Yesaya 28 - Eipomek

“Outam mutuku ulamik ninye ati teneipdenamlulume,” nyabuk yupu

¹ Allah arye nyapdeibukba, nabi Yesaya birye sekeipsuk. Anggun bicoe, Israel yala ninye anggun umunye mutuku ara, Allah arye nyapliba, yu weik nang arye yanuka opsikirye, atu kiplopnamsiyaka ati, anggunda bicoe nyapsine. Anggunce weik asik dobuka ulamlum mutuku, Efraim mutuku kota noutam ara, sirya daknamake. Bukni, anggunda amutuku ululum nang ara, kanye wangalamak mek weik tonun, dimunye diparyuk, ‘Nun mutuku ara, urasin teleb kibuka aunamsile,’ tenelulum bukni, amutuku ara pia kum danamsile. Winipmanto ara, weik nang arye, bunga kita moupmalye ning dobuka, sik kisok deice deipmake bukni, dakalsaklamle atonun, anggun urasin teleb tenelulum mutuku babye, pia tuku telebak deice tam ulul bukni, aminyan akeit ning sesal lebuka, malye ulamle touk, anggun mutuku ara malye upnamsile. Ati anggunda bicoe. Anggun aik dolalum mutuku ara, teleb mutuku bukni, ninye nirya kanye wangalamak mek, weik tonun dilaluma deice arye, akunum malye winilulume.

² Anggunda talye kanye bobuka ulamlum bukni, Allah arye wipdeibukba, anggun mutuku olyanamsilanye bira, el ap, el yin talin nang ap, sikda mikip weik unyake. Anye bira weik liman ap, weik mok piriripna ap doplirye, weik kumanya mikip deice arye, mok bobuka yalirye, weik mok purwu, el si ara es, saklirye, aning-aning nirya yanuka oltaklamle touk winipnamsile. Winipmanto ara, weik mok piriripna doplirye, kumanya mikip weik yalirye, weik mok ceplirye, mek obuka ninye aik dolamikcak piriplirye, olamle atonun winipnamsile. Anggun olyanamsilanye elcuk, anggun talilulum ning ap, anggun aik dobuka umunye mutuku nirya ara, ulubuka atu kiplopnamsile.

³ Anggun Israel ninye deiyok nang ara, ninye kanye wangalamak mek dibuka dilamunce, ‘Nun mutuku ara, urasin teleb mutuku anya arye, apia unamsile,’ tenelulum bukni, anggun olyanamsilanye bira, mikip weik deice arye, anggun mutuku nirya atu kiplopsilirye, yanuka siknipnamsile.

⁴ Winipmanto ara, bunga kita moupmalye ning, dakalsaklamle atonun, anggun urasin teleb tenelulum mutuku babye, pia tuku telebak deice tam ulul bukni, aminyan akeit ning sesal lebuka, malye ulamle atonun, anggun mutuku ara, malye upnamsile. Winipmanto ara, Ara, yo duk min kum ekmalibuk, min yuma ekmalye ninguk eibikirye, minopce dakuka dilamak touk, anggun kum bikmamunye talak uk, talye karin arye olyanamsile.

⁵ Atalak ara, anggun Israel ninye arye, kanye deibuka dilalum ning nirya, akunum kum dasilyopura, Allah el si Yahweh aning-aning nirya talibuka, im deice yin talin malaikat nirya, sik weik deiyoknye bira, el tibuk tenepmunce, el siuk erebuka kinamlulume. Winipmanto ara, sik mutuku weik nang yakiba, kait ning dobuka arebikiba, kanye delilamak touk, sik yu nang arye obikirye, tuba bataknamsiyak nang ara, mitik tonunuk unamlum bukni, Allah Yahweh ati, el siuk erebuka umumce, kanye deibuka unamlulume.

