Yosua 16 - Eipomek

Manasye yala nang ap, Efraim yala nang ap, sik talibuka ulamik mutuku ati arebuk tam ara, keting kumulbalamle mutuku tam arebuka ati, nyabuk yupu

¹ Yusuf el mapu arye deibikba, deipdanin balamik nang ara, sik ulamik mutuku bokuka dolona ati, Allah arye sikti, ‘Amutuku tam talibuka unamakʼ tenen, kintinibuka arebuk. Arebuk mutuku tam wililamik ara, “Winiplulume,” nyapdeibuk. Amutuku wilinak ara, Yordan mekin otam, Yeriko mutuku arye dipdongobuka binamuka ani, keting panalyangan tam, bilamuk mek pu nirya ap, tonda, mek wenenga kan-kan ap, binuka doprobik. Ara, Yeriko mutuku arye, eitam weik mutuku bulbiyukce, Betel mutuku dup binuka, dukdongobuk mutuku nirya dopromik.

² Amutuku wilinak ara, Betel mutuku arye binuka, dukdongopbuka biyukce, Lus mutuku tam dinikilbiyuk. Adinibuka, otam mutuku, Atarot mutuku bisibuka, Arki yala nang ulamik mutuku bisik balamik tamuk, binuka eibik.

³ Tonda, Arki yala nang ulamik sukum arye, koulukuka balamika ani, keting kumulban tam, Yaflet yala nang, sik ulamik mutuku ara, Bet-Horon-Hilir mutuku binamikce, dipdukdongobuka, Gezer mutuku binuka, sirya ara, weik laut mekwen deiamuk dam binuka doprobik.

⁴ Tonda, amutuku ara, Yosua birye Manasye yala nang ap, Efraim yala nang ap, ati bokuka arebuk. Sik abitinye yala nang ara, Yusuf birye deiamuk nang ulamdik. Ati, ‘Sik ayala nang talibuka unamakʼ tenen, amutuku ara, bokuka arebukba, sik Manasye yala nang ap, Efraim yala nang ap arye doprobik.

Efraim yala nang ati, amutuku bokuka arebuk yupu

⁵ Efraim yala nang, sik tam nang yala yuk-yuk ulamikto nirya ara, sik bona talibuka ulamik mutuku wilinak ara, keting panalyangan tam, Atarot-Adar mutuku arye, dukdongobuka, eitam binamuka ani, Bet-Horon-Hulu binuka dukdongamuk.

⁶ Anyapce, dukdongobuka binamuka ani, utam dabu tam, ubuk mutuku weik mekwen Laut Tengah dam dinikildongolbinamuk mutuku, doprobik. Eitam, amutuku wilinak ara, Mikmetat mutuku bukamuk. Tonda, weik mekwen laut deibuk sukum nirya ara, binuka doprobik. Tonda, keting panalyangan tam, mutuku wilin sukum ara, ila tamubuka, otam Taanat-Silo mutuku tam, bisik binamuka ani, asukum arye dipdongobuka, keting panalyangan tam bukni, Yanoah mutuku tam binuka doprobik.

⁷ Amutuku arye diprongobuka, kolukuka binamuka ani, Atarot mutuku ap, Naharat mutuku ap, binuka dukdongobikce, anyapce Yeriko mutuku binukabikce, sirya ara, Yordan mekin dam binuka dolamik.

⁸ Tonda, keting kumulban tam, Efraim yala nang sik mutuku wilinak ara, Tapuah mutuku arye dukdongobuka, binamuka ani, Kana mekin binuka weik mekwen laut noutam arye, bokuka arebuk. Amutuku nirya ara, Efraim yala nang, sik mapu silip nirya ati, bokuka arebukba, sikce talibuka ulamik mutuku ati sekibik.

⁹ Amutuku noutam nirya ara, weik asik dolamik ning ap, mitik-mitik asik dolamik ning nirya ara, Manasye yala nang, sik mutuku noutam ulamik nang ara, sik Efraim yala nang ap, sik mapu silip ulamik touk dobuka, arebukba doprobik.

¹⁰ Amutuku-amutuku ninye nirya obukce, tuku alabuka doprobik bukni, Efraim yala ninye arye, Kanaan mutuku ulamik nang, sik mutuku si Gezer nang ara, amutuku noutam ulamik nang, ton obuka kum yakdonokamik. Ati, minop talak arye diprongobuka, anoutam talak ap, akaren babye, sik Gezer mutuku ulamik nang ara, tuba aunyake. Efraim yala nang ap, sik neika dukdongobuka ulamik. Bukni, sik Efraim yala nang arye, Gezer yala nang ati, ‘Nun weik pil talye dopsululume,’ nyabuka aruklamikba, Gezer yala nang arye, ikin kanye bobuka, pil weik dobuka ulamik touk, wini babye tuba unyake.