Yosua 18 - Eipomek

Allah arye, “Kanaan mutuku dobuka, Israel yala nang ati boknamlyame,” nyapdeiamuk touk, tuku nirya bokuk yupu

¹ Allah arye Israel nang ati, “Amutuku nirya arepnamsine,” nyapdeiamuk mutuku, akunum binuka doprobik talak ara, sik Israel yala nang nirya bulubuka, Silo mutuku uk wekik. Winibikce, amutuku noutam ara, Allah ap, ninye ap epdanuka, Allah el si erena ati, tenda arye dolina aik kintinibuka deibik. Atalak ara, Kanaan noutam nirya ara, anyasik nirya, akunum obisibikce, amutuku nirya akunum dopromika ati, yuk tam nang ton, tonok nang babye, ton kum yanuka warikik. Talya urdem ulamik.

² Bukni atalak ara, Israel yala ninye bukni, sik tekbarye (7) yala nang ton, sik talibuka ulamik mutuku ara, Yosua ap, Musa ap arye akunum bokdeipdik bukni, sik ayala nang ara, abokuka arepdik mutuku ara, min kum binuka doprobike. Talya asukumuk ulamik.

³ Winibikba, Yosua birye, sik atekbarye (7) yala nang ati, nyabuk. “Anggunda, talye daunmalumce, amutuku-amutuku tuku pia moubuka dilinauk ulamunya ani, dan talak arye binuka, amutuku dopromunce, asukumuk binuka unamlum do? Anggun apu yapu arye, si erelamik Allah, el si Yahweh arye, anggunti akunum arepsuk mutuku ara, dopropmoce, kum binuka unamlum do?” nyabuka, sikti, asibuk.

⁴ Nyabukura, ayupu ton nyabuk, “Anggun Israel yala nang, tekbarye yala kan-kan arye, yuk-yuk bukni, winilye nang ton, wibuka deipnulume. Awipdeipnalum nang ara, na Yosua birye, sik anang ati, sikce, ‘Nun Israel nang arye, amutuku talibuka utibyeʼ tenen, mutuku ap, amutuku tuku wililonak nirya ap ara, dipdebuka bamunce, amutuku noutam eipnamlum ning ton, sekmunce, nun dam tamubuka, nyalyanamsululume. Narye anang ati nyapdeipnyeura, dipdebuka eibikirye, tamubuka, na dam lake nyalyanamake.

⁵ Anoutam uamuk tuku ara, adiparyuk wilibuka tekbarye (7) mutuku yuk-yuk kipdeipnamlulume. Ara, Yehuda yala nang ara, sik min arye aunyak touk unamake. Ara, selatan tam ubuk mutuku ara, sik Yehuda nang talibuka unamake. Tonda, utam dabu tam ubuk mutuku ara, Yusuf yala nang min arye aunyaka ati, sikda amutuku talibuka unamake,” nyabuk.

⁶ Sik Israel tekbarye yala nang, talibuka unamak mutuku wilipa nirya ara, anggunce wilipmunce, na Yosua biti, yanuka arepnamnulume. Winipmunyeba, narye, Yata yala nang amutuku dopropnamaka do? Tonda, dan yala nang ton amutuku dopropnamaka do?’ tenen, narye lake bikilin ning, el si ara Undi, dopneba, Allah ati asipnyeura, Allah arye, ‘Sik ayala nang arye talibuka unamak mutuku ara ani,’ nyaplyopura eibibirye, ‘Sik unamak mutuku ara anyakaʼ tenen, biknamabe.

⁷ Bukni, sik Lewi yala nang ara, sik kayapu, yuk Israel yala nang mutuku dopropmak touk, sik Lewi yala nang ara, sik talibuka una ati, tuku ton kum dopropnamake. Deiyok ara, sik anang pil dona ara, Allah Yahweh el si eren aik pum tam, pil donyaka ati, sik dopropnamaka ara, aning uka. Imam-imam nang unamak yala ara, sik Lewi yala nang arye, tuku ton dolona kume. Tonda, Gad yala nang ap, Ruben yala nang ap, tonda Benyamin yala nang arye bokukabikce, sik talibuka, una ati tuku ara, min arye keting panalyangan tam, Yordan mek koubuka, otam uamuk mutuku uk, akunum doprobik. Ara, Allah el pil donanye, Musa birye amutuku ara, akunum bokuka areamukba, doprobik.

