Yesaya 20 - Eipomek

Nabi Yesaya bira, Allah arye nyapdeibuk touk, bikilina ati, deiyatinga kwanibuka deibuka ati, sekik yupu

¹ Asyur mutuku deiyok kibuka taleamuknye, el si Raja Sargon birye, el yin talin nang nirya, sik weik deiyoknye biti nyabuk. “Ance Pilistin mutuku noutam, tonok weik asik, ara Asdod mutuku unyak nang olbinulyame,” nyapdeibukba, elce amutuku ulamik nang binuka obukabukce, amutuku alubuka doprobuk.

² Atalak ara, Allah Yahweh arye, ninye si Amos, elce deiamuknye, Yesaya biti, “Ance anyapkin touk winipnulyame,” yana nyabuk. Anyabuk yupu ara, ani. “Anda malye baju, el si karung koni ongolamlum ning ap, yan ongolamlum ning, el si sandal ap ara, asukum bin kwiribuka bataknulyame,” nyabuk. Nyabukura, Yesaya birye amalye baju el si karung koni ap, yan ongon ning, el si ara sandal ap, ongobuka bina bukukce, aning nirya kwiribuka batakukce, keting tamun winilye deice arye, talye nong bananguk balamuk. Awinilamuk ning ara, keting tamun winilye noutam nirya arye, talye nong bananguk balamuk.

³ Keting tamun winilye akunum ubukura, Allah Yahweh arye, Asdod mutuku ulamik nang ati, yanuka yupu ton nyabuk. Ara, “Na amu tam pil donanye, nabi Yesaya bira, keting tamun winilye deice arye, baju ap, yan sendal ap, ongona kumce, talye nong bananguk balamuk. Winibuka balamuk ning ara, ninye dinmanakuk, Yesaya bira balamuk. Ara, Mesir mutuku nang ap, Sudan mutuku nang ap ati, weik ikin ning upnamle ning, ara Asyur mutuku Raja birye, sikti, aminyan talak winipnamuk ning ati, narye nyapdeipsiba, nabi Yesaya birye lakakiamsuke.

⁴ Alaka kiamsuk ning deiyok ara ani. Ara, Asyur mutuku ninye deiyok kibuka talipnamlanye birye, sik abitinye mutuku nang, ara Mesir ap, Sudan mutuku ap, abitinye mutuku noutam unyak nang nirya ara, obuka tomoplirye, sik amutuku nang nirya bobuka wenen aik binuka dongopnamle. Nabi Yesaya birye, nong bananguk balamuk touk, sik anang nirya babye, nong bananguk binamake. Ara, ninye deiyok nang babye, talye amu tam unyak nang babye, wisi nang babye, wel nang babye, sik nirya ara baju ap, yan ap ongona kumce, nong bananguk bobuka binamle. Ara, sik Mesir mutuku unyak nang ara, weik alye una ap, malye kilina ap, unamaka ati, nong banang bobuka, pera mutuku bobinamle.

⁵ Asyur mutuku deiyoknye birye, amutuku bitinye obuka tomoplirye, karin mutuku bobinamle talak ara, sik yuk mutuku nang arye, Mesir mutuku nang ap, Sudan mutuku nang ap ati, ‘Se, anggunda sikcuk melipnamsiakcaʼ, tenebupu nang bukni, ‘Se akunum bobinmak atia tenebuka, malye kanye bopnamake. Malye kanye bobuka unamak nang ara, amutuku nang bitinye bobiceba, eibikirye, ‘Se yata wiriptibye do? Nun mambul upsile. Sikce, nun melipnamsiake,’ tenelampu nang ara, ‘Akunum kum kiple,’ tenen, kanye ikin upnamle.

⁶ Atalak ara, weik laut mekwen lilun tam unyak nang arye nyapnamake. “Se, Dipdelulume. Nunce sik abitinye mutuku nang ati, Asyur mutukunye birye, olyangalye talak ara, sikce yanuka melipnamsiakcaʼ nyalamupu nang ara, wini talak sikda yata wiriple do? Ati nunda yata wiriptibye do? Yata wiribuka bai sakuka bikbik abuka bitibye do? Yata nang melipsik tingce, lyepdopsiting do?’ nyabuka, asipdanamake. Allah arye nyabuk.