Yesaya 13 - Eipomek

Allah arye, Babel mutuku nang wenepnamle ati, nyabuk yupu

¹ Allah elce, Babel mutuku nang wenepnamle ati, Amos el mi nabi Yesaya biti arebukba, Yesaya lengdar mabuka deice arye, ayupu kekebuk. Ara, Allah arye nyabukba, Yesaya birye kekebuk yupu ara, ani.

² ‘Yin talin nang arye, minopce olyanganamakʼ tenen, laka kin ning, el si bendera, biribuka kirikwetepnamlyame. Ara, aning-aning kum upmalye mutuku, weik cang mutuku dup eitam yanuka, bikilin ning ikuka, kirikwetepmunce, dopkweteplulume! Winipmunce, yin nang ati, yupu weika arye yukupmunyeba, kekebikirye, yanamake. Ara, Allah arye, ‘Anang wenebuka opnamne,’ tenyamuk nang, sik mutuku olalbinamake. Amutuku ninye deiyok nang, sik botopdeibik bisik bublan damuk, binuka wekelbikirye, anang opnamake.

³ Na Allah aryuk, narye wipdeipse nang ati, ‘Sikce na tenepse pil dopnamniakʼ tenen, ‘Anggunda winipnamlume,’ nyabuka, sik deice akunum nyapdeipse. Tonda, na yu weik upnuk ati, narye wipdeipse nang, sik mikip yin talin nang ati, “Anggunda yanuka buluplulume,” nyapdeipse. Bulubikceura, narye, ‘Na yu weik upnilyak ati, na tenepse nang ara, anggunce anang deice ikin ning deibuka, wenepmunce, opnamlume,’ nyapnyeura, ayin talin nang arye, anang olalbinamake. Ayin nang ara, kwalinyak bukni, “Aninye olbilulume,” nyapdeipnyeura, sik ayin nang ara, ‘Yo, nunce koupnuyapʼ tenen, kanye deibuka kintinipnamake.

⁴ Anggun nirya dilulume! Mutuku eitam arye, lelim weik nyanmaliba, kekepnamlume. Alelim ara, mutuku kon deice, ninye yupa pia weik bulubuka wekmakirye, sik yupu weik arye nyalamak touk, nyanmakibuk, kekepnamlume. Anggun nirya kekeplulume! Ayupu ara, dana-dana tam unyak nang ap, sik ninye deiyok nang ap, yupa pia weik bulubuka, neika wekmakirye, yupu weika arye nyamakibuk, lelim weik lelamle touk, anggun ton kekepnamlume. Anang yupa pia weik bulupmakirye, lelim weik nyanmacak ara, talye ati kum lelule. Deiyok ara, na Allah aning-aning nirya deice tam erebuka, im deice unyak yin talin malaikat, sik deiyoknye unune. Naryuk, yin talin nang kum nukmanto, yupa pia weik, nang olbana ati bulupdeipniba, kintinipnamake.

⁵ Sik ayin talin nang ara, pia pera mutuku ara, mutuku sirya, im sirya daulamice nang, bulubuka yanganamake. Na Allah ap, sik ap, nun neika bibirye, na tenepse mutuku unyak nang obuka, sirya dakuka kum kipdeipnamne. Ara, na ap, na wipdeipse yin nang ap, nun neika arye, sik malye wininyak nang nirya ati, obibirye, sirya daknamabe.

⁶ Sik wenepnamne mutuku noutam ululum nang ara, imun kanye bopmunyakarye, weik arye engenamlume. Ara, na Yahweh arye anggunti, ‘Wenebuka opnamsineʼ tenepse talak ara, akunum dam upmala atia. Atalak ara, na Allah arye, aning-aning nirya talibuka, deice tam erebuka, mikip weik ununye birye, na tenepse nang nirya ara, obuka kum kipdeipnamsin atia.

⁷ Ati ara, anggun wenebuka oplopnamsin nang nirya ara, pia ilil weik upsilyeura, anggun nong nirya ara, mitang upnamsile. Tonda, ilil weik upsilyeura, anggun kanye uk dipsilirye, talima daksaknamsil ara, aning-aning nirya ara, pia kum winipmanto upnamlume.

⁸ Narye opnamne nang nirya ara, ilil pia weik upnamle. Ikin ning, sik nong deice deipnyeura, sik nirya arye, ‘