Yesaya 64 - Eipomek

Israel ninye ara, ‘Allah Yahweh arye yanuka lyepnamsil’ tenen, morobik yupu

¹ Allah ance im deice nirya bokuka dana-dana deipmince, yanalam talak ara, mutuku dana-dana nirya ara, weik tonun luluknamle. Ara, an weik mambulnye dam yaminba, mutuku nirya luluknamle.

² Winipmanto ara, ninye arye yo uku dongobikiba, uku diplirye sirya dakuka dilamle touk, winipnamle. Tonda, uku dinmalya deice arye, mek buppu opliba yaruk-yaruk alamle atonun, Allah an yanamlam talak ara, atonun winipliba, anti yu tenekinyak nang, ninye mutuku-mutuku nirya eipkikirye, ilil weik upliba, sik nong nirya ara sirim talipnamle. An yanamlam talak ara, anti, ‘Allah ara nun like,’ tenekinyak ninye nirya, ila tamubuka mikip weik ning ap, weik mambul si ap ukilye ning ara, moubuka kel biknamake.

³ Minop talak, nunce, ‘Allah winipnamle,’ kum tenebupe ning, Allah anda tukwak mutuku yalumce, ninye kum winipmanto pil, sirya dakna pil doplumba mutuku weik tonun lulukamuk.

⁴ Minopa donirye dipdongobuka wini talak babye, an Allah uminya atonunye ton ulamukba ninye elilamikce, laka nyalamikba, kum kekelamike. An tonok ulyama atia. Allah anti diba tenekinyak nang arye, ‘Allah aryuk melibuka lyepnamsile,’ tenekirye, kintinibuka dinauk unyak ninye ati, lyesilyamnye atonun ton pia kum ulule. An tonok ulyame.

⁵ Sikce Allah an nyapsulum touk diba tenebikirye, kanye deibuka an yupu moubuka talibuka diksukumuk unyak nang ati, ance melibuka yangasilyame. Bukni, Allah ance, ‘Wininamake, aning ara kum wininamake,’ tenesiminye ning ara, nunce, ‘Nun lik’ tenen, an yupu yanilamuburye malyeuk ulamupuba, an yu ulamkuke. Winibuka yu ulamkuka anya arye, nun wenena ati ikin ning weik nun deice delilamsulume. Nunda, pia malye un ninye unyaba ati, wini talak ara, yata wiribuka lyepsutumce, ila tamubuka teleb kipdeipsutum do?

⁶ Nun nirya ara, Allah ance, ‘Aning ara, weik malye ning anya arye, na walwale,’ tenesiminye ning atonun wininyabe. Tonda, nunce, ‘Teleb unyap ning ani’ tenen, teleb winin ning winiptibya babye, dipkoprob weik malye ninguk unyabe. Nunda, pia weik malye ning baju deice bol pipliba, bataklamaka atonun, nunda malye ninye uk unyaba anya arye, malyeuk usulule. Tonda, weik kumanya yalirye, pubuka dopliba kolulamle yo bok dakuka bobalamle touk unyabe. Ara, nun minopce malye ulamepya ani, wisi dapyopura, dibinyabe. Ara, nun bidamang malye wininyaba deice arye winisulule.

⁷ Nun pia malye weik wininyap bukni, nun noutamak arye anti ‘Se, na nio yanuka melipsilyame,’ nyabuka, tonoknye babye kum morokinyabe. Tonda nunce anti ‘Naio, talye lukparabuka opsutum bukni, bico tenepsutumce, lyepsutum’ tenen, kanye deipkibirye kum morokinyabe. Nunce anti pia kum morokenyaba anya arye, ance nunti, ‘Lik’ tenen, duknubuka donga karikisilyame. Tonda, nun malye-malye weik unyaba deice arye, bataksimince, ‘Dauplye, aninye ara, malyeuk daunamak’ tenen, batakasiminba, malye winin ninguk upra banyabe.

⁸ Bukni, dipkoprob anda nun ni Allah Yahweh, nun deiyoknye ulyame. Winipmanto ning ara, ninye arye kira tuku dobuka, sik tenepmace ning pinibuka delilamak touk, Allah an bidamang aryuk, nunti kwepdeiamsulume. Kwepdeipsuluma deiyoknye bira, an uka. Nunda kira tuku atonun ninye unyabe. Ati an taruk deice aryuk kintinilisilyame.

⁹ Ati, nun ni Allah Yahweh, ance nun malye winilamap ning ati, pia yu weik upkiliba derepnirye, ‘Wenepnamne’ tenen, ‘Aning ara, tuba kum tenenamsilyam’ tenen, moropkinyabe. Nunda ance wiamsulumce, an mapu koproba una ati, kintinip deiamsulumba, unyaba anya arye, nun malye wininyap ning ara, ‘Tuba kum tenenamsilam’ tenen, morokinyabe. Aning kum bukni, ‘Ance nunti tamubuka kanye deipsimince, nun ikin usilye ning ati, melinamsilam’ tenen, morokinyabe, na nio.

¹⁰ Allah ance, ‘Na tenen mutuku’ tenen, wipdeiamlum mutuku ara, telebuk ulamuk mutuku bukni, yuk pera mutuku ninye yayikce, daklomikba, oldem uamuk mutuku nirya ara, anyaik oldemuk yamince tamubuka donamlyame. An si deice arye si dolum mutuku, Yerusalem mutuku, tonda Sion nyanyap mutuku ara ninye pia kum unyaka anya arye, asik oldemuk ulule.

¹¹ Nun apu yapu arye, Allah an si erena ati, urasin pia teleb aik dobuka kintinyamike. Apia teleb aik ara, yu nang arye uku dongobikba, uku arye dibuka akunum sirya dakuk. Ati, nunce, ‘Aning nirya ara, urasin pia teleb ning, weik mambul aik’ tenen, kanye delilamupu ning nirya ara, akunum kum upsuke.

¹² Nun malye winilamupu ning wenena ati, ance nyapdeiamlumba, yuk nang arye, aning-aning nirya akunum malye winililamsik bukni, nun ni Allah Yahweh, ance aning nirya elisiyam bukni, talye batakalongosilyam do? Talye mangkau asa umince, wenen ikin ninguk nun deice deipsiminba, tuba imun kanye uk bobuka unamap do? Nabi Yesaya birye Allah ati nyabuk.