Daanela 3 - ጌሻ ማፃፋ

ዎርቃ ምስለነ እቶነ ታማ

¹ ካዎይ ናቡካዳናፆር አዱሳተይ ኡሱፑን ታሙ ዋ፥ ጎምፓይ ኡሱፑን ዋ ግድያ ምስለ ዎርቃፈ መድ፥ ባብሎነ ቢታን ዱራ ደምባን ኤስስ።

² ሄ ምስልያ አንጅሳናዉ ያና መላ፥ ካዎ ሞርናታ፥ ሹማታ፥ ቢታ አይሰይሳታ፥ ካዋ ዞረይሳታ፥ ሚሸ ኬን ኦይሳታ፥ ፕርዳ ዳይናታ፥ ህገ ኤራንቾታነ አዉራጃ ሹማታ ፄግስ።

³ ሄ ዎደ ካዎ ሞርናት፥ ሹማት፥ ቢታ አይሰይሳት፥ ካዋ ዞረይሳት፥ ሚሸ ኬን ኦይሳት፥ ፕርዳ ዳይናት፥ ህገ ኤራንቾትነ አዉራጃ ሹማት ሺቅድ፥ ካዎይ ናቡካዳናፆር ኤስዳ ምስልያ ስንን ኤቅዶሶና።

⁴ ሄ ዎደ አዋጅያ አደይ ባ ቃላ ቁ ኦድ፥ ሀይሳዳ ያግስ፦ “ህንተኖ፥ አሳዉ፥ ካዎተቶ፥ ዱማ ዱማ ዶና ኦደተይሳቶ፥

⁵ ኡባይ ሞይዘ፥ ሱሱልኤ፥ ማስንቆ፥ ዲ፥ ዛየነ ሀራ የ ሚሸ ግርስ ስእያ ዎደ፥ ካዎይ ናቡካዳናፆር ኤስዳ ዎርቃ ምስልያስ ጉፋንድ ጎይንተ።

⁶ ምስልያ ስንን ጉፋንድ ጎይኖና ኦንካ፥ ሄ ሳትያን ኤፅያ እቶነ ታማን ሆለታና” ያግስ።

⁷ ሄሳ ግሾ፥ አሳይ፥ ካዎተትነ ዱማ ዱማ ዶና ኦደትያ ኡባይ ሞይዘ፥ ሱሱልኤ፥ ማስንቆ፥ ዲ፥ ዛየነ ሀራ የ ሚሸ ግርስ ስእዳ ዎደ ቢታን ጉፋንድ፥ ካዎይ ናቡካዳናፆር ኤስዳ ዎርቃ ምስልያስ ጎይንዶሶና።

⁸ ሄ ዎደ ባብሎነ አሳታፐ እሶት እሶት አይሁደታ ሞትዶሶና።

⁹ ኤንቲ ካዋ ናቡካዳናፆራኮ ሀይሳዳ ያግዶሶና፤ “ካዋዉ፥ መርናዉ ካዎታ።

¹⁰ ካዋዉ፥ ነ ሞይዘ፥ ሱሱልኤ፥ ማስንቆ፥ ዲ፥ ዛየነ ሀራ የ ሚሸ ግርስ ስእያ ኦንካ ጉፋንድ፥ ዎርቃ ምስልያስ ጎይናና መላ፥

¹¹ ቢታን ጉፋንድ ጎይኖና አስ ደእኮ፥ እቶነ ታማን ሆለታና መላ አዋጆ ከሳዳሳ።

¹² ሽን ካዋዉ፥ ኔኒ ባብሎነ ቢታን ሹምዳ አይሁደት፥ ስድራቅ፥ ምሳቅነ አብዳናጎይ ነ ኪታ እፅዶሶና። ነ ፆሳታስ ኦኮና፤ ቃስ ነ ኤስዳ ዎርቃ ምስልያካ ጎይኖኮና” ያግዶሶና።

¹³ ናቡካዳናፆር ሄሳ ስእዳ ዎደ፥ ይሎ ኤፅድ፥ ስድራቃ፥ ምሳቃነ አብዳናጎ ኤሀና መላ ኪትስ፤ ኤንታ ካዋ ስን ኤህዶሶና።

¹⁴ ናቡካዳናፆር ኤንታ ሀይሳዳ ያግስ፦ “ስድራቃ፥ ምሳቃ፥ አብዳናጎ፥ ህንተ ታ ፆሳታስ ኦቦናይስነ ታ ኤስዳ ዎርቃ ምስልያ ጎይንቦናይስ ቱሜ?

¹⁵ ሀእ ሞይዘ፥ ሱሱልኤ፥ ማስንቆ፥ ዲ፥ ዛየነ ሀራ የ ሚሸ ግርስ ስእያ ዎደ ታ ኤስዳ ምስልያስ ጉፋንድ ጎይንኮ ሎኦ። ሽን ህንተ ጎይኖና እፅኮ፥ ኤለስድ ኤፅያ እቶነ ታማን ሆለታና። አይ ፆስካ ህንተና ታ ኩሸፐ አሸና” ያግስ።

