Salmos 78 - Biblia Enxet

Aqsok apkelánesso axta Dios énxet'ák apagkok

¹ Énxet'ák ahagkok, kóleyxho nélxekmowásamáxche ahagkok; ¡kóltaqmelchesho kélháxenmo sekpeywa!

² Altennaksek sa' ko'o kéxegke aqsok sekyetcháseykekxoho; axének sa' ma'a aqsok eyápomáxko nak kólya'asagkoho', eyeynamo m'a nano' axta.

³ Aqsok nenlegaya axta, tén han negya'áseykegkoho nak, sẽltennáseykha axta chá'a m'a ẽlyapmeyk nano',

⁴ óltennasha sa' chá'a m'a egketchek. Óltennasha sa' chá'a kaxwe nak apmáheyo elántépekxak egmonye', ektémakxa ekyawe apmopwána Wesse' egegkok, tén han aqsok sempelakkasso nak agwetak apkelane.

⁵ Apméssegkek axta segánamakxa Dios ma'a Jacob; appekkenchessegkek axta han apkeltémókxa chá'a etnahagkok ma'a Israel, apkeltémók axta han elxekmósek aptawán'ák neptámen ma'a ẽlyapmeyk nano' nak,

⁶ yaqwayam enxoho elya'asagkohok ma'a peya nak elántépekxak makham egmonye', cham'a apketchek mepalleykmo nak makham, yaqwayam enxoho han elxekmósek apketchek ma'a;

⁷ yaqwayam enxoho etnahagkok apkeláyo m'a Dios, tén han megkalwagqamagkehek ma'a aqsok apkelane axta; yaqwayam enxoho elyahakxohok han ma'a apkeltémókxa nak antéhek,

⁸ metnahagkek ma'a aptamheykegkaxa axta apyapmeyk nano', élyennaqte apkelwáxok, tén han élyeyháxma, ekmanyehe eyaqmagkasek mók élchetamso apkelwáxok, ¡énxet'ák apkelyenseyam nak apkelyetleykha Dios!

⁹ Apkenyaheykegkek axta apkeltaqhémo neptámen ma'a Efraín énxet'ák apagkok, yetlo yágke apagkok, tén han sawhéwa, cham'a émpakhamaxko axta;

¹⁰ axta eláneykegkok ma'a aphéssamo axta mók apkelpaqhetchásamákpoho m'a Dios, axta han elyeheykekxak ma'a nélxekmowásamáxche apagkok.

¹¹ Kelwagqámeykegkek axta m'a aqsok apkelane axta chá'a, cham'a aqsok sempelakkasso nak agweta' apxekmósso axta chá'a.

¹² Apkeláneyak axta chá'a aqsok sempelakkasso agwetak Dios nápaqta'awók apyapmeyk nano' ma'a yókxexma Soan, ekpayho nak Egipto:

¹³ apmeykáseykekxeyk axta neyseksa wátsam ekwányam, apkelyeykháseykekxeyk axta m'a, máxa axta kélhaxtegkesso tegma apteméssessók apmeykegko yegmen.

¹⁴ Yaphope axta chá'a apxegkessessók apmonye'e ekhem, keñe axta chá'a axta'a táxa eyápogwate.

¹⁵ Appáxqatmeyk axta han neyseksa meteymog meykexa nak énxet, tén axta apméssama ekyawe agko' yegmen yaqwayam énagkok, eñama m'a kañók agko' xapop.

¹⁶ ¡Aptekkessegkek axta yegmen Dios ma'a meteymog, yegmen ényé ekyennaqte!

¹⁷ Apkellenxanmeykegkók axta eyke aqsa apkeláneyak melya'assáxma nápaqtók Dios; apkelenmexeykekxeyk axta Dios Meyke nak Ekhémo m'a yókxexma meykexa nak énxet.

¹⁸ Apmáheyók axta épkeynek Dios apkelmaxneyeykencha'a aqsa chá'a m'a aptéyak.

¹⁹ Axta etnehek chá'a elpaqmésmakha ekmaso exének se'e: “¿Apwancheya hegagkok nento Dios yókxexma meykexa nak énxet?

²⁰ Naqsók axta appáxqatma Dios neyseksa meteymog, keñe han ekteyapma yegmen ma'a, ektémól'a wátsam, tén han ekpayheykekxo yegmen ma'a xapop; ¿apwancheya han hegmések nento m'a? ¿apwancheya han egkések ápetek ma'a énxet'ák apagkok?”

²¹ Xama axta aplegaya Wesse' egegkok xa, aplamchek axta; ¡máxa táxa axta temék aplo, aptaqnagkamchek axta m'a Jacob!

²² Hakte axta eláyók ma'a Dios, apkelya'ásseykmek axta apmopwána epasmok.

²³ Appaqhetchessegkek axta Dios yaphope m'a aphamakxa nak néten, apkelmeykásekxeyk axta atña'ák ma'a néten;

²⁴ ¡appalchessásenteyk axta énxet'ák apagkok ma'a maná, hótáhap apkeñama nak néten, yaqwayam etawagkok!

