Yesaya 65 - Eipomek

Allah arye nyalamuk yupu, yaniltalamik bukni, ‘Aninye ara, tuba tamubuka lyepnamne’ tenen, nyabuk yupu

¹ Na Allah Yahweh arye nyapsine. Na kum wiamse ninye, yuk pera mutuku ninye arye, ‘Allah Yahweh ara, yatanye do?’ tenen, nati minop talak kum asilelamnik ninye arye, wini talak ara, nati “Allah ara, yata tonye do? yatato Allah ulul do?” nyabuka asileninyake. Tonda, minop talak ara, ‘Nun ap, Allah Yahweh ap eipdatibye’ tenen, nati kum elamnikce, pia kum morolamnik ninye bukni, wini talak ara, sikda nati eninyake. Wininyak ninye ara, nati, “Nun ni,” nyabuka moropnetingopura, narye kekebuka meliptinye. Narye sikti, “Na aunune,” nyanamne.

² Bukni, ‘Na tenena ninye unamak’ tenen, wiamse ninye, sik Israel ninye ati, ‘Narye sikti, melinamsine’ tenen, na taruk yangalilamseba, sikda talima kat ninye anya arye, na yupu kum kekepmanto ulamnike. Sikda, mandipna kanye bobuka malye-malyeuk unyakce, sikce ‘Wininamabe,’ tenenyak ninguk wininyaka anya arye, malye weik unyake.

³ “Sikda pia tuba-tuba kam ning obuka, isa si erena ati kintininyak wa win dam bobikirye, kam ning binuka obuka uku dongonyake. Tonda, isa si eren ati, siltong teleb ning dobuka, keil bulubuka yangabica deice deibuka, uku dalbanyake. Awininyaka ara, ‘Nun ni Allah eipsilirye, kel biksilyak’ tenen, kum duknunyake. Nati ara, ‘Allah daupmalye’ tenen, laka aryuk isa si erenyake. Winyaka ati, nara weik tonun yu unulule.

⁴ Tonda, malye weik unyak ning ton ani. Sik Israel ninye ara, lukunyan talak ara ninye wein keil deiya dam ap, ninye wein dam ap, duknubuka banyaka deice arye, diamice nang dib kanye ati, ‘Sikce ton nunti bisik nuksululume,’ nyabukka moronyake. Tonda na Allah arye sikti, ‘Israel ninye anggunda basam kum dinamlulume. Tonda, ayala ning ani, aning babye anggun kum dinamlum ning ani,’ nyalamsise bukni, anyalamse yupu yanibuka lukunyan ara duknubuka dinyake. Narye, ‘Aning ara dina meme,’ nyamse buk, sik makau pum bisik yupmaca ani oplyopura, dinyake. Aning atonun, narye sikti, ‘Aning dina meme,’ nyalamse yala weik bukni, sikce yupmace mek babye dinyake.”

⁵ “Sik amalye ning wininyak nang arye, yuk ninye nirya ati nyanyake. ‘Nunda pia teleb diksukumuk unyapce, teleb koprop nanguk unyaba anya arye, nun dam yangana meme. Memepdakuka yuk sukumuk unamlulume,’ nyanyake. Wininyaka ati, na Allah arye nyapsine. Ninye arye uku sekikiba, tulum weleplirye, ninye u pum bisik wekliba kanye malye ulamle touk, sik amalye ning wininyak nang ati, na lik uniliba, narye sik anang ati kum elinune. Narye anang ati yu teninye ning ara, kume kum danmanto unulule. Winipmanto ara, uku pakanmalyak kum tangalamle touk, anang ati yu weik unulule.

⁶ Sik malye wininyak ninye ati, wenebuka ikin arenamne ning nirya ara, na dam akunum sekuka deiamse. Dipkoprop aninye wenena ati, talye kanye lamapdongobuka kum unamne. Sik malye wininyak ninye ati, narye tamubuka, sik malye unyak ning dekna ara, atouk arenamne.

