Yosua 9 - Eipomek

Gibeon nang arye Yosua biti, “Nunda pera mutuku arye yanmabe,” nyabuka, tilila yupu nyabik deice arye lyepdayik yupu

¹ Ura, Yordan mek koubuka, otam keting wekelban tam, sik mutuku kon deice ulamik nang ap, mutuku amu tam ulamik nang ap, tonda, weik laut mekwen tam bukni, Libanon mutuku dam otam ulamik nang ap, sik dabu tam lu mutuku ulamik ninye ap, sik deiyok nang nirya ap ara, yuk nang arye, “Se, Yosua ap, sik Israel yin talin nang babye, Ai mutuku akunum obuka batakmakce, sirya dakmake,” nyabuka, lake nyanmekba, kekenmek.

² Kekenmek ning ara, ‘Se, ara, Israel nang arye nun mutuku nirya babye, yanuka olyanusiayaka ati, teleb ning ara, nun nirya ansinibibirye, nun deiyok tonok kibuka weika arye, sik Israel nang ati warikil binamapʼ tenen, kanye wisibuka kintinibik. Ara, amutuku-amutuku nirya ara, sik ninye deiyok nang nirya kekebik. Ayupu kekebikce, ansinibuka kintinibik nang ara, ani. Ara, Het mutuku ulamik nang ap, Amori mutuku ulamik nang ap, Kanaan tam ulamik nang ap, Feris mutuku ulamik nang ap, Hewi mutuku ulamik nang ap, Yebus mutuku ulamik nang ap, ayala nang nirya arye kekebikce, yupa tonok kibibirye, ‘Israel nang olbinamabe,’ tenebikce, ansinidobik.

³ Sikce amutuku-amutuku ulamik nang arye, ansinipdobikce, kintinibik bukni, sik ayupu kekebik nang ton, sik yuk yala nang, Gibeon mutuku ulamik nang ara, sik yuk winibik. Ara, yuk nang arye, “Yeriko mutuku ap, Ai mutuku ap ati, Yosua birye nyapdeibukba, Israel yala yin talin nang arye, abitinye mutuku dam binuka, obuka sirya dakikce, amutuku ulamik nang ap, sik talilamik bona ap, sirya dakmake,” nyabuka, lake nyabik Gibeon mutuku ulamik nang nirya kekebik.

⁴ Kekebikura, ‘Se, teleb kibuka tenipnuyabe,’ tenebika ati, sikce “Winipyube,” nyabuka, yupu talibikce, weik kel arye, ‘Aning ara, winipdenuyabe,’ tenebik. Utenebikura, Yosua el dam bana ati, sik anang ara, yuk pera mutuku arye yayik. ‘Sikda, nun mal olan nang kume, talye nang uka, tenepnamsiyakʼ tenen ati, karung bola pun deiamuk ning ara, sik keledai basam deice delina ati kintibikce, anggur tapu duk puturubuka, anggur du mek lin ning babye, pun deiamukce, kwelekuka sakamukce, malye-malye uamukba, tamubuka wiamik ning ap kintinibik. Aning nirya ara, sik keledai basam balye deice deibuka, koupdongobikura yayik.

⁵ Tonda atouk, ‘Aning ara, pera mutuku arye yanganmake, tenepnamasinyakaʼ tenen, sik roti kwaning din ning ara, minop talak arye yuamikba, akunum sesal omokura moulamuk ning ap, kwaning yubuka deiamikba, dung-dunga ilamukce, kam potong palamuk ninguk, libuka yayik. Tonda, sik anang yan ongon ning, sepatu babye, sandal babye, pupun danamukce, bola kopra, saklamuk ninguk, ongobuka yayik. Aning atouk, sik ongopmek baju babye, pupun danamukce, durunga pia weik uamukce, kwilikilsaklamuk ninguk, ongopdakuka yayik.

⁶ Aning-aning nirya kintinibik ning ara, ‘Winibuka nun Yosua dam bibirye nyapnubʼ tenen, aning nirya ara, akunum tenebikce, Yosua ap, Israel nang ap, Gilgal mutuku tenda arye doltakna aik dobuka, ulamika dam biyik. Biyikura, nyabik, “Se, nun ni Yosua, an ap Israel nang ap, anggunti nyapsiyabe. Nunda, pia pera weik mutuku arye yangalamupu ani, yayabe. Ara, ‘Nun ni yapu anggun ap, neika epdanuka, olana kum aryuk, teleb kibuka tonok mutuku noutamuk neika uptibyeʼ tenen, moropsiyabe,” nyabuka, “Nyalin yupu deice nyapdeipdanamabe,” nyabuka, sik Gibeon mutuku arye yanmek Hewi yala nang, sikce nyabuka morobik.

