Mazmure 132 - Geeshsha Maxaafa

Xoossay Xiyoone Dooris

Pudethe keyishe yexiya mazmure

¹ Godaw, Dawitanne I danda7ida metuwa ubbaa qopa.

² Godaas I caaqidaysa, wolqaama gidida Yayqooba Xoossaas, I odidaysa hassaya.

^3-5 Godaas besse giigisana gakanaw, Wolqaama gidida Yayqooba Xoossaas, keethe keexana gakanaw, ta soo gelike; ta hiixan zin7ike. Ta ayfey qilim7enna, woyko tana dhiskoy ekenna.

⁶ Nuuni Taabotiyabaa Efraatan si7ida; Yi7aarime biittan iya demmida.

⁷ “Ane I de7iya bessaa boos; iya tohoy yedhiya bessan iya goyinnoos.”

⁸ Godaw, denda! Ne minotethaa malla gidida ne Taabotiyara ne keethaa gela.

⁹ Ne kahineti xillotethi ma7o; ne asay ufaysan yexo.

¹⁰ Ne aylliya Dawita gisho, neeni tiyida kawa aggofa.

¹¹ Goday Dawitas laametonna caaqo haysada yaagidi caaqis; “Ne gulbatape keyida, ne naytape issuwa ne araatan utisana.

¹² Ne nayti ta caaquwanne ta tamaarsiya timirtiya naagiko, enta nayti ne araatan merinaw uttana” yaagis.

¹³ Goday Xiyoone dooris; baw de7iya bessi oothanaw amotidi, haysada yaagis;

¹⁴ “Haysi ta merinaw de7iya besse; taani amotida gisho haysan daana.

¹⁵ Taani daro kathi immada Xiyoone anjana; iyan de7iya manqotaka kathi kalsana.

¹⁶ Iyan de7iya kahineta atotethi mayzana; iyan de7iya xilloti ufaysan yexana.

¹⁷ He bessan Dawita zeriyape kawo kessana; taani tiyida kawa kawotethan gam7isana.

¹⁸ Taani iya morketa yeella mayzana; shin iya huuphen de7iya kallachay phoolana” yaagas.