Zakaria 11 - Eipomek

Allah Yahweh arye, yuk mutuku mikip weik unyak nang ara, wenebuka opnamle ning ati, nyabuk yupu

¹ Se anggun Libanon mutuku nango, anggun asik wekelbana ati bisik bublan nirya ara kukeipnamlume. Winipmunyopura, narye dopkwetepniba, weik uku buk dilirye, anggun mutuku tam tiklamuk aras yo nirya ara, dipnamle!

² Se, ati winipnamle talak ara, yo si daru yo ati, pia tenibuka engena uk unamlume. Deiyok ara, amutuku noutam atikamuk cemara yo nirya ara, urasin pia teleb uamuk bukni, ninye nirya arye, ‘Se, aning ara, pia mambule,’ nyalamik bukni, wini talak ara akunum kum danmale. Tonda atonun, anggun mutuku noutam ara, mambul weik yo yala nirya ara, kum danamla atia. Aning atonun, se anggun Basan mutuku noutam ululum nang ara, kat weik yo, el si sanobar tikamuka nirya ara, ninye arye webikirye, kum danin balamlya ati, anggunda, ‘Seʼ tenen, engena uk unamlume. Deiyok ara, amutuku noutam uamuk aras yo ap, sanobar yo nirya ara, webuka pia kum kilinyake.

³ Ati ara, sik deiyok talibuka unyak nang ap, sik domba basam weinyaka deiyok nang arye engenmaka ara, anggunce kekenamlume. Deiyok ara, sik deiyok nang arye kwalina deice arye, pia teleb ning talibuka ulamik ning nirya ara pia kum daliba engenamake. Atonun, sik domba basam weina deiyok nang ara, sik domba basam nirya kum dayuka ati, sik bidamnye engena uk unmake! Aning atonun, bai tam Yordan mek kup-kup yo kan-kan noutam ulamle kam ning, el si ara yu singa kus arye, weik yupu deice arye malye nyanamle ning ara, kekenamlume. Deiyok ara, sik unak nirya ara, ninye arye weltakanyak atia. Ara, Yordan mek kup-kup tam tiklamuk yo kan-kan nirya ara weltakana uk upnamake.

Peteren nang bitinye ati, nyabuk yupu

⁴ Ura, Allah Yahweh arye, na Zakaria biti nyapnuke. “Ara domba basam weina deiyok nang arye, ‘Nun domba basam opnamabe,’ akunum tenenyak bukni, ance adomba basam dopropminyeura, ance sik domba weina deiyoknye unamlame,” nyapnuke.

⁵ Tonda nyabuk. Aning deiyok ara ani. Sik adomba basam nirya akunum dekikirye, dopropnamaka ning ara, adomba basam nirya opnamak bukni, sik anang arye, ‘Se, adomba basam opnamaba ara, bicoe,’ pia kum tenenyake. Sik adomba basam el kalipdeibuka dekenyak nang arye nyanyake, “Se, Allah Yahweh anda pia telebe. Adomba basam dekmapya deice arye, nunda, pia weik tonun tabakuka bona weik talin nang unamabe,” nyanyake. Tonda, adomba basam dekenyak nang ap, sik domba weina ati deiyok nang ap, sik nirya arye sik weinyak domba basam ati, ‘Se nun domba basam obikirye, dipnamak,’ tenen, pia bico kum tenenyake.

⁶ Narye, ‘Anda sik domba basam weina deiyoknye atonun upnamlame,’ nyapmakina deiyok ara, ani. Narye amutuku, Yudea noutam unyak nang nirya ati, na bico tenen ning ton pia kum deipnamne. Na babye amutuku unyak nang, sik talima noutam, ‘Nun dam unyak nang ara, nun like,’ tenelana deiyok ning arepniba, sik nirya arye, ‘Anang ara, nun like,’ tenelanamake. Tonye birye, el dam ululnye biti, olana ap, walana apuk unamnyake. Winibibcopura, narye arepniba, sik tam talibuka unyaka deiyok nang arye, amutuku nang nirya ati, ikin ning deipnamake. Sik amu tamuk ukirye, imun kanye bobuka unamake. Winipnyopura, sik amutuku deiyok-deiyok nang malye upnamaka deice arye, sik mutuku nirya, malye dem kipdeibikirye, amutuku ning nirya, sikce malye kibuka bataknamake. Amutuku nirya malye kibuka sice buklopnamake. Winipnamak bukni, na Allah arye, amutuku nang nirya ati, bico tenepnirye, lobuka kum lyepnamsine. Sik ti ‘Lik,’ tenenuna ati, batakana uk unamne.

