Leemiso 1 - Geeshsha Maxaafa

Leemiso Go77a

¹ Haysati Isra7eele kawa Dawita na7aa Solomone leemisota.

² Leemisoti asay cincatethi, seeranne era haasaya akeekanaw maaddoosona.

³ Enti cincatethi, xillotethi, suure pirdinne suure wozani daana mela tamaarsoosona.

⁴ Eeyatas akeeka immees; na7atethatas eratethinne kahaamatethi immees.

⁵ Cincati ha leemisota si7idi, era gujoosona; akeekanchoti lo77o zore ekoosona.

⁶ Hessan leemisotanne enta birshethaa, cincatetha odaanne enta qan7isheta akeekanaw danda7etees.

⁷ Godaas yashshi cincatethas doomethi; shin eeyati cincatethinne seera kadhoosona.

Cincatethi New Miishe Ootha

⁸ Ta na7aw, ne aawa zoriya si7a; ne aaye timirtiya kadhopa.

⁹ Hessi ne huuphiyas boncho kallacha; ne qoodhiyas gozda gidana.

¹⁰ Ta na7aw, nena nagaranchoti cimmiko ero goopa.

¹¹ Enti, “Nuura yedha; ase wodhanaw hokidi naagoos; xillota wodhanaw qosetoos.

¹² Si7ooley mitteysada nuka enta paxa mittoos; nu enta ollan yegetiya asada oothana.

¹³ Nuuni al7o miishe ubbaa demmana; nu keethaa bonqe miishen kunthana.

¹⁴ Nuura laggeta; nu demmidaba issife shaaketana” yaagana.

¹⁵ Ta na7aw, entara hemetofa; enta ogiyara baanaw ne tohuwa denthofa.

¹⁶ Enti iitabaa oothanaw woxoosona; asa suuthi gussanaw yaa haa goosona.

¹⁷ Kafoy xeellishin, iya oykanaw gite yegethi maaddenna.

¹⁸ Shin enti banta suuthi gussanaw hokosona; banta shempuwa wodhanaw qosetoosona.

¹⁹ Genen go77a demmiya asa wursethi hessa mela; enti shiishida shaloy enta shempuwa ekees.

Cincatethi Xeegees

²⁰ Cincatethi daggala bolla eqada xeegawusu; dabaaban ba qaala dhoqu oothada sissawusu.

²¹ Cincatethi asi shiiqiya bessan eqada xeegawusu; katamaa geliya pengen eqada haysada yaagawusu.

²² “Hinteno, akeeki pacidaysato, hinte awude gakanaw eeya gididi daanee? Qelqiseysato, awude gakanaw ufaytanee? Eeyato, awude gakanaw eratethi ixanee?

²³ Ta seera hinte si7idaba gidiyako, taani ta eraa hinte bolla gussana; ta qaalaka hintena tamaarsana.

²⁴ Shin ta xeegida wode hinte koyonna ixida gisho; taani kushe miccin oonika akeekibona gisho;

²⁵ Ta zoriya hinte kadhida gisho; ta seeraka ekiboonna gisho;

²⁶ Hintena metoy gakiya wode ta miicana; hinte dagaman kokoriya wode ta qelqisana.

²⁷ Gadoy uushoda hinte bolla yaa wode, metoy goteda hinte bolla eqiya wode, un7inne waayey hinte bolla gakiya wode, taani hintena qelqisana.

²⁸ “He wode enti tana xeegana; shin ta koyke; enti tana minthidi koyana; shin demmokona.

²⁹ Enti eratethi ixida gisho; Godaa yashshi dooriboonna gisho,

³⁰ Ta zoriya ekiboonna gisho; ta seera kadhida gisho;

³¹ Enti banta oosuwa ayfiya maana; banta qofaa ayfiya kallana.

³² Akeeki pacidaysata cincatethafe haakeysi wodhees; eeyata qelli guussi dhaysees.

³³ Shin ta odiyaba si7iya ubbay saro daana; meto hirgafeka shempana.”