Yohanes 11 - Eipomek

Lazarus dipmokak, Yesus arye kam bukeibuk yupu

¹ Atalak noutamak ara, tonoknye el si ara Lazarus, uk weik dilamuk. Lazarus el mutuku koprop ara, Betania mutuku. Lazarus el weit kilapu ara, Maria ap, Marta ap ulamrik.

² Uk dilamuknye Lazarus, el weit kil Maria ara, yuk kil kume. Ara, mince nintong teleb mek dobuka, Yesus el nong deice dikeibukce, akil el cang potong talibuka, Yesus el yan deice kilyamuk kil binya.

³ Sik du koprop Lazarus uk weik talyamukba, dipmanto ulamuka ati, akilapu bitinye arye, Yesus ati yupu nyapdeiprik. Ara, “Naio, ance kanye deililyamnye Lazarus ara, uk weik talipmale,” nyabuka yupu nyapdeiprik.

⁴ Nyabuka nyapdeiprikura, yuk nang arye, Yesus dam binuka laka nyabikura, kekebuk. Yesus arye ayupu kekebukce, nyabuk. “Auk talipmal bukni, Lazarus kum dipnamle. Kume, auk dinmala deiyok ara, ‘Allah el Mi Koprop arye mambul pil doliba, ninye eibikirye, se anye bira weik mambul’ tenen, ‘El si erepnamak’ tenen, auk talilule. Allah el weik mambul ulya ap, weik mambul pil dopnamle ning ap eipnamlume. Tonda, ‘Auk talipmalye talak noutamak arye, Allah el Mi Koprop arye pil dopnamle deice arye, ninye arye Allah el si babye ereipnamak’ tenenauk talipmale,” Yesus arye nyabuk.

⁵ Yesus arye Marta ap, el weit kil Maria ap, sik du koprop Lazarus ap, weik arye bico tenelamuk.

⁶ Sik nirya ati bico tenelamuk bukni, anang arye, “Lazarus ara weik uk talipmale,” nyabuka, yupu laka nyalbiyik talak ara, Yesus kekebuk bukni, el unmok akuk, liki bitinye sum tonap mapmok.

⁷ Liki bitinye sum tonap akunum ubukba, Yesus arye el wipdeiamuk nang, sik 12 nang ati nyabuk. “Nun nirya tuba tamubuka tonap Yudea tam tamubuka binuyabe,” nyabuk.

⁸ Bukni, Yesus el mapu arye, “Kume, Naio. Winiryuk talak ara, sik Yahudi deiyok nang arye anti, ‘Anye opnuyap’ tenen, keil dobuka kintinipmek bukni, anda ‘Tamubuka binune,’ tenepmalama ara yata ati do?” nyabik.

⁹ Nyabikura, Yesus arye tamubuka domon yupu deice arye nyabuk. “Berentam talak arye diprongobuka keting dukduk ap, inin talak ap, keting kum ulamle talak noutamak ara, keting 12 jam usulule. Yatanye do nirya, keting dukduk noutamak bisik balinye bira, keting dirina deice arye, balule. Anye bira keting dirinarye, dilirye, balula ati, yan dum kum dukulule.

¹⁰ Bukni, lukunyan noutamak balinye bira, dirina kum ulula ati, bisik balibuk, yan dum dukliba, pulbalule.” Yesus domobukce, nyabuk.

¹¹ Nyabukopura, ayupu ton nyabuk. “Nun kwit koprop Lazarus ara, mapmal bukni, narye elti, kam bulilbinune,” nyabuk. (Ara, Lazarus dipmok ati, Yesus arye, “Lazarus mapmale,” nyabuk)

¹² Nyabukura, el mapu 12 nang arye moubuka tenena kum arye, nyabik. “Naio, Lazarus uk talipmala ak, mapmalyani, adeice arye aminyan talak mitik teleb upnamale,” nyabik.

¹³ Yesus ara, el kwit koprop Lazarus akunum dipmok ning ati, “Mapmale,” nyabuk bukni, el mapu sik 12 nang ara, ‘E, ara talye mapmala ati, nyapsile’ tenen, moubuka kum tenebikce, walwal arye nyabik.

¹⁴ Sik walwal arye nyabikura, Yesus arye laka nyabuk. “Nun kwit koprop Lazarus ara ambusum arye dipkoprop akunum dipmoe.

¹⁵ Dipmok bukni, anggun kel bikna ati, el dipmo talak ara, na ap el dam kum unmanua ara, na kanye deipne. Ara, talya ati kum nyapne. Na mambul pil dopnyopura, ‘Anggun dib tenepnamlum’ tenen, nyapsine. Winira, Lazarus el dam binuyabe,” Yesus arye nyabuk.

