Yesaya 58 - Eipomek

Din dina kumce, talye unyakce teleb unyak ning ati, nyabuk yupu

¹ Allah Yahweh arye nyabuk. Anggun yupu mikip weik arye, na mapu Israel ninye sik dam nyalbinamlulume. Winipmanto ning ara, weik yupu nyalul pong-pong ana, el si terompet lelim weik tonun nyalamle touk, anggun yupu mikip weik tonun arye Israel ninye ati nyanamlume. Ara, sikce nati bataknikce, sik malye weik wininyak ning ati, lakoprop kibuka laka nyanamlulume. Sik apu koproba Yakub birye deibukba, dadeipdanin yangalamik ninye, Israel yala ninye ati, sik malye unyak ning lakak arye laka nyanamlulume.

² Aning ara urdem ati kum nyapsine. Israel ninye ara, asum-asum nirya na siuk erebikirye, ‘Allah arye, aning wininamlume, aning ara kum wininamlulume,’ nyapdeipsuk ninguk, ‘Nun ton kel biknamabe,’ nyanyake. Sikce, ‘Nunda telebuk kibuka ubirye, Allah tenelye ning ara kel biktibye’ tenenyak ninye mitik anun unyak bukni, yuk ninye nirya ara, dipkoprob aning atonun kum unyake. Israel ninye arye talye urdemuk unyake. Sikce na nyalamse yupu akunum batakanye. Sikce nyaninyake, “Kume, nun kanye deibibirye Allah si erenamabe. Tonda, Allah arye ‘Wininamlulume, aning ara kum wininamlulume,’ nyapdeiamsulum ning ara, tuba tenenamabe. Allah ati moropmabibuk, diksukum kibuka yupu lipsisikuka bokeipnamsile,” nyanyak bukni, aning ara dipkoprob kum wininyake. Tenepce aniryuk tilila yupu uk nyanyake. Dipkoprop sik kanye aryuk malye unyake.

³ Sik aninye arye nyabuka asininyake. “Allah ance melipsilyame, nyabuka din dina kumce, si tebuka winibirye morokinyabe. Bukni, yata ati Allah Yahweh kum disilyam do?” nyaninyake. Tonda nyanyake. “Yata deiyok ati Allah arye nyapdeipsuk ning amu tam ubirye kekebuka unyap bukni, elce kum disulul do? Ara, yata deiyok ati, nun wininyap ning eipsilirye, ‘Teleb unyake,’ kum tenesulul do?” nyabuka malye nyaninyake. Nyanyaka ati, na Allah Yahweh arye anggunti tamubuka nyapne. Dipkoprop anggun din dina kum arye unmalumce, nati moronululum ning ara, elisunun bukni, anoutam talak ara, dipkoprob nati kum tenelulume. Anggun bidamnye arye anggun patan ning atibuk tenelulumce, anggun kanye aryuk tenelulum ninguk malye-malye winilulume. Tonda anggun amu tam pil don nang ati ikin pil aruklamlumba dolamik buk, dekna kum arelulume. Sik nong deice ikin ning weik delilulume.

⁴ Tonda, anggun din dina kum arye si tebuka unmalumce, nati moronululum talak ara, dipkoprob ning ton kum winilulume. Aning winimunye sum aniryuk anggun mining nanguk, weik tonun malye yupu nyabuka waldamunce, anggun malye taruk arye olana uk ululume. Winimunye ning ara, pia malye ululuma anya arye, anggunce moronululum ning ara, im deice ununa arye, pia kum kekenamsine. Anggun tenemunya ara, ‘Nun moronyap ning ara, Allah arye kekebuka arepnamsilca,’ tenelulum bukni, winibuka umunyopura, kekenamsin do? Kume, anggun morolulum ning ara, pia kum kekenamsine.

