Zefanya 1 - Eipomek

Allah Yahweh arye, tukwak nang im sirya, mutuku sirya, sik malye wininyak ning ati, wenebuka opnamle talak ati, nyabuk yupu

¹ Allah Yahweh arye, ninye si Zefanya dam yanuka, aminyan talak winipnamuk ning ati, laka nyan yupu nyapdeiamukba, nabi kibuka ulamuk. Zefanya bira, ninye si Kusyi birye deiamuknye ulamuk. Kusyi el li koproba ara, Gedalya ulamuk. Gedalya el li koproba ara, Amasia ulamuk. Amasia el li koproba ara, Raja Hizkia ulamuk. Sik anang arye, deipdanin bana ara, min talak arye dipdongobuka, Zefanya ulamuk talak nukuka sekupu. Raja Yosia birye, Yehuda tam ulamik nang taleamukce, Raja kiamuk talak noutam ara, nabi Zefanya ulamukce, Allah Yahweh arye nyapdeiamuk yupu, laka nyalamuk.

Allah arye tukwak nang nirya ati, ninye yupu bokuka wenepnamle ning ati, nyabuk yupu

² Allah Yahweh arye, nabi Zefanya ati nyabuk. Ara, ani. “Na Allah Yahweh arye, tukwak mutuku ulul ning yala-yala nirya ara, kum kipdeipnamne, nyapsine.

³ Ara, tukwak unyak nang ap, talye tukwak kam daunyak ning yala-yala nirya, tonda maka yala nirya ap, ikan ap, aning nirya ara, kum kipdeipnamne. Tonda, malye-malye un ninguk talibuka wininyak nang nirya ara, narye lo arepnyeura, yuk nang arye, anang yanuka, obuka sirya daknamake. Winipye deice arye, na Allah Yahweh arye, tukwak nang nirya ara, obuka kum kipdeipnamne. Winipnamne talak ara, tonoknye babye ton, kum kam bataknamne. Na Allah Yahweh arye, ayupu ara, akunum nyapdeipmana ati, aning ara, pia dipkoprob nong upnamle!

⁴ Na Allah arye, weik asik kota Yerusalem mutuku noutam unyak nang ap, Yehuda tam unyak Israel yala nang ap nirya ara, na taruk deice arye, ikin weik ning arepsinirye, wenepnamsine. Tonda, amutuku noutam mitikto, tuba malye ulul ning, sikce Bahal isa ati, ‘Nun ni,’ nyabuka, si eren ning ati, na Allah arye, aning nirya kum daneipnamne. Tonda, talye Bahal isa si erena ati, sikce deiyok kibuka, imam pil atonun donyak nang ara, pia malye weik unyaka ati, na Allah arye sikti, obuka sirya daknamne. Sikda, yuk talye ning si erenyaka ati, winipmanto ara, ninye akunum domikce kilapu batakuka, yuk talye kilapu ati, moun dilamak touk wininyake. Ara, na bataknikce, talye isa ati si erenyaka ati, nyapne.

⁵ Aning atonun, yata nang do nirya arye, im noutam ulul ning ara, keting ap, wala ap, tonda kurya ap ati, ‘Aning arye melinamsiakʼ tenen, aning si erenyake. Aning ati, si erenyak nang nirya ara, wenebuka opnirye, sirya daknamne. Anang ara, kat ning arye, aik duma lu kibuka donyak ning deice tam arye welebuka, im noutam ulul ning ati, si erenyake. Anang babye, obuka sirya daknamne. Tonda, yuk yala nang bukni, sikce, na Allah ati, ‘Naio an siuk erenyabe,’ nyabuka, nyalin yupu nyapnik bukni, talye nyaltakna ati, sikce talye isa si, Milkom isa si ap, tabakuka erenyak nang nirya babye, opnirye, pia kum daneipnamne.

