Yesaya 37 - Eipomek

Yudea mutuku taleamuka deiyoknye, Raja Hizikia bira, nabi Yesaya biti, “Na melina ati yupu ton nyapnilyame,” nyabuk yupu

¹ Atalak ara, sik Yudea tam deiyok winilye nang yayikce, yanuka lak nyabikba, Hizkia bira, Asyur mutuku nang Rabseka birye nyananmok yupu kekenmokce, ‘Se yata wiripnamap do?’ tenen, kanye imun kanye bobukce, talima mitang ubukba, lak kina ati, el ongopmok baju kwilikukabukce, malye baju karung koni baju ongobukce, Allah Yahweh, el si eren aik dam biyuk.

² Tonda, Hizkia birye, el amu tam pil dona deiyok nang ton dopdeibuk. Ara, el ulamuk aik melibuka pil dona deiyoknye, el si Elyakim ap, amutuku noutam winilamik ning nirya si sekena deiyoknye, el si Sebna ap, tonda imam pil dona deiyok wisi nang, yata winibuka nang ap, anang nirya wipdeibukba, Amos birye deiamuknye, nabi Yesaya dam dopdeibukba, sikce el dam biyik. Anang arye Yesaya dam biyik talak ara, sik nirya ara, ‘Se, nun ikin usulule,’ lak kina ati ara, lak kina ati, sik ongolamik baju kwililobukabikce, malye baju karung koni baju uk ongobuka biyik.

³ Nabi Yesaya dam binuka, nyabik. “Na nio, nun deiyoknye Raja Hizkia birye, ‘Nyapnamlume,’ nyapdeipmasu yupu ara, nyapnukiyabe. Ara, atalak ara, sik Asyur mutuku nang arye, nun Yudea tam nang nirya ati, olyanamasiyaka anya arye, atalak ara, kanye imun weik upsile. Allah arye ikin ning deibuka wenepsilirye, malye kiplisulula anya arye, nun alye weik upnamsile. Winipmanto ara, nun Yehuda tam nang ara, mi deipnukirye, mi deiya uk dinmalya ani, mikip mitang upmaliba, mi kum deipmanto ulamak touk upsile. Deiyok ara, nun mikip ara, pia kume.

⁴ Se, nun ni Yesayao, ance Allah moropsilyame! Nun mitik tonun tuba kam unmap nang ati ara, ance, ‘Allah melipsilyame!’ nyabuka moronamlume. Ara, nun walwal bukni, nun kanye ara, an ap, nun ap arye, si erenyap Allah ara, Asyur mutuku talilulnye birye, el amu tam pil dolulnye, Rabseka dopdeibukba, nun dam yanuka, Allah ati malye yupu nyapsuk ning ara, akunum kekebuk do? Anye birye, Pia Kam Ulul Allah, el si Yahweh ati, nalin deice yupu Allah ati malye weik nyabuka anya arye, nunda, ‘Allah arye, Asyur mutuku nang nirya ati, weik tonun wenebuka opnamlarya,’ tenepmabe. Anye Rabseka birye, Allah Yahweh ati, malye yupu nyapmok ning ara, kekepmoka anya arye, ‘Sik Asyur mutuku nang ati wenebuka opnamle,’ tenepmabe. ‘Winiptue,’ tenen, ance Allah ati, nun amutuku unyap nang ati, Allah moronamlume.”

⁵ Raja Hizkia el pil don nang arye, nabi Yesaya dam yanuka, ‘Naio, nun melina ati, Allah ati moropnamlame,’ nyabuka moronmekopura, Yesaya kekebukce, ayupu ton nyabuk.

⁶ Yesaya birye ayupu yanuka nyapmek nang ati nyabuk. “Anggun deiyoknye Raja Hizkia biti, nyalbinamlume. Ara, Allah Yahweh arye nyapsil yupu ara, ani. “Kume, Raja Asyur el amu tam pil donanye dopdeibukba, elce nati, malye yupu nyabuka, nalipmanu ning ara, pia kekebuka ilil una kume.

