Yesaya 48 - Eipomek

“Doyanamle talak ara, Allah el mikip weik deice arye, Israel yala nang, Babel mutuku noutam arye, lobukaplirye, lyepdopnamle,” nyabuk yupu

¹ Allah arye nyabuk. Anggunda, anggun apu koproba, Yakub birye deiamsukba, dadeipdanin yangalulumce, ululum ninyeo, anggunda moubuka kekepnamlulume. Yakub birye deiamuk nang ati, narye, ‘Sik si ara, Israel yala nang nyapsina anya arye, ninye arye nyanamsiyake. Tonda, minop talak ara, anggun pununanye Yudah birye deiamukba, dadeipdanin yangalamlum nang ululume. Anggunce, nyalin yupu nyaplum talak ara, ‘Nun ni Allah Yahweh, el si deice arye nyapsiyabe,’ nyanamlume. Tonda, ikin upsiliba, ‘Nun ni Allah arye melipnamsilʼ tenen, anggun Israel nang arye, na si erenululume. Aning nirya winibuka nyalulum bukni, dipkoprob ning ara, anggun kanye deice arye, diba tenebuka kum nyalulume. Talye yupu atonun nyabuka, si bambol deice aryuk, nyaltakalulume. Dipkoprop diksukum ubuka, teleb deice arye, kum nyaltaklulume.

² Aning ara, talye ati kum nyapsine. Deiyok ara, anggunce, “Kume, nun Israel nang ara, Allah arye wipdeiamsuk mutuku, pia mambul Yerusalem mutuku noutamuk unyaba anya arye, nun Israel nang arye si erenyap Allah ara, el si Yahweh ulule. El diamuk nunti melibuka kalikisulule. Allah Yahweh ara, aning-aning nirya deice tam erebuka, el mikip weiknye ulirye, im deice yin talin malaikat nirya, sik deiyoknye ulule. El ti buk diba tenenyabe! El amu tamuk unyabe,” nyalulume.

³ Minop talak anggunti ikin weik tonun akunum ulamuk ning ara, aning kanam kum uamuk talak, na Allah arye, “Aning ara, anggun wenena ati winipnamsine,” nyabuka akunum nyalilamsise. Na si bambol deice arye, ‘Winipnamsile, winipnamsile,’ nyabuka lak nyapdeiamsisirye aning nirya ara lak kibuka nyapsise. Winibuka nyalamsisa ani, aminyan talak ara, aning nirya talye karin arye, aning nirya nong ubuke. Ara, narye, ‘Wininamsine,’ nyapse ning nirya ara, anyapdeipsise touk nong ubukba, akunum lak kipdeipsise.

⁴ Ura nara, anggun winilulum ning nirya akunum bikamsise. Ara, anggun kanye ara, kisok kat nang ululama anya arye, deiyok nang arye, ‘Wininamlume, wininamlume,’ nyapsitinga babye, sikce nyabikce yupu ara, anggunce malye kibuka, ‘Nunda, sik nyanyak yupu kum kekepnuyabeʼ tenen, lik tenebuka ululume. Anggun una ara besi beton atonun ulule. Anggun asok ara, pia kat ning, el si perunggu atonun ubuka, ululuma anya arye, anggun mandipna kanye bobuka ululumce, wenen yupu pia kum kekelulume.

⁵ Anggunda winibuka ululuma ati ara, minop talak, narye anggunti, ‘Aminyan talak ara, anggun wenena ati, ikin weik ning anggun dam yanamle! Akanye imun ning min kum yayuk talak arye, ‘Aning dipkoprob akunum winipnamsile,’ nyapdeiamse. Winibuka babye, talye ati kum winipse. Deiyok ara, anggunce, “Kume, awinipmal ning nirya ara, nunce puturubuka deibupe talye ning, isa si erena ati aning, puturubuka deibupe ning arye, aning nirya arepsuke. Akumopura, nun si erenyap ning, el mikip deice arye, mambul weik pil nirya dopsukce, kanye imun ning arepsuke,” nyabuka, ‘Kum nyapnutumʼ tenen, aning nirya min kum winibuk talak ara, narye akunum lak nyapsise.