⁵ Anggun teneipdelulume. Anggun din dina kumce si tebuka umunye talak nirya ara, anggunce, ‘Nun ti kekeplirye arepnamsil’ tenen, ululum bukni, anggun malyeuk winiluluma deice arye, anggunce anggun bidamnye atibuk imun kanye bolilalulume. Na tenepmase ning ara, ‘Teleb ning ara, tonok sum aryuk, na amu tamukirye, telebuk unamake. Yuk talak nirya ara talye urdemuk unamak,’ tenelamsise do? Aning pia kume. Kum yanuka doplirye maning loklamle touk, anggun kisok kanupdongobuka, kwelalulume. Tonda, malye baju kitibuka mutuku deice mapmunce, uku sice butbuta dobuka anggun kisok ap, nong deice ap delilalulume. Winilulum ning ara, ara ‘Din dina kumce si tebuka umunye talak ara, Allah arye telebe tenepnamsil’ tenen winilulum do? Anggunce, ‘Din dina kumce si tebuka una ara, dipkoprob ning ani,’ tenebuka winilulum do? Winimunye ning ara, nong bol deice ninguk winilulum bukni, anggun talima noutam ara malyeuk ulildalalume. Talye-talye uk winimunye ning ara, ‘Allah Yahweh eipsilirye, kanye deipnamsil’ tenen, winilulum do? Anggunda ‘Aning ara telebe,’ tenelulum bukni, nara aning atonun kum tenenune. Na Allah Yahweh arye, anggun winilulum ning ati, kanye kum delisunune.

⁶ Na Allah arye anggun Israel ninye ati nyapsine. Anggunce nati, ‘Elce melipnamsil’ tenen, din dina kumce si tebuka umunce, teleb winipmunyopura, aning ara, mitik teleb bukni, dipkoprob pia teleb unamlum tenepse ning ara atia. Mikip nang arye yuk talye nang ati, deiyok kum wamlibuk, yu ubikirye tapu koubuka delinyak ninye ara, ‘Anang ati bico tenepmunce anang loltakanamlum’ tenen nyapsise. Tonda aninye ara deiyok kum wamliba, rantai tapu arye tapu koubuka, wenena aik dongonyak ninye ati, ‘Anang ati bico tenepmunce, loltakanamlum’ tenen, nyapsise. Tonda mutuku-mutuku nirya talibuka unyak weik deiyok nang arye, sik amu tam nang nong deice ikin ning delinyak ning ara, kum danaipmunce, aninye ati lobuka melipnamlulume. Winipmunyopura, na Allah arye anggunti kanye delinamsine. Talye kanye deibuka, din dina kumce si tebuka una ara kume.

⁷ Tonda, ‘Teleb unamlum’ tenepse ning ara, atia. Anggun din ning aupmasilyopura, bokukapmunce sik din kum nang ati bokuka arepnamlulume. Tonda, bona utotoa kum ati talye bisikak balsusulamak ninye ap, ninye asik nang ap ati, ‘Nun aik wekuka yamunyeba, nun ap din neika dibuka unamabe. Nun aik manna teleb uka,’ nyabuka unamlume. Tonda sik baju ongona kumce, nong banang uk ulamak nang ati, anggun baju bokukapmunce, melibuka arepnamlume. Tonda anggun kwit capu ap, anggun yala nang ap, aning-aning nirya pataplyopura, sikti, batakna kumce melibuka arepnamlume. Winipmunyopura, na Allah arye anggunti kanye delinamsine.

⁸ Arup nyapmasin touk akunum winipmunyopura, bereklirye keting panayaliba, dirina weik ulamle touk, narye teleb kipdeipsinirye, telebuk unamsile. Tonda anggun ikin weik usilye ning ara, kum kipreipnirye, adiparyuk teleb kipdelinamsine. Nara Pia Diksukum ununye birye menekuka baniba, na aminyan tam dobolyanganululume. Tonda, ‘Dana-dana tam nirya arye malye winilyasilyak’ tenen, na Allah Yahweh, Dirin Weiknye birye, melibuka anggun aminyan tam melibuka kalikinamsine. Winipsinirye, boyanamsine. Anggun dam unirye, teleb kibuka melipsinya deice arye, lyenamsine.

⁹ Winipsinya deice arye, atalak-atalak nirya anggunce na moropnumunyopura, na Yahweh arye kekebuka melinamsine. Tonda anggun ikin weik upsilye talak, weik tonun malye nyabuka, anggunce nati, “Se na nio, melipsilyame,” nyapnumunyopura, kekepsinirye, ‘Na aunune,’ nyabuka melinamsine. Yuk nang arye, yuk nang ati, tapu koubuka delinyak ninye ati, ‘Anang ara, bico tenepmunce, lopdeipnamlum’ tenen, nyapsise touk, akunum winipmunyopura, teleb kipdeipnamsine. Tonda, ikin ning, anggun nong deice usilye ati, anggunda, ‘Deiyok el uka, anca,’ nyabuka, taruk kum pukulanamlulume. Aning atonun, anggun kayapu ati, yu upsiliba, anang ati, malye yupu nyabuka, lululina meme.