⁷ Na Allah arye, anye Raja Asyur biti, el kanye talima noutam pil dopnyopura, yuk nang arye, lengdar deice yupu nyapmakce ning ara, elda, ‘Se, yuk mutuku nang arye na tam olyanganamake,’ teneplirye, ilil upliba, ‘Aning ara, dip nyanyak do, kum do?’ tenen, elce, ‘Dilbinunʼ tenen, el taleamlye mutuku tamubuka binamle. Tamubuka bilyopura, na Allah arye, pil dopneba, elcuk taleamlye mutuku noutam arye, yuk nang arye ninye on parang ya dobuka, anye obikcopura, dipnamle. Ati, anggunce anye birye nyananmok yupu ara, tuba tenina kume, dauaplye,” Allah arye nyapdeibukba, Yesaya kekebukce, sik Yehuda tam deiyok nang ati nyabuk.

Asyur mutuku nang ati, yu un ning ton sik dam deibik yupu

⁸ Atalak ara, Raja Asyur, el amu tam pil dona deiyoknye Rabseka tamubuka Asyur mutuku biyuk talak ara, yuk nang arye, “Nun deiyoknye birye weik asik si Lakdis mutuku arye batakuka, itam asik el si Lipna mutuku nang ati olbinmoke,” nyabikba, kekebuk.

⁹ Ura, atalak ara, yuk daunmek nang arye, “Anggunda moubuka kekepnamlume. Mesir mutuku taleamuka deiyoknye, Tirhaka bira, el mutuku Kush mutukunye bira, Mesir mutuku batakuka, deiyok koupmalarye, el yin talen nang ap, sik Asyur mutuku nang olana ati, bisik panabuka yanganmake,” nyabikba, kekebuk. Asyur mutuku nang taleamuka deiyoknye, Raja Senakarib birye ayupu kekenmokba, adeiyok ati ara, Asyur mutuku Raja, el si Senakarib birye, surat sekuka arebukba, el tam nang arye, Yudea tam Raja Hizkia biti bobinuka lak nyabik.

¹⁰ Asyur Raja Senakarib birye nyabuk. “Anggunda, Yudea tam talibuka deiyoknye Raja Hizkia biti nyapnamlume. ‘Anda moubuka tenipdelyame! Ance diba tenepmalam Allah arye, nyalin yupu deice akunum nyapdeipkuk yupu ara, diba kum tenepnamlume. Allah arye, ‘Winibuka melipsiniba, Raja Asyur mutuku talibuka deiyoknye Raja arye, anggunti obuka sirya daksilirye, anggun weik asik Yerusalem mutuku nirya alubuka, kum dopropnamsile,’ nyapdeipnulyame.

¹¹ Bukni, Ance moubuka tenipdenulyame. Ance akunum kekelume. Ninye arye nyakiba kekelamlum ning ara, ‘Yata mutuku nang do nirya ara, ‘Raja Asyur biti opnuyabe,’ tenelamik nang nirya ara, na Senakarib ap, minop talak Asyur mutuku taleamdik Raja ap ara, sik nirya akunum obuka sirya dakupurye, amutuku-amutuku nang nirya kum kipdeiamupu. Ati, an Hizikia tonok ati ara, kum obuka bataknamkiyap do? Batakniba, talye kanye bobuka telebuk tuba kam unamlam do? Kume, ance, ‘Allah arye nati lyepdopnilyopura, na tonok ara, kum opnamaniyake,’ tenepmalam do?

¹² Tonda, moubuka teniplyame! Nara, Asyur mutuku talinunye, na punun nang ulamik talak arye, dipdongobuka, atalak noutam nirya ara, sikce, yuk mutuku-mutuku obuka sirya daklamik talak ara, amutuku nang nirya ara, si erelamik isa arye, sikti, yanuka lyepdomu do, kum do? Kume, sik nirya ara, obuka sirya dakamik. Tonda, Gosan mutuku ap, Haran mutuku ap, tonda Resef mutuku ap nirya ara, na apu yapu arye amutuku nang nirya, talye luparabuka obuka sirya daklamik. Tonda, Eden tam nang, sik Telazar mutuku ulamik nang babye, dan sukum unyak do? Sik babye obuka batakamik. Anang nirya ara, sik si erelamik ning arye, ton kum yanuka lyepdomuk.

