Gɨye-lɔɔ 15 - Gabri Maja

Dayaŋ gɨ a Jerusalɛm

¹ Ɨni na, kalaŋ ga pɨna wo̰ saygage a cay gɨsəŋ ga Jude gaŋ, ɨrgage gɨlɨn̰ge ka-karme ga a Antɨyɔs kɔl, yege hɨn̰: «Hɨn̰ gɨ kɨŋ na ɗa gɨ kan na walagɨŋ ban̰a dan̰ gɨyəŋ gɨ da gasɨn̰-kɔl gɨ da Moyis naŋ na, Kumu kɨya poɗɨgɨŋ naŋ bɨrɨŋ.»

² Kardi kɔl gɨ nee le na, tumɔ di ɓalɨn̰a naŋ say woy bɨ, Pol dan̰ Barnabas man̰ge kɔl dan̰ kalaŋ ga nee le ɨl pɨvb ojɨn̰ cay kɔl gɨ nee le. Ɨni na, kalaŋ ayge noyge gɨ Pol bɨ, Barnabas bɨ, kalaŋ ga pɨna wo̰ ga Antɨyɔs bɨ, na ɨrage a cay ƴaa-di-gumu di Jerusalɛm dɨŋ, yage koldi bɨn̰ ka-gɨre-gɨye ga da Jesu bɨ, kan ga muɗoldoŋ bɨ.

³ Ɨni na, Ka-Daye ga a Antɨyɔs bɨge hɨnga ga ni orɨn̰ tɨrga toge le kobɨge. Kan dorge kol bɨle gɨ kalaŋ ga toyge na Jubɨ naŋ, ba bɨlɨn̰ge gɨye-lɔɔdɨge, daa daa gan̰ge cay gɨsəŋ ga Pinisi bɨ, Samari bɨ, orɨn̰ge. Kɔl gɨ nee le bɨn̰ ka-karme nɔm gusi-mɔwa tɔgɨ.

⁴ Kɨɗɨn̰ ga kan bugoŋge a cay ƴaa-di-gumu di Jerusalɛm dɨŋ ɨni na, Ka-Daye bɨ, ka-gɨre-gɨye bɨ, kan ga muɗoldoŋ bɨ, ƴomgege gusɨge. Bɨ kan dor kol hɨnga nɔm ga Kumu ba lee dan̰ gɨyəŋ koge le, dɨbɨge sɨmayge.

⁵ Ama ka-aye kudurɔ ga pɨna wo̰ ga ka-kɔbɛ kardi hɨnga gɨle ga da Parɨsɨn̰an̰əŋ sayge daa kɨɗɨn̰ dayaŋ gaŋ le yege hɨn̰: «Ka-aye kudurɔ ga na Jubɨ naŋ le, naa wa wa kalɨn̰ ma ojɨ gɨ kan walage ban̰a. Bɨ ojɨ gɨ ni na aya noyni bɨge ɗe kan na kɨba te gasɨn̰-kɔl gɨ da Moyis bɨ.»

⁶ Ka-gɨre-gɨye bɨ, kan ga muɗoldoŋ bɨ, dayge cayge kɨya kobɨn̰ te kɔl gɨ nee le sɔlɛ.

⁷ Kɨɗɨn̰ ga kan man̰ge kɔl ɨl pɨvb ɨni na, Pɨyɛr say daa duroyge bɨ yege hɨn̰: «Karmɨnɨ, kɨŋ sol gɨ Kumu dɔrɔŋ karɨnɨ sɨngɨɗɨ cay wase duroygɨŋ bɨ, gɨyəŋ gusi kalaŋ ga toyge na Jubɨ naŋ, ɗe gɨ kan na jan̰ bɛrnɛ di da Kɔl-gɨ-Ɗari gɨ kɨya andaŋ kɨbɨnɨ bɨ, bɨgan̰ge kuduroyge cay nee.

⁸ Ɨni na, Kumu gɨ ba sɔlɛ kuduroy kalaŋ le, lee tɨmon̰ kol cayge. Na toy di hɨn̰ wo̰ ma ban bɨge Turnɔ ɗe-kuduroy-bɛrɛ, hɨn̰ gɨ ban ba bɨna na-gandi wo̰ bɨ.

