Yesaya 6 - Eipomek

Allah arye, ‘Yesaya bira, na yupu nyapniba, laka kibuka lak lena deiyoknye unamle’ tenen, wipdeibuk yupu

¹ Ura ninye deiyoknye, el si Raja Uzia dibuk keting tamun noutam ara, lengdar mapsa deice arye, Allah eipse. Eipse talak ara, dinmasiba, Allah ara, ninye deiyok nang bulamak ning, weik bun ning deice bukmok. Bukmokak, el cang baju ongopmok ning arye, Allah el si eren aik pum tam nirya ara, langdipmok.

² Tonda dinmasiba, malaikat sik si Serafim arye, dana-dana tam nirya tikuka, antanap dongopmekba, sik urasin atonun upmeka ara, sik pol ara, 6 uamuk. Sik pol bitinye arye, sik urasin tam lelipdongopmek. Ton bitinye pol ara, sik yan nirya lelipdongopmek. Atonun, sik pol bitinye ara, erebuka laka banmekba, eipse.

³ Winibuka banmekce, tonye ap, ton yuknye ap, yupu nyalanmekba kekepse. Ara, sikce, sik bidamnye ati, lakuka balsusunmekce, nyanmek yupu ara, ani. “Allah Yahweh, aning-aning nirya taliplumce, im deice yin talin malaikat nirya, sik weik deiyoknye ulyame. Allah Yahweh, anda, malye ning tonok babye kum ukilya ati, anda Pia Telebnye, Pia Telebnye, Pia Telebnye ulyame. Anda dikdik senauk umince, aning-aning nirya talibuka deice tam, Weik Erenanye ulyame. Ati, an pia mambul ap, pia teleb ap, weik dirina ap, uminye ning ara, tukwak mutuku unyak ninye nirya arye elikinyake. Aning-aning nirya elinyaka deice arye, an pia mambul uminye ning nirya ara, laka ululba, eibuka kel bikinyake,” nyanmekba eipse.

⁴ Sik malaikat Serafim nirya arye, ayupu nyanmek talak ara, Allah el si eren aik bublan dam, taplakakuka deiamuk yo nirya lulukukce, anyaik pum noutam nirya, tulum arye langdibuk.

⁵ Winibukba narye nyapse. ‘Se, bicoe. Nara daopnutuba, diptinye. Aning ara, talye ati kum nyapne. Deiyok ara, pia mambul ning eipman bukni, nara malye yupu nyananye unune. Tonda, na unye mutuku noutam neika unyap ninye nirya babye, malye yupu uk nyapdabirye, malyeuk unyabe. Wininyap bukni, na malinye birye, na asing arye pia mambulnye elinmane. Na malye ning aunilye bukni, aning-aning deice tam ulirye, ninye deiyok talibuka ululnye, Weik Raja akunum eipmane. Ara, aning-aning nirya talilirye, im deice yin talin malaikat nirya, sik weik deiyoknye ulirye, weik erena ap, mikip weik ap ululnye, Allah el si Yahweh akunum eipmana ati, na dipnamne,’ nyapse.

⁶ Nyapse bukni, tonok im deice ululnye, malaikat Serafim, na dam lakuka yanmokce, uku tuba dinmok. Uku sirika ara, tau arye dobuka boyayuk. Aning ara, Allah el si erena ati, kam ning obuka, uku danyak sukum arye, tau arye dobukabukce, uku dinmok kalum bobuka, na dam boyanuk.

⁷ Abopmokba, uku dinmok kalum ara, na sitang deice deipnukce, ayupu nyapnuke. Auku ara, an sitang deice deipmakinba, dinmakila ati, adeice arye an malye winiminye ning nirya ara, Allah arye kilibuka kum daneipmakile. An malye winiminye ning wenena ati, opkutu bukni, Allah arye, an malye winiminye ning akunum kum kipdeipmakile,” amalaikat Serafim arye nyapnuke.

⁸ Nyapnuk talak uk, Allah arye yupu ton nyanmokba, kekepse ning ara, ani. “Yatanye wipdeipniba, na yupu nyalbinamle do? Nun yupu laka nyalbana ati, yatanye birye nyalbinamle do?” Allah arye nyapmokba kekepse. Nyabukura, narye nyapse. “Kume, na aunman ati, ance na uk wipdeipniminba, narye an yupu laka nyalbinamne,” nyapse.