⁷ Nara, nabi Zakaria, sik domba basam dekenyak nang arye dekna arepnikiba, domba basam opnamak ning nirya ara, naryuk weinamne. Ati ara, na kama ara bitinye akunum bopmane. Tonok kama ara, narye si dopse ning ara, ‘Bicoe tenepnirye melipnamne,’ nyabuka, si dopse. Tonda, kama bitinye talipse ning ara, el si ati, “Tonok kanye dukdongobuka un ning,’ nyabuka, si dopse. Aning nirya akunum winipsopura, adiparyuk deiyok koubuka, adomba basam kalikuka wein pil talibuka dopmase.

⁸ Ati sik domba weina ati deiyok nang winilye nang arye nati, ‘Nun like,’ tenelamnik. Winibuka tenelamnikba, narye sikti, ‘Se, sik anang ara dan talak arye teleb pil donamak do? Pia sikcuk ukirye, teleb ubuka pil kum donyake,’ tenepse ati, ‘Aning ara na pia like,’ tenepsirye, ‘Akunuma sikda dauplye,’ tenepse. Winibuka tenepse ati, tonok wala deice aryuk, sik adeiyok nang winilye ati, wenepsirye, yakuka dopkwetepsirye, obuka sice buklopse.

⁹ Winipsopura, narye tamubuka, sik domba basam dekna deiyoknye biti nyapse. “Ati narye anggun domba basam nirya ati, narye kum weipnamsine. Dadipnamak domba basam ara, sik dibina teleb uka. Tonda dawangapnamle domba basam ara, daupnamle. Winipliba, tuba mitik tonun arye kam unamak ning ara, sik domba basam weina ati poka pum noutamuk, daopdakirye, dibina uk unamake.”

¹⁰ Utenebuka nyapsopura, narye nyabuka si sipse kama ara, el si ‘Bicoe tenepnirye melipnamne,’ nyabuka, si sipse ning ara, tamubuka dopropsirye, bulakuka batakse. Ara, minop talak narye mutuku sirya im sirya nirya unyak nang ati, ‘Aning ara wininamlume, aning ara, pia kum wininamlume. Winipmunyopura, narye anggun dekna ati, winibuka melinamsine,’ nyalin yupu deice arye nyapdeiamse yupu ara, akunum kum kilina ati, akama ara bulaklopse.

¹¹ Akama bulaklopseba, asum deice, akama bulakmase ning, nyalin yupu nyapdeipse ning ara, akunum kum kipdeipse. Winipseba, sik domba basam dekna deiyok nang arye, nati kalikuka dilamnika ati, moubuka bikike. Ara, ‘Se, nabi Zakaria birye nyapmasil yupu ap, elce winimok ning ap ara, dipkoprob ninge ara, Allah Yahweh, elcuk aning nyapsutua babye, atonun ulule. Ati nabi arye nyapmasil ning ara, Allah Yahweh el yupu uk nyasulule,’ tenelamik.

¹² Sik akunum aning tenebuka bikikopura, narye sik adomba dekna deiyok nang nirya ati nyapse. “Telebe na kayapu, anggunce nati, ‘Yo telebe, winiptibye,’ tenepnutumce, nyapnutumba, na pil dolamse ning pununa ati, na dekna yo bok arepnutumopura, aning ara telebe. Kumopura, dauplule. Ara, anggunce, ‘Yo, winipnamabe, an yo bok arepkitibye,’ kum nyapnumunyopura, na deken ning kum arepnamnulume. Nyapsopura, sik adiparyuk, na deken keil uang ara, tiga puluh perak arepnike.

