Yesaya 38 - Eipomek

Yudea mutuku taleamuknye Raja Hizkia, kanye imun pia weik uk dilamuka ani, Allah arye kwetepdeibuk yupu

¹ Atalak ara, Raja Hizkia, kanye imun weik uk dilamukba, dipmanto ubuk. Amos elce deiamuknye nabi Yesaya birye, Raja Hizkia uk dilamukak dilyayukce, ayupu yanuka nyabuk. “Allah Yahweh arye, Raja anti, ‘Elce aning winipnamne,’ tenelamlye ning ara, adiparyuk winipnulule. El aik ning ap, el pil dolamlye ning ap nirya ara, teleb kipdeiplirye, sirya daknamle. Deiyok ara, el dipnamle talak ara, akunum dam upmale,’ nyapdeipmakile,” nyabuka lak nyabuk.

² Nyabukba, kekebukopura, Raja Hizkia birye, anyapdeipmok yupu akunum kekebuka anya arye, anyaik abilinga pibuka domik tam dilbiyukce, Allah Yahweh ati morobuk. Elce morobuk yupu ara ani.

³ Allah ati morobukce nyabuk. “Se, na ni Allah Yahweh, nara, ance nyapdeiamnulum touk ubuka unirye, batakana kumce, pia an piluk weik donirye, ance, ‘Aning ara, diksukum un ning ani,’ tenelyam ning ara, teleb un ninguk wininun ning ara, akunum kel biknulum ning ara, luba kina kum bukni, tuba teninauk unamnilamʼ tenen, moropkine,” nyabuka, malye kanye bobuka, pia engena weik deice arye, Allah ati morobuk.

⁴ Winibukopura, Allah Yahweh arye, nabi Yesaya biti, el dam yanuka nyapdeibuk. Allah arye nyabuk yupu ara ani.

⁵ “Anda Yesaya, ance tamubuka Raja Hizkia, el dam bimince, binuka nyapnulyame. ‘Nara Allah Yahweh, an apu koproba Daud, elce si erelamnuknye, na akunume. Ance moropmanilam ning ara, akunum kekepmakine. Tonda, an asi maka sakmakil ning ara, akunum eipmakine. Ati ara, an kam tuba una ati, limabelas (15) tahun ton lo tuba arepmakine.

⁶ Aninguk kum bukni, tonda, narye, an ap, amutuku Yerusalem mutuku ap, amutuku nang ap ara, Raja Asyur, el taruk deice arye talesilirya ara, narye anggun dobuka lyepsinirye, anggunti tuba melibuka kalikinamsine.” Allah arye nyapdeipmakile. Yesaya birye, Raja Hizkia biti laka nyabuk.

⁷ Yesaya birye ayupu nyabukopura, ayupu ton dukdongobuka nyabuk. Na deiyoknye, ance, ‘Dipkoprop Allah arye nyapnuk yupu nong upnamleʼ tenipmince, ‘Diba tenepnamlamʼ tenen, Allah arye an kel bikna ati, Allah Yahweh arye ‘Winipnamkine,’ nyan ning ton arepnamakile. Allah arye anti, ‘Winipnamkine,’ nyapdeipkuk touk, winipnamkile. Awinipnamle ning ara atia.

⁸ Ura, Raja Ahas birye kintinip deipmokba, eilinyak keting asing atonun ning, el si Keting Kanya Dina ara, Allah arye pil doplirye, aketing kanya kisikdopliba, sepuluh garis ton akunum kisikdoplibuk bukni, tamubuka arup keting atonun kililyanganamle. Winiplyopura, keting kumulbanmal bukni, tuba tonap tamubuka panapliba, aketing kanya ara, sepuluh garis ton tamubuka deipliba, arup keting deipmalye touk kilyangalamle.” Yesaya birye, Raja Hizkia biti nyabuk. Nyabuk touk, Allah arye pil dobukba, aketing kanya dina deice ara, keting kanya akunum 10 garis otam banman bukni, tamubuka arup keting atonun kibuka kilyanmokba eibik.

⁹ Yudea tam taleamuknye Raja Hizkia, uk dilamuka ani, akunum lopdobukura, elce Allah ati, ‘Telebe,’ nyan mot ton sekuk yupu, amot ara ani.

¹⁰ Narye nyapne. Winipmanto, keting duk-duk mitikto noutam talak atonun, nara, kanam wisi kum danmase bukni, tuba keting tamun mitik tonunuk nepse talak noutam bukni, kanye imun uk diknukba, pia mikip ara, mitang upnuke. Winipnukba, narye, ‘Se, tukwak mutuku lo mitik tonunuk kam tuba unmanya ani, adiparyuk dipnamne,’ tenipsirye, ‘Ati ara, akunum diamik nang unyaka, el si Sheol mutuku noutamuk unamne,’ tenipse.

¹¹ Tonda, nyapse. “Kume, tukwak mutuku unirye, Allah Yahweh ati ton ap pia kum dinamne. Deiyok ara, na minop dipnamne anya arye, tukwak mutuku tuba kam unyak nang ap, na ap neika kum unamabe. Tukwak mutuku noutam nirya ara, tuba kam unyak nang ara, na ton ap pia kum eilinamne.

¹² Nara, dibin dam akunum besi. Domba basam wein nang arye, sik kain doltakne tenda aik ulultakalamaka atonun, na kam una deiyok ning ara, kanam aryuk kum winipmanto upnuke. Tonda winipmanto ton, baju win nang arye, cang baju akunum winmakca ani, sikce, ‘Abaju cang ara, akunuma,’ tenebikcopura, adiparyuk kunting arye sekeltakanyak touk, Allah arye, na kam un talak sekmanto upnuke. Asum-asum nirya ara, Allah arye nati, ‘El awinilye ning nirya ara, kum kipdeipnamne, tenepnuke,’ tenipsirye nyapse.

¹³ Nara, kanye imun weik uk dilamnukba, lukunyan noutam nirya babye, beren tam babye nirya ara, ‘Se, melibuka kwetepnilyame!’ nyabuka moropsirye ngalukunmase. ‘Yu kus atonun ning, el si singa arye, ninye yok nirya malye kibuka karulamle touk upnile,’ tenelamse. ‘Allah arye na kam una ara, asukumuk deipnamnilce, upnila,’ tenepse.

¹⁴ Na yupu nyana babye, mikip kum upnukce mitang upnukba, na yupu mikip ara, mitik maka bikbik abuka balamlirye, yupu mitik tonunuk nyalamle touk upnuke. Na kanye imun upnukba, im deiceuk dilamsirye, ‘Allah arye yanuka melibuka kwetepnamnil do, kum do?’ tenen, dinauk ulamsa ani, sirya ara, na asing mikip pia mitang upnukce, ‘Daupmalye,’ tenepse. Bukni, na ni Allah, anda mikip weik deice arye aning-aning nirya talilyame. Ati, ‘Nara kanye imun weik kanye bopnirye, ikin weik ununa anya arye, ancuk yanuka melipnilyame,’ nyabuka morokunune.

¹⁵ Bukni, naryuk yata yupu nyaptinyeba, Allah arye kekepnutu do? Dipkoprop na kanye imun uk dinilye ning nirya ara, Allah elcuk aning nirya dobuka, nati arepnuka anya arye, yata yupu nyaptinyeba kekepnuturye kwetepnutu do? Kume, na yupu ton kum nyaptinye. Na kanye talima noutam ara, kanye imun weik ulamsiba, kanye se tenelamse anya arye, lukunyan nirya teleb ubuka kum maptinye. Tonda, bereknopura, ikin aryuk kanupdongobuka aryuk banune.

¹⁶ Na ni Allah, anda mikip weik deice arye aning-aning nirya talilyame. An nyasiminye yupu nyan deice ap, an mikip arye winiminye ning deice ap arye, nun ninye nirya unyabe. Aning atonun na babye, na kam una lo ton ap tabakuka arepnilyame. Ati ara, ance melibuka kwetepnutumce, kam una lo ton arepnutum toura, na tuba kam unamne. Ati, anti diba tenepkinirye unamne.

¹⁷ Dipkoprop na akunum moubuka kel bikse. Ara, na talima uk dinilye ning ara, ance na teleb kinina ati arepnulume. Kanye imun uk dilamnukba, dipmanto uamse bukni, tuba ton ap teleb kibuka kwetepdeipnulumba, adiparyuk kum dipse. Deiyok ara, narye malye un ning weik tonun winilamsa ani, ance, aning nirya dobuka, an dong tam deiplume. Na nie, ance pia kanye imun ning dam arye, lyepdeipmanilamce, na malye winilamse ning kum kipdeipnulume.

¹⁸ Ance kam una lo ton arepnuluma deiyok ara, ani. Ara, ninye dibikirye, Sheol mutuku banyakak, akunum bikcopura, ninye arye anti tamubuka, ‘Naie telebe,’ kum nyapkitinge. Tonda, sik akunum diamik nang arye, an Allah ati, ‘Anda pia telebe,’ nyabuka, an si kum erepkitinge. Tonda, akunum diamikce nang tuku pum tam akunum bikcopura, sikce anti, ‘Kume, nun ni Allah ara, elce nyapsilye touk, dipkoprob aninguk wininamsululʼ tenebikirye, ‘Dan talak melibuka lyepnamsil do?’ tenen, antibuk dinauk kum unamake.

¹⁹ Na ni Allaho, sik kam tuba unyak nang aryuk, an si erebikirye, anti, ‘Telebe,’ nyakinyake. Aning atonun, naryuk, arup arye an si erebuka, anti, ‘Telebe,’ nyapmakine. Ninye wisi nang nirya ara, sik mapu ati nyanyake. Ara, Nun ni Allah ara, elce, ‘Wininamne,’ nyalye touk, aning nirya dipkoprob winilule. Bico tenesilirye, pia ati kum batakasulule,” nyabuka, sik mapu ati nyanyake.

²⁰ Ati ara, na kanye ara, ‘Na ni Allah Yahweh arye, dipkoprob lyepnilirye, kanye tamubuka teleb kipdeipnamnile,’ tenenune. Akunum teleb kipdeipnilyopura, anggun ap, na ap, nun nirya kam tuba unamap talak nirya ara, neika mot nyanamabe. Ara, mot lelim nyana deiyok ning nirya, bung-bung nyana, el si kecapi ap, gitar ap arye, nun kam unamap talak noutam nirya ara, mot nyanamabe. Ara, Allah Yahweh, el si eren aik dam bipyopura, elti, ‘Telebe,’ nyabuka, neika mot nyabibirye, el siuk erenamabe. Raja Hizkia birye, ayupu nirya nyabuk.

²¹ Ura, Raja Hizkia uk tuba dilamuk talak, Allah arye, el kanam kum kweteipdeibuk talak ara, nabi Yesaya birye, yuk nang ati nyabuk. Ara, “Raja Hizkia, ‘El kanye imun uk torok moupmale,’ tenen ati, sik kel nang arye, kwarang yo duk dakikirye, teikuka opmunce, Raja Hizkia dam yanuka, el torok deice aning likdeipnamlume,” nyabukba kekebikce, el dam yanuka likdeibik.

²² Tonda, Allah arye, Raja Hizkia kanam kum kwetepmok talak ara, Raja Hizkia birye, Yesaya el kekena ati nyabuk. “Allah arye na kwetena ap, ‘Allah Yahweh el si eren aik dam ara, welebinun do, kum do?’ tenena ap, na kel bikna ati ara, Allah arye, ‘Winipnamkine,’ nyan ning arepnamnil ning ara, yatato ning arepnamnil do?’ nyabuka asipdeyuk.