⁶ Tonda yata nang do nirya, sikce, ‘Se, nun ni Allah arye, yata yupu nyapnamsil do?’ Tonda, ‘Nai ance nunti, kalikuka melinamsilamʼ tenen, na dam ton yanuka, kum moroninyake. Tonda, sik anang arye, ‘Se, nun yata wiripnamap do? Teleb ning ara, aning do, aning do?’ tenen, na Allah ati, tuba kum asininyak nang nirya babye, wenebuka opnirye, sirya dakuka, kum daneipnamne. Ara, sik anang nirya ara, na Allah ati, melibuka kum dobolyanganinyakce, akunum bataknika ati, opnirye pia kum daneipnamne. Tonda, ‘Allah arye, yata yupu nyapsiliryeba, aninguk talebuka dobolyanganamap do?’ tenen, na dam yanuka, na yupu kum kekenenyake. Wininyaka ati, anang nirya opnirye, pia kum kipdeipnamne.

Allah Yahweh, elce tukwak nang nirya ati, yupu nyaplirye, wenepnamle ati, weik mambul sum kintinibuk ning ati, nyabuk yupu

⁷ Nabi Sefanya arye, ayupu nyabuk. Allah Yahweh aning-aning nirya talilirye, weik tonun erebuka, Pia Mikip Weik Deiyoknye ulule. Elce, ‘Tukwak mutuku unyak nang nirya ati, sik wininyak ning ara, teleb do, malye do?’ tenen, dipdesilirye, wenepnamsil talak, akunum dam upmala ati, anggun tukwak nang nirya arye, kekeplulume! Ara, Allah Yahweh, el dam yamunce, yupu nyana pia kumce, pia tunim abuka unamlume. El Allah arye, tukwak nang nirya, yupu bokeipnamle sum, akunum dam upmala ati, elce tenyamukce, akunum wiamuk nang nirya ati, akunum kintinip deipmale. Ara, winipmanto ara, ninye arye, ‘Allah ati, si erenamap’ tenen, sikce talye kam un ning, domba basam do, kambing basam do, obikirye, uku dongolamak touk, Allah arye anggun Israel yala ninye ati, atonun winipnamsile. Allah arye, ‘Anang ara, ‘Naʼ tenen, nang unyaka ati, na si erena ati, wenebuka opnirye, sirya daknamne,’ akunum tenebuka ati, aning ara, adiparyuk winipnamsil ati, anggunda, Allah el dam yamunce, tunim abuka unamlume. Ara, sik malye-malye weik wininyak nang ara, Allah arye sikti, weneplirye, opnamla ati, akunum kintinipmale.

⁸ Na Allah Yahweh arye, sik malye wininyak nang weik opnamne sum, akunum yalyopura, na Allah Yahweh arye, ninye deiyok kibuka unyak nang ap, ninye deiyok nang, Raja-Raja, sik mapu nirya ap, tonda, sik yuk mutuku ninye arye wininyak ning talibuka ukirye, sikce, ‘Amutuku nang arye, talye ning si erenamapʼ tenen, yuk mutuku nang ongonyak baju dobuka, ongonyak nang nirya ap, wenebuka opnamne.

⁹ Ara, talye ati kume. Sik anang arye, ‘Nun talipsukba, si erenyapnye birye, el kanye teleb kilinamsilʼ tenen, sik tilila yupu nyabikirye, talye bona talina kum nang, sik aik pum tam, mikip arye wekelbikirye, anang sik talinyak ning, alubuka dolonyake. Doprobikirye, sik deiyok nang ati, abona ubula doprobikcopura, sik aik weknukce talak ara, abisik bublan noutam ara, kum yanipnamapʼ tenen, kaplibuka poulbikirye, anyaik pum moubuka wekelbanyake. Anang arye, yuk nang talinyak ning ara, mikip arye alubuka dolonyake. Tonda, tenebuka tilila yupu weik nyanyake. Yuk nang ning duknubuka ubula doprobikirye, abona bulubuka, sik isa si eren aik dam yanuka, arebikcopura, anyaik langdilule. Sikda, tilila yupu nyana ap, ubula dolona ap, deice arye, malye weik winiyaka ati ara, na Allah arye, amalye wininyak nang nirya ara, wenebuka opnirye, sirya daknamne!

