Yesaya 33 - Eipomek

Allah arye, Asyur mutuku ninye wenebuka opnamle ati, nyabuk yupu

¹ Allah arye nyapdeibukba, nabi Yesaya birye sekeibuk. Se, nun mal olan nang, sik Asyur mutuku ninye arye, sik yuk mutuku unyak ninye ati, sik mutuku dakuka uku sice kiploplum bukni, yuk mutuku ninye arye, anggun talilulum ning nirya babye, dakuka kum uku sice kiplopsulume. Anggunce, yuk mutuku ninye sik nong deice, pirilen ning delilulum bukni, yuk mutuku ninye arye sik Asyur mutuku ninye nong deice pirilen ning kum delinyake. Ati ara, wini talak anggunce ‘Naʼ tenen, ninye ati, sik mutuku ulubuka uku sice kiploplum bukni, aning winibuka akunum sirya dakmunyopura, aminyan talak, yuk mutuku ninye arye, anggun talilulum ning nirya babye atonun, ulubuka uku sice kiplopnamsiake. Tonda, anggunce, yuk mutuku ninye, sik nong deice, pirilen ning delilulum bukni, aning winibuka akunum sirya dakmunyopura, aminyan talak yuk mutuku ninye arye, anggun Asyur mutuku ninye ati, anggun nong deice pirilen ning delinamsiake.

² Nun ni koproba Allah Yahweh ance bico tenepsimince, melinamsilame. Anda asum-asum nirya, pia talibuka usimince melibuka kalikinamsilame. Beren tam babye, sintam babye, atalak-atalak nirya, ‘Nun imun kanye usilye talak ancuk melibuka lyepnamsilam’ tenen, moropkiyabe. ‘Ancuk, dan talak arye lyepnamsilam do?’ tenen, dinauk unamabe.

³ Minop talak ara, an yupu weik arye nyalamlumba, atalak ulamik ninye kekelamikce, ilil ubukba, bikbik abuka balolamik. An mikip weik ap, mambul weik ap, ulamluma deice arye, yangalamlumba, sik yuk-yuk daulamik ninye elilamikce, ilil ubukba, bikbik abuka balolamik.

⁴ Winipmanto ara, sul kwising arye, yo bok nirya dibuka sirya dakuka dilamle touk, ance meliamsulumba, yuk mutuku ninye olbisilamuburye, sik talilamik ning nirya dololamupe. Tonda, Sul kwising kala deice arye, lakuka minopce bulamle touk, ance melilamsuluma deice arye, yuk mutuku ninye weik, sik talilamik ning nirya dalubuka dololamupe.

⁵ Allah Yahweh, elda pia eitam telebuk ululnye birye, im deice ulul bukni, elce anggun dam, Sion mutuku yanuka melisilya deice arye, pia teleb winin ning ap, dipkoprob yupu lipsisikuka bokolina deiyok ning ap, pia diksukum una deiyok ning ap, arenamsile. Arepsiliba telebuk unamlume.

⁶ Allah arye anggun Israel mutuku ninye ati melisilya deice arye, pia teleb kibuka unamlume. Ilil una pia kum diparyuk, kanye lamapdongobuka unamlume. Elce arenamsila deiyok ning ara, mitik tonun kum bukni, pia weika arye arenamsile. Ara, ninye lyena deiyok ning ap, aning nirya kel kina deiyok ning ap, ‘Wininamaba,’ tenebikirye, dipkoprob una deiyok ning ap arenamsile. ‘Aning nirya doproptibnye,’ tenepmunyopura, anggun ni koproba Allah Yahweh atibuk, ilil upsiliba, el siuk erebuka kisal donamlulume. Winibuka umunyopura, aning nirya arenamsile. Kumopura, kume.

⁷ Bukni, wini talak ara, mambul kanye bobuka unmalume. Deiyok ara, ‘Nun moroptibyeba, nunti kum olyanamsiyak’ tenen, yupu laka nyalban nang dobuka, sik Asyur mutuku deiyok nang dam dopdeipmunyeba, ‘Ayupu kekepnamak’ tenen, yupu laka nyalbiyikba, anyanmek yupu kum kekebik. Ati ara, sik yupu laka nyalbanmek nang ara, balsusunmekce, engenmek.

⁸ Wini talak ara, weik bisik balamicak nirya ara, talye lo uk upmale. Wini talak ara, anggun mutuku noutamak nirya, ‘Asyur mutuku nang arye opsicak’ tenen, abisik-abisik nirya talye lukparabuka kum balulume. Bisik nirya kum banyaka ara, urdem ati kume. Ara, Asyur mutuku deiyok nang arye, ‘Kume obuka sirya kum daknamsiabe,’ nyabuka, minina yupu deice arye nyapdeiamik bukni, ayupu akunum batakikirye, ‘Dauplye, anang ara olbinuyabe,’ tenenyake. Sikce nyalilamik talak ara, yuk nang ton kekelamik bukni, ‘Aning ara mambule,’ tenena kum diparyuk, batakanye.

⁹ Ati ara, Israel yala ninye ululum mutuku noutamak nirya ara, ninye nirya arye, imun kanye bobuka ikin deice uk ululume. Tonda Libanon mutuku noutamak unyak ninye nirya ara, akunum obuka sirya dakmasiakba, amutuku nirya malyeuk ulule. Aning atonun, Saron mutuku weik lu pala mutuku ara, pia teleb wa wiamik bukni, Asyur mutuku nang arye, kirye dibuka uku sice kiplobikba, wini talak ara, amutuku nirya lo uk ulule. Tonda, weik kebi yo tikamlya koluplirye, kumanya arye, ayo bok nirya dakuka balamle touk, Basan mutuku ap, Karmel mutuku ap noutamak ulamuk teleb ning nirya, akunum dalubuka dakuka bobiyik. Amutuku-amutuku nirya ara, talye yini mutuku lo uk ulamle touk ulule.

¹⁰ Sik Asyur mutuku nang arye, Israel yala ninye ululum mutuku noutamak nirya ara, akunum malye kipdeipmasiak bukni, aminyan talak ara, na Allah Yahweh arye aninye ati wenebuka oplopnamnarya. Wini talak ara, na erepdeipdanirye, tiknamne. Winipnirye, mambul pil ton dopnyopura, sik elinamniak ninye nirya arye, na siuk erenamniyake.

¹¹ Tonda anggunce, ‘Wininamabe,’ tenelulum ning nirya ara, talye-talye urdemuk winilulume. Anggunce winimunye ning nirya ara, nong kum upnamle. ‘Wininamabe,’ tenelamlum ning nirya ara, ninye arye maning tuplobikiba, kel-kel alamle touk, upnamle. Maning kel-kel alamle ning uku dinibikiba, uku arye dibuka uku sice kilamle touk, anggun babye atonun winipnamsile. Anggun mining isin mikip aryuk, uku disuturye, dibuka sirya daksutue atonun, anggun wininamlum ning deice arye, anggun bidamnye nong uk kum kipdeipdanamlume.

¹² Anggun deice unamsil ning ara nyapnusine. Tonok ning ara, mitang yo uku dongobikiba, diplirye, uku sice bultaklamle touk, winipnamsile. Tonda, ninye arye keil leibikiba, uku dinmalirye, keil leibuka ongom-ongom alamle touk winipnamsile. Tonda tace ning nirya webuka uku dongobikiba uku diplirye, kum danalamle touk upnamsile. Allah arye sik Asyur ninye obuka sirya daknamle ning ati nyabuk.

Aminyan talak, Allah arye Israel ninye, sik mutuku teleb kipdeipnamle ning ati, nyabuk yupu

¹³ Allah arye nyabuk. Anggun pia yukak ululum ninye babye, anggun dam ululum ninye babye, na Allah arye winipnamne ning ara, nyapnusine. Ati ara, ayupu moubuka kekepmunce, ‘Se, Allah ara, dipkoprob pia mambul mikip weiknye ulule,’ nyabuka na si erenamnulume.

¹⁴ Aning ara urdem ati kum nyapsine. Deiyok ara, sik Sion mutuku noutamak unyak ninye, pia malye unyak ninye nirya ara, ilil uplirye lukdanuka sirim talipnamle. Tonda, na Allah arye, ‘Wininamlulume, aning ara kum wininamlulume,’ nyalisinyak yupu ati, ‘Ayupu ara daupmalye’ nyabuka, batakanyak ninye nirya babye, ilil ati sirim talipnamle. Ilil weik uplyopura, sikce nyanamake. ‘Allah arye sik malye wininyak ninye ati, ‘Weik arye wenepnamne’ tenen, weik uku dilamle touk, imun kanye ning arepnamsil ning ara, winibuka arepsiliba, yata wiribuka tuba kam uptibye do?’ tenen, malye nyanamake. Aning atonun, ‘Uku pia dinamle ning atonun arepsilyopura, yatanye birye kam tuba uptu do? Kume, winibuka arepsiliba, yata wiribuka kam uptibye do?’ nyabuka, mambul kirikuka, sirim talilule.

¹⁵ Na Allah arye nyasunune. Yata ninye do nirya, sikda teleb kibuka ubikirye, tilila yupu nyana kum diparyuk, dipkoprob yupu uk nyabuka, diksukumuk unamak ninye ara, amutuku noutamak unamtinge. Tonda, sikce, ‘Aning-aning nirya kum talinyakce, talye bona utotoa talina kum ninye ati, ‘Dauplye’ tenen, yaniltanyaka deice arye, nun dem aryuk amutuku ning nirya dobuka taleptibye,’ kum tenenyak ninye ara, amutuku noutamak unamtinge. Tonda, ninye yupu lipsisikuka bokolina talak ara, ‘Malye winipmakibuk, yo bok weik arepsitingba, aninye kum wenepnuyabe,’ kum tenenyak ninye ara, amutuku unamtinge. Tonda, yuk nang arye, ‘Ninye optibye,’ tenena ap, ‘Yuk malye ning winiptibye’ tenen, ning ap, yuk malye nang arye malye-malye wininyak ning ati, ‘Kum eipnuyabe,’ tenebikirye, sik bidamnye arye asing kulongonyak ninye ara, amutuku noutam unamtinge.

¹⁶ Anyanmasin touk wininamak ninye ara, amutuku teleb kipdeipniba, unamake. Winipmanto ara, ‘Yuk yu weik nang arye kum olyasitinge’ tenen, mutuku deice unyak ninye atonun unamake. Winipmanto ara, mutuku yangan keil dana-dana bulamle keil deice uptibyopura, ‘Yu nang arye kum opnamsiyake’ tenen, ulamak nang atonun unamake. Na Allah arye anggun mutuku teleb kipdeipsinirye, pia telebak umunyopura, anggun kwaning ap, mek ap min arye akunum kintinip deipse ninguk, naryuk arenamsine. Winipsiniba, telebuk unamlume.

Yuk dotalak, pia teleb upre banamuk ning ati, nyabuk yupu

¹⁷ Allah arye nyapdeibukba nabi Yesaya birye nyabuk. Yuk dotalak yanamlanye bira, elce ninye deiyoknye ululba, el weik dirina ap, urasin pia teleb unamle ning ap, laka kipdeipsilyopura, eipnamlume. Tonda amutuku nirya teleb kipdeipliba, pia pera mutuku dana-dana nirya elinamlume.

¹⁸ Aminyan talak ara, doupra yangalalumce, imun kanye bobuka ulalum ning ati, ila tuba tonap tamubuka teninamlume. Ara, Asyur mutuku deiyoknye birye, ‘Yerusalem mutuku ninye cang weik keil poka dolamik ning, daklopnirye, amutuku binuka aning-aning nirya winibuka aning ubula dopropnamne’ tenen, nukdesuknye bira, ‘Wini talak dan sukum unmal do?’ tenen, teninamlume. Tonda, Yerusalem mutuku anggun cang aik dobuka ulalumak noutamak ara, ‘Yata barye nang unyak do?’ tenebukce, ‘Pajak yo bok yupa winibuka arepnamniake,’ tenepsuknye bira, ‘Wini talak dan sukum unmal do?’ tenen, teninamlume. Asyur mutuku deiyoknye bira, na Allah arye wenebuka, kum kipdeipnamna ati, aning nirya teninamlume.

¹⁹ Na Allah arye, sik Asyur mutuku ninye ati, wenebuka kum kipdeipnyopura, anggun Israel yala ninye arye, sik aninye ara ila tuba tonap kum elinamlume. Sik Asyur ninye ara, yu kanye weik bobuka ulamikce, kanye talima pum tam erelan deice arye kwalilamik bukni, aminyan talak ara, aninye kum kipdeipnamne. Winipniba, sikce anggun mutuku koproba ati yupu talilamik yupu ara, kum kekepmanto yupu, nyalamik ning ara, ila tuba tonap kum kekenamlume.

²⁰ Asyur mutuku ninye ila tuba tonap kum elinamlum bukni, Sion mutuku uk, teleb kipdeipnyopura, amutuku uk elinamlume. Nati, diba tenenyak ninye nirya ara, Sion mutuku yangakirye, na si erena ati, weik kwalya kwalibikirye, pin-pin kanye bobuka, nati si erenamniyake. Winibikiba, elinamlume. Ara, Yerusalem mutuku teleb kipdeipniba, amutuku unamak ninye nirya ara, teleb kanye bobuka lamapdongobuka unamake. Yuk mutuku nang arye, kum benbenenamake. Winipmanto ara, ninye arye baju bol doltakna aik dopnamakca ati, tapu birin yo kat ning moubuka ikikiba, kum lulukmanto ulamle touk winipnamle. Tonda, tapu kum bulukmanto kat tapu kirikikiba, lulukna kumce kat ulamle touk, Sion mutuku babye atonun kipdeipnamne. Winipniba, anggunce elinamlume. Allah arye nyapdeibukba Yesaya birye sekeibuk.

²¹ Yesaya birye ayupu sekukce, ayupu ton dukdongobuka nyabuk. Nun ni Allah Yahweh, pia mikip weik ulirye, nunti melibuka kalikinamsile. El weik deiyoknye ululba, el siuk erenamabe. Winipmanto ara, ninye aik dobuka ulamikca noutamak ara, pia weik mek dana-dana balamlibuk, ninye arye amek koubuka yatingce, kum opting touk, Sion mutuku babye olyanamto kum mutuku atonun upnamsile. Tonda, weik laut mekwen deice arye balamle mek liya yo, weik kapal deice arye buku yanuka, olyanmasento kum mutuku kipnamsile.

²² Anyapman yupu ara, talye ati kum nyapne. Deiyok ara, nun ni Allah Yahweh, elda nun ninye deiyoknye unamsile. Allah el mikip weik deice arye melibuka kalikinamsile. Allah Yahweh elda, nun weik deiyoknye unamsila ati ara, el dem arye lyebuka teleb ulinamsile.

²³ Kum mikip deice balamle mek liya yo noutamak ara, cang yo ikamlumce, ‘Lontoksilyak’ tenen, ayo dup tapu kicamlumce, mek liya yo sirya dana-dana tapu kirikamlum ning ara, akunum surukmasile. Atapu akunum surukmasila ati, acang yo ara kat kum upnamsile. Lontokna uk unamsile. Tonda, amek liya yo deice kiriklalum baju bol babye, surukmasutua ati, kumanya mikip arye dakuka kum bobisutue. Ati, ila tuba tonap, anggun Asyur mutuku nang arye, nunti kum olyasutume. Allah arye anggun nirya akunum wenebuka oplopsuka ati, nyapsine. Ati ara, anggunce nun ning ubula dalubuka dololamsulum ning nirya ara, ila tuba nun bidamang tamubuka doprobibirye, bokuka arelanamabe. Yan malye uamliba, teleb kibuka kum binmanto ulamikce ninye babye, aning bokuka dopropnamake.

²⁴ Tonda aminyan talak ara, Allah arye Yerusalem mutuku akunum teleb kipdeipsilyopura, doryanamle talak nirya ara, nun mutuku noutamak ara, tonoknye babye ikin upliba, imun kanye bon ning ton kum unamle. Uk din ning ayala-ayala nirya babye, kum upnamla anya arye, tonoknye babye, ‘Na uk dinmanile,’ nyabuka, malye kum nyanamabe. Yerusalem mutuku noutamak unamap ninye nirya ara, Allah arye nun malye wininyap ning ap, malye tenenyap ning nirya ap kum kipdeipsilirye, namin kinamsila ati, pia diksukumuk unamabe.