⁶ Ati ara, anggunce moubuka teniplulume! Narye, ‘Doyanamle talak ara, aning-aning winipnamsile,’ nyamsisiba kekelamlum ning nirya ara akunum winibuk. Ati ara, narye anggunti akunum lak nyapdeaimsise yupu ara, anggunce, ‘Se, nunda malye ubupu. Allah arye dipkoprob yupu uk nyapdeipsuke. Elce nyapdeiamuk touk akunum nong ubuka ati, ikin usulule,’ teneplumce, aning ton lak sukum arye kum nyapnamlum do, nyapnin banamlum do? Bukni, wini talak ara, narye anggunti, yuk ning ton, winiryuk winipnamle ning ati nyapnusine. Tonda, minop talak duknyamsirye, kum lak nyapdeiamsise arye, anggun ton min kum biklum ning lak nyapnusine.

⁷ Dipkoprop, anyapnusin ning nirya ara, minop talak arye, min kum kintinip deiamse. Aning nirya ara, wini talak aryuk kintinipnirye, arepnamsine. Arup arye nyapnusin bukni, ayupu ara minop talak ninye arye kum nyalamikba, anggun ton aning nirya min kum kekelamlume. Wini talakuk narye ton winiryuk ning kintinip deipnuna anya arye, anggunce, ‘Kume, aning nirya ara, nunce akunum kekebuka bikamupe,’ pia kum nyaptume.

⁸ Na kele, anggunce anyapnusin ning nirya ara, min arye pia kum kekelamlume. Aning nirya ara, min kum bikamlume. Minop talak arye dipdongobuka, wini talak noutam nirya ara, ninye arye kum nyalamika anya arye, kum kekelamlume. Tonda, anggun kanye talima noutam ara, ‘Allah arye nyasilye yupu ara, kanye deibuka adiparyuk moubuka kekepnuyabe,’ pia kum tenelulume. Anggun amul arye ayupu kekepmanto deiyok ning ara, min arelamsisa anya arye, ayupu ara kum kekepmanto ulamlume. Deiyok ara, ani. Na kele, anggunda diba tenen nang kum ululume. Anggun apu yapu arye deiamikba, dadeipdanin yangalamika ani, anggunti deipsikba, anggun mitik mapu ulamlum talak arye dipdongobuka, wini talak babye, anggunda deiyok nang arye nyanyak yupu kekepmanto nang kum ululume. Anggunda, deiyok nang arye nyanyak yupu yaniltan nanguk ululume. Tonda, anggunce, ‘Deiyok, ance nyasilyam ning ara, talibuka unamabe,’ nyaptuma babye, aning ara dipkoprob kum wininamlum bukni, yaniltana uk umunya ati, ayupu kum lak nyapsise. Nyaptinya babye ara, tonok babye anggun amul pum tam kum weksutue.

⁹ Tonda, ninye mutuku sirya im sirya nirya arye, ‘Se, Allah ara, dipkoprob talima pia naminye ulula anya arye, yu usilya babye, yu weik tonun, adiparyuk kum wenebuka oplopsulule,’ tenepnikirye, na si biknamakʼ tenen, na yu tenisunun ning ara, tuba dokolauk deipsine. Winipnya deice arye ninye mutuku sirya, im sirya nirya ara, na siuk biknikirye, ‘Se, dipkoprob Allah ara, pia telebuk ulule, nyabikirye, na si erebuka, kinamniyakʼ tenen ati, narye anggun yu weik upnuk ning ara, adiparyuk anggun deice min kum deipsine. Tonda anggun nirya ati, min kum obuka, sirya daksitinye. Tonda, min kume kum kipdeipsitine. Tuba bico tenesunune.

¹⁰ Anggun moubuka tenipdelulume! ‘Na tenen nang telebuk unamakʼ tenen, anggun akunum lak kina ati, narye kanye imun weik ning areamsisiba, ikin weik ulamlume. Winipmanto ara, ninye arye, dekna teleb ning perak dobuka, uku dongobikiba, uku buk arye dinmalya ani, malye wamlye ning kum danin baliba, perak pia teleb ninguk uplyopura, aninguk wibuka delilamak touk, narye ikin ning anggun deice deibuka piripdesise. Winipse bukni, uku pum tam kum dongopsise, kanye imun ninguk arepsisirye, piripdesise.

¹¹ Aning nirya ara, anggun deice ikin ning aresinya deiyok ara, ani. Ara, Ninye nirya ara, na pia teleb si, tuba teleb tenenamniyakʼ tenen ati unune. Diba, ara na pia Teleb si ati ara, unune. Yata deiyok ning ati, na talye daunmakiba, anggunce malye upmunya deice arye, yuk mutuku nang mutuku sirya im sirya nirya eibikirye, na teleb si yanipnikirye, ‘Allah elda malyeuk ulule,’ tenebikirye, na si ati malye nyapnamak do? Kume, ‘Aning ara daupmalyeʼ tenen, kum winiptinye. Ara, na pia teleb unye ning ap, na mikip weik ap, na pia teleb weik unun ning ap nirya ara, yuk ning do, yuk nang do, sik deice ton kum dobuka deiptinye. Aning nirya ara ‘Naʼ tenen, ninguk unulule.

Allah arye el ‘Naʼ tenen, nang, Israel yala nang ati winipnamuk ning ati, nyabuk yupu

¹² Allah arye nyabuk. “Se, anggun Israel yala nang ara, na nyapnusin yupu moubuka kekepnululume! Tonda, anggun apu koproba Yakub birye deiamukba, dadeipdanin yangalamlum nang ara, anggunti yupu nyapsisirye, ‘Naʼ tenen, ati wibuka deipsisa anya arye, na nyapnusin yupu kekepnululume! Nara anggun ni koproba Allah pia ati unune. Pia aununye bira, nauk aunune. Aning-aning min kum uamuk talak ara, na akunum ulamse. Tonda, aning-aning akunum kum uplyopura, na uk tuba kam unamne! Nara aning-aning nirya deiyok kina ap, sirya dakna ap, weik deiyoknye birye, na uk unune. Yuk ning ton pia kum ulule.

¹³ Na mikip weik taruk arye, tukwak mutuku amu tam ara, mutuku yuk ning keil deiamse, aning nirya baribuka talipse. Na mikip weik sirik taruk arye, im noutam ap, im deice tam ap, ulye ning nirya ara, naryuk lilibuka deiamse. Tonda, im deice tam awamuk ning nirya babye, narye yukupnirye, sik si, si sibuka, ‘Yalulume!’ nyaptinyopura, sik adiparyuk bikbik abuka yakirye, ‘Yata nyapnusil do?’ tenen, kintinibikirye, tunim abuka tikinyake.

¹⁴ Ati, tukwak nang mutuku sirya, im sirya nirya, dana-dana tam nirya arye, anggun nirya bulubuka wekmunce na nyapnusin yupu kekepnululume! Anggun mutuku noutam arye, yata nang do, yata dewa-dewa isa do, na winipnamne ning ati, anggun kanye aryuk aning lak nyaptingba kekeptum do? Kume aning kum winipmanto. Na Allah Yahweh ara, Babel mutuku olyanamlanye bira bico tenenirye, melinune. Ati, anye melinamna deice arye, sik Babel mutuku unyak nang ati, yanuka oplirye, sirya daknamle. Dipkoprop, el taruk mikip erebuka, adeice arye, sik Kasdim nang ati, obuka sirya daknamle. Aning nirya winipnamle ning ara, na Allah Yahweh arye, sik Babel mutuku nang wenena ati winipnamne!

¹⁵ Anye bira, na Allah arye akunum wipsirye, yukupse. Tonda, narye elti, yukupsirye, el nong dobuka, akunum boyanuka deipse. Boyaniba, elce, ‘Winipnamne, winipnamne,’ tenelye ning nirya ara, winipnamle. Elce tenelye ning nirya ara, teleb kibuka, pil dopnin banmalya ani, aning nirya nong upnamle! Ayupu nirya ara, Allah arye nyapdeibukba, nabi Yesaya kekebukce, sekuk

¹⁶ Nyabukopura, Yesaya birye nyabuk. “Winida anggun Israel nang ara, na damuk yalulume. Yamunce Allah arye nyapdeipsuk yupu kekepnamlume! Minop talak arye, na Allah arye winipnamuk ning nirya ara, kum duknulamse. Aning-aning nirya lak kibuka lak nyalamsise. Nyapdeiamsise talak arye dipdongobuka, anoutam talak nirya babye, na tuba aunirye, aning kintinibuka delinune. Aning nirya dipkoprob akunum nong kibuka delinune,” nyabuk. Ati na Yesaya birye nyapsine. Atalak ara, Allah arye el mikip arepnuka deice arye dopkwetepmanilba, anggun dam akunum yanmasine. Yesaya birye, sik Israel nang ati nyabuk. “Allah arye nyapdeipsil yupu ara, ani!” Allah arye nyabuk.

Allah arye, Babel mutuku ninye deiyoknye oplirye, el ‘Naʼ tenen nang, lyepdopnamle ning ati, nyabuk yupu

¹⁷ Wini talak ara, na Allah Yahweh arye nyapsine. Israel nang anggun Lyena Deiyoknye usunune. Nara, malye un ning tonok babye kum unilyeba, pia teleb Lek Deiyoknye unune. Anggun ti pia melibuka kalikisunune. Nara, anggun ni koproba Allah unirye, aning-aning nirya deice tam unirye, na mikip deice arye talinune. Narye anggunti, ‘Winibuka unamlume. Teleb uning ara ani,’ nyabuka peteresununa deiyok ara, ‘Anggun moubuka kel bikmunce, aminyan ara telebuk unamlumʼ tenen ati, pia peteresunune. Naryuk, ‘Anggun teleb banamlum bisik ara ani,’ nyabuka peteresiniba, aninguk kekebuka winimunyeba, pia diksukum bisikuk bobasunune.

¹⁸ Ati, nyapsine. Se, narye anggunti, ‘Aning winipnalmume, aning ara, pia kum winipnamlume,’ nyabuka akunum nyapdeiamse yupu uk moubuka bikamtumce, aninguk kekepmunce, talibuka akunum utumopura, anggun winin ning nirya, pil dopnin balamunyeba, aning nirya akunum pia telebuk upsutue. Winipmanto ara, weik mek cena kumce, tuba-tuba balamle touk akunum winipsutue. Tonda, anggun una ara pia pin-pin deice uk uptume. Tonda, weik laut mekwen, el mikip arye tuba-tuba batakana kumce, welebinmana ani, koulukuka balamle atonun, pia tuba yangalamle touk, anggun babye tuba telebuk uptume. Teleb ning ara, anggun dam tuba-tuba yanyana uk uptue.

¹⁹ Aninguk kum bukni, anggunce deiplumba, dadeipdanin banamak nang, sik yupa ara, ninye arye mek wininga weik ati, kum nukmanto ulamaka atonun akunum upmatinge. Narye anggunti melipsitiniba, anggun deipnin banamlum mapu babye, pia ati unamtinge. Narye sikti, pia eibuka kaliknyopura, sik mapu silip ara, na dam arye, min kum upnamtinge. Ara, yuk mutuku nang, yu nang arye, sik mapu silip ati, pia malye kibuka, kum sirya daknamtinge. Ninye mutuku sirya im sirya nirya ara, sik si tuba teninauk unamtinge. Anggun mapu silip nirya ara, kum opnamsiyake. Pia ati unamtinge.

²⁰ Ati ara, anggun Israel yala nang ara, Babel mutuku arye batakuka, bikbik abuka bimunce, yuk-yuk mutuku nirya binuka unamlume. Anggun nirya ara, Kasdim mutuku batakuka, bikbik abuka bindopnamlume. Narye nyapnusin yupu ara, boyanuka, weik yupu deice arye, ayupu nyabuka, dana-dana tam nirya banamlume. Anggun kanye pin-pin deice arye, “Ayupu nyapnamlume. Ara ani. Nun ni Allah Yahweh arye, el amu tam pil donanye Yakub, elce deiamukba, dadeipdanin yangalamikce deiamik nang, Israel nang ara, akunum lobukaplirye lyepdopnamal atia!” nyabuka ayupu weik tonun nyapnamlume.

²¹ Tonda, ayupu ton weik tonun nyapnamlume. Ara, “Allah arye, el ‘Naʼ tenen nang, Israel nang, ninye ap, mek ap, pia kumak, pia kata sukum mutuku bobinamuk talak nirya ara, sik anang mek patabukba, elce mek areamukba, sik ton mek patana kum ulamuk. Allah arye weik keil bukamuk mutuku kan-kan arye, cobuka dilikukak, mek panabuka yayukba, kwebuka dilamik.

²² Bukni, na Allah Yahweh arye nyapsine. Sik malye un ninguk talibuka wininyak nang ara, dipkoprob talye kanye deibuka, telebuk pia kum unamake. Ikin diamuk unamake. Na Allah arye nyapsine, nyabuk.