¹⁶ Nyabukura, tonoknye el si ara, bitinye Tomas ton nyalamike. Tonda Didimus, nyalamiknye birye, ‘Malye nang arye, Yesus opnamak’ tenen, nyabuk. “Na kayapu, nun ap, nun ni koprop Yesus ap neika binuyabe. Yu nang arye, el obicopura, nun babye opsitinge. Neika dipnamape,” nyabuk.

Yesus arye Marta ap, Maria ap ati, kanye talima mikip kipdeibuk yupu

¹⁷ Sik nirya arye neika bisik banmeka ani, Betania mutuku Lazarus dam biyik. Amutuku biyik talak ara, sik kwit koprop Lazarus ara, akunum dipmokbuk, el nong ara keil deiya pum bisik deipmekba, like dumbarye sum akunum upmok.

^18-19 Betania mutuku atam, Yerusalem mutuku otam, danoutam bisik bana ara, winipmanto 3 kilometer mitik dam ubuka anya arye, Yahudi yala nang weik arye Yerusalem mutuku arye akunum yayik. Deiyok ara, ‘Marta ap, Maria ap, sik du koprop Lazarus dibuka ati, sik kanye sukuplirye, talima malye uplyak ati, akilapu sik kanye talima mikip kipdeipnuyap’ tenen, sik dam akunum yayik.

²⁰ Yesus yayukba, yuk nang arye Marta ati, “Yesus ara an aik dam yanganmale,” nyabuka lak nyabikura, Marta arye, ‘Bisik akuk epdatinimnye’ tenen, Yesus yanganmok bisik biyuk. Marta biyukbuk, Maria ara, sik aik pum asukumuk unmok.

²¹ Marta arye Yesus ap eipdarik talak arye, Yesus ati nyabuk. “Naio, anda nun mutuku unmatumopura, na du koprop Lazarus kum dipmatue.

²² Winira akunum dibuk bukni, na kele, ance Allah ati moropminye ning nirya ara, adiparyuk Allah arye arepnamakile,” nyabuk.

²³ Marta arye nyabukba, Yesus arye tamubuka nyabuk, “An du koprop kam buknamle,” nyabuk.

²⁴ Nyabukba, Marta arye, “Naio na kele, sirya talak ara, sik akunum diamik ninye ati, Allah arye kam bukeipnamle talak ara, Lazarus babye kam bukeipnamle,” nyabuk.

²⁵ Nyabukopura, Yesus arye nyabuk. “Kam Bulina Deiyoknye ap, Kam Una Deiyoknye ap, na aunune. Yatanye do nirya, nati dib tenepnilinye bira, el nong dipmalya babye, kam pia unamle.

²⁶ Yata ninye do nirya, nati dib tenebikirye, na ap talima dukdongobuka unyak ninye nirya ara, sik nong dibikce babye, pia kamuk unamake. Anyapmakin yupu ara, dib tenepmalam do?” Yesus arye Marta biti nyabuk.

²⁷ Nyabukura, Marta arye tamubuka nyabuk. “Naio, narye dib tenepkine. Tonda, anda Ninye Lyena Deiyoknye, Allah arye wipdeipsuknye Kristus ulyame. Sik minop talak arye, “Allah el Mi Koprop ara, aminyan talak tukwak mutuku yanamle,” nyabuka, nabi nang arye nyalilamsiknye bira, anda akunuma. Narye dib tenekunune,” nyabuk.

²⁸ Nyabukopura, Marta el aik tamubuka biyukce, el weit kil Maria ati yukubukura, sik mitik yukak tikilbirikce, Marta arye nyabuk. “Nai weit kilo, nun peterena Deiyoknye akunum yanmalarye, anti enmakile,” nyabuk.

²⁹ Nyabukura, Maria adiparyuk tikuka, Yesus bisik yanganmokak minopce biyuk.

³⁰ Atalak ara, Yesus arye Betania mutuku asik domikak min kum biyuk. Elda, Marta ap epdanmarik akuk, bisik noutamak tuba unmokbuk, Maria el dam yayuk.

³¹ Sik Yahudi yala ninye, ‘Maria kanye talima mikip kipdeipnamap’ tenen, dilbinmek ninye arye, Maria minopce tikuka aik pum arye bai tam binmokba, eibikopura, sikce, ‘Se, Maria ara, Lazarus nong keil deiya pum bisik deipmong akuk, engel banmale,’ tenebikce, Maria banmok bisikuk dobolbanmek.

³² Maria arye Yesus unmokak biyukce, Yesus eibukopura, ‘Yesus kipnun’ tenen, el yan dam tukwak dipdongobuka bulbiyuk. Bulbiyukce, nyabuk. “Naio, anda nun mutuku unmatumtoura, na du koprop Lazarus bira kum dipmatue,” nyabuka engenmok.