⁷ Nyabuka morobik bukni, sik Israel deiyok nang ap, Israel nang nirya arye, tamubuka nyabik, “Anggunda, mining dam nun unyap mutuku noutam, anyuk ululum nanguk yanamlum do? Ati, nunda yata deiyok ati, nyalin yupu nyapdanuyap do? Tonda, nun aunamap mutuku dam, yanuka umumyopura, yata deiyok ati, ‘Olana kum aryuk, teleb kibuka neika unamabeʼ tenen, nunce nyalin yupu nyapdeipdanamap do?” nyabuka, sik Hewi nang ati nyabik.

⁸ Nyabikura, sik Hewi nang arye, Yosua ati tamubuka nyabik. “Kume na nio, nunda namin kanye bobuka yanganmabe. ‘Nunda, ‘Sik Israel nang talye pil melibuka don nanguk unamabeʼ tenen, yanmabe,” nyabik. Nyabikura, Yosua birye tamubuka asideyuk. “Anggunda, yata yala nang do? Anggunda, dipkoprob dan mutuku arye yanamlum nang do?” nyabuka, asipdeyuk.

⁹ Nyabukura, anang arye tamubuka nyabik. “Nunda, pera weik mutuku arye, anggun dam ayanmaba ara, talye ati kuma. ‘Anggun pil melibuka don nang unamapʼ tenen, nunda yanmabe. Tonda, nun pera mutuku arye yanmaba deiyok ara, anggunce talibuka si erelulum Allah Yahweh ara, yuk nang arye, ‘Sik ni Allah ara, dipkoprob weik kanye ikin ninguk ulule,’ nyabikceba, kekenyapa ati, nunda yanmabe. Tonda, nun ni yapu, yuk nang arye, ‘Sik ni Allah ara, Mesir mutuku arye, deiyok koubuka lopdeibukce, ninye arye kum winipmanto ning, pia weik pil dolamuka deice arye, Israel ninye ara, Mesir mutuku noutam arye, lopdeibukura, yanganmake,’ nyabikba, nunda aning kekebupa ati, anggun dam ayanmabe.”

¹⁰ “Tonda aning atouk, weik mambul ning awinilul ning ara, mutuku bitinye talibuka, ulamik ninye deiyok nang ton, atouk obukadakuk. Ara, Yordan mek koubuka, otam mutuku keting yangan tam ulamik nang, sik Amori yala nang talibuka, ulamik ninye deiyok nang, sik Raja nang si ara, ani. Hesyebon mutuku weik deiyoknye, Raja Sihon ap, tonda Basan mutuku ninye deiyoknye, Raja Og, elda Asitarot mutuku ulamuknye babye, sik ni Allah arye obukabukce, sirya dakuk. Aning nirya, yuk mutuku nang arye nyabikceura, nun akunum kekenyabe,” nyabik.

¹¹ Kekenyaba ati, nunda nun mutuku talibuka, usinyak ninye deiyok nang ap, tonda nun mutuku unyak nang nirya arye, kintinibikce, ‘Bisik noutam dinamlum ning ap, yuk ning ap, aning nirya ap, bobimunce, Yosua ap, el tam Israel nang ap epdanamlume,’ nyapsikba, aning nirya ara, libuka yangalamupu ani, ayanmabe. Tonda, sikce yuk yupu ton nyapdeipsik ning ara, nyapsiyabe. Ara, “Nunda, anggun pil melibuka don nanguk unamap ati yanmabe. Ati wini talak ara, ‘Oryanamle talak noutam ara, olana kumce, teleb kibuka neika unamapʼ tenen, nyalin yupu nyapdanuyabe. Nun deiyok nang arye, ‘Nyalin yupu nyapdanuyabe,’ nyabuka, moropnamlulume,” nyapdeipsike.