¹³ Tonda, Hamat mutuku ap, Arpad mutuku ap, Sefarwaim mutuku ap, Hena mutuku ap, tonda Iwa mutuku ap, dolamik mutuku asik nirya ara, ‘Sik amutuku-amutuku talibuka ulamik ninye deiyok nang nirya ara, wini talak dan sukum unyak do?' Anang nirya babye obikba, akunum diamik.

Raja Hizikia bira, Allah Yahweh ati, yanuka morobuk yupu

¹⁴ Raja Asyur birye ninye dopdeibukba, el sekeiamuk surat ara, Yudea mutuku taleamuknye Raja Hizkia biti, boyanuka arebik. Arebikba, asurat eibukce boyanuka, Allah Yahweh, el si eren aik koproba biyukce, el li Allah dinak arye, asurat lak deibuk.

¹⁵ Raja Hizkia birye, Allah Yahweh ati yanuka morobukce nyabuk.

¹⁶ “Se, Nun ni Allah Yahweh, anda aning-aning nirya deice tam erebuka umince, pia mikip weiknye uminye birye, im deice yin talin malaikat nirya ara, sik deiyoknye ulyame. Nun Israel nang nirya ara, Allah an mapu ubirye, an siuk erekinyabe. Tonda, na nie, anda Peti Perjanjian bublan deice malaikat urasin atonun ning, el si Kerub, bitinye puturubuka deibubak, deice tam ara, bukmince tuba asukumuk ulyame. Nun ni Allah, an tonok aryuk erebuka uminyeba, atukwak mutuku ninye deiyok kibuka talinyak nang nirya ara, an amu tamuk unyake. Allah ance im ap, tukwak ap wepdeiplumce talilyame. Mutuku sirya im sirya nirya talinyaka deiyok nang ara, an amu tamuk unyake. An tonok ulyame.

¹⁷ Ati nun ni, ance ebuka kel bikinamsilame. Nunce an morona ati, nyapnukiyap yupu nirya ara, ance moubuka kekepnusilyame. Tonda, yata un ning do nirya, nun dam unamsil ning ara, ance eipnulyame. Nun ni Allah anti, Raja Sanherib birye, anda Kam Una Deiyoknye ulyam bukni, elce, ‘Allah ati ara, malye-malye yupu nyapnirye, elti, nalipnamne,’ tenebukce, ninye dopdeibukba, sikce amalye yupu yanuka nyapsike.

¹⁸ Dipkoprop nun ni Allah Yahweh, sik Asyur mutuku ninye deiyok nang arye, yuk mutuku unyak nang nirya ap, yuk-yuk pera mutuku nirya ap ara, obuka sirya dakamikba, oldemuk uamuk. Nun nirya ara, aning akunum kel bikinyabe.

¹⁹ Tonda, amutuku nang nirya obukabikce, sik anang arye, si erelamik ning babye, dobuka uku dongobikba, uku arye dibukba kum uamuk. Ura, sik si erelamik ning ara, dipkoprob talye ninguk ubuka anya arye, an Allah atonun kum uamuk. Sikce si erelamik ning ara, ninye taruk arye puturubuka deiamik ning ara, yo ap, keil ap arye puturubuka deiamika ati, winibukba aning babye mikip kum uamukba, sik Asyur mutuku nang arye aning nirya sikce buklobikba, kum dayuk.

²⁰ Winibuka ulamika anya arye, nun ni Allah Yahweh, an siuk erekinyaba, ance nunti melibuka kalikisilyame. Ati, Asyur mutuku nang talibuka weik deiyoknye birye, el taruk noutam arye, ance nunti lyepdopsilyame. Ance nunti lyepdopsiminyopura, mutuku sirya im sirya nirya unyak nang, kel bikikirye, ‘Se, dipkoprob Allah Yahweh, el tonok ulule,’ tenen, kel biknamkiyake.” Raja Hizkia birye, Allah ati binuka morobuk.

