Yesaya 59 - Eipomek

Nabi Yesaya birye, Yudea tam ulamik nang, sik malye ulamik ning ati, wenebuk yupu

¹ Anango, kekepnululume! Anggunce Allah ati, ‘Elda taruk mikip naminye ulula anya arye, nun ikin usulul ning ara, kum lyepnamsile,’ tenena kume. Tonda, ‘Elda amul kunukunanye binya arye, nun moropmapye ning ara, kum kekepsutue,’ tenena kume. Dipkoprob ning ara, el mikip weik ap, nun yupu kekepmanto ap ululnye birye.

² Bukni, elce min kum melibuka lyepdopmasila deiyok ara, ani. Ara, anggun malye un ninguk tuba talibuka winilulama atia. Malye weik tuba winimunya deice aryuk, elti, ‘Se, melipsilyame!’ nyabuka, moroptuma babye, atalak ara, elce kekebuka kum melipnamsile. Anggun malye winiluluma deice arye, anggun ap, anggun ni koproba Allah ap ati, wililongolalulume. Winimunya deice arye, elce kum disulule, tonda kum kekebuka melisulule.

³ Anggun malye winilulum ning ara, ani. Ninye olulumba, anggun taruk deice ara, ining bol pisulule. Tonda, anggunce malye un ning weik tonun winilama anya arye, anggun taruk duk nirya ara, akunum malye kipdeipdanmalume. Tonda, anggunce tilila yupu ap, minin yupu ap, tuba-tuba nyaltakalulume. Anggun nyamunye deice arye, yum yupu dobuka nyalulume. Adeice arye, anggunda lik tenebuka winimunyeba, Allah arye deresulule.

⁴ Tonda, anggunce yuk nang ati derelalulumce, ninye deiyok nang, yupu lilsisikin nang dam bimunce, sikti, ‘Yupu kekesumunce, yupu bokuka lipsisik deipnusulume,’ nyabuka morolulum bukni, dipkoprob ning ati kume. Anggun kan-kan arye tonoknye babye, diksukum un ning ati, ayupu nyabuka kum morolulume. Anggun nirya arye, yupu lipsisikina deiyok nang dam bimunce, tilila yupu ap, minin yupu apuk, nyalulume. Yupu bokolina deiyok nang dam bimunce, ‘Aning ara, malye upmake,’ nyabuka, binuka nyalulum bukni, ara dipkoprob yupu kum nyalulume. Aning kum bukni, anggunce, ‘Kume, nunce anang deice ikin ning deibipyopura, malye un ning ton tabakuka winipnamapca,’ tenelulume. Anggunce ayupu sisikinmamunya deice arye, ‘Aning-aning ton winipnin banamabe,’ tenepmunce, yuk malye wini ning ton tenemunce, aninguk talibuka ululume.

^5-6 Anggunce pia malye winin ning atibuk, ‘Aning ara, winipnamabe, aning ton winipnamabe,’ tenebuka, yupu lilsisikumunya deice arye, ninye on ning ap, ninye dibin ninguk, kintinideilimunce, malye piluk dolulume. Winipmanto ara, ninye on yu kwatima, el duk deiamlya, aminyan talak aduk coplirye, yu weik kwatima dalirye, ninye si tobuka olamle touk, anggun babye winilulume. Tonda, anggunce, ‘Aning winiptibye,’ tenebuka winilulum ning ara, dipkoprob nong kum upnamsil ninguk winilulume. Talyeuk ulule. Winipmanto ara, tenipdelulume! Anggunce kwalin aik dobuka, ninye ongopmanto baju wiptum do? Kume! Aning atonun anggunce malye ululum ning nirya ara, teleb kum upnamle. Aning kum bukni, anggun nirya arye, malye una ap, talye nyaltakan yupu ap, ‘Naʼ tenen arye, tilila yupu uk nyana ap, minin yupu ap, nyaltakamunya deice arye, ninye oldana ap, yupu arye walana ap, yuk malye un ning ap, ton tabakuka winilulume. Adeice arye, malye una weik tonun ton ap winilulume. Aning winimunye ning nirya ara, talye ning uka.