¹² Ati nun ni yapu, ‘'Aning ara dib, nyapmakeʼ tenena ati, aning dipdelulume. Roti kwaning dabuka, liamupu ning ara, atia. Aroti ara, yanganmapu talak arye, ‘Bisik banamap talak ara, adin dinamapʼ tenen, aroti kwaning ara, nun aik noutam arye, dabuka liamupuba, buppu tuba unmoke. Wininmok bukni, winira akunum moul kibuka selal sebuka, lyubukce, malye kibukak, eipmalume,” nyabik.

¹³ “Tonda, aning atouk, adinmalum anggur mek lin ning babye, winiryuk ning arye liamupue. Bukni, anggun dipdelulume! Akunum kwilikuka malye ubuke. Aning atouk, nun baju ongamupu ning ap, yan sepatu sandal ongamupu ning nirya babye, bisik yangalamupu talak arye, akunum pupun dayukce, malye ubuka atia,” nyabik.

¹⁴ Sik Hewi nang arye ayupu nirya nyabikba, sik Israel deiyok nang arye, anang sik liamik din doprobik. Talye luparabuka doprobik bukni, aning dopropnuyik talak ara, sik ni koproba, Allah Yahweh ati, “Nunda, aning ton doproptibye do? Aning ara, kum do?” nyabuka, kum morobik.

¹⁵ Tonda, Yosua birye, sik Gibeon mutuku arye yanganmek nang, sik Hewi nang ati, ‘E, sikda na kayapu,’ tenebukce, “Wini talak arye diprongobuka, dorunamap talak ara, olana kumce, teleb kibuka neika unamabe,” nyabuka, nyalin yupu ton nyapdeibikce, sik nirya nyapdayike. Winibuk deice arye, “Sik anang ara, kum opnabe,” nyabuk. Atonun, sik Israel nang ati, ninye deiyok talibuka, weik nang nirya arye, “Yo aninguk dipkoprob winipnamabe,” nyabuka, nyalin yupu ton nyapdeipdayik.

¹⁶ Nyapdeipdayikce, Israel nang ap, sik Hewi yala nang ap, nyalin yupu nyapdayik deice arye, “Kum opdanamabe,” nyapdeibik bukni, daunmeka ani, like winilye sum akunum ubukopura, yuk Israel ninye arye dinmeka ani bikikce, yanuka nyabik. “Se, sik Hewi nang ara, Allah arye arepsuk mutuku noutam bukni, otam pera mutuku unyake. Ati, nun ap, sik ap, neika unamabe. Meneng dam aunmalum mutuku nanguk nyalanmaluma,” nyabuka, lake nyabik. Nyabikura, kekebik.

¹⁷ Ati ara, sik Israel ninye arye, ‘Nun asing arye mining dam eipnamabe,’ tenebikce, sik mutuku batakuka, otam mutuku dina ati dabanmeka ani, biyik. Like winilye mabuka, Hewi yala nang, sik ulamik mutuku ara, eibik. Sik daunmek mutuku ara, ani. Ara, Gibeon mutuku ap, Kepira mutuku ap, Beerot mutuku ap, tonda, Kiryat-Yearim mutuku ap, daunmekbuk, Israel nang arye eibik.

¹⁸ Bukni, Israel nang sik Hewi yala nang ati, amutuku ulamik nang nirya ara, kum oplobik. Deiyok ara, sik Israel nang, sik deiyok-deiyok nang arye, “Kume, neika uk, teleb kibuka ubirye, ansinibuka unamabe. Pia kum opdanamabe,” nyabuka, sik ni Allah Yahweh, el si deice arye nyalin yupu akunum nyabika ati, winibik. Tonda, Israel nang ati, pia melibuka kaliklamuk Allah, el si deice arye, nyalin yupu akunum nyabika ati, Hewi yala nang tonok babye, kum obik. Kum obikba, sik talye daunmek Israel nang nirya ara, “Se, anang ara, dipkoprob nun mal olan nang unyak bukni, yata deiyok ati, kum opdanamap do?” nyabuka, malye weik nyanmek.

¹⁹ Nyabuka malye nyanmekopura, Israel nang, sik ninye deiyok talibuka ulamik nang arye, sik awekmek Israel nang nirya ati nyabik, “Kume, Yata wiriptibya kuma! Nunce, ‘Aninye ap olana kumce, teleb kibuka neikauk ansinibuka unamabe,’ nyabuka, nyalin yupu akunum nyabupue. Ara, talye nyaltakan yupu kume. Nun Israel nang ati, pia melibuka kalikisulul Allah, nun ni koproba Yahweh, el si deice arye, akunum nyabupa ati, wini talak ara, nunce ikin ning sik nong deice ton kum deiptibye.