¹⁰ Na Allah Yahweh arye nyapsine. Anang nirya, wenebuka opnamne sum, akunum uplyeura, sik malye wininyak nang wenepnyeura, anang weika arye, imun kanye bobikirye, ngalukuka, lelim weik nyabicopura, ninye weika arye kekepnamake. Yerusalem mutuku weik asik antanap dongobuka, domik keil poka noutam bukni, “Ikan bublan (Gerbang Ikan) tam nyabuka, botopdeibik sukum, weik bisik bublan tam arye, ngalukna lelim nyanamake. Tonda, Yerusalem mutuku noutam bukni, asik winiryuk talak donmace tam arye, engena lelim nyabikceba, kekepnamake. Tonda, Yerusalem mutuku kon deice, aik domik ning nirya, yu nang arye uluplobice talak ara, engena lelimuk nyaplyeba, yuk tam nang nirya arye, kekepnamake.

¹¹ Alelim nyapliba kekepnamlum ning ara, anggun nirya ngalukuka, malye nyapmunce, engepnamlume. Deiyok ara, Yerusalem mutuku noutam bukni, mitik lu kibuka, outam mutuku din dekna aik dobuka, deiamlumak arye, ninye arye, ‘Se, yata wiripnamap do?’ nyabikirye, weik tonun engenamake. Deiyok ara, sik bona talibuka dekna deiyok nang ap, tonda yuk nang arye, bona yala-yala nirya dekikce talak ati, keil uang ap, yo bok ap, nukikcak arye, ‘Bokuka tia ati areamniminya ani, tuba tamubuka arepnamkine,’ nyaltakanyaka deiyok nang nirya ap, anang nirya wenebuka opnyopura, kum danamake. Ati ara, anggun nirya arye, ngalukna engepmunce, lelim weik nyanamlume.

¹² Atalak ara, na Allah arye, Yerusalem asik domikce noutam nirya ara, ‘Na min kum wenebuka opman nang ara, dan sukum duknukmak do?’ tenen, epnamne. Winipmanto ara, ton nang arye, ‘Anang opnuyapʼ tenen, ninye duknukmanto sukum nirya binuka, upna ubuka bobikiba, dirina uplya deice arye, eibuka banyak atonun, na babye atonun winipnamne. Ara, Yerusalem mutuku noutam nirya epra binamne. Tonda, sik Yerusalem mutuku unyak bona utoto talena arye, na Allah ati, ‘Kume, Allah Yahweh, elda nun dam malye wininyap ning babye, teleb wininyap ning babye, ton dipkoprop, ton kum elisulula ati, nun malye wininyap ning ati, kum wenepnamsile. Nun teleb winiyap ning ati, ‘Telebʼ kum nyapnamsile. Nunce malye winipmabye babye, elce, ‘Aning ara, malye,’ nyabuka, ‘Kum wenepnamsile,’ tenenyake. Anang ara, sikce sik pedamnye atibuk, ‘Nunda, mambul bona utotoa talen nang unyapa ati, Allah arye, yata wiripsutu kuma. Kume, el ara, aning-aning nirya ara, kum winisululnye ulula,’ tenenyaka atia. Ati sik winibuka tenenyak nang nirya ara, wenebuka opniba, dipnamake.

¹³ Nara, Allah arye lo arepnyeura, yu nang arye, sik maknya kintinilan nang, sik talinyak bona nirya ara, dalubuka dopropnamake. Tonda, sik nirya teleb aik doptinga babye, yu nang arye, sik donyak aik nirya babye, ulubuka batakikirye, sice buklopbikiba, tuba ton ap, anyaik nirya wekuka kum unamake. Tonda, sikce anggur wa wibuka kouamikca arye, talibuka unamak bukni, anggur duk el nong ara, libuka kum teikicak arye, anggur mek ton pia kum dinamake. Deiyok ara, sik aik babye, sik anggur wa babye, na Allah arye, kum daneipnamna atia.

¹⁴ Allah Yahweh elce, ‘Tukwak mutuku unyak nang nirya ati, sik unyak ning ara, teleb do, malye do?’ tenen, dipdelirye, wenepnamle talak, akunum dam upmale. Asum ara, dipkoprob minop yanuka winipnamsile. Asum deice arye, Allah Yahweh arye, tukwak nang unyak ning nirya ati, dipdelirye, sik nirya arye, malye ning winilamika ati, wenebuka opnamle. Asum ara, dipkoprob minopce yanamle. Asum ara, kanye imun weik ning yanamla ati, pia weik tonun engenamlume. Tonda, sik mandipna kanye bobuka, mal olana kel weik bikamik nang babye, ‘Se, yata ati, aning winipmasil do? Wini talak yata wiriptibye do?’ tenen, ikin kanye bobuka, sik babye engenamake.

¹⁵ Dipkoprob asum ara, Allah Yahweh, el yu weik uplyeba, wenen sum upnamsile. Winiplyopura, tukwak nang nirya arye, ikin kanye bopnamake. Allah Yahweh arye, tukwak nang nirya ati, wenebuka opnamle sum yanamla ati, engena weik sum ap, ikin ning yanamle sum ap, kanye imun ning upnamle sum ap, ton yanamle. Asum ara, aning-aning nirya ulubuka, sikce buklopnamle sum kipnamle. Tonda, lokuka poulban sum bereknamle. Asum noutam ara, mirin dua weik yanuka sikniplyopura, tukwak mutuku nirya kunuknamle. Tonda, kunuklirye, lukunyan atonun kipnamle.

¹⁶ Atonok sum noutam ara, pia yu nang yakirye, weik pong-pong nyan ning, el si terompet lelimuk nyabikcopura, weik lelim deice arye, “Yehuda noutam unyak nang ap, Yerusalem mutuku weik asik noutam unyak nang ap, olyanuyabe,” nyabikirye, adiparyuk minopce olyanamake. Ura, sik mutuku dana-dana tam nirya ara, ‘Nun mal olan nang arye olyasicakʼ tenen, sik kalikna ati, weik cang keil poka dukdongobuka dobik ning babye, cang keil aik donyaka babye, ayu nang arye, kum bataknamake. Sikda, ninye mal olan kel weik nang yakirye, weik yupu nyabuka, warikmasikirye, opnamsiake. Allah Yahweh arye nyabuk.

¹⁷ Nyabukopura, ayupu ton dukdongobuka nyabuk. Narye anggun wenena ati, weik ikin ning dobuka, anggun nong deice deipsinyopura, adeice arye, amutuku unyak nang nirya ara, imun kanye bobikirye, walwal uplya ati, asing kun nang arye, dengkepdanin balamak touk, upnamake. Ara, sik babye, na Allah dam malye pia weik ulamak ning dengna ati, narye wenebuka opsiniba, sik aopmace nang, sik ining ara, mek balamle touk, ubuka binamle. Tonda, na dopdeipnamne yu nang arye, sik nong opmakce ning ara, ninye tuku deice deiplomakce touk, sik anang nong ara, sakuka tuku deice poulbikirye, asukumuk talye lyupnamle. Sik anang nong ara, tuku pum tam kum weipnamake.

¹⁸ Allah Yahweh, el yu ulul ning ara, tukwak uplyeba, aweik ikin upnamle sum areplyopura, sik bona weik talin nang arye, talinyak dengna weik ning emas ap, perak ap arye, amutuku nang ati, pia kum melinamle. Abona weik talenyak nang ara, sikce sik dengna weik talenyak ning arye, pia kum lyepdanamake. Allah el yu ara, weik uku dilamle touk ulirye, tukwak mutuku nirya ap, tukwak mutuku nang ap, nirya wenepnamle deice arye, malye kiplirye, bataknamle. Aning ara, ninye arye kum tenipnamak buk, sik mangkau kibikce talak, Allah minopce tukwak mutuku kam unyak ning yala-yala nirya ap, tukwak nang im sirya, mutuku sirya nirya ap, opsilirye sirya daknamsile! Tonok ning babye, pia kum bataknamle.