⁹ Duroyge kan bɨ, ni-gandi bɨ le Kumu dɨra cɨn̰ ungo naŋ. Kɨya wa na dan̰ gɨyəŋ gɨ da aye kudurɔ ma kan pɨl kuduroyge ɗe duroŋ mɨra.

¹⁰ Hɨn̰ wo̰ na, na kɨya wa ma magɨŋ cɨbɨ cɨn̰ Kumu haw kɛ ga? Hɨnga ga nɨn̰i ga mon̰inagɨŋ wala na-gandi kalɨn̰ ma, na ɓalagɨŋ aye naŋ le, kɛ na mɨna ma mana gɨ aye se a cay ka-aye-cay-tɨbay Jesu ga?

¹¹ Na solgɨŋ leen̰ cɨndi, gɨ na kɨya cay ɗarwa di da Ba-gulɔŋ Jesu le ma, mana wan̰gɨŋ pɔɗɛ hɨn̰ gɨ kan ba wan̰ wo̰ bɨ.»

¹² Kɨɗɨn̰di ga nee gaŋ le, kalaŋ nɔm ga ba dayaŋge le somge sɨndɨŋ bɨ, jen̰ge kɔl gɨ a kɨbɨ Pol bɨ Barnabas bɨ. Kan dorge te kol hɨnga nɔm ga ɗɨn̰ cɨn̰-kɨɗɨn̰ bɨ, hɨnga ga ni beli nɔm bɨ ga Kumu ba lee dan̰ gɨyəŋ koge duroy kalaŋ ga toyge na Jubɨ naŋ le.

¹³ Kɨɗɨn̰ ga kan dɨɗɨge kɨbɨ kɔl koge ɨni na, Jag ay kɔl bɨ yege hɨn̰: «Karmɨnɨ, jagɨŋ kɔl hɨnge!

¹⁴ Simo ba yeni gaŋ kɛ ayɨn̰ a toy dɨŋ le, Kumu ojɨ tɔrɛ duroy kalaŋ ga toyge na Jubɨ naŋ ɗe gɨ kan na bɨləŋge kalaŋ kayi.

¹⁵ Kɔl gɨ da ka-yɔɔ-kɔl-gɨ-Kumu-ba-yɔɔ le bugoŋ pɨna dan̰ hɨnga ga nee le, kɨya wa kan walge yege hɨn̰:

¹⁶ “Kardi hɨnga nɔm ga nee le na, Ɨŋ-bandi Ba-gulɔŋ ba kɨya jɨga, Kɨya cay ƴaa di da Dabid di ba dusoŋ le, Ɨŋ kɨya jɨga kɨya gaɗe ɗaŋ bɨ, Kɨɗɨn̰do ga ba jɨdɨrdaŋ dugo le, Ɨŋ kɨya jɨga n̰ane ɗɔɔ daa bɨ. Kɨɗɨn̰do ga dusdoŋ le Ɨŋ kɨya jɨga ɗɔɔ daa ban̰di nee bɨ.

¹⁷ Kɨɗɨn̰di ga nee gaŋ le, Kalaŋ toyge ga ba baa kɨya malege Ba-gulɔŋ, Pɨna dan̰ te wɔɔ gɨ da kalaŋ nɔm ga gusonɨ ye cayge le.

¹⁸ Sɨlagɨŋ kɔl gɨ Ba-gulɔŋ ba ye le ba kɔ. Hɨnga ga ban ba lee haw kɛ le, Na hɨnga ga ban ƴom cay tɨbayge na jɨne hage.”»

¹⁹ Jag ye kɔl koyi orɨn̰ cɨndi tumɔ ye hɨn̰: «Naa hɨn̰ wo̰ na, ɨŋ-bandi Jag, ɨŋ gey gɨ kalaŋ ga toyge na Jubɨ naŋ ga ba bɨlege gɨye-lɔɔdɨge bɨn̰ Kumu le, ungo gɨ jogdɨge dan̰ hɨnga nɔm ga kɨya narge ɔrɛ tumɔ naŋ ɨni.