Nabi Yesaya birye, Raja Hizkia biti, ‘Wininamlyame,’ nyapdeibuk yupu

²¹ Raja Hizkia birye nyabuka morobukopura, akunum winibukopura, ninye si Amos birye deiamuknye, nabi Yesaya birye, Raja Hizkia biti nyabuk. “Allah Yahweh anti nyapkile. ‘Anda na Allah ati moropnuluma deice arye, ‘Asyur mutuku talibuka deiyoknye, el si Raja Sanherib biti, ‘Melibuka lyepdopsilyame,’ nyabuka moropmanilama ara, akunum kekepmakine. Ati, ayupu nyapnukine.

²² Na Allah Yahweh arye, anye Raja Sanherib biti nyapne yupu ara, ani. Yerusalem mutuku weik asik noutam unyak nang ara, winipmanto mi delina kum kilapu atonun unyake. Se, an Raja Saheribo, anti, ‘Elda bicoe. Talinye ulula anya arye daupmalye,’ nyabuka, nalipkikirye, akutukinyake.

²³ Anda moubuka kel biknulyame. Ance, Yudea tam nang ati, malye yupu nyapmalumce, nalibuka akutupmalum ning ara, anggunti buk nalipmalumce, akutupmalum do? Tonda, yatanye biti an pi talima erepdamince, maknya kintininmamunce, an asing erebuka dinmamince, malye yupu weik tonun nyanmamunce nalilulum do? Dipkoprop ning ara, nara, Israel nang, anggunti pia melibuka kalikisununye, pia Diksukumuk Ululnye, nara, Pia Leknye biti malye yupu nyamnulume.

²⁴ Ance ninye dopdeiamlumba, mok yupu nyalyanmika deice arye, na Allah Yahweh, aning nirya talenirye, mikip weiknye ulunua bukni, nati nalibuka akutunmanik. Ance nyapdeiamlume. Ance, “Nara ninye bukuka olban ning ati, el si kereta perang ara, yupa weik tonun deipsirye, weik mutuku dup welepsirye, iknapye tam Libanon mutuku noutam babye, weik mutuku deice tam welepse. Libanon mutuku noutam nirya ara, na patan ning talye alubuka dopropse!” nyaplume. Ara, ayupu deice an kanye erepdalumce, maknya kintinimince,” Urasin pia teleb kat wa mutmuta yo, pia teleb cang arye tiklamuk ning nirya ara, webuka sirya dakamse. Tonda, pia teleb wa mutmuta cang yo palpal tikamuk weik mutuku dup, ninye kum binmanto mutuku babye, narye amutuku welepsirye ayo webuka sirya dakamse,” nyaplume.

²⁵ Tonda, an kanye aryuk, yuk nang arye, “Elda, pia mambul weiknye, tenepnamniyakʼ tenen, narye sumur mek dina ati, sik mutuku binuka, talye mangkau mekwen palibuka loksirye, mek dilamsirye, amutuku nirya alubuka dopropse. Tonda, na ap, na yin talin nang ap, yupa pia weik tonun, Mesir mutuku noutam balamuk mek yanibuburye koubuka balamupu talak ara, sik mek nirya cebuke,” nyaplume.

²⁶ Bukni anda bicoe. Anda min talak arye ayupu ton kum kekelamlum do? Dipkoprop ning ara, aning nirya ara, na Allah Yahweh arye, ‘Aning ton, aning ton winipnamne,’ akunum teninyamse. Winibuka akunum tenibuka nyapdeiamse anya arye, wini talak ara, anyapdeiamse ning ara, akunum nong kibuka pil donyake. Narye anti, ‘Winipnamlarya,’ tenyamkise touk, mikip areamkisirye, lo arekiseba, an ap, an yin talin nang ap arye, apil dolulume. Ara, yuk mutuku nang arye, ‘Nun mal olan nang olyasikcakʼ tenen, cang weik keil poka domik ning, an ap, an yin talin nang ap arye, akeil poka ulubuka sung-sunga bultakalamlume. Na mikip deice arye amutuku nirya ara akunum obuka sirya dakamlume. An mikip deice arye kuma!

