Hose 1 - Geeshsha Maxaafa

¹ Ooziyani, Iyo7atami, Akaazinne Hizqiyaasi kaalli kaalli Yihudan kawotida wode qassi Yo7aasa na7ay Iyorbaami Isra7eelen kawotida wode Bi7eera na7aa Hoseko yida Godaa qaalay haysa.

Hose Machiwnne Iya Nayta

² Goday koyro Hose baggara odida wode “Ta asay taape haakidi iita laymatethi oothida gisho, neeni bada, layma maccas ekada layma nayta iipe yela” yaagis.

³ Hessa gisho, Hosey bidi, Dibilayma na7iw Gomero ekin, iya qanthatada adde na7a yelasu.

⁴ Yaatin, Goday Hoseko ne na7a suntha, “Izra7eele” (laallana woyko zerana) yaagada suntha. Ayis giiko, Izra7eelen gukida suuthaa gisho taani Iyyu kochaa qantha woden pirdana; Isra7eele kawotethaaka dhaysana.

⁵ He gallas taani Izra7eela zangaaran Isra7eele olanchota mentherethana.

⁶ Gomera nam7antho qanthatada, macca na7a yelasu. Yaatin, Goday Hoseko, “I suntha Loruhaama (Maarotethi demmonaaro) yaagada suntha. Ayis giiko, hizape guye taani Isra7eele asas qadhetike; entaw atto giike.

⁷ Shin taani Yihuda asaas qadhetana; taani enta dongen woyko mashshan woyko olan woyko paratan woyko para asatan gidonashin, taani Goday, enta Xoossay, ta wolqan enta ashshana” yaagis.

⁸ Gomera Loruhaamo dhanthi duuthidaape guye qanthatada hara adde na7a yelasu.

⁹ Yaatin, Goday Hoseko, “Iya sunthaa Lo7aama (Ta ase gidenna) yaagada suntha. Ayis giiko, hinte ta ase gideketa; taka hinte Xoosse gidike.

¹⁰ “Gidoshin, Isra7eele asay makanawunne taybanaw danda7etonna abba shafiya mela gidana. Enti, ‘Hinte ta ase gideketa’ geetetidi xeegetida bessan hinte ‘De7o Xoossaa nayta’ geetetana.

¹¹ Yihuda asaynne Isra7eele asay issife shiiqidi bantaw issi halaqa dooridi di7etida biittafe simmananne injetidi daana. He gallasay Izra7eeles gita gallas gidana.