²⁵ ¡Apteykegkek axta énxet'ák ma'a nento apteykegkoho nak ma'a Dios apkelásenneykha! ¡Apkeleykegkek axta ekxámokma aptéyak ma'a Dios!

²⁶ Teyapmakxa ekhem axta keñamak aptekkessama éxchahayam, tén han nepyeyam, kexchaheykmek axta néten; ¡Dios axta aptekkesso yetlo apmopwána!

²⁷ Appalchessásenteyk axta ápetek nepyeseksa énxet'ák apagkok; ¡palleykenteyk axta náta, ektémól'a yagkamex ma'a neyáwa nak wátsam ekwányam!

²⁸ Appalchásenteyk axta Dios neyseksa apheykegkaxa, tén han ma'a neyáwa nak apkelpakxenéyak.

²⁹ Apteykegkek axta ekweykmoho apkelyaqkáneykmo, cháxa apméssama axta Dios aqsok apkelmopmenyého xa.

³⁰ Axta eyke elyaqkáneykmok makham, apkelenseykha axta makham ma'a aptéyak

³¹ eyáhapweykto m'a Dios aplo, apkelnapmeyk axta m'a énxet'ák apkelyennaqte apagko' axta. ¡Apkelnapmeyk axta m'a énxet'ák élyennaqte axta apyempe'ék ma'a Israel!

³² Apkeláneykegkokxeyk axta aqsa makham melya'assáxma neyseksa eykhe ekteme xa ekyókxoho nak; apkelya'ásseykmek axta m'a aqsok sempelakkasso nak agwetak apkelane Dios.

³³ Axta keñamak apmassésseykmo Dios ekmanyehe agko', ektémól'a xama negwátekhapma, asagkek axta ektémakxa apkeletsapma.

³⁴ Wánxa aqsa han chá'a elchetmok Dios ma'a apkelnapa enxoho chá'a nápakha, elyo'ókxak axta chá'a; elmaxneyagkok axta chá'a meyke apkelyeytekkesseyam;

³⁵ kaxénwakxohok axta han chá'a apkelwáxok apkelmasma m'a Dios Meyke nak Ekhémo, tén han apkelwagkassama teyp.

³⁶ Kaltaqmalmakha axta chá'a apkelpeywa, atsek axta chá'a katnehek apkelpeywa etnahagkok apkelmopwancha'a amya'a,

³⁷ apkelmopwancha'a amya'a axta aqsa chá'a aptamheykegkok, axta eláneykegkok ma'a ekhémo mók apkelpaqhetchásamákpoho.

³⁸ Apyósekak axta eyke apkelányo m'a Dios, meyaqmagkásekxeyk axta chá'a apkeltémakxa ekmaso, axta han emassésseykmok; megyohók axta chá'a katxek apwáxok aplo.

³⁹ Kaxének axta chá'a apwáxok Dios apteme énxet aqsa m'a; aptamhéyak ekho éxchahayam, ekxegál'a keñe megkataqhegwome'.

⁴⁰ ¡Xámokmeyk axta melyaheykekxa m'a Dios, tén han apkelapwagkassesso apwáxok ma'a yókxexma meykexa nak énxet!

⁴¹ Épkeynekxak axta aqsa chá'a; ¡apyentaxnéssessegkek axta apwáxok ma'a Appagkanamap nak Israel!

⁴² Axta kalxeyenweykekxohok chá'a apkelwáxok ma'a ekhem apkelwagkassama axta teyp Dios, yetlo apmopwána, nepyeseksa m'a apkelenmexma;

⁴³ apkelánéssama axta aqsok ekyawe agko' ma'a yókxexma Soan, ekyetnama nak Egipto, tén han ma'a aqsok segyegwakkassamo nak agweta';

⁴⁴ aptemessáseykekxo axta éma m'a wátsam yegmen, megkalmopwagko axta apmáheyo énagkok ma'a egipcios.

⁴⁵ Apchahayak axta sempéhe, tén han paha', apkeltakxeykegko axta apyókxoho, tén han apsawhoma;

⁴⁶ apkeltémók axta etawagkok sawa' m'a aqsok kélcheneykekxa, apkeneykekxa axta m'a énxet'ák nak.

⁴⁷ Yegmen élyennaqte axta apchehék aptawássaseykencha'a m'a higo yámet apkeneykekxa', tén axta yeyam appok apchahaya m'a anmen yámet apkeneykekxa.

⁴⁸ Kelnáhakkassegkek axta yegmen élyennaqte m'a weyke apnaqtósso, keñe axta nepkések apnaqtósso apkelnáhakkassama takha'.

⁴⁹ Apkeltaqnaweykegkók apagko' axta Dios: apchahayak axta aplo, apkeltémók axta kóllegássesagkoho', apkellegassáseykegkók axta apkelwáxok, máxa axta m'a sẽltennassól'a agwetak aqsok ekmaso.