⁷ Amalye ninye dekna arenamna deiyok ara, ani. Ara, sik ap, sik apu yapu ap, malye-malye weik winilamika ati, dekna arenamne. Sik ap, sik apu yapu ap, mutuku deice welepna arye, isa si erena ati, siltong teleb ning ap, kam ning obuka arelamik deice arye, nati malye kililamnik. Winilamnika dekna ati, sik malye winilamik touk, sik wenen ning tonok ning babye batakna kumce, anirya nukuka ikin ning weik tonun, sik nong deice arenamne.”

⁸ Na Allah Yahweh arye nyapsine. “Winipmanto ara, ninye arye anggur tapu duk mouamlya dakikirye, malye ning batakuka, teleb ning wibuka dololamak touk, Israel ninye na wipdeiamse ninye noutamak arye, malye unyak nang ara wibuka bataknamne. Bukni, na si erebikirye, teleb unyak nang ara, lyebuka dopropnamne.

⁹ Yakub birye deibukba dadeipdanin yangalamik ninye nirya kum bukni, sik noutamak arye, Yehuda yala ninye yupa mitik anun aryuk lyepnirye teleb ulinamne. Yehuda yala ninye arye deibikcopura, dadeipdanin banamak ninye noutam arye, dopropnamne ninye ara, na talinye mutuku arepneba, talibuka unamake. Narye wipdeipnamne ninye arye, na si tuba-tuba erenamniyake, Winibuka erelamnikce ninye uk amutuku talibuka unamake.

¹⁰ Na siuk tuba-tuba ereninyak ninye ati, melipnamna deice arye, aninye arye weinyak domba basam ap, sapi basam ap nirya ara, pia weik mutuku lu, el si Saron mutuku ap, tonda Akhor mutuku ap, palamle maning ap, dinak ap, aning wa bun mutmuta dinamake.”

¹¹ “Bukni, na Allah Yahweh ati batakuka malye ululum ninye arye, ‘Na si amutuku deice erenamniyak’ tenen, wipdeiamse mutuku, Sion mutuku pia teleb ak. ‘Amutuku ara weik mambule,’ kum tenemunce batakalum nang anya arye, na si eren aik batakuka kum wekelulum nang ara, narye wenepsiniba ikin weik unamsile. Anggunce winilulume. ‘Aminyan nun unamap ning ap, talinap ning ap, teleb kilinamsil ning’ tenen, isa si bitinye sik si ara, Gad ap, Meni ap ati, din ning aning-aning nirya ap, anggur mek ap, kintinibuka delilulume. Aisa si erelulum ninye nirya ara, wenebuka onamsine.

¹² Kanye talima kat ulamsuka deice arye, malye weik ulamluma ati, narye obuka sirya dakanamsine. Wenebuka opnamsina deiyok ara ani. Ara, narye anggunti yukulamsise talak nirya ara, anggunce na yupu kum kekelamnulumce, bataklamnulume. Aning ati narye anggunti, yupu nyalilamsise talak nirya ara, anggunce na yupu kum kekelamnulume. Narye, ‘Aning ara mem ning ati, winina meme,’ nyapdeiamsise ning ara, tuba winilulume. Aning atonun, narye, ‘Aning ara na like,’ nyabuka laka nyalamsise ning ara, anggunce tuba winilulume. Winilamluma deice arye, narye nyalamse yupu mitik kililamnulumce, anggun bidamang winin ning atibuk weik kepropnin, balamlumce, nati yanibuka malyeuk kilalume. Ati, narye nyapniba, yuk pera mutuku yu ninye arye, sik nirya obuka sirya dakanamake.”

¹³ Anggunda pia malyeuk umunya ati, na Allah Yahweh arye, aning-aning nirya talinirye, ‘Winipnamne,’ tenenye touk wininune. Nara Weik Erena Deiyoknye arye nyapsine. “Dipkoprop na si tuba erepnikirye, na amu tam pil dobuka unyak ninye ara, din dinamake. Bukni, anggun malyeuk ululum nang ara, tuba patana uk unamsile. Na si tuba ereninyak nang ara, mek dinamak bukni, anggun malyeuk ululum nang ara, mek tuba patana uk unamsile. Aning atonun, na si tuba ereninyak ninye ara, kanye deibuka pin-pin asa uk unamake. Bukni, anggun malyeuk ululum nang ara, tuba imun kanye bobuka unamlume. Winipmunce, alye dakalanamlume.