¹⁶ ስድራቅ፥ ምሳቅነ አብዳናጎይ ዛሪድ፥ “ካዋዉ፥ ናቡካዳናፆራ፥ ሀይሳስ ኑ ነዉ ዛሮ እማናዉ በሰና።

¹⁷ ካዋዉ፥ ኑ ኤፅያ እቶነ ታማን ሆለትያኮካ፥ ኑ እያዉ ኦያ ፆሳይ ታማፐ ኑና አሻናዉ ዳንዳኤስ። ቃስ ካዋዉ፥ እ ኑና ነ ኩሸፐ አሻና።

¹⁸ ሽን ካዋዉ፥ እ ኑና አሾና እፅኮካ፥ ኑኒ ነ ፆሳታስ ኦናይሳነ ነ ኤስዳ ዎርቃ ምስልያ ጎይናናይሳ ኤራ” ያግዶሶና።

¹⁹ ሄ ዎደ ናቡካዳናፆር ስድራቃ፥ ምሳቃነ አብዳናጎ ቦላ ይሎ ኤፅን፥ እያ ሶምኦይ ላመትስ። ታማይ ካሰ ኤፀይሳፈ ላፑን ኩሸ አድ ኤፃና መላ ኪትስ።

²⁰ ስድራቃ፥ ምሳቃነ አብዳናጎ ቃችድ፥ ኤፅያ እቶነ ታማን ሆላና መላ፥ ባ ኦላንቾታ ግዶፈ ምኖ አሳታ ኪትስ።

²¹ ኤንቲ ባንታ አፍላራ፥ ሱርያራ፥ ሁጰ ፃራነ ሀራ ማኦ ኡባራ ደእሽን፥ ኤፅያ እቶነ ታማን ሆልዶሶና።

²² ካዋ ኪታይ ዳሮ ኤሶ ግድዳ ግሾነ እቶነ ታማይ ካሰፐ አድ ኤፅያ ግሾ፥ ስድራቃ፥ ምሳቃነ፥ አብዳናጎ ታማን ሆልዳ፥ ምኖ አሳታ ታማ ላጮይ ዎስ።

²³ ሀ ሄ ቃሸትዳ አሳት፥ ስድራቅ፥ ምሳቅነ አብዳናጎይ፥ ኤፅያ እቶነ ታማን ዎዶሶና።

²⁴ ሄሳፈ ጉየ፥ ካዎይ ናቡካዳናፆር ማላለትድ፥ ኤሶን ደንድ ኤቅድ፥ “ኑ ቃችድ ኤፅያ እቶነ ታማን የግዳ አሳት ሄ ግዶኮናዬ?” ያግድ ባና ዞረይሳታ ኦይችስ። ኤንቲ፥ “ካዋዉ፥ ኤ፥ ቱማ ሄ” ያግድ ዛርዶሶና።

²⁵ ካዎይ ዛሪድ፥ “ቃሾፐ ብርሸትድ፥ ታማ ግዶን ያነ ሃነ ሄመትያ፥ ታማይ አይኮካ ቦቾና ኦይዱ አሳታ በአይስ፤ ኦይዳንይ ፆሳታ ናአ ዳኔስ” ያግስ።

²⁶ ናቡካዳናፆር ኤፅያ እቶነ ታማ ማታ ሺቅድ፥ ባ ቃላ ቁ ኦድ፥ “ኡባፈ ቃ ፆሳ ኦሳንቾቶ፥ ስድራቃ፥ ምሳቃ፥ አብዳናጎ፥ ከይድ ሃ ዪተ!” ያግድ ፄግስ። ስድራቅ፥ ምሳቅነ አብዳናጎይ ታማ ግዶፈ ከይዶሶና።

²⁷ ካዉዋፐ ጋርሳራ ቢታ አይሰይሳት፥ ሞርናት፥ ሹማትነ ካዋ ዞረይሳት ኤንታኮ ሺቅዶሶና። ታማይ ኤንታ አሳተ ቦችቦናይሳ፥ ኤንታ ሁጰ ብናናፐ እሶይካ ፁገትቦናይሳ፥ ኤንታ ማኦይካ ሜተትቦናይሳነ ታማ ፔኖይ ኤንታ ቦላ ባይናይሳ በእዶሶና።

²⁸ ሄሳፈ ጉየ፥ ናቡካዳናፆር ሀይሳዳ ያግስ፦ “ስድራቃ፥ ምሳቃነ አብዳናጎ ፆሳይ ጋላተቶ። እ፥ ባ ኪታንቹዋ ኪትድ፥ ባናን አማነትዳ፥ ባ አይለታ አሽስ። ኤንቲ ካዋ ኪታ እፅድ፥ ባንታ ፆሳፈ አትሽን፥ ሀራ ፆሰ ጎይናናፐ ሀይቃናዉ ዶስዶሶና።

²⁹ ሄሳ ግሾ፥ ሀራ አይ ፆስካ ሀይሳዳ ኦድ አሰ አሾና ግሾ፥ ስድራቃ፥ ምሳቃነ አብዳናጎ ፆሳ ቶችድ ኦደትያ አይ አስካ፥ ዎይኮ አይ ካዎተካ፥ ዎይኮ ዱማ ዱማ ዶናን ኦደትያ አይ ኮቻይካ ቃንፀታና መላ ኤንታ ኬይካ ላለትድ፥ ፕቶ ዶረ ግዳና መላ ታኒ ኪታስ” ያግስ።

³⁰ ካዎይ ስድራቃ፥ ምሳቃነ አብዳናጎ ባብሎነ ቢታን ቁ ቁ ኦድ ሹምስ።