¹³ Arepnikba, dopropse talak ara, Allah Yahweh arye nati nyapnuke. “Anda akeil uang tigapuluh nirya ara, dobuka na Allah, si eren aik pum tam ara, na arena ati yo lakase pum tam, el si kas, aning noutamuk dongopnulame,” nyapnuke. Ati ara, Allah Yahweh arye nyapdeipnuka atonun, narye akeil uang tigapuluh perak ara, Allah el si eren aik pum noutam, el arena ati kas pum tam dongopse.

¹⁴ Aning nirya akunum winipsopura, na adiparyuk na kama bitinye ara, “Tonok kanye dukdongobuka un ning,’ nyabuka, si sipse ning babye, cebuka batakse. Ara, narye si sipse kama bitinye ara, bulaklopsa deice arye, sik Yehuda tam unyak nang ap, Israel tam unyak nang ap, yuk-yuk kipdeipsirye, sekdongopse. Sik anang nirya ara, ‘Nunda neika tonok yala nang dem unyabe,’ tenelalamikce, tonok yala nang dem ulamik bukni, wini talak arye dipdongobuka doyanamle talak ara, sik nirya arye, ‘Nunda yala yuk-yuk unyabe,’ tenebuka, yuk-yuk unamake.

¹⁵ Winipsopura, Allah Yahweh arye, na Zakaria biti nyapnuke. “Anda tuba tonap domba basam weinyak nang atonun unamlame. Tonda, sik domba weina deiyok nang arye talibuka pil donyak ning ara, tuba tonap, aninguk dobuka wininamlame. An kele, yuk ninye arye sik domba wein pil don nang ati, ‘Sikda mambul nang kume, talye nanguk unyake,’ tenenyake.” Allah arye, nati nyapnuke.

¹⁶ Nyapnukopura, adiparyuk dukdongobuka ayupu ton nyabuk. “Narye, ‘Anda domba wein nang arye, talinyak pil don ning dopnamlame,’ nyapmakina deiyok ara, lakakilina ati nyapmakine. Bukni deiyok ara ani. Ara, wini talak ara, narye na domba basam weina deiyoknye ton wipdeipnamne. Anye kintinibuka wipdeipnaman bukni, anye bira, elce wangamlye domba basam ati, awangamseʼ tenen, pia moubuka bikna kumce, kum elbalule. Tonda, domba basam dipmanto ulul ning ara, elce, ‘Seʼ tenen, kum melibuka lyelule. Tonda, suse dilamliba, dila wamne domba basam ati, elce moubuka obat kum arelule. Tonda, domba basam tuba kam ulul ning ara, tuba teleb kibuka, sik din kum arelule. Aning nirya ara, teleb pil kum dolul bukni, elce, akunum nong teleb nelamle domba basam, meta weik ulul ning ara, elce adomba obuka diplayak arye, sirya daknamle. Adomba sik yan kala babye, kwinilolule. Anong nena teleb basam ara, obukaplirye, el yan kala taruk kala nirya ara, kwinilolule.

¹⁷ Se, narye wipdeipse domba weina deiyoknye bira, elda pia telebnye kum ulule. Anye bira, pil teleb kibuka dopmantonye kum ulule! Na domba basam nirya, teleb kibuka kum weilirye, adomba basam nirya batakalule! Winilula ati na Allah Yahweh arye elda domba basam moubuka weina kumnye biti supnamne! winipniba, elce adomba basam weina ati ara bataknamle. Winipliba, lo arepniba yu yin talen nang arye, ninye ona ati parang ya arye, el taruk sirik tam opliba weik suse upnamle. Winiplirye, el asing sirik tam babye asing luklopnamle! Winiplyopura, adomba weina malye ululnye bira, el taruk mikip ara, pia kum upnamle. El sirik tam asing ara, kuna daknamle!” Allah arye ayupu nyabukba, na nabi Zakaria birye kekepse.