¹⁴ Dipkoprop na si tuba erepnikirye, na amu tam pil dobuka unyak ninye ara, na si erebikirye kanye deibuka unamake. Bukni, anggun malye-malyeuk ululum ninye ara, engelamunce, imun kanye bobuka unamlume. Tonda, kanye talima pia uk dilamsiliba, ikin kanye bopmunce, engenamlume.”

¹⁵ “Narye, ‘Aninye ara na mapu koproba’ tenen, wipdeiamsiba, na si tuba ereninyak nang arye, anggun malye ululum ninye ati, dipdongobuka anggun si malye nyanamsiyake. Tonda, na Allah Yahweh arye aning-aning nirya talinirye, ‘Winipnamne’ tenenye touk, ninye winipmanto kum pil donanye birye nyapsine. Nara, Weik Erena Deiyoknye aryuk, anggun malye-malye ululum ninye ati, obuka sirya dakanamsine. Bukni, na amu tam unyakce, na si erenyak ninye ati, winiryuk si pia teleb ning arepnamne.

¹⁶ Aning nirya akunum winipnyopura, amutuku noutam unamak ninye ara, ‘Yatanye birye melipsutuba, nun un ning nirya teleb kipdeipsutu do?’ teninamak talak nirya ara, na Allah pia diksukum yupu nyanunye biti moronamniyake. Narye, ‘Wininamne’ nyanun touk, batakna kumce aninguk wininunye biti moronamniyake. Aning atonun, amutuku unamak ninye arye, yuk nang ati, ‘Wininamsiyabe,’ nyabuka nyalin yupu nyanamak talak nirya ara, na Allah pia diksukum yupu nyanunye, na si deice arye nyalin yupu nyanamake. Wininamaka deiyok ara, minop talak malye ululum ning nirya ara, akunum kum kipdeipsinirye, tuba tonap pia kum teninamne. Aning nirya kum kipreipnirye, bataknamne.” Allah arye Israel ninye ati nyabuk.

Allah arye, “Im noutam ulul ning nirya ap, tukwak ap nirya, winiryuk ning kwepdeipnamne,” nyabuk yupu

¹⁷ Allah Yahweh arye, nyabuk. “Dipkoprop narye, im noutam ulul ning nirya ap, tukwak mutuku ulul ning nirya ara, winiryuk ning punubuka kwepdeipnamne. Winipyopura, minop upnin yangalamik ning nirya ara, kum kipdeipniba, ninye arye, luba kinamake. Tuba tonap kum teninamake.

¹⁸ Winiryuk ning nirya kwepdeipnamne ati, ‘Se, minop ninguk upsutue’ tenena kume. Aning kum bukni, winiryuk ning kwepeipnamne ning ati, anggun Israel ninye pia telebuk umunce, kanye deibuka unamlume. Yerusalem mutuku pia teleb ning, winiryuk kwepeipniba, amutuku unamlum ninye ara, kanye deibuka pin-pin asa arye unamlame.

¹⁹ Na babye, Yerusalem mutuku winiryuk kwepdeipnamne ning ati, kanye weik delinamne. Aning atonun, na Allah arye Yerusalem mutuku unamlum ninye ati, kanye delinamsine. Wininamsina ati, Yerusalem winiryuk ning, kwepdeipnamne mutuku noutam unamlum talak nirya ara, ikin ning upsiliba, weik tonun, ‘Melipsilyame,’ nyabuka, ngalukuka engemunce, nati kum moronamnulume. Tonda, imun kanye bobuka, ngalukuka kum engenamlume. Kanye deibuka telebuk unamlume.