³³ Engenmoka ani, tonda, Maria ap yanganmek Yahudi nang engenmekba, Yesus eibukopura, Yesus ara bouku sukubukce, ‘Se, sikda bicoe,’ tenebuk.

³⁴ Bouku sukubukce malye kanye bobuka, bico tenebukce, asipdeyuk. “Na kwit Lazarus ara, el nong dan tam weipmalum do?” nyabuka asipdeyuk. Sikce, “Naio, an dilyalyame,” nyabik.

³⁵ Nyabikba, Yesus arye engenmok.

³⁶ Engenmokba, aunmek Yahudi yala nang arye, “Se, el engenmala ara dinmalulume. Elda, Lazarus ati, weik arye bico tenepmal arya,” nyabik.

³⁷ Ton nang arye nyabik bukni, yuk nang arye ton nyabik, “Asing kuamuknye biti ara, asing kwetebuk bukni, Lazarus biti ara, yata ati, ‘Na kwit Lazarus diplyak’ tenen, min kum dipmok talak arye, yupu sekdongobuka, kum kwetebuk do?” nyabik.

Lazarus akunum dibuk bukni, Yesus arye kam bukeibuk yupu

³⁸ Lazarus el nong dobuka keil deiya dongobikce, weik keil dobuka akeil deiya buplan tirikdongobik. Otalak arye akunum weipmek bukni, Yesus arye Lazarus nong dongobik keil deiya dam yayukce, tuba tamubuka tonap bouku sukubuka, malye kanye bobuk.

³⁹ Bouku sukubuka malye kanye bobukce, nyabuk. “Anggunda, akeil deiya weibuka, buplan tirikdongopmong keil ara, dopropmunce, buplan kukiplulume,” nyabuk. Nyabuk bukni, dibuknye el weit kil Marta arye nyabuk. “Naio, nyapmasilam bukni, na du koprop dibukura, keil deiya weibik bukni, like dumbarye sum akunum ubuka anya arye, tong weik nyapkilyake,” nyabuk.

⁴⁰ Nyabukba, Yesus arye tamubuka nyabuk. “Kume, ‘Dip tenepminyopura, Allah el weik mambul ulya ap, weik mambul pil dolul ning ap eipnamlume,’ kum nyapkise do?” nyabuk.

⁴¹ Nyabuka ati ara, aunmek nang arye, Lazarus weibuka keil deiya buplan dam tirikdongamik keil doprobik. Doprobikba, Yesus arye kisok erebuka im deice tam dipdeyukce, el li Allah ati nyabuk. “Naio, ance akunum kekepmanilama ati, telebe nyapkine.

⁴² Ance na nyakunun yupu nirya tuba kekenilyam ning ara, na akunum bikamse bukni, na ap atikmak nang arye, ‘E, Allah arye dipkoprop Yesus dopkwetepsuke, tenebuka, kel bikikirye, dib tenepnamak’ tenen, nyapkine.” Yesus arye nyabuk.

⁴³ Yesus arye nyabukopura, weik yupu deice arye nyabuk, “Lazaruso, keil deiya pum bisik arye, bai tam asukum yalyame,” nyabuk.

⁴⁴ Nyabukura, adiparyuk diamuknye Lazarus kam bukukce, akeil deiya pum bisik arye bai tam yayuk. El yan ap, el taruk ap, namin kain arye kitipmeka ara, tuba upmok. Tonda, el urasin kitipdongopmek baju ara, tuba upmok. Winibuka ati, Yesus arye awekmek ninye ati nyabuk. “El nong weina ati, kitipmek cang kain nirya kwiribuka loplopmunyeura, Lazarus binule,” nyabuk.

⁴⁵ Yesus arye winibuka ati ara, sik Yahudi yala ninye, ‘Maria kanye talima mikip kipdeipnuyabe’ tenen, yayik ninye ara, Yesus pil dobuk ning eibik ati, yupa weik arye, Yesus ati dib tenebik.

Yahudi yala deiyok nang arye, ‘Yesus opnuyap’ tenen, yupu talinmek ati, nyabuk yupu

⁴⁶ Ton nang ara, Yesus ati, dib tenebik bukni, yuk nang arye, Farisi nang sik dam biyikce, Yesus winipmok ning ati, laka nyalbiyik.

⁴⁷ Laka nyabikura, sik Farisi nang kekebikce, yu ubukba, sik Yahudi ninye yupu bokolina deiyok nang, Sandeheren nyalamik nang, ‘Anang ap yupu talipnamap’ tenen, anang nirya yukubik. Yukubikba, sik nirya Farisi nang ap, Allah arena ati weik deiyok nang, Yahudi yala deiyok nang nirya bulubuka yupu talinmek talak ara, nyabik. “Se, nun yata wiripnamap do? Nun talyeuk unmaba ara, yata ati do? Anye birye, ninye kum winipmanto ning, ‘Allah el mikip deice pil dolule tenepnamake’ tenen, ninye kum winipmanto pil weik arye donmale.

