Yesaya 46 - Eipomek

Babel mutuku ninye arye, isa si erelamik ning ati, nyabuk yupu

¹ Wini talak ara, Babel mutuku ninye arye, isa si ara, Bel Isa ap, isa si ara Nebo Isa ap, si erelamik ning ara, akunum mikip kum upliba, nimalyap arye bobanyake. Bukni, aisa nirya ara, dobukabikirye, talye kam ulamle ning keledai basam balye deice deibikiba, ikin weik uplibuk bobalule.

² Sik isa si ara Bel ap, Nebo ap arye, ‘Aning saklyak’ tenen, gutam tuku dipdongobukaplirye, sik urasin atonun puturubuka deiyok si erelamik ning, ‘Se, nun urasin atonun memamik ning saklyak’ tenen, taruk yangabuka deiyok barurake. Bukni, sik urasin atonun memamik ning saktua babye, sik Isa bitinye arye aning lyebuka kum doproptiringe. Sik patung babye, yu nang tomobuka, pia pera mutuku bobinamake.

³ Ati, Yakub birye deibukba, dadeidanen balulum ninye, Israel ninye ara, anggun tuba kam aunmalum ninye ara, “Na yupu uk moubuka kekepnululume. Anggunda na mapu koprop ati nyapsine. Ara, anggun apu yapu arye anggun min kum deiamsik talak arye, narye meliamsa ati nyapsine. Anggun deipsik talak arye dipdongobuka, wini talak nirya ara, narye tuba kalikuka melisinirye, talisunune.

⁴ Nara, anggun deiyoknye Allah unune. Ununce, melilamsinya ani, wisi danamlume. Aning atonun pia melilamsinibuk, kul potong tiknamsile. Na Allah arye anggunti pia tuba-tuba bico tenesununce, kalikuka melisunune. Narye kwepdeiamsise ati, narye anggun melibuka bobinamsine. Minop talak arye melibuka lyepdopsise touk, tuba anggun patapsilye ning arelamsinirye, lyenamne.”

“Ninye arye, talye ning si erenyak ning nirya ara, na Allah ununa atonun, kum ulule,” nyabuk yupu

⁵ Allah arye nyabuk. “Anggunce nati ara, ‘El atonye ton aulule’ tenen, ‘Anye bira ani,’ nyapnutum do? Yatanye ton, na ununa atonye, aulule nyapnutum do? Na Allah ara, na tonoka anya arye, anggunce teneipdelulume. Anggunce, ‘Aning koproba ton, Allah mitik tonunuk ulule,’ kum nyaptume. Na ununa atonunye ton, pia kum ulula atia.

⁶ Ton nang ara, kat ning dekna weik ning, emas liamice yokuka yamuplobikirye, tonda, dekna weik ning perak yokukabikirye, ‘Aning el ikin ara, yata barye do?’ tenen, kel bikna ati, kiklilen ning, el si timbangan deice deibuka dilinyake. Winibicopura, adiparyuk, memenanye dam bobicopura, el anye birye, ninye urasin atonun kibuka memepliba, amemelulnye bira, el pil domlya dekna ati, dekna arinyake. Winibikirye, aning ati, ‘Nun ni koproba,’ nyabuka, sik nong kanupdongonuka, isa si erenyake.

⁷ Ninye arye, isa si erena ati memenyak ninguk dobukabikirye, sik aik binuka deibikirye, ‘Nun ni koproba,’ nyabuka, si erenyake. Ara, el delina ati, kintinip deiamice aikuk, binuka deibicopura, aning ara, abinuka deipmace sukumuk pia aulule. Ton kum balsusulule. Ninye arye, aning ati, ‘Nun deiyoknye, ance nun patapsil ning arepsilyame,’ nyabuka moroptinga babye, kekebuka kum areptue. Anang, sik ikin upliba, ‘Yata wiripnuyap do?’ tenebice talak ara, isa arye melibuka kum lyeproptue. Aning ara, kam kum ulul ning atia. Talye ninguk ulula atia.”

⁸ “Ati, Se, anggun malye umunce, na yupu yaniltanululum ninye nirya ara, moubuka tenilenamlulume. Na Allah arye nyapnusin yupu ara, anggun asok deice deipmunce, pia tenenamlulume.

⁹ Ara, minop talak na Allah arye pil dolamseba, winipra yangalamuk ning tuba tonap, aning nirya moubuka tenepmunce, kel kinamlulume. Winipmunce, ‘Allah ara el tonok ulule. Elcuk aning nirya winyamuk’ tenen, na siuk kel kipnumunce, erenamnulume. Ara, na ununa atonye bira, yuk Allah ton kum ulule. Na tonok unune,” Allah arye nyabuk.

¹⁰ Nyabukce ayupu ton nyabuk. “Aning-aning nirya min kum kwepdeiamse talak arye, ‘Sirya talak ara, aning winipnamle,’ nyabuka laka nyapdeiamse. Tonda, minop talak arye do unamle talak ati, ‘Aminyan talak ara aning ton wininamle’ tenen, moubuka tenelamsirye kintinip deiamse ning ara, laka nyapdeiamse. Ati na tenepsirye ‘Aning ara winipnamle,’ nyapdeiamse ning ara, ton kum bataknamne. Anirya tenelamse touk dukdongopnamle. Tonda, na kanye deipsirye, ‘Winipnamne’ tenyamse ning ara, adiparyuk dipkoprob nong upnamle, kum bataknamne.”

¹¹ “Narye, ninye deiyoknye keting yangan tam arye yukupniba, yanamle. Ayanamle talak ara, na tenipsirye nyapse touk yanuka winipnamle. Winipmanto ara, somnyo maka minopce lakuka yalirye, el teneplye touk, mitik tonun kam ning obuka dilamle touk, narye wipdeipnamnanye bira, amaka atonun kibuka, minopce yalirye wininamle. Ati, dipkoprob narye, ‘Wininamle,’ tenen, nyapdeiamse ning ap, tenyamse ning ap nirya ara, dipkoprob nong upnamle. Aning nirya ara, kume kum danamle. Anirya dukulongona uk unamne.”

¹² Allah arye nyabuk. “Anggun talima erepmunce, ilil kanye pia bolulum nang nirya ara, anyapne yupu moubuka kekeplulume. Anggunda diksukum pia kum ululumce, malyeuk ululum ninye ara, kekeplulume. ‘Aning ara, min kum winipnamle,’ tenena meme.

¹³ Narye, anggun ikin kanye bobuka umunye noutam arye lopdeipsinirye, anggun lyen talak ara, dam kipdeipnamsine. Anggun lyepnamsin talak ara, ‘Aminyan dotalak uk yanamle do?’ kum tenenamlulume. Ara, dipkoprob dam uple ati nyapsine. Anggun lyena ati yanyopura, yatanye birye ton, ‘Aning ara kum winiptue,’ tenen, yupu seknutu do? Ara, pia kum winipmantoe. Na Allah arye Yerusalem mutuku umunye ninye nirya ati, dipkoprob lyepnamsine. Tonda, nara pia teleb unye touk, Israel ninye ati, teleb kipdeipnamsine. Winipnirye, yupu laka kipdeipniba, yuk mutuku ninye arye, Israel ninye ati, ‘Se sikda mambul weik ninye,’ nyabuka si erenamsiake.” Allah Yahweh arye nyabuk.