⁸ Ayupu sirya nyabukura, Yosua birye, sik tekbarye (7) yala nang arye, yuk-yuk bukni, ninye winilye wipdeipmik nang ati, “Anggunda aning-aning nirya talibuka, omutuku tuku dina ati, pil dolbinululume,” nyapdeibuk yupu ara, ani. “Anggunda, amutuku urasin nirya, dipdebuka binamlume. Dipdebuka bimunyaka arye, amutuku tuku wilinak babye, bikmunce, sekdopnululume. Sekmunye ning ara, anggun tamubuka, na damuk yanuka, aseknamlum ning arepnamnulume. Winipmunyeba, Silo mutuku ara, ‘Yata nang arye amutuku dopropnamaka do?’ tenen, narye Allah ati asipniba, Allah arye, lake kipdeiplyeba, ‘Anggun ayala nang talibuka unamlum mutuku ara ani,’ nyapdeiplyeura, eibibirye biknamabe.” Yosua birye ayupu nyabukopura, sik awinilye nang wipdeibik nang aryuk, Yosua nyapdeibuk touk, sik anang arye, amutuku noutam urasin el lina ati dilbiyik.

⁹ Sik atekbarye nang arye, amutuku urasin nirya dipdebuka biyikce, amutuku noutam uamuk ning nirya ara, tekbarye mutuku wilibuka bokolonak babye, nirya si sekdobik. Tonda, amutuku asik pia weik dolamik noutam nirya babye, akunum si sekdobik. Sekdobik ning ara, tekbarye bokukabikce, sik anang ara, tamubuka, Silo mutuku Yosua unmokak uk yayik.

¹⁰ Sik anang tamubuka, yayik talak ara, Yosua birye, ‘Yata yala nang arye, amutuku dopropnamaka do?’ tenen, Allah Yahweh dinmok sukum arye, bikilin ning el si undi deice arye, ayala-ayala nang nirya ati ara, Allah arye undi ning dobukba, adeice arye, ‘Dan tam nang arye, amutuku arepnyeura, dopropnamaka do?’ tenen, Yosua birye winibuk deice arye, tekbarye yala nang ati, Allah elce kintinibuka, arebuk mutuku ara bikik. Akunum bikik ning ara, Israel yala nang, sik talibuka una ati, tuku ton pia kum dopromik nang ara, Yosua birye amutuku bokuka arebuk.

Benyamin yala nang arebuk, tuku ati, nyabuk yupu

¹¹ Minopce sik unamik mutuku bokuka arebuk nang ara, Benyamin tam nang ara, sik yala yuk-yuk ulamik bukni, sik mapu nirya ati arebuk. Ayala nang, sik duweit nirya ati, arebuk mutuku ara, Yehuda yala nang ap, tonda Yusuf yala nang ap, sikti, areamukba, ulamik mutuku, dana-dana ulamika noutam uamuk mutuku, bokuka arebuk.

¹² Sik Benyamin yala nang, sik tuku doprobik ning ara, deice tam ara (ara utara), tuku wililamik ati ara, Yordan mek koubuka, otam arye, bulubuka welebukabikce, leibuka, deice tam (ara utara) bukuk asik, Yeriko mutuku lilun, deice tam (ara utara), itam banmeka ani, keting kumulban tam ubuk mutuku, iknapye tam kibuka, banmeka ani, mutuku ara, Bet-Awen mutuku tam dipdongobuka bukamuk.

¹³ Amutuku arye, dipdongobuka binmeka ani, outam (ara selatan tam), Lus mutuku lilun nirya babye dobike. (Lus mutuku atibuk, yuk si ton si nyalamikce, Betel mutuku nyalamik.) Alus mutuku arye koulukuka, Atarot-Adar mutuku ara, utam (ara selatan tam) bukuk mutuku tam babye dobike. Ara, Bet-Horon-Hilir mutuku tam arye kibuka, outam binuka wilipdopnamlume.

¹⁴ Amutuku bukni, sik mutuku tuku wililongonak ara, iknapye tam (ara selatan tam) banmeka ani, keting kumulban tam ara, weik mutuku tuku deice bukamukak, atam bukni, otam, mutuku si Kiryat-Bahal asik ton dolamik. Asukum arye, dipdongobuka iknapye tam ton, (ara selatan) tuba banmeka ani, Kiryat-Bahal mutuku dam dipdongobuka binamuk. (Ura, Kiryat-Bahal asik ton si ara, Kiryat-Yearim mutuku ton nyanyake.) Amutuku biyukce, tamubuka selatan tam binuka, dipdongopnamlule. Ara, Yehuda yala nang, sik mutuku tuku kina atia. Ara, keting kumulban tam mutuku tuku wililonak ara, Anyapdeibuk touk uamuk.