⁹ Nyapse ati, Allah arye nyapnuk. “Na nyapkin yupu bobuka, amutuku unyak ninye noutamak peterelbinamlyame. Peterelbinamlam yupu ara, ani. Anggun Israel yala ninye ara, na yupu pia kekenauk unamlum bukni, ‘Deiyok anye’ tenen, moubuka bita kel kum kinamlume. Narye mambul pil dobuka, wininamne ning ara, asing arye, pia elinamlum bukni, ‘Deiyok anye’ tenen, moubuka bita kel kum kinamlume. Ayupu nyapnamlyame,” nyapnuk. Allah arye nyapnukce, ayupu ton nyapnuk.

¹⁰ Aninye ara, ‘Sik kanye talima kat unamle’ tenen, na yupu kum kekepmanto una deiyok ning arepnyopura, sik kanye talima katauk unamle. Aning atonun, amul kunukna deiyok ning arepneba, sik amul arye teleb kibuka, kum kekepmanto unamake. Tonda, sik asing kuna deiyok ning arepneba, asing kupliba, narye mambul pil donamne ning ara, bita kum eipnamake. Aning-aning nirya ara, sik wenena ati, kum winipnyopura, sik asing arye eibikirye, sik amul arye kekebikirye, sik kanye talima pum tam moubuka tenebikirye, kel kibikcopura, pia ilil kanye bobuka, unyak ning nirya, batakikirye, ‘Na dam tamubuka yacak’ tenen, nyapne. Ara, na dam tamubuka yatingopura, narye sik malye ning ati, kilipnirye, teleb kipdeiptinye bukni, sik malye-malye weik wininyaka ati, ‘Aning kum winipnamak’ tenen, talima kat una deiyok ning arepneba, kum kekepmanto una deiyok ninguk, talibuka pia unamake. Allah arye, ayupu nyapdeibukba kekepse.

¹¹ Nyabukopura, narye tamubuka asipdese. “Se, na ni Allah, kum kekepmanto unamak talak ara, yata talak arye talima kat ninye uk unamak do?” nyabuka asipdese. Asipdesiba, Allah arye, tamubuka nyapnuk. Amul arye kekena kum ap, asing arye el lina kum ap, talima kat ap unamak ara, weik tonun tonap pia aunamake. Ilil kum asa winilamice buk, sik wenena ati, narye nyapniba, yuk mutuku yu nang arye yacopura, sik aik dolamikce ning nirya, dakuka atu kiplopnamake. Sik aik ulamikcak nirya ara, ninye una kum ati, asik oldemuk upnamle. Sik wa wilamik ning nirya ara, yu nang arye alapdobikirye, yaniptabikiba, tuku nirya babye, malyeuk upnamle. Sik koulamak ning tonok ning babye, teleb ton kum upnamle. Aning nirya ara, kum danamle.

¹² Winipyopura, na Allah Yahweh arye nyapniba, yuk pera mutuku yu nang arye, Israel ninye unyak mutuku nirya, yanuka obisibikirye, amutuku unyak ninye nirya ara, tapu koubikirye, pia yuk mutuku uk bobinamake. Na Allah Yahweh arye, amutuku unyak ninye yakuka dopkwetepniba, sik mutuku nirya, oldiamuk kipnamle. Sik wenena ati, aning nirya akunum winipnyopura, amutuku nirya ara, louk upnamle.

¹³ Winipnamne bukni, Israel ninye yupa mitik anun aryuk bataknyopura, sepuluh persen atonun utinga babye, aminyan talak, tuba tonap, yuk mutuku yu nang yakirye, amutuku nirya uku dongobikiba, uku dipliba, sirya daknamle. Anang babye, onauk upnamake. Sik wenena ati wininamne bukni, kwarang yo ap, kenai yo ap atonun unamake ati, ayo nirya wibikirye, yo konga dem batakikiba, aminyan talak tuba kwapu bongolamle ning atonun upnamake. Israel ninye mitik tonunuk batakniba, kam unamak ninye ara, yo sirika arye, tuba kwapu bongolamle ning atonun winipnamak ati, aminyan talak ara, tuba deiyok koubuka, telebuk upre banamake. Ara, narye wipdeipnamne yala ning atonun, unamake ati nyapne. Allah arye nyapdeibukba, na Yesaya birye kekepse.