⁷ Anggunce malye un ning atibuk, ‘Aning ara, winipnamabe,’ tenebuka, yupu sisikimunce, tuba-tuba tenelulum ning ara, anggun aning tenyamlum touk, adiparyuk minop winin balulume. Ara, anggunce, ‘Winibipyopura, aminyan talak yata unamsil do? Ikin ning nun dam yanamsil do? Yuk nang ati, malye kipdeipnamap do?’ moubuka tenina kumce, malye ninguk talye kanye bobuka winilulume. Anggun kanye talima noutam tenelulum ning nirya ara, malye un ninguk ulule. Tonda, yuk nang ati, ‘Opnamap,’ tenepmamunye ning ara, adiparyuk mangkau onauk ululume. Anggunda, dan mutuku do nirya, anggun bisik balulumak ap, yuk mutuku binuka unamlumak nirya ara, ninye obuka, aning nirya kum danalinauk ululume. Anggun aik oldemuk unamsile.

⁸ Tonda, anggunda, ninye olana ap, walana ap kumce, tonok kanye bobuka teleb un ning ton, kum kel bikamluma anya arye, aning kum winilulume. Tonda, anggunce diksukum winin ning ap, ninye yupu lipsisikuka bokolin ning ton, kum kel bikamlume. Winipmanto ara, anggunda kwalin bisikuk yapnin balamlume. Anggun balamlum bisikuk, melibuka dobolyangasinyak nang babye, teleb ning ton lengdar manamake. Nabi Yesaya birye, sik Yudea tam ulamik nang ati nyabuk.

Sik Yudea mutuku nang arye, Allah ati, sikce sik malye ulamik ning, kel bikdanamik ning ati, lak nyabik yupu

⁹ Sik Yudea nang arye, Allah ati nyabik. Winida, an Yesaya birye lak nyapdeiamsuk ning arye, nun akunum kel bikmabe. Allah ara, nunti kum lopdeipsukce, bataksukba, nun deice arye, ikin ning deilisiliba tuba dolonyabe. Tonda, Allah arye, nun mal olan nang dam arye, kum lobuka lyepdopsuka ara, nun malye un ning atia. Lyen ning ara, nun dam kanam kum yayuke. Wini talak ara, winipmanto ara, nunda, ‘Beren tam dirina yangalamliba, keting delilamle touk, weik tonun patasiliba, dan talak yanamsil doʼ tenen, pia dinauk unyabe. Bukni, nun dam ara, dirina kumce, pia kunukulongauk upsukba, kunuknauk unyabe. ‘Dirina arye bisik eibuka teleb kibuka banamapʼ tenen, dinauk unyap bukni, tuba kunukunauk usulule.

¹⁰ Tonda, winipmanto, nunda asing kulamle nang arye, talil busulamak atouk unyabe. Asing akunum yum ubuk nang arye, keting duk-duk noutam banmapya babye, lukunyan noutam banmakiba, yan dum duklamle touk usulule. Tonda, nunda kam nang unyakak unmap bukni, nunda akunum diplamak nang atonun unyabe.

¹¹ Nun nirya ara, ikin weik upsiliba, ilil deice engena ap, tonda bicoto touk, ngalukunauk unyabe. Nunda, ‘Se Allah arye lyepsutue. Elce nun mal olan nang dam arye lopdeisutuba bitibyeʼ tenen, dinauk unyap bukni, aning pia kum eilinyabe. Tonda, Allah arye, nun ikin weik usilye ning ara, kum kipdeipsuturye lyepdopsutueʼ tenen, dinauk unyabe. Bukni, aning nirya ara, kanam kum upsuke. Nunda aning patasiliba, teninyap ning ara, pere sukum atonun ulula anya arye, aning ara talye atibuk teninyabe.

¹² Min kum lyepdopsuluma deiyok ara, ani. Ara, dipkoprob, nunce Allah an dam pia malye weik unyabe. Ance, ‘Aning ara wininamlume, aning ara pia kum wininamlume,’ nyapdeiamsulum yupu ara, yaninauk unyabe. Nun kele, nun malye weik unyaba dekna ara tamubuka, nun diamuk malye ulisulule. Dipkoprob nun bidamnye, an yupu batakuka, tuba-tuba malye wininyap ning ara, moubuka kel bikinyabe.