²⁰ Nunce, sik anang ton kum optibye. Deiyok ara, ‘Anang obibiba, Allah arye, yu weik uplirye, nunti ikin ning nun nong deice deipsilirye, wenebuka opsilyakʼ tenena ati, anang ara, kum opnabe. Aninye ara, kamuk unamake. Nunce sik ap, nyalina yupu akunum nyapdapue. Ati, daupmalye, ayupu kum yanipmanto ati, anang ara, kamuk unamake,” nyapdeibik.

²¹ Israel nang, sik deiyok nang arye nyabik. “Kume aninye ara, batakibiba daunamake. Bukni, nun nirya ara, tonok kibibirye, sik anang ati ara yo touna ap, mek kwebuka boyangana ap, talye pil don nanguk unamsiyake,” nyabik. “Anyabupu touk, sikti, ara, wininamabe,” nyabuka, adeiyok nang arye nyabik touk, aninguk winilamik.

²² Ura, aminyan talak ara, Yosua birye, sik Gibeon mutuku ulamik nang, sik Hewi yala nang ati, “Yalulume,” nyapdeibukba, Yosua el damuk yayik. Yayikopura, Yosua birye, sik anang ati nyabuk. “Anggunda, yata deiyok ati, nun dam yanuka, tilila yupu nyapsulumce, ‘Nunda pera mutuku arye yanmabe,’ nyaplopsulum do? Nyapsulumba diba tenebupu bukni, dipkoprob ning ara, mining dam nanguk ululume. Se, yata deiyok ati nyapsulum do?” nyabuka wenebuk.

²³ “Anggunda kunusa aryuk, tilila yupu nyapsulume! Anggunda, talye tilila yupu nyapsulum ati ara, ikin ning anggun nong deice deipsine. Ara ani, Allah arye, anggunti wenepsilirye, supnamsile. Winipsiliba, anggun mutuku unyak nang nirya ara, nun amu tamuk unamake. Winibikirye, yo touna ap, mek kwebuka boyangana ap, ukirye nun ni Allah, el si eren aik damuk, boyanganamake.” Yosua birye, sik Hewi yala nang ati nyabuk.

²⁴ Nyabukura, anang arye tamubuka nyabik. “Nun awinibupu ning deiyok ara, ani. Nun kekelamupuba, nun ni koproba, an si erelyam Allah, el si Yahweh, elce el pil donanye, Musa biti nyapdeiamuk ning ara, ani. ‘Amutuku noutam nirya ara, anggun Israel nang ati arepnamsine. Winipsiniba, wekelbimunyopura, sik amutuku minop talak akunum aunyak ninye ara, obuka sirya dakmunce, alubuka dopropnamlume,’ nyapdeiamuk. Ati, ayupu kekebupurye, ‘Se, winibikirye, nun ton obuka kum kipdeipsikcakʼ tenen, nun ikin kanye bobuka, ilil upsukba, nunce tilila yupu nyapsupe. Dipkoprob aning deiyok ati, nunce winibupe.

²⁵ Bukni wini talak ara, nunce an deice uk deipkepyopura, ‘Nun ni Yosua, ance tenepsiminye touk, talipsiminyeura, unamabe. An babye tenepmalam ning ara, ‘Aning ara telebe, winipnamabe,’ tenepminye ninguk wininalama ati, nun kanye ara, aning ara, telebe uka. Nunda anggun amu tam unamabe,” nyabik.

²⁶ Nyabikura, Yosua birye, nyapdeibukba, sik Israel nang aryuk, anang talibikba, sik amu tamuk unamika ati, sik anang ara, kum obik.

²⁷ Kum oplobik bukni, Yosua birye nyamuk touk, aninye ara, pia ati pil melina ninye uk kipdeibukba, yo touna ap, mek kwebuka delilyangana ap, un ninye uk kipdeibukba, ulamikce, Israel nang melina ati, pil dolamik. Tonda, sik Israel nang malye ulamik ning kilina ati, Allah Yahweh el arena ati, memelamik mesba dam, uku dan yo ap, mek ap delilyangalamik. Aninye ara, atalak arye dipdongobuka, winilamik touk, wini talak abuku sekenyak talak babye, apiluk donyake. Allah Yahweh arye apil dona ati, kintinibuka delilul mutuku nirya ara, apiluk dopra banyake.