⁴⁸ Elce pil donmala ara, yupu kum sekipyopura, apil atonun tuba doplyopura, amutuku ninye nirya arye elti, dib tenepnamake. Elti dib tenebikirye, el si erebikcopura, akunuma, amutuku nirya talisinyaka deiyok nang, sik Roma mutuku nang arye wenelyanamsiyake. Sikce, nun Yerusalem dobupu aik, Allah el si erena ati, weik mambul aik daklopsikirye, nun Yahudi yala ninye nirya yanisikirye nun wenena ati, amutuku arye yaknamsiake,” nyanmek.

⁴⁹ Nyanmek talak ara, sik kan-kan bukni, tonoknye el si ara Kayapas, el ap unmek. Kayapas ara, Allah arena deiyok nang weik aulamik bukni, aketing tamun noutamak ara, sik deiyoknye una ati, erepdeibikba aunmok. Elce nyabuk. “Anggun nirya ara, pia walwal ninye ululume.

⁵⁰ Anggunda moubuka kum tenepmalum bukni, teleb ning ara, nyapnusine. ‘Nun Yahudi yala ninye nirya kum dapyak’ tenen, teleb ning ara, tonoknye ton nun nirya malye ning pununa ati dipsute.” Kayapas arye nyabuk.

⁵¹ Ara, Kayapas arye, ayupu nyabuka ara, el kanye aryuk kum nyabuk. Elda, talye mankau kanye bobuka, ayupu nyabuk bukni, aketing tamun noutamak ara, Allah arena deiyok nang, sik weik deiyoknye ulamukce, ayupu nyabuk deice arye, aminyan winipnamuk ning ati, laka nyabuk. Kayapas ara, talye mankau kanye bobuka nyabuk bukni, Yesus arye, Yahudi yala ninye nirya, sik malye winin ning pununa ap, sik lyena ap ati, dipnamuka ati, laka nyabuk.

⁵² Tonda, Yesus arye Yahudi yala ninye, sik lyena ati dipnamuka ara, sik tibuk kum bukni, Allah el mapu yuk yala ninye nirya, mutuku-mutuku nirya, yuk-yuk daulamik bukni, sik ansinilina ap, talima dukdongobuka, tonok nong atonun kilina ap ati, Yesus dipnamuka ati ara, laka nyabuk.

⁵³ Ara, sik Yahudi yala deiyok nang arye, ayupu talibikce, ‘Tonoknye diptue,’ tenepmek sum arye diprongobuka, otalak nirya noutamak arye, ‘Yesus ara, yata talak optibye do?’ tenen, yupu talina ap, tenena ap unmek.

⁵⁴ Yesus arye, atenenmek ning akunum bikamuka anya arye, sik Yahudi yala nang bulubuka, unmekak nirya talye laka kum biyuk. Sik Yahudi yala deiyok nang unmekak, bana kum bukni, ninye pia kum ulamik mutuku damak, amutuku si ara, Efraim mutuku, el ap, elce wipdeiyamuk nang, sik 12 nang ap, amutuku uk, binuka unmek.

⁵⁵ Efraim mutuku uk, daulamika ani, sik Yahudi yala nang weik kwalina talak, Kaplina ati Kwalina talak akunum dam ubuk. Atalak dam ubuka anya arye, dana-dana tam nirya arye, Yahudi yala ninye bulubuka, weik asik Yerusalem mutuku welebik. Yerusalem mutuku biyik deiyok ara, ani. Ara, Musa arye, el sekamuk yupu mem yupu noutamak, ‘Allah arye kanye deipsilibuk, el si erena aik wektibye’ tenen, “Winibuka, winibuka anggun nong mek kekuka teleb unamlulume,” nyapdeiamuk touk, ‘Kaplina ati Kwalina sum min kum yanmalye talak ara, mek kekibirye, nun kanye talima kintinipnamabe’ tenen, Yerusalem bulubuka banmek.

⁵⁶ Aninye nirya arye, Allah si erena ati, Yerusalem noutamak pia weik aik dam wekelbanmek talak ara, Yesus ati pia enmek. Tonda, sik nirya arye nyapdanmek. “Anggunda yata tenepmalum do? Weik kwalina ati, kum yanamle do?” nyabuka asildanmek.

⁵⁷ Yahudi yala nang, Allah arena ati weik deiyok nang ap, sik Farisi nang ap arye, ninye nirya ati nyabik. “Yata ninye do nirya, Yesus yalyeba, eipmunyopura, ‘El unmalak ani,’ nyabuka, adiparyuk laka nyalyanamsulume,” nyabik. Ayupu nyabika deiyok ara, ‘Yesus tapu koubibirye, wenebuka optibye’ tenen, nyabik.