¹⁵ Benyamin yala nang arye, doprobik mutuku ara, selatan tam mutuku tuku wilina ati, bulubuka wekna, asik el si Kiryat-Yearim mutuku, ara, keting kumulban tam kup-kup arye, dipdongobuka binmeka ani, Me-Neftoah mutuku mek pu tam nirya, binuka doprobik.

¹⁶ Me-Neftoah mutuku deiyok dam arye, koulukuka, Hinom lu mutuku tam ap, dipdongobuka mutuku lilun tam buk, utam dabu mutuku tam ara, Refaim lu mutuku ubuka dam arye, binuka sekdobik. Akunum winibuk ning ara, otam mutuku (ara selatan) tam tuku wililonak ara, Hinom mutuku, lu arye diprongobuka, binamuka ani, Yebus yala nang ulamik mutuku lilun ap, anyapce ubuka, En-Rogel mutuku tam nirya dobuk.

¹⁷ Anyaka uk dipdongobuka (ara utara) dabu tam ara, En-Semes mutuku dipdongobuka, balamikak anyapce, Gelilot mutuku biyuk. Amutuku ara, atam ulamuk bukni, otam urasin tam ara, Adumim mutuku bisik welena otam biyuk. Aning ara, dabu mutuku tam, wilina ati ara, Bahan keil bukuk bisik noutam arye, binuka sekdobuk. (Bahan keil nyanyaka deiyok ara, Ruben birye deiamuk mi, el si Bahan ulamuka ati nyalamik.)

¹⁸ Amutuku bukni, utam, dabu mutuku tam, Yordan mek duman otam bukukce, kanilbana ati, mutuku si Bet-Araba biyuk. Amutuku lilun nirya ara, tuku wilibuka binamuka ani, koulukuka amutuku banak binuka, dukdongobuk.

¹⁹ Asukum arye, deice tam, utam dabu mutuku tam bukdanin, biyuk mutuku lilun nirya arye, dipdongobuka, binamuka ani, Bet-Hogla mutuku biyuk. Tonda, anyapce ubuka sik tuku sirya ara, utam dabu tam bukni, weik laut mekwen bana kumce, pia aubuk laut mekwen dam tam, Yordan mek duman ara, mek binuka dalyayukak arye, binuka sekdobuk. Selatan tam tuku wilinak ara, amutuku noutam arye bokdeibik.

²⁰ Benyamin yala nang arye, doprobik mutuku ara, otam keting panalyangan tam, mutuku tuku bokolonak ati ara, Yordan mekin arye, binuka sekdobuk. Amutuku nirya ara, Benyamin yala nang, sik duweit arye, talibuka ulamik mutuku ati, dana-dana tam nirya bokuka arebik.

²¹ Benyamin yala nang, sik duweit nirya arye, weik asik dobuka, ulamik mutuku doprobik ning ara, ani. Obarye mutuku asik dolamik. Amutuku noutam ara, mitik asik babye adolamik. Adoprobik mutuku si ara, ani. Yeriko mutuku ap, Bet-Hogla mutuku ap, Emek-Esis mutuku ap,

²² Tonda, Bet-Araba mutuku ap, Zemarahim mutuku ap, Betel mutuku ap,

²³ atouk tonda, Hawim mutuku ap, Para mutuku ap, tonda Ofra mutuku ap,

²⁴ Kefar mutuku ap, Hamomai mutuku ap, Ofni mutuku ap, tonda Geba mutuku bukamukba, amutuku noutam, asik dobuka ulamik. Amutuku nirya ara, dua belas mutuku (12) uamuk.

²⁵ Tonda, empat belas (14) asik dolamikak ton doprobik. Aweik asik dolamika noutam ara, mitik asik babye, atouk dolamik. Amutuku si ara ani. Gibeon mutuku ap, Rama mutuku ap, Beerot mutuku ap,

²⁶ Mizpa mutuku ap, Kefira mutuku ap, Mosa mutuku ap,

²⁷ Rekem mutuku ap, Yirpeel mutuku ap, Tarala mutuku ap,

²⁸ Zela mutuku ap, Elef mutuku ap, (ara Yebus yala nang ulamik sukum atia. Amutuku si ton Yerusalem nyalamik.) Tonda, Gibea asik ap, tonda Kiryat-Yearim asik ap doprobik. Amutuku nirya ara, Benyamin yala nang, sik duweit nirya, pia talibuka ulamik mutuku ati, bokuka arebukba doprobik.