Yesaya 55 - Eipomek

Allah el si Yahweh arye, Israel ninye ati, ‘Narye pia melipnamsine,’ nyabuka nyalilamuk yupu

¹ Allah el si Yahweh arye, ‘Israel ninye na dam yangakiba, narye teleb kibuka melinamne’ tenen, adomon yupu nyabuk. Anggun mek patasulu ninye nirya ara, narye kintineipse mek dekna kum, ur talye yanduka dobuka dina ati yalume. Anggun yo bok kum ninye ara, na dam yamunce, yo bok kum upmalibuk, anggun din ning ara, dekna kumce, urdem arye dopropmunce, dinamlume. Winipmanto ning ara, anggur tapu duk mek ap, sapi basam moum yung ap, akunum kintinipsise ning ara, dekna kum urdem arye yamunce dobuka dinamlume. Ati, na dam yanulume.

² Yata deiyok ati, dipmanto kum ning dekelulum do? Tonda, anggun kanye talima teleb kum kipdeipsutue ning bukni, yata deiyok ati anggunce, ‘Aning doproptibnye,’ tenen, ikin pil weik dolulum do? Anggunda, dipmunce boupmanto kum usilye ning, yata ati awa uk wilulum do? Anggun dekuka dilulum ning ara kum bousilye diparyuk, urdemuk dobuka dilulume. Ati, narye, ‘Aning ara wininamlulume, aning ara kum wininamlulume,’ nyapdeipsise yupu uk moubuka talipmunce, diksukumuk umunyopura, anggun kanye talima nirya telebuk usiliba, kanye deibuka unamlume. Winipmanto ning ara, na dam yatumopura, narye piato weik din ninguk arepsiniba, teleb ning dinamlume. Aning atonun, na dam yamunyopura, anggun kanye talima teleb ulin ning arepsiniba, pia telebuk unamlume.

³ Se, na Allah arye wipdeiamse ninye nirya anggunda, na dam anyuk yamunce, na yupu moubuka kekenamlulume. Na dam yamunce, kekepnumunyopura, narye anggunti dipkoprob pia kam un ning arepsiniba, anggun dib kanye ara pia kam unamlume. Anggun apu koproba Raja Daud biti, ‘Bico tenepkinirye, pia melinamkine,’ nyapdeiamse ning ara, anggun Israel ninye ati bico unilya ati, batakna kumce, pia dipkoprob aninguk wininamsine. Awininamsin ning ara, min kum, kum danmanto ning pia aunamle. Kum bataknamsine.

⁴ Narye, ‘Dipkoprop Daud bira, Israel ninye, anggun ninye deiyoknye Raja unamle’ tenen, wipdeiamse. Tonda ‘Yin talin nang, sik weik deiyoknye unamle’ tenen, wipdeiamse. Ara, talye ati kume, Daud erepdeipsiba, aning nirya winilamuk ning deiyok ara ani. Ara, Daud erepdeipsiba, el winilamuk ning ara, ‘Ninye nirya eibikirye, na si ap, na mikip ap, moubuka kel biknamniak’ tenen, winyamse.

⁵ Anggun Israel ninye kekepnululume. Dipkoprop anggunce bita kel kum kiamlum ninye, mutuku-mutuku nirya pera mutuku daunyak ninye ati yukupmunba, sik aninye nirya kekebikirye, adiparyuk anggun dam anyuk yanganamake. Aning atonun, yuk pera mutuku unyak ninye, sik Israel ninye bita kel kum kiyamik bukni, anggun dam bikbik abuka yanganamake. Anggun dam yanganamaka deiyok ara, na si erenululum Allah ara, na Yahweh arye anggun Israel ninye ati, wipdeiamsirye, ereipsisa ati, sik yuk yala ninye arye, ‘Se, Israel nang ara, weik mambule,’ tenesinyake. Nara malye winin ning tonok ning babye kum ununa anya arye, Pia Telebnye unirye, anggun Israel ninye ati pia kalikuka melisunune. Narye anggunti erepdeipsisirye, teleb kililamsisa ati, yuk pera mutuku ninye arye, anggun dam dilyanamake.

⁶ Allah el si Yahweh, el dam anyuk adiparyuk tamubuka yanululume. Ara, el tuba upliba din ning din talakuk, el dam yatume. Aning atonun, anggun dam awinilul talak aryuk, elti, ‘Naio, melipsilyame,’ nyabuka, ‘Allah ati yukupnamnulum’ tenen, nyapsine.