⁵⁰ ¡Axta emágweykekxak aplama! Axta eltémók chá'a elweynchamha, apkelnapmeyk axta apchahaya aqsok ekmaso;

⁵¹ ¡apkelnapmeyk axta chá'a apyókxoho átnaha apketkók étchek nak ma'a kelán'ák Egipto, cham'a kañe' nak Egipto!

⁵² Apkelántekkessegkek axta énxet'ák Israel, máxa axta apteméssessók ma'a nepkések kélnaqtóssol'a, apnaqleykekxeyk axta énxet'ák apagkok apkelyeykháseykekxo m'a yókxexma meykexa nak énxet.

⁵³ Aptaqmelchessegkek axta apnaqleykha, yaqwayam enxoho megkaxek chá'a apkekakxa', chápeykekxeyk axta eyke wátsam ekwányam ma'a apkelenmexma.

⁵⁴ Apnaqleykekxeyk axta énxet'ák apagkok Dios ma'a xapop apagkok ekpagkanamaxche nak, cham'a élámhakxa nak meteymog élwenaqte, apmomakxa axta m'a eñama apmopwána.

⁵⁵ Apkelántekkessegkek axta nápaqta'awók Israel ma'a melya'áseyak nak Dios; apmelásektegkek axta xapop nepyeseksa m'a ektáhakxa nak chá'a énxet'ák apagkok, apkelheyáseykha axta han ma'a apheykegkaxa nak.

⁵⁶ Apkelyepkeynmeyk axta eyke chá'a m'a Dios Meyke nak Ekhémo, apkenmexeykekxo chá'a, axta elyeheykekxohok chá'a m'a apkeltémókxa axta etnahagkok;

⁵⁷ aphémók axta m'a apyapmeyk nano', apkelyamasmeyk axta, apkelyenseykmek axta han apkelyetleykekxa; apkeltaqhegweykmek axta, máxa axta m'a yágke ekyetnakhágwayam la'a ekxega!

⁵⁸ Aplókassegkek axta apkeláneykegko apkelwatnamakxa aqsok, apkelwatnéssamakxa chá'a aqsok ma'a mók aqsok kéláyókxa, tén han apkelpeykessamo m'a kéleykmássesso, aplókassegkek axta apkelmeyeykha.

⁵⁹ Aplamchek axta Dios apweteya xa aqsok nak, tén axta apkexakhama apagko' ma'a Israel,

⁶⁰ apyamasmeyk axta m'a kélpakxanma appagkanamap apyetnama axta m'a Siló, apxagkok axta nepyeseksa m'a énxet'ák.

⁶¹ Apchahayók axta apmoma apkelenmexma m'a yántéseksek, ekyetchesamaxkoho nak apcheymákpoho, tén han apmopwána.

⁶² Apméssegkek axta yaqwayam elnápok énxet'ák apagkok ma'a apkelenmexma, hakte apkeltaqnaweykegkók apagko' axta.

⁶³ Apkeletsepmeyk axta wokma'ák neyseksa kempakhakma; ¡néxa axta temégweykmok yaqwayam kalyamhopagkok kelán'a étkók!

⁶⁴ Apkeletsepmeyk axta han apkelmaxnéssesso Dios énxet'ák apagkok, sawo axta chá'a kélyetxeykegkok, yawanchek axta han ekmáheyo kallekxagwaha m'a apnaqteyegka'a neptámen.

⁶⁵ Apxatakha'ak axta eyke Wesse' egegkok, máxa axta aptáhak ma'a xama énxet apteyenmal'a exatakha', aptémól'a kempakhakma yáp exátekhágwók natámen éllágwayam eyaqhe vino,

⁶⁶ apkeltaqheyásawók axta apkelenmexma, apmenxenchek axta; ¡apkelmegqásawók apagko' axta meyke néxa!

⁶⁷ Axta han elanók ma'a José aptawán'ák neptámen, axta nahan elyésaha m'a Efraín énxet'ák apagkok;

⁶⁸ Judá énxet'ák apagkok axta aqsa Apkelyesáha, tén han ma'a egkexe Sión, apchásekhayo apagko' axta chá'a.

⁶⁹ Apkelanak axta tegma appagkanamap apagkok, netnók agko' ekhawo nak ma'a néten, appekkenmeyk axta han meyke néxa m'a, ektéma nak xapop.

⁷⁰ Apkelyéseykha axta apkeláneykha David, apteme axta apkeláneykha nepkések;

⁷¹ apkelwátéssessegkek axta apkeláneykha nepkések apnaqtósso, yaqwayam enxoho elánesha m'a énxet'ák apagkok, yaqwayam etnehek apkeltaqmelchesso énxet'ák Israel.

⁷² Apkeláneykha axta David Dios énxet'ák apagkok; yetlo apmopwána aqsok, apnaqleykha axta chá'a yetlo meyke aptémakxa.