¹⁰ Tonda, ‘Bona utotoa talina kum ninye melinamap’ tenen, anggun din ning aupmasilyopura, bokukapmunce, sik dina kum nang ati, bokuka arepnamlume. Anang melina ati, pia pi dobuka, mikip arye pil donamlulume. Tonda yata ninye do nirya, deiyok kum wamikibuk, tapu koubuka, wenen aik dongolamikiba, imun kanye bolamice ninye ati, lolongonamlulume. Winipmunyopura, sik patan ning arebuka melipnamlulume. Anyapmasin touk, akunum winipmunyopura, kunukna noutamak ulamunye ning ara, dirin weik upnamsile. Ara, na nyapsine ning winipmunyopura, wini talak ara, lukunyan noutam kunukulul touk, ikin weik asa ululum bukni, aminyan talak ara, keting noutam talak, dirin weik ulamle touk, teleb unamsile.

¹¹ Na nyapsinye ning winipmunyopura, na Allah Yahweh arye, pia tuba talibuka bobasinirye, kalikisiniba, telebuk mikip arye unamlume. Tonda, anggun tuku ilimak ululuma babye, narye anggunti, pia tuba-tuba melibuka kalikisiniba, anggun din dipmunye babye bounamsile. Winipmanto ara, ninye arye koun ning koubikiba, mok weik cepliba, teleb kibuka palamle ning atonun, narye melipsiniba, teleb unamlume. Atonun, tonda mek pu ara, cena kumce, mek pia tuba balamle touk, pia melipsiniba, telebuk unamlume.

¹² Anggun ulamlum mutuku bukni, yu nang arye dakuka, uku sice kiplomik ning ara, sik mining ninye, Israel ninye arye, tuba tonap tamubuka, anyasik nirya punubuka donamake. Tonda, minop ayukumna uluplobicopura, tuba tonap deibikirye, aning deice uk, anyasik nirya deibuka donamake. Winipmunyopura, yuk nang arye, eibuka kel kibikirye, anggunti nyanamsiyake. ‘Sik Israel ninye ara, cang keil poka dakuka batakamik ap, keil aik daklomik ning ap, unirya tuba tonap tamubuka, aning nirya lipsisikuka, dona kel nang unyake,’ nyanamsiyake. Tonda, anggun asik nirya ap, bisik ap ara, yu nang arye aning nirya daklomik bukni, “Wini talak ara, min arye bisik diksukum yamik touk, Israel ninye arye lipsisikuka yapmakce, ninye unamak aik dana-dana tam donmake,” nyanamsiyake.

Allah arye, “Na si erena ati, dikdik senamlum nyapsise sum ati, ‘Asum ara, weik mambul sum’ tenen, kintinilinamlulume,” nyabuk yupu

¹³ Na Allah Yahweh arye, nyapsine. Narye, na si erena ati, narye wipdeiamsiseba, dikdik sen sum, Sabat sum akunum uplyopura, anggunce nati kibuka, na si erenamnulume. Asum deice arye, anggun patan ning tenebuka, yuk-yuk talye pil ton, kum donamlulume. Tonda, asum ara, yuk-yuk pera mutuku kum banamlulume. Tonda, asum deice arye, talye-talye yupu kum peterenamlulume. Ati, ‘Asum ara, weik mambul sum,’ tenebuka kintinipmunce, na siuk erenamnulume. Tonda anggunce, ‘Allah arye, dikdik sen sum arelamsuk ning ara, pia telebe. Allah Yahweh, el sum ara, weik mambul sum ati, asum ara, nun kanye deibabe,’ tenebuka umunyopura, narye teleb kilinamsine. Asum ara, ‘Naʼ tenen, sum anya arye, talye pil dona ap, talye-talye yupu nyana ap, pia kum wininamlulume.

¹⁴ Aning tenepmunce, dipkoprob na nyapmasin ning atonun umunyopura, anggun nirya arye, natibuk tenebuka, na si erepnumunyeba, narye teleb kanye arenamsine. Nati, kanye deibuka, telebuk unamlume. Narye anggunti, erebuka, teleb kipdeipsiniba, weik mutuku deice umunce, yuk mutuku unyak ninye weik tonun talibuka, anggun weik deiyok nang unamlume. Winipsinyopura, anggun apu koproba Yakub bak, ‘Winibuka arenamkine,’ nyalilamse ning ap, teleb mutuku ap, dopropmunce, adiparyuk telebuk unamlume. Ayupu nirya ara, anggun ni koproba Allah Yahweh arye, akunum nyapsina ati, dipkoprob nong upnamle. Allah arye nyabuk.