Yosua 12 - Eipomek

Israel deiyok nang arye, yuk mutuku ninye deiyok nang obuka, dakik ati, nyabuk yupu.

¹ Asekip nun ning ara, amutuku deiyok nang talibuka ulamikbuk, Israel ninye arye obukabikce, talibuka ulamik mutuku ara, ani. Yordan mek koubuka, otam keting panalyangan tam, lu mutuku Arnon mek pudam arye dipdongobuka, anyapce, ubuka welebuka, Yordan mek banak diprongobuka, yuk pera mutuku utam, weik mutuku dup, el si Hermon. Tonda, otam biyikce, keting panalyangan tam ton, amutuku nirya ara, sik Israel ninye arye doprobik. Ara, ninye deiyok nang Raja bitinye arye, talibuka ulamdik mutuku ara, obikce doprobik.

² Aobik ninye deiyok nang, sik Raja-Raja nang sik si ara, ani. Tonoknye bira, Amori nang sik deiyoknye Sihon, elce talibuka ulamuk mutuku ara, Hesyebon mutuku ulamuk bukni, el ninye deiyoknye talibuka una ati ara, Aroer mutuku taleamuk. Elda, Gilead tam dana-dana ton bokuka, talibuka ulamuk. Anyapce ubuka, Aroer mutuku taleamuk, (ara Arnon mek irikna tam nirya), amutuku banak nirya arye, diprongobuka, pera karin mutuku noutam, Yabok mek kin tam, alu mutuku ton taleamuk. Tonda, sik Amon yala nang ulamik tam wililamik dam nirya ara, elcuk taleamuk.

³ Tonda Yordan mek banak diprongobuka, otam keting panalyangan tam arye diprongobuka, Galilea mekwen kup-kup tam arye ubuka, eitam Bet-Yesimot mutuku ton doprobik. Bet-Yesimot mutuku ara, anyak arye diprongobuka, keting panalyangan tam mutuku ara, weik laut mekwen, el si ara Laut Mati, deiamukak nirya, anyapce diprongobuka, weik mutuku, el si Pisga mutuku, amu tam nirya ara, doprobik.

⁴ Tonda, asukum arye dipdongobuka, yuk ninye deiyoknye ton, el si ara Raja Og, elce Basan mutuku nirya ara taleamuk. Elce deiyok kibuka ulamuk mutuku ara, Asytarot mutuku ap, Ederei mutuku ap taleamuk. Aninye mitik tonunuk ulamik ara, Refaim yala nang ulamik. Refaim ninye ara, yuk mutuku tam ton kum ulamik.

⁵ Amutuku nirya taleamukce, ulamuk mutuku ara, Hermon mutuku ap, Sikha mutuku ap, Basan mutuku nirya diprongobuka, pera mutuku tam, Gesur mutuku ulamik nang ap, Maakha mutuku noutam ulamik nang ap, taleamuk. Tonda, Gilead mutuku bukni, dana tam tonokuk taleamuk. Asukum arye, ubuka pera weik mutuku ninye deiyoknye, Raja Sihon, elce taleamuk mutuku deiyok ara, Hesyebon mutuku arye taleamuk.

⁶ Allah Yahweh, el pil donanye Musa ap, elce taleamuk nang, sik Israel yala nang ap arye, sik abitinye nang ara, ninye deiyok nang, Raja Sihon ap, Raja Og ap obik. Obik ning ara, aninye deiyok nang arye, taleamdik mutuku nirya ara, Allah Yahweh arye, el pil donanye biti arebukba, Musa birye, amutuku nirya bokuka, ‘Amutuku ara, pia talibikirye, pia aunamakʼ tenen, sik Ruben yala nang ap, Gad yala nang ap ati arebuk. Aning atouk, dantam ton bokuka, Manasye tam nang ton, bokuka arebuk. Winibukba amutuku ara, sik mutuku koproba, kibuka ulamik.

Yosua birye obuka, sirya dakuk nang ati, nyabuk yupu

⁷ Yosua ap, el yin talena nang ap, sik Israel nang ap nirya arye, obuka sirya dakik ninye deiyok nang ara, ani. Ara, Yordan mek koubuka, otam keting kumulban tam talibuka ulamik ninye deiyok nang ara, Bahal-Gad mutuku arye diprongobuka, Libanon mutuku ban sukum arye diprongobuka, eitam iknapye tam mutuku arye ubuka, Edom tam bukni, weik mutuku, Seir mutuku nirya taleamuk. Amutuku ara, Yosua birye bokukabukce, Israel nang yala-yala yuk-yuk aulamik touk, arukukba, sik mutuku kibuka ulamik.

⁸ Amutuku dam arye, bukamuk mutuku ap, Yordan mek dam, otam keting kumulban tam ap, amutuku-amutuku tam bukamuk mutuku nirya ap, tonda amutuku kon nirya bukni, keting panalyangan tam nirya ara, doprobik. Tonda, eitam mutuku nirya ap doprobik. Atonun, Negeb mutuku ton ap doprobik. Amutuku ara, Het yala nang ap, Amon yala nang ap, Kanaan yala nang ap, Feris yala nang ap, Hewi yala nang ap, Yebus yala nang ap, anang uk amutuku talibuka ulamik.

⁹ Amutuku nirya ara, moubuka taleamik bukni, obuka sirya dakik ninye deiyok Raja nang ara, yupa pia weik tiga puluh satu (31) ninye deiyok nang arye, talilamik. Aninye deiyok Raja nang arye, talilamik mutuku ap, sik si ara, ani. Ara, Yeriko mutuku deiyoknye bira, tonok taleamuk. Ai mutuku arye dipdongobuka, Betel mutuku otam nirya babye, tonoknye dem aryuk taleamuk.

¹⁰ Yerusalem mutuku taleamuk ninye deiyoknye Raja bira, el tonok arye taleamuk. Tonda, Hebron mutuku ninye deiyoknye, Raja babye, tonoknye dem aryuk taleamukbuk obik.

¹¹ Yarmut mutuku taleamuk ninye deiyoknye Raja ap, tonda, Lakis mutuku babye, tonok ninye deiyoknye, Raja biryuk taleamuk. Sik anang nirya ara, obik.

¹² Eglon mutuku taleamuk ninye deiyoknye, Raja babye, tonoknye dem aryuk taleamuk. El ap, Geser mutuku ap ara, tonok ninye deiyoknye, Raja elcuk taleamuk. Aninye deiyok nang nirya ara, oltakana uk ulamik.

¹³ Debir mutuku ninye deiyoknye, Raja babye, tonoknye biryuk taleamuk. Elcuk, Geder mutuku babye, ninye deiyoknye Raja, tonoknye dem aryuk taleamuk. Sikce amutuku-amutuku talilamik nang babye, olbisina uk ulamik.

¹⁴ Horma mutuku taleamuk ninye deiyoknye Raja ara, tonoknye elcuk taleamuk. Arad mutuku babye, tonoknye biryuk, weik deiyoknye, Raja kibuka taleamuk. Sik babye ton, oltakna uk ulamik.

¹⁵ Libna mutuku ninye deiyoknye, Raja tonoknye aryuk talibuka ulamuk. Adulam mutuku babye atouk, tonok ninye deiyoknye, Raja aryuk taleamuk. Anang babye, olbiyik.

¹⁶ Makeda mutuku babye, tonoknye elcuk ninye deiyoknye Raja kibuka, ulamuk. Ninye deiyoknye ulamuk mutuku, atouk Betel mutuku babye, ninye deiyoknye Raja ara, tonoknye elcuk talibuka ulamuk. Aninye deiyok nang nirya babye, olbiyik.

¹⁷ Tapua mutuku deiyoknye, tonok ninye deiyoknye Raja ulamuk. Heper mutuku babye, ninye deiyoknye Raja tonoknye, elcuk talibuka ulamuk. Sikce amutuku-amutuku talilamik nang babye, olbiyik.

¹⁸ Afek mutuku noutam Raja nang ara, tonok-tonok nanguk, talibuka ulamik. Lazaron mutuku babye, ninye deiyoknye Raja ara, tonoknye biryuk taleamuk. Amutuku-amutuku taleamik nang babye, oltakana uk ulamik.

¹⁹ Madon mutuku babye, ninye deiyoknye, Raja tonoknye, elcuk taleamuk. Hasor mutuku nirya ara, tonok ninye deiyoknye Raja, elcuk taleamuk. Amutuku-amutuku taleamik nang babye, oltakana uk ulamik.

²⁰ Simron-Meron mutuku ap, tonok ninye deiyoknye, Raja birye taleamuk. Akhsap mutuku babye, ninye deiyoknye Raja bira, tonoknye biryuk taleamuk. Amutuku-amutuku taleamik nang babye, oltakana uk ulamik.

²¹ Taanak mutuku ton, ninye deiyoknye Raja bira, tonoknye el dem taleamuk. Tonda, Megido mutuku babye, ninye deiyoknye Raja tonoknye, elcuk taleamuk. Amutuku-amutuku taleamik nang babye, oltakana uk ulamik.

²² Kades mutuku ton, ninye deiyoknye Raja babye, tonoknye dem arye taleamuk. Tonda, Yokneam mutuku ara, Karmel mutuku ninye deiyoknye Raja tonok ara, elcuk taleamukbuk olbiyik.

²³ Dormutuku deice ara, ninye deiyoknye Raja kibuka, taleamuknye bira, el tonok aryuk, Napat dormutuku ulamukce, taleamuk. Tonda, Goyim mutuku ap, ninye deiyoknye Raja kibuka, Galilea mutuku taleamuk. Amutuku-amutuku taleamik nang babye, oltakana uk ulamik.

²⁴ Tonda, sirya ara, Tizra mutuku ninye deiyoknye Raja ara, tonoknye biryuk taleamuk. El anye babye olbiyik. Winibuka ninye deiyok nang taleamika ati, anirya ara, tiga puluh satu (31) Raja nang arye taleamik. Sik nirya babye, adiparyuk oltakna uk ulamik.