⁶ Atalak ara, Allah arye Israel ninye sik yupu lipsisikuka bokolina deiyok nang ati, teleb kibuka una deiyok ning arepliba, anang arye, ‘Ninye urasin meiltona kum diparyuk, diksukum ubuka, yupu lipsisikuka bokolinamabe’ tenen, patapliba, talye lukparabuka yupu lipsisikuka bokolinamake. Tonda, Allah arye sik mutuku kalikna deiyok nang ati, kanye talima mikip kilin ning arepliba, ilil una kumce, mikip asa, sik olyanamak ninye ati, obuka sirye dakanamake. Allah arye nyapdeibukba, nabi Yesaya birye sekeipsuk.

Israel yala ninye ati, Allah el yupu peterelamik nang ap, el yupu lak lena deiyok nang ap ati, nyabuk yupu

⁷ Allah arye Israel ninye ati nyabuk. “Wini talak ara, sik deiyok nang weik tam ara, ninye kanye wangalamak mek weik tonun dinyakba, sik kanye wanganyake. Tonda, na yupu lak lena deiyok nang, sik nabi-nabi ap, na si eren aik pum tam pil dona deiyok nang imam-imam ap, sik babye, kanye wangalamak mek dinyaka deice arye, teleb arye kum teneiptinge. Kanye wangalamak mek weik tonun dinyakba, kanye wangabikiba kanye bona kumce, talye kwepdanin bakirye, keil yan dum dukdanin banyake. Winibicopura, sik kanye walwal upliba, Allah arye anang ati, ‘Lengdar deice arye nyalisilye ning ara, deiyok anye’ tenen, moubuka bita kel kum bikinyake. Tonda, ninye ati yupu moulinukce talak ara, teleb kibuka tenepmanto kum unyaka anya arye, malye-malye yupu uk nyanyake.

⁸ Wininyaka deice arye, sik pil don meja deice nirya ara, dukna weik dukikiba ililule. Ililula anya arye, lo telebak ton, pia kum ulule.” Allah arye nyabuk.

⁹ Nyabukce, ayupu ton dukdongobuka nyabuk. “Tonda sikce malye kanye bobuka, na Allah ati nyaninyake. Allah arye nunti, ‘Danto nang peterepnun’ tenen, nyasulul do? ‘Yata nang ati nyapnun’ tenen, ayupu weik tonun lak nyasulul do? Elce, nunti, ‘Sikda kanye bona kumce, milo mapu atonun unyake,’ tenesilirye nyasulul do? Elce, nunti, ‘Sikda kanye bona kumce, moum tuba dinyak mapu atonun unyake,’ tenesilirye nyasulul do?

¹⁰ Aning nyanmaba ara, talye ati kume. Allah arye, nunti nyasilye yupu ara, ton cang nyapmasilya ani, ayupu uk, tonap tuba-tuba nyasulule. Elce nunti nyasilye talak ara, ‘Aning ara ani, aning ara, ani. Winiplulume, winipnamlume,’ nyabuka ayupu uk, tuba-tuba tamultosilirye, nyasulula ara yata ati do? Nunda yata ati, milo mapu tenesilirye, nyasulul do? Anggun Israel yala deiyok nang arye, nyanululume.” Allah arye nyabuk.

¹¹ Nyabukce, ayupu ton dukdongobuka nyabuk. Na Allah arye nyasunun yupu ara, anggun walwal umunya ati, ayupu nyapsine. Anggunce na yupu kum kekenumunya ati, na Allah Yahweh arye yuk pera mutuku, yu weik nang dopdeipniba, anggun mutuku yakirye, sik yupu diamuk nyabikiba, anggun Israel ninye ara, ayupu kum kekenamlume. Anggun olyanamsiyak nang arye, yuk mutuku yupu deice nyanamsiyaka ati nyapsine. Yuk mutuku yupu nyanamsiyaka deice arye, na Allah arye wenepnamsine.

¹² Minop talak ara, na Allah arye anggunti, nyalamsise. ‘Anggun dikdik sena ati, pia teleb mutuku akunum kintinip deipmasine. Mikip kumce, mitang asa umunye nang ara, asukumuk dikdik sebuka unamlume.’ Ayupu ara, narye nyalamsise bukni, anggunce na yupu kum kekelamnulume.

¹³ Ati, na Allah Yahweh arye anggunti nyanamsin ning ara ani. ‘Aning ara, wininamlulume. Aning ara, kum wininamlulume,’ nyan yupu ara, tonap weik tonun tabakuka arenamsine. Ton talak ara, mitik anun arye nyanamsine. Ton talak ara, weik tonun arye nyanamsine. Nyapsinyopura, pia kanye walwal unamsile. Winipmanto ara, bisik walwal nang arye, kirikikirye, yuk bisik balamak touk wininamlume. Winimunyopura, ton nang ara opnamsiake, ton nang ara, tapu koubuka sik mutuku bobinamsiake, ton nang ara ikin ning anggun nong deice deipsikiba, imun kanye weik bonamlume.

¹⁴ Ati, na Allah Yahweh arye nyapnusin yupu ara, moubuka kekepnululume. Anggun Yerusalem mutuku ninye deiyok nang arye, nati, kum kekenululum nang ara, kekepnululume.

¹⁵ Anggunda teleb kanye bobuka dilamunce, ayupu nyanululume. “Kume, nun ap, Mesir mutuku ninye ap, akunum yupu talipdabirye, tonok ansinipnamaba ati, yuk pera mutuku yu weik nang arye, obuka sirya kum daknamsiyake. Yuk nang yupa weik tonun nun dam olyasitinga babye, obuka sirya kum daksitinge.” Anggunce utenelulume. ‘Nunda, talye tilila ati nyan yupu ap, tenebuka arye weik yupu ap, Mesir mutuku ninye ap, duknubuka nyapdapu yupu deice arye, telebuk unamabe. Sik Asyur mutuku yu nang arye, kum opsitinge,’ tenelulume. Utenebuka nyamunya ati, ayupu nyapnusine.

“Sion mutuku noutam ara, weik mambul keil tonok deipne,” nyabuk yupu

¹⁶ Ati, na Allah Yahweh, aning-aning deice tam unirye, Weik Erena Deiyoknye ununa anya arye, narye, ‘Winipnamne,’ tenenye touk wininune. Narye dipkoprob nyapsine. Narye weik mambul keil tonok Sion mutuku noutam deipne. Akeil ara dipkoprob pia mikip keil deipne. Tonda akeil ara, dekna weik keil deipniba, pia darabuka buknamla ati, yata ninye do nirya, akeil ati diba tenebice ninye ara, alye pia kum dakdanamake.

¹⁷ Narye winipnamne ning ara, pia dipkoprob ninguk winipnamne. Winipmanto ara, aik dona kel nang arye, ‘Cang ara ani, pala ara anye’ tenen, tapu deice arye kiklelamak touk, narye pia diksukum winilen deice arye, ‘Sikda teleb nang do, malye nang do?’ tenen, kiklipdenamsine. Weik mok ceplirye, mok purwu weik ning, el si ara es, saklirye, aning nirya yanuka olamle touk, anggun malye winimunye ning nirya kum kipdeipnamsine. Ara, weik mok ceplirye, mek weik tonun deibuka oplirye, aning siknibuka dilamle touk, anggun tilila yupu nyabuka, duknulamunye ning nirya ara, na Allah arye wenebuka kum daneipnamsine. Allah arye sik Israel yala ninye ati nyapdeibukba, Yesaya birye sekeipsuk.

¹⁸ Sikda, ‘Mesir mutuku noutam unyak nang ap, nun ap, yupu nyapdabirye, tonok ansinipnamaba ati, yuk pera mutuku yu nang arye, pia kum obuka sirya daknamsiyake. Winibiyopura, ninye olana ati pia ikin weik ning yanamle talak ara, sik adiparyuk yanuka opsikiba, kum dipnamabe. Dibin nang weklamakak, Sheol tam ara, nun ton kum wekelbinamabe. Kam tuba unamabe,’ tenelamlum bukni, aning ara nong kum upnamle. Ara sik ninye olana deiyok nang, anggun mutuku noutam yanuka olyanamsiyak talak ara, sikce, anggun Israel yala nang weik tonun oplobikirye, sirya dakanamsiyake. Bikbik abuka duknubuka kum bitume.

¹⁹ Sik aolyanaganamsiyak nang ara, pia tuba-tuba anggun dam yanganamake. Yanuka opsikce talak nirya ara, ninye weik tonun oplopnamake. Ara asum-asum nirya, anggun anang arye, keting Noutam babye, lukunyan talak babye, tuba yanuka ona uk unamsiyake. Wininamle talak ara, anggun Yudea tam ululum nang nirya ara, anggun ni koproba Allah arye nun nabi nang ati nyapdeiamuk ning, nyabibiba, anggunce aning kekepmunce moubuka tenelulum ning ara, dipkoprob weik tonun ilil pia upliba, yok sirimtalipsilirye, talima malye upnamsile.

²⁰ Ura, tenipdelulume! Ninye arye nyalamak yupu ara, anggun ton akunum kekebuka kel bikamlume. Ara, ‘Maptinye,’ teneplinye bira, el amsuna deice mapdelye bukni, el amsuna ara pia bumang ati kum wekukamatue. Tonda elce, ‘Na galun ning selimut uptu ura, na nong galubuka maptinye,’ teneplye bukni, el nong galubuka sinipdongopliba, selimut ara pia bumang ati, el nong kum galubukamatue. Aning atonun, sikce, ‘Omutuku Mesir tam nang arye, nun dam yanuka melibuka lyepdopsitinge,’ tenyamlum bukni, sik kum melipnamsiyake. Asyur mutuku nang arye yanuka bisipsikirye malye kipnamsiyake.

²¹ Aning ara talye ati kum nyapsine. Deiyok ara, ani. Minop talak Allah Yahweh arye Perazim mutuku dup ak, mikip weik arye pil melibuka dopsuka atonun, upnamsile. Tonda, Gibeon lu mutuku yanuka, elce, ‘Na tenen nang lyepdopnamneʼ tenyamukce, mambul weik pil dopsuka atonun, upnamle. Bukni, aminyan talak Allah arye mikip weik arye pil dopnamsil ning ara, pia yuke! Allah arye, ‘Wininamne,’ tenyamukce, mikip arye winipnamsil ning ara, nun ninye arye pia kum kel biktibye. Tonda Allah elce pil dopnamle ning ara, eibibirye, nunda malye nyabuka ngalukna uk unamabe. Nunce kum tenipmanto ning pil dopnamsila atia!

²² Ati ara, na Yesaya birye, Winipnamlul,’ nyabuka lak nyapmasin yupu nirya ati, anggunce, ‘Daupmalye, aning kum winipnamleʼ tenen, akutuna meme! Ayupu kum kekebuka namin kipmunyopura, Allah arye Kanye imun weik ning anggun dam deilisulule. Aning babye talye ati kum nyapsine. Dipkoprop, Allah Yahweh arye, aning-aning deice tam erebuka pia mikip weiknye ulinye birye, im deice yin talin malaikat, sik deiyoknye ulirye, lengdar deice yupu nyapdeipnukba kekepse. Ara, Allah arye, ‘Kume, amutuku dana-dana tam noutam ara, wenepsinirye, aning-aning nirya kum kipdeipnirye, sirya daknamsine nyapdeibukba na Yesaya birye akunum kekesa ati, anggunce, ‘Daupmalye,’ tenena kume!

Allah ara, kel pia weik bikna deiyoknye birye, pil dolula ati, nyabuk yupu

²³ Dipkoprop nyapne. Anggun amul aupmasilyopura, na nyapne yupu ara moubuka kekepnamlume. Tonda, na yupu deice arye, alaka nyapnusin yupu ara moubuka kekepmunce, moubuka tenipnamlume. Winipmanto ning nyapsine.

²⁴ Ninye tonok wa wilamlinye birye, asum-asum nirya pia pi deibuka, tuba-tuba tuku palilul do? Tuku paliplirye, awa tonok ati, tuku akunum palibuka kintinip deiptopura, tuku palin pil kum batakalul do? Akumopura, el tuku palin pil don ning deice arye tuba tuku palina uk pia unamle do? Aning batakuka, yala kounamle do? Kum do?

²⁵ Nun mutuku noutam ara, wa tuku akunum palipturye, kintinibuka teleb kibuka akunum deiptopura, elce yala ton doknamle do, kum do? Kume, dipkoprob doktue. Winipmanto ara, mirin yala ap, kurun yala ap nirya ara, doknamle. Aning atonun, awa wina deiyoknye birye, yala koun bisik yuk-yuk kibuka, gandum duk ap, tonda yukak jelai ap doktue. Winipturye, awa tuku kup-kup tam ara yuk yala, el si sekoi ton kouptue. Yala ulye touk, telebak uk koulule.

²⁶ Wa wina deiyok nang arye, teleb kibuka wa koun ning ap, yala dokmanto ning ap ara, weik kel arye pil donyake. Deiyok ara, wa tuku wina deiyoknye birye, el si erelul Allah, elce anye akunum, ‘Winipnamlam, aning ton winipnamlam,’ nyabuka peterlya anya arye, anye birye apil talibuka, teleb kibuka pil dolule.

²⁷ Anggun babye akunum kel bikamlume. Awa wina kelnye bira, el yala yuk-yuk ulye touk, aning bol kona ati ara, yuk-yuk kintinibuka delilule. Ara el wa wiamlirye, yala yuk-yuk akouamlye touk, el bol kona ati pil don ning babye, yuk-yuk kintinililule. Ati, gandum do, kacang tanah do atonun ning ara, kat ning bol kona ati ara, ikin ning arye teikliba, bol kolule. Bukni, pia mitang ning, winipmanto ning, tomat ap, sumik (ketimun) ap ati ara, namin ning aryuk yala dokolule. Tonda ikin ning arye, tomat ap, sumik ap ara, kum paplirye, yala kum dololule. Aning ara kum winipmanto. Kat ning kona ati, ikin ning arye pil dolule. Mitang ning kona ati, mitang ning aryuk apil dololule.

²⁸ Ura winipmanto ning ton nyapnusine. Awa wina deiyoknye birye, el gandum duk daklirye, ‘Gandum teiknirye, roti kwaning deiyok ning kintinipnamne,’ teneplye talak ara, kat yo arye do, besi ning arye do, gandum kat duk tikinmana ani, kat bola akunum wiplyopura, akunuma. Tuba-tuba tuba teikina uk pia kum winipnamle. Gandum duk ara, sung-sunga winina kume. Kume! El awena deiyoknye birye, el bol kona ap, teikina ap nirya ara, elda pia kel weiknye binya arye, ayala ning aulye touk, el pil don ning babye, teleb ninguk wibuka pil dolule.

²⁹ Ati, anggun tenipdelulume! Aning-aning nirya ara, Allah el si Yahweh arye, sik wa wina deiyok nang ati peterliba, weik tonun kel bikinyake. Allah arye, nun tukwak nang ati, ‘Aning ara wininamlume, aning ara pia kum wininamlume. Teleb winin ning ara ani. Malye ning ara ani,’ nyabuka lak nyasulul yupu nirya ara, pia teleb uka. Tonda, Allah arye, ‘Winibuka pil donamlume. Winibuka teleb ubuka dipsukumuk unamlume. Pia kum winipnamlum ning ara, ani,’ nyabuka lak nyasulul yupu nirya ara, weik kel arye peteresulule. Allah Yahweh ara, aning-aning deice tam erebuka, mikip weiknye ulirye, im deice yin talen malaikat nirya, sik deiyoknye ulula anya arye, dipkoprob elce pil donamle ning nirya ara, weik kel arye wininamle! Allah Yahweh arye tenilul ning nirya ara, pia dipkoprob telebuk ulule. Ayupu nirya ara, Allah arye nyapdeibukba, Yesaya kekebukce sekuk.