⁷ Anggun malye winin ninguk tenebuka ululum nang ara, ‘Nun malye unyabe,’ tenepmunce bataknamlulume. Aning atonun anggun diksukum un ning bataklum nang ara, anggun malye tenelulum ning nirya batakuka teleb ninguk tenenamlume. Winipmunyopura, anggun ni Allah, el si Yahweh dam tamubuka yanamlulume. Ara, ‘Nun malye wininyap ning ati, talye opsutu bukni, el kanye aryuk bico tenesilirye lyepnamsil’ tenen, unamlume. Anggun ni koproba Allah el dam tamubuka yamunyeba, weik tonun bico tenepsilirye, anggun malye ning weik aupmalya babye, namin kipnamsile. Anggun talima mitang usilirye, anggun malye winilulum ning batakmunba, kum kipdeipsilirye namin kipnamsile. Ati, anggun malye winimunye nang ara, tamubuka Allah el dam yanganamlulume.

⁸ Na Allah arye nyapmasina ara, talye ati kum nyapsine. Na tenenuna ara anggun tenemumya touk kum tenenune. Tonda na wininun ning ara, anggun winilulum ning atonun kum wininune. Na Allah Yahweh arye nyapsine.

⁹ Na tenenun ning ap, wininye ning ap ara, anggun tukwak arye im deice dinmamunba, pia alip ulamle touk tenebuka wininune. Ati, na wininun ning ara, anggun winilulum ning ara atonun kum wininune. Nara pia yuke. Aning atonun, na tenenun ning babye im deice dinmanyeba pia alip ulamle touk kibuka tenenune. Anggun tenelulum ning ara pia yuke. Ara, na wininye ning ara pia yuke. Anggun winimunye ning ara, pia yuk ulula ati nyapsine. Nun kanye neikto touk, pia kume.

¹⁰ Im deice arye mok tukwak saklamle ning ara, tonap tuba tamubuka urdem aryuk im deice kum welebalule. Bukni, tukwak mutuku saklirye, tuku mok oplirye namin upliba, tukwak ubuk ning nirya teleb kibuka palule. Winiplirye ninye koulamak ning nong upliba, anggunce libuka dilulume. Ati Allah arye mok arisilye ning ara, talye ati kum winilule. Mok arisiliba, el tenelye touk nong ulule.

¹¹ Awinilul atonun, na Allah arye anggunti nyalisinye yupu ara, talye urdemuk tamubuka na dam kum yanamle. Aning kum bukni, narye, ‘Winipnamle, aning ara nong upnamlarya,’ tenebuka nyalisinye ning ara, dipkoprob atenenirye nyanun touk nong unamle. Tonda narye, ‘Ayupu dopkwetepniba, nong ara winipnamle,’ tenenye touk dipkoprob nong unamle.

¹² Sik Babel mutuku ninye malye kipsikce, sik mutuku bobinamsikba, daulamunya ani batakuka, anggun mutuku koproba tamubuka binamlum talak ara, pia kanye deibuka banamlume. Ara, Babel mutuku noutam ara, na Allah arye anggunti talibuka bobinamsine. Bobasiniba, banamlum talak ara, weik mutuku ap, mitik mutuku ap nirya ara, anggunti kanye deipsikirye, mot sebikirye si erebuka kinamsiyake. Tonda yo nirya ara, anggun Israel ninye atibuk taruk bok-bok abikirye si erenamsiake.

¹³ Parum tace atonun ulamle ning nirya ara, wa win dam yo atonun yo, el si ara kepyal yo uk punupnamle. Aning atonun kirikna tace atonun ulamle ning nirya ara, teleb keit ning el si murad yo palamle ninguk punupnamle. Aning nirya akunum winiplyopura, ninye nirya eibikirye, ‘Se nun ni koproba Allah, elcuk amalye ning punubukce, teleb ninguk deipmasile,’ tenen, kel kibikirye, na si Yahweh erebuka kinamniyake. Malye ning nirya kum kipdeipnirye, teleb ninguk punupdeipnyopura, ara pitin kilina ati winipniba pia unamle. Aning nirya ara, min kume kum danamle. Winipliba ninye mutuku-mutuku nirya arye, na Allah Yahweh ati, na siuk erenamniyake. Allah arye nyabuk.