¹³ Nun dam, akunum malye ulilamnyap bukni, ance, ‘Winipnamlume,’ nyapdeipsulum ning ara, batakaltakanauk unyabe. Tonda, yuk nang dam ara, nunce, ‘Kume, Allah Yahweh ara, nun walwale, el bisik kum dobolbanyabe,’ nyabuka batakanyabe. Nun ni Allah, an siuk erelamupu bukni, wini talak ara, an dam mal pipkuburye, nunda mandipna dobuka unyapce, pia yuk kwalin bisikuk akunum banyabe. Malyeuk winibibirye, yupu lipsisikuka bokolina deiyok nang dam bibirye, yuk nang ati, malye kum winipmakibuk, ‘Kume, sikda malye winipmake,’ nyabibirye, ‘Deiyok nang arye, anang wenepnamakʼ tenen, minin yupu arye nyanyabe. Allah anti, kum melibuka dobolyangakinyabe. Nunce yuk nang ati, nun kanye pum tam tenebibirye, ‘Ikin ning, sik deice akunum deilinamabeʼ tenen, yupu bokolina deiyok nang dam binuka, tenepce arye, talye tilila yupu uk nyabibiba, anang deice wenepnarye ikin ning delinyake. Adeice arye, an yupu yaninyabe.

¹⁴ Winibuka uninyaba deice arye, ance, ‘Aning-aninguk talibuka wininamlume,’ nyapdeiamsulum yupu ara, akunum batakupa anya arye, ninye yupu lipsisikuka bokilinyakak ara, dipkoprob yupu kum nyanyabe. Tonda, diksukum winin ning ara, nun dam batakupuba, winipmanto ara, pia pere atonun ulule. Ninye arye yupu lipsisikuka bokolinak ap, ninye bulubuka yupu sisiklamakak ap ara, ninye nirya, dinak arye teleb diksukum yupu nyana ap, teleb winina ap ara, teleb nyalilamak touk ulinyabe. Aning atonun mitang arye diksukum winin ning babye, nun tam nang nirya arye, akunum dongakarikdobukce tamubuka ati, tonoknye babye, aning ton kum kekenyake.

¹⁵ Malye un yupu kum nyaplirye, diksukum yupu uk nyalulnye bira, nun dam ton kum ulule. Ati, yatanye do nirya, sikce, “Malye kum wininune. Diksukumuk wininuna,” nyabuka nyalalulnye bira, nun tam unyap nang arye, anye el deiceuk malye un ning dobuka deibibiba, elti, malye kilinyabe. Allah Yahweh arye, amalye weik wininyap ning ara, akunum eililule. Elce diliba, diksukum teleb winin ning ap, ninye yupu lipsisikuka bokolin ning ap ton, kum eililamunce, el kanye teleb kum ulamlirye, malye kanye bobuk.

Allah arye, el mapu koproba, sik lyena ati, kintinip deipnamla ati, sekuk yupu

¹⁶ Allah elce eililamsuka ati, teleb diksukum winin nang, tonok babye panabuka tiklirye, Allah el mapu anggun malye ning kum danalina ap, kanye tamubuka, teleb kilina ap, pil dopmantonye pia kum ubuka anya arye, elce, ‘Se yata ati do?’ tenen, malye kanye bobukce, ‘Na bidamnye aryuk, aning lipsisikuka dopnirye, tuba tamubuka, teleb kipdeipnamne,’ tenebuk. Utenebuka deice arye, Allah ara, mikip weiknye ulula anya arye, el mikip aryuk, el mapu koproba ati, obuka sirya dakik nang ati, malye kiplobuk. Ara, elce, ‘Na mapu koproba sikti, lyepdopnamne,’ tenebukce, sik mal olan nang ati, obuka kum kipdeibuk. El pia diksukum ulya deice arye, melibukabukce, el mapu lyepdobuk.