²⁰ Ama kuɗa gɨ na gɨn̰gɨŋ dan̰ magtubu bɨge, narge dɔɔ kuyoŋ ga mɨdagi ga na kuyoŋ ga kan dɨɗɨge n̰ɨrɨn̰ge kulan̰əŋ bɨ, narge cay yɔyɛ dan̰ gangɨ cayge bɨ, dɔɔ kuyoŋ ga asɨri bɨ, dɔɔ kɨbar bɨ.

²¹ Kɨya wa ay toy na jɨne hayi bɨrɨŋ andɨn̰ haw kɛ, gɨ Moyis orɨn̰ dan̰ kalaŋ ka-tɔgɛ bɛrnɛ gasɨn̰-kɔl koyi duroy cay ƴaan̰əŋ ga gɨmdəŋ gaŋ pɨna pɨna bɨ, kan ɗongɨsɨn̰ge gasɨn̰-kɔl koyi boy ƴaa-daye-di-da-Jubɨn̰əŋ dɨŋ, dan̰ wɔlɛ dɔrɛ gɨlale nɔm bɨ.»

Magtubu di kan wal bɨn̰ ka-aye kudurɔ

²² Kɨɗɨn̰di ga nee gaŋ le, ka-gɨre-gɨye bɨ, kan ga muɗoldoŋ bɨ, Ka-Daye nɔm bɨ, ojɨge tɔrɛ kalaŋ ga pɨna duroyge kɨya gɨyge a Antɨyɔs, pɨna dan̰ Pol bɨ Barnabas bɨ. Kan dorge Jud gɨ teeyige Barsabas le bɨ, Sɨlas bɨ. Kan na kalaŋ ga duroy ka-dɔrɛ tumoy ka-aye kudurɔ ga somge a cay ƴaa-di-gumu di Jerusalɛm dɨŋ.

²³ Kan say walge magtubu bɨge kobɨge. Walge boy nee yege hɨn̰: «Ka-gɨre-gɨye bɨ, ga muɗoldoŋ bɨ, kan ga na karmɨgɨŋ bɨ, leen̰ge karmɨge ga na te kalaŋ ga toyge na Jubɨ naŋ ga somge a Antɨyɔs cay gɨsəŋ ga Siri gaŋ bɨ, Sɨlisi gaŋ bɨ le lapɨya.

²⁴ Ni je gɨ kalaŋ ga pɨna wo̰, na sayge duroyni kɛ orge mɔndɛ kuduroygɨŋ bɨ, dorge turnoygɨŋ bɨ, dan̰ kɔl yɔɔdɨge. Ama kalaŋ ga nee le, na ni ba-aye noyni bɨge ojɨn̰ cay kɔl gɨ nee le naŋ bɨrɨŋ.

²⁵ Na toy di hɨn̰ wo̰ ma, mani bee noyni pɨna, torɨn̰ kalaŋ kɨya gɨyge gusɨgɨŋ. Kan kɨya bɔgɛ Barnabas dan̰ Pol ga na ka-pogɨn̰ini ga ni ɗege jam cɨndɨni gaŋ.

²⁶ Kan na kalaŋ ga ay gusɨge dɨbɨ coŋ kɨya cay guson̰ Ba-gulondɨni Jesu-Kɨris.

²⁷ Na toy di hɨn̰ wo̰ ma, mani gɨy Jud bɨ, Sɨlas bɨ, ɗe gɨ kan na ɨra yagɨŋ kɔl nɔm gɨ ni ba wal le, dan̰ kɨbɨge nee coŋ.

²⁸ Kɨya wa Turnɔ ɗe-kuduroy-bɛrɛ bɨ, ni-gandi gusɨni bɨ le, ni gey se hɨnga ga nɨn̰i ga ɗaŋ caygɨŋ naŋ. Ama na hɨnga nɔm ga ba kɛ le, ma naa wa wa kalɨn̰ ma, ojɨ gɨ ni lɔɔ.

²⁹ Kuyoŋ gɨ kan dɨɗɨge n̰ɨrɨn̰ge kulan̰əŋ le, kɨŋ ɗɔɔ ba dɔɔ bɨ, kɨŋ ɗɔɔ ba dɔɔ kɨbar bɨ, culom gɨ da kɨmana gɨ asɨri bɨ, kɨŋ ɗɔɔ ba yɔyɛ dan̰ gangɨ caygɨŋ naŋ bɨ. Hɨn̰ gɨ kɨŋ na nara gusɨgɨŋ coŋ cay hɨnga nɔm ga nee le na, kɨŋ lee na hɨnga ga kuɗa. Ni leegɨŋ lapɨya.»

^30-31 Kɨɗɨn̰di ga nee gaŋ le, kan ɗe kan ga kan ba gɨyge le orge. Bɨ kɨɗɨn̰ ga kan or bugoŋ a Antɨyɔs na, kan dayge cay ka-aye kudurɔ pɨna bɨ, bɨgege magtubu le ɨni na, kɨɗɨn̰ ga kan ɗongɨsu na, kɔl gɨ a boy nee le bɨn̰ kalaŋ nɔm tɔgɨ, lee gɨ gusi kalaŋ nɔm mooge tɔgɨ bɨ.

³² Jud bɨ, Sɨlas bɨ, na ka-yɔɔ-kɔl-gɨ-Kumu-ba-yɔɔ. Kan kalɨn̰ ma yege kɔl tɔgɨ bɨ, dobɨge bandɨ kuduroyge bɨ, bɨgege tɔgɨ bɨ.

³³ Kan leege wɔlɛ ɓal kɔl a boy cay ƴaa di Antɨyɔs dɨŋ pa dɨm ma, kardi nee ka-aye kudurɔ ɗege jogɨge gusi kan ga ka-gɨyge le dan̰ gusi-dɔbɛ ƴee.

³⁴ [Ama Sɨlas na, ojɨ bɔɔ dugo a Antɨyɔs bɨ, na Jud ba jɔgɛ kan̰di hay a Jerusalɛm.]

³⁵ Pol dan̰ Barnabas baage dugo a Antɨyɔs. Dan̰ kalaŋ ga ɗaŋ dan̰ kondɨwayge danage gɨlɨn̰ge kalaŋ kɔl bɨ, teen̰ge bɛrnɛ Kɔl-gɨ-Ɗari gɨ da Ba-gulɔŋ bɨ.

Pol ɗe Barnabas coŋ

³⁶ Wɔlɛ dḛ kardi nee ɨni na, Pol yen̰ Barnabas hɨn̰: «Kuɗa gɨ na jogɨ sɔbɨrɛ karmɨna ga a boy cay ƴaa ga gɨmdəŋ gaŋ nɔm ga na ba teen̰ bɛrnɛ kɔl gɨ da Ba-gulɔŋ boy nee le. Ana solɨn̰ kɛ, kan bee kuduroyge cay Kumu ban̰ nee hage ga?»

³⁷ Barnabas gey aye Ja̰ gɨ tɨrɨmbalay na Marg le, ɗe na or danage bɨ.

³⁸ Ama Pol gey gɨ Marg na gɨ ɔrɛ danage naŋ, kɨya wa ban na ungo gɨ tumɔ ɗege coŋ, a cay gɨsəŋ ga Pampili gaŋ bɨ, bɨgage a kɨɗɨn̰ gɨye koge gɨŋ naŋ bɨ.

³⁹ Kan̰e kɔl kɨbɨ gusɨge le say osɨ tɔgɨ lee gɨ kan cudroŋge daa. Bɨ ɨni na Barnabas say ay Marg danayi orɨn̰ge nan̰ge koburo gɨ gumu taa taa gɨŋ, orɨn̰ge cɨndɨge jɨn̰ cay ƴaa di Sɨpɨr dɨŋ bɨ,

⁴⁰ Pol say ay koyi Sɨlas bɨ. Kɨɗɨn̰ ga ka-aye kudurɔ beegege kobɨ Ba-gulɔŋ ɗe gɨ ban na laa ɗarwa danage ɨni na, Pol ay gɨyəŋ koyi bɨ.

⁴¹ Pol gɔdɨrde cay gɨsəŋ ga Siri gaŋ bɨ, ga Sɨlisi gaŋ bɨ. Dobɨn̰ bandɨ kuduroy Ka-Daye gaŋ ɗe gɨ kan na ɨrɨn̰ge usa a cay aye kudurɔ koge gɨŋ bɨ.