²⁷ Ance, amutuku-amutuku sung-sunga buluplum talak ara, sik amutuku ulamik nang nirya ara, sik mikip pia mitang ulilamikba, sikda duk-duk nyabuka, ‘Se yata wiriptibye do?’ tenen, kanye imun kanye bobuka, talima sirim talibukba, ilil ulamukce, winipmanto kum ulamik. Winipmanto ara, sik amutuku nang nirya ara, yo mutmuta kata sukum arye palamliba, buppu weik kumanya donmaliba, koululamle touk ulamik. Tonda aik aruma deice arye mitikto ning paplirye tiklamle bukni, asim maplirye buppu weik ulamlyopura, mikip weik kumanya keting panalyangan tam arye donokliba, nunulamle touk, anang babye atonun ubik.

²⁸ Bukni, na Allah ara, an Sanherib birye mapmaminya bukuka baminye talak babye, tuba tonap bukuka dikdik sepminye talak babye, na kele. Tonda, ance bai baminye talak babye, an aik tamubuka yanuminye talak babye, na kele. Anda winiminye ning nirya ap, pil dominye ning nirya ap ara, na kele. Dipkoprop na Akunum kel bikikununa anya arye, ance nati weik tonun dereniminye ning babye, na kele.

²⁹ An weik tonun kanye eren deice arye, nati dereniminye ning ara, na akunum kekeknunune. Tonda, ance talima erebuka maknya kintinimince malye nyaminye yupu nirya babye, na akunum kekeknunune. Ati ara, wini talak ara an u pum bisik ara, narye besi cincin dongopkinirye, tapu kirikdongopnirye, an si bambol darapdongobuka koupdongopnamkine. Winipkinyopura, narye libuka an yanamlum bisikuk tamubuka bobinamkine. Allah Yahweh arye Asyur mutuku Raja ati akunum nyabuke,” Yesaya birye lak nyabukba, Raja Hizkia kekebuk.

³⁰ Nabi Yasaya birye ayupu akunum lak nyabukce, ayupu ton dukdongobuka nyabuk. Ara, Raja Hizkia biti ayupu nyapdeibuk. “Anyapdeipkin yupu ara, ance, ‘Dipkoprop Allah arye apil donamle,’ tenenalam tenen ati, alak kina ati ayupu ton nyapkine. Ara ani. Aketing tamun noutam ara, talye bai tam el yuk talye palamle ning libuka dinamlame. Aning atonun oyanamle keting tamun bitinye ap noutam ara, keting tamun tonok arye yala sakliba, talye palamle ning ton libuka dinamlume. Bukni, keting tamun winilye noutam ara, anggun bidamnye wa wilamunce, yala kounamlume. Anggun gandum duk doknamlume. Tonda, anggun bidamnye, anggun anggur tapu ton kounamlume. Aning nirya akunum duk mouplyopura, anang nirya din patapliba, anggun wa noutam palamle ning libuka dinamlume.

³¹ Aning atonun, anggun Yehuda yala nang ara, Asyur mutuku yin nang arye yupa weik tonun opnamak bukni, kum sirya dakanamsiyake. Sik tuba kam unamak nang ara, aning-aning nirya weik tonun upliba, kanye teleb deice aryuk unamake. Winipmanto ara, ninye arye sik koun ning koubikiba, el yating tuku noutam bilyopura, tuku deice tam teleb ubuka palamlirye, duk weik tonun moulamle touk ubuka unamake.

³² Ara talye ati kuma. Deiyok ara, Yerusalem mutuku arye, tonda, Sion mutuku deice ap arye, ninye mitik tonun ton lyepliba, anang arye amutuku noutam arye banamake. Aning ara, Allah Yahweh elcuk apil donamle. Allah ara, aning-aning deice tam erebuka mikip weik ulirye, im deice malaikat nirya sik deiyoknye ulirye, el pia pi deibuka, mikip weik deice arye, elce, ‘Aning winipnamne,’ tenyamlye ning nirya, dipkoprob pil dopnamle. Allah arye nyabuka anya arye, aning nirya, dipkoprob nong upnamle!

³³ Ati ara, Allah Yahweh arye ayupu nyapdeiamsuka ara, Asyur mutuku taleamuknye, elce winipnamle ning ati nyapdeiamsuke. Raja Asyur bira, elce Yerusalem mutuku weik asik noutam ara kum wekelyanamle. Sik amutuku nang ara, kum wenebuka opnamle. Tonda, amutuku unyak nang ara, Raja Asyur birye, mal tonok ning deice arye kum opnamsile. Tonda, el yin talin nang, ‘Nun mal olan nang arye marapsikcakʼ tenen, sik nong kalikina ati bonyak ning, el si perisai bobikirye, sik amutuku nang olana ati kum erepnamake. Tonda, el yin nang arye, ‘Amutuku antanap dongobuka domik cang keil poka welebibirye, amutuku noutam weknampʼ tenen, tuku palibuka sik keil poka dam kum deilinamake. Dipkoprop amutuku dam ton, kum yanuka weknamake.

³⁴ Dipkoprop nyapsine. Raja Asyur el tamubuka binamle bisik ara, el yanamuk bisikuk, el mutuku tamubuka binamle. Amutuku Yerusalem asik noutam ara, pia kum binamle. Aning ara, na Allah Yahweh arye akunum nyapsina anya arye, aning ara dipkoprob nong upnamle!

³⁵ Deiyok ara, na Allah arye Yerusalem mutuku weik asik ap, amutuku nang ap ati, pia melibuka kalikinamsine. Ara talye ati kuma. Amutuku lyepropnama deiyok ara, narye amutuku kaliknirye lyepdopnyopura, anang nirya ara, ‘Se, Allah ara, pia mambulnye ulule,’ tenebikirye, na si kel biknamniyake. Tonda, na amu tam pil dolamuknye, Raja Daud biti, ‘Amutuku ara, pia ati kalikinamna anya arye, ance deipminba, dadeipdanin banamak nang arye, ninye deiyok kibikirye, Yerusalem mutuku talipnamake,’ nyapdeiamse ati, narye amutuku pia melibuka lyepropnamne!

Asyur mutuku taleamuknye, Raja Sanherib oplobik ning ati, sekik yupu

³⁶ Allah arye ayupu nirya akunum lak nyabukopura, Allah Yahweh arye wibuka doprobikba malaikat arye, asum lukunyan aryuk Asyur mutuku yin talin nang, sik tia ati doltakne tenda aik dobuka ulamikak yanuka nyabukba, ninye yupa pia weik tonun, seratus delapan puluh lima ribu (185.000) yin talin nang obuk. Oplobukba, lukunyan kipmoka ani, berekukba beren tam ara, obuka deipmek nang, sik nong nirya ara, lak ubukba eibik.

³⁷ Ninye weik tonun obuka anya arye, Raja Asyurnye Sanherib aning kel bikukce, el adiparyuk asukum batakuka, el mutuku, Niniwe mutuku tamubuka bindobukce, dabinuka ulamuk.

³⁸ Aminyan talak, tonok sum ton, Raja Asyur el si erelamuk isa, el si Nisrok dam biyukce, elti, binuka si eremok. Wininmokba, Sanherib birye deiamuk nang, Adramelek ap, Sarezer ap, sik abitinye nang birikce, ninye on parang ya dobuka, sik ni koproba Sanherib dam binuka opdik. Opdikopura, sik anang bitinye, adiparyuk bikbik abuka, Ararat mutuku birik. Ati, adibuknye pununa ati ara, el mi Esar-Hadon birye, ninye deiyoknye kibikce, erepdeibik.