²⁰ Sik amutuku ukirye delinamak mapu nirya ara, mitik talak arye, like bitinye do, winilyeto kam unmaca ani, adiparyuk kum dibinamake. Pia kam unamake. Aning atonun, anggun wisi ninye ara, daulamunya ani, wisi deipmunce, minopce dipna kumce, pia daulamunya ani, wisi deipmunba, kul potong uk upnamsile. Wel tuba umunye talak ara, kum dibinamlume. Anyapmasina ara, urdem ati kum nyapsine. Amutuku noutam ara, keting tamun yupa weik, 100 tahun deice arye wisi akunum deiamikce nang ati, yuk nang arye, ‘Anang ara kam nanguk unyake,’ tenenamake. Ati, keting tamun yupa weik 100 tahun kum kipmalibuk, dipmantonye ton awamtu toura, yuk nang arye, ‘E, elda malye ulamlya dengna ati, Allah arye wenen ning el deice deipmala arye dipmale,’ tenenamake. Ara, Yerusalem winiryuk mutuku unamak ninye ara, keting tamun yupa pia weik kam uk unamaka ati nyapne.”

²¹ “Amutuku noutam aik dopnamikce nang ara, adobice nanguk talibuka unamake. Yuk mutuku ninye arye, anyaik ubula kum dolonamake. Anyaik pum tam ara, yuk ninye ton pia kum unamake. Sik aik domikce nanguk, anyaik talibuka unamake. Anyaik unyak nang aryuk, anggur tapu duk wa wibuka kounamake. Sik dem aryuk anggur duk dakikirye, teikuka purubikirye, sik dem aryuk anggur mek dinamake.

²² Minop talak ara, anggunce domlum aik ara, yuk pera mutuku nang arye yanuka dalubuka dopromsik touk, pia kum wininamsiyake. Aning atonun, anggun wa wiamluma nirya, yuk pera mutuku nang arye yanuka dalubuka kipromsik touk, pia kum wininamsiyake. Amutuku ara, na wipdeiamse nang, sik unamaka ara, lo weik tonap, tabakuka arepneba unamake. Winipmanto ara, yo pia tiknamle atonun, ‘Naʼ tenen, ninye sikda keting tamun yupa pia weika arye kam uk unamake. Sik taruk deice arye, aning-aning nirya pil donamak nirya ara, sik dem aryuk talibikirye, kanye deibuka unamake.

²³ Sikce, pil donamak ning ayala-yala nirya ara, nong uk unamle. Sik amutuku ukirye delinamak mapu nirya ara, deiyok kum upmalibuk, talye karin arye mitik talak ton kum dibinamake. Tonda, yuk pera mutuku ninye arye, kum olyanganamake. Ara, na Allah Yahweh arye, sik ap, sikce deibikiba dadeipdanin banamak ninye ap ati, sik dam unirye, pia telebuk kilinamne.”

²⁴ “Sik amutuku unamak ninye arye, nati ‘Melipsilyame,’ nyabuka min kum moropmanice talak arye, na adiparyuk kekebuka melinamne. Tonda, tuba moronmaca noutam, min kum sirya dakmace talak ara, na kekepnirye, ‘Telebe,’ nyabuka arenamsine.

²⁵ Yerusalem mutuku winiryuk ning kwepdeipnye talak ara, domba mi ap, weik kuse atonun yu ning el si singa kus ap, sik neika maning bok dinamdake. Tonda sapi basam maning bok dilamle touk, pia yu weik kuse el si singa kus babye, yuk kam ning obuka kum dinamle bukni, el babye maning wa bun mutmuta dinamle. Ton ning ara, ninye opliba, kulanyak kwatima nirya ara, tukwak mutuku aubuk kel-kel an tuku uk dinamake. Abal nirya ati, mikip ara mitang kipniba, yu kum unamake. Ara, na Allah Yahweh mikip weiknye unamne mutuku deice nirya ara, na dam arye yu ulamle ning ayala-yala nirya ap, ninye ati malye ulul ning nirya ara, mitanguk kipdeipnamne. Pia malye ning ton, tonok babye, kum unamla anya arye, pia teleb ninguk unamle,” Allah arye nyabuk.