¹⁷ Allah elda, el pia dipsukumuk ulula ara, winipmanto ara, yin talin nang arye, ‘Marapsikirye opsikcakʼ tenen, sik taram deice ara, ting kiniklamaka atonun ubuka, Allah el nong taram deice arye, diksukum winin ning deibuk. Winipmanto ning ton, sik yin talin nang arye, ‘Keil dopsikirye, nun kisok deice opsikcakʼ tenen, besi ning arye kat topi memepdeibikirye, galubuka ongolamak touk ubuka, Allah arye ninye lyena deiyok ning boyanuka, el kisok deice deibukce, ongobuk. Tonda, ninye arye, cang baju ongobuka balamak touk, Allah arye baju ongona atonun ubuka, sik malye-malye winilamik nang arye, teleb nang ati malye kipdeiamik ning ati, ‘Tamubuka kwang daknamnaryaʼ tenen, yayukce, anang ati wenebuka obuk. Winipmanto tonok ton, ninye arye tin baju dobuka, sik nong dam ongopnamak baju deice ongobikirye balamak touk, Allah arye, sik malye winin ninguk, talibuka ulamik nang ati, yu weik ubuk ning ara dobuka, el nong deice kwetep deibukabukce, sik amalye nang ati, yanuka wenebuka olamuk.

¹⁸ Allah elce, ‘Sik mal olan nang arye, malye wininyak ning ara, sik amalye wininyaka atonun, tamubuka kwang daknamne,’ teneplirye, sik dam yanuka kwang daklirye, dekna arepnamle. Ati, yata nang do nirya, sikce, ‘Allah ara, nun likeʼ tenen, el ulye ning batakanyak nang ati, yu weik deice arye, anang wenebuka opnamale. Tonda aning atouk, anggun weik laut mekwen deibukak, lilundam unyak pera mutuku nang ati ara, sik nirya arye, malye winilamik ning ati, elce wenebuka opnamlarya.

¹⁹ Tukwak nang mutuku sirya, im sirya nirya ara, Allah arye sik malye winilamik ning ati, wenebuka opnamle. Akunum winiplyopura, keting kumulban tam unyak nang arye, aning eibuka, kel bikikcopura, Allah Yahweh el mikip weik nyalul si ap, el ap ati ara, ilil weik unamake. Aning atonun, sik keting panalyangan tam unyak nang nirya ara, Allah Yahweh, el pia teleb ulye ning ap, el weik dirina ap ulya ara, eibikirye, ilil weik unamake. Allah Yahweh, el bikbik abuka yanamla ara, winipmanto, weik balamle mek deice, weik kum mikip yalirye, yanuka lontik abliba, mek silong bukuka welelamle touk ubuka, mikip arye bikbik abuka yanamle. Aning nirya ati ara, tukwak nang mutuku sirya im sirya nirya ara, elti, ilil weik unamake.

²⁰ Allah el mikip arye, tukwak mutuku tamubuka yanamle talak ara, Yakub birye deiamukba, dadeipdanin yangalamik nang, el mapu koproba ati nyapnamle. “Na Yerusalem mutuku weik asik noutam tamubuka yanamna ara, ninye Lyena Deiyoknye kipnirye yanamne. Ara, na mapu, anggun nirya malye winimunye ning batakmunce, tamubuka na tam kipnumunye nang lyepnamne ati, yanamne,” nyapnamle. Nara, Allah Yahweh arye, ayupu nyapsina ati, dipkoprob aning nirya nong upnamle!

²¹ Ura, Allah arye ayupu nyabuk. Narye na mapu koprop, anggun deice ara, ‘Narye winipnamsine. Winipsinyopura, anggunce ton wininamlume,’ nyabuka, nyalin yupu deice arye nyapsine. Na mikip weik ulye, Allah el Pia Teleb, Lek Dip Kanye ara, na mapu koproba, anggun Israel nang deice deipnamsine. Tonda, narye na nyasinye yupu dobuka peterepsinirye, anggun si pum bisik dongopnamsine. Ayupu peterepsiniba, anggunce, ‘Aninguk aupsiliba, pia ati talibuka unamabe, tenepmunyopura, ayupu ara, tuba nyapnamlume. Pia ati kum bataknamlume. Tonda, anggunce deipmunba, dadeipdanin banamak mapu babye, na nyasinye yupu dobuka, sik deice peterenamake. Anang arye deilinamak mapu ati, peterebikiba, anang babye ayupu kekebikiba kel bikikirye, talinamake. Ara, na Allah Yahweh arye, ayupu nyapsina anya arye, dipkoprob nong upnamlarya! Ara, atalak arye dipdongobuka, doyanamle talak nirya ara, peterepdanin bana uk unamlume,” nyapsine. Allah arye, sik Israel nang ati nyapdeibuk.