Yosua 1 - Eipomek

Allah el si Yahweh arye, Yosua biti, “Kanaan mutuku bimince, talipnalyame,” nyapdeiamuk yupu

¹ Allah el si Yahweh, el amu tam pil dolamuknye, Musa akunum dibukopura, Allah arye, Musa el pununanye Yosua biti, nyabuk. Musa min kum dipmok talak ara, Yosua el pil melinanye ulamuk. Yosua el li koproba ara, el si Nun ulamuk. Allah el si Yahweh arye, Yosua biti nyabuk.

² “Na amu tam pil dolamnuknye, Musa akunum dipmala anya arye, adipmala ati ara, an ap, na mapu Israel ninye nirya ara, atalak ara kintinibuka, Yordan mek koubuka, otam mutuku bana ati, dinmamunce, anggunti nyamse mutuku arepnamsina ati, weknalume.

³ Yosua an ap, Israel nang nirya ap, yanibuka binamlum mutuku ara, aning nirya arepnusine. Ara, narye Musa biti, akunum nyapdeiamse touk, winipnamsine.

⁴ Anggun mutuku ara, atam mek kum mutuku anyapce, deice tam Libanon mutuku iknapye tam arye, dipdongobuka arepnamsine. Tonda anggun mutuku ara, keting yangan tam, weik mek si Efrat mek, dara tam anyapce, keting wekelban tam, sik Het yala nang unyak mutuku nirya ap anyapce, weik laut mekwen otam, keting wekelban tam nirya ara, anggun mutuku ati arepnamsine.

⁵ Tonda, Yosua an kam unalam talak nirya ara, tonoknye babye anti, kum opyaknamkile. Narye Musa meilyamse atonun, anti pia melipnamkine. Narye anti, pia kum bataknamkine. Neika ubirye, pia melinamsine. Tonda, anggun batakuka, yukak kum binamne. Neika uk unamabe,” Allah arye, Yosua biti nyabuk.

⁶ Nyabukce, ayupu ton dukdongobuka nyabuk. Ati ara, an adiparyuk dib tenebuka, ilil pia kum aniryuk, mikip arye Israel ninye, sik deiyoknye kipminyeba, anang bobuka, na arepnamsin mutuku bobiminba, dopdopnamake. Narye anggun apu yapu nang ati, ‘Amutuku arepnamsine,’ nyapdeiamse mutuku binamluma ati, nyapkine.

⁷ Ati ara, an adiparyuk dib tenebuka, ilil una pia kum diparyuk, mikip arye unamlyame. An adiparyuk, dib tenebuka kalikdaminye deice arye, na yupu moubuka talinamlyame. Ara, na pil donanye, Musa birye arepkuk yupu, narye, ‘Wininamlume, aning ara, kum wininamlume,’ nyapdeipse yupu, moubuka dobolbanamlulume. ‘Yuk bisik binuyap’ tenen, ayupu batakuka, kwanim tam bisik babye, diksukum bisik babye, kum binamlulume. Tonok babye, ton kum batakminyopura, an ap, sik Israel ninye ap, banamlumak nirya ara, telebuk unamlume. Na yupu batakmunyopura, kume, pia ikinuk unamlume.

⁸ Narye, ‘Anng wininamlume. Aning ara, pia kum wininamlulume,’ nyabuka, mem yupu nyapsiba, Musa sekamuk yupu ara, Yosua an ap, na mapu Israel nang ap, ‘Deiyok ning nirya kel biknamabe’ tenen, moubuka teninamlume. Ara, keting noutam babye, lukunyan babye, na yupu moubuka teninamlume. Winipminyopura, asekuk ning atonun winipmunyopura, anggun wininamlum ning ara, telebuk kipnin banamsile. Ara, anggunce aning-aning, ayala-yala nirya dopropnamlulume. Tonda anggunce, ‘Winiptibye’ tenen, kiklipdenamlum ning nirya ara, telebuk kipnamle.

⁹ Narye akunum nyapkise touk, pia teninamlyame. Ara, an adiparyuk, dib tenebuka, ilil pia kum aryuk, mikip arye unamlyame. Ilil una meme. Pia kanye lamapdongobuka unamlyame. Tonda, ikin upkiliba, ‘Se, na tuba kum winiptinye’ tenen, kanye mitang upkiliba, kanye talima lik una kume. Anggun binamlum mutuku nirya ara, nara Yahweh, anggun ni Allah, na si Yahweh arye melipsinirye, pia kalikinamsina ati, anggun ilil una ap, lik tenena ap, meme. Allah arye, Yosua biti nyabuk.

¹⁰ Nyabuka ati ara, Yosua birye Israel ninye, sik yupu lipsisikuka, bokolin nangak nyabuk.

¹¹ “Israel ninye, sik doltakna aik dam nirya bamince, ayupu nyapnulyame. Anggun ning ayala-yala nirya, kintinibuka deipnamlulume. Wini talak arye, diprongobuka, lik winilye sum akunum uplyopura, Yordan mek koubuka, otam keting yangan tam, omutuku wekelbinamabe. Allah el si Yahweh arye, nyapdeiamsuk mutuku arepsilyopura, binuka wekibirye, dopropnamapa ati, anggun ning kintinibuka deipnamlume. Amutuku ara, pia talinamap atia,” Yosua birye, Israel ninye, sik deiyok nang ati nyabuk.

¹² Yosua birye nyabuk bukni, sik Ruben yala nang ap, Gad yala nang ap, tonda Manasye yala nang bukni, noutamak arye bokuka, wilyamuk nang ati nyabuk.

¹³ “Anggun tenipnamlulume. Allah el si Yahweh, el pil donanye, Musa birye anggunti, akunum nyamuk yupu ara, luba kina kume. Anggun wini talak aunamalumak ap, Allah arye arepnamsilak ap, Kanaan mutuku nirya ara, anggun dikdik sena ap, una ap ati, anggun ni Allah, el si Yahweh arye, amutuku dobuka, talye urdem akunum areamsuke.

¹⁴ Ati ara, anggun kilapu nirya ap, mapu nirya ap, sik wein ning nirya ap, Yordan mek koubuka, otam keting wekelbalamle tam, kum binamake. Asukumuk, keting yangan tamuk, Musa arye areamsuk mutuku uk, unamake. Bukni, anggun yala nang noutamak arye, ninye mikip-mikip nang, oldana ati yin bobuka, banyak nang ara, Yordan mek otam, keting wekelbalamle tam, minopce binamake. Sik menekuka bace ani, anggun kwit capu nang, yuk yala nang nirya ara, anggun aminyan tam yanganamake. Deiyok ara, anggun kwit capu nang, Yordan mek koubuka, keting wekelbalamle tam binamica ati, melibuka kalikinamluma ati nyapne.

¹⁵ Anggun kwit capu ati, melilamunyebuk, Allah arye anang ati melipliba, sikce sik dopropnamaka mutuku, akunum bisibuka doprobicopura, anggun ni Allah, el si Yahweh arye, anggun kayapu ati, dikdik sen talak areplyopura, atalak aryuk, anggun mutuku tamubuka binamlume. Ara, Musa birye, areamsuk mutuku, Yordan mek koubuka, otam keting yangan tam tamubuka binamlume. Anggun ni Allah, el si Yahweh arye, anggun bidamnye ati, dikdik sena talak areamsuk touk, anggun kwit capu nang ati, arepnamle. Akunum areplyopura, anggun mutuku tamubuka bana telebe.” Yosua birye, sik ayala winilye nang ati, nyabuk.

¹⁶ Yosua birye nyabukopura, sik Ruben yala nang ap, Gad yala nang ap, tonda Manasye yala nang noutamak, bokuka wilibik nang ap arye, Yosua biti tamubuka nyabik. “Telebe, ance nunti, yata pil yala arepnamsilam ning ara, nunce dukdongobuka, pil donamabe. Tonda, ‘Amutuku bilulume,’ nyapsiminyopura, amutuku uk banamabe.

¹⁷ Nunce Musa nyapsuk yupu kekelamupu atonun, an yupu babye kekepnamabe. Winipnamap bukni, nun patapsilye ning ara, Allah el si Yahweh arye, Musa melilamuk atonun, ‘Yahweh arye an damnye biti, melinamkile’ tenen, patasulule,” nyabik.

¹⁸ Nyabikopura, ayupu ton nyabik. “Yatanye do nirya, ance, ‘Winiplulume,’ nyabuka nyapminye yupu, kum kekeplirye, yaniplinye bira, nunce wenebuka oplopnamabe. Winipnamap bukni, anda ilil una kum aryuk, mikip aniryuk, Allah el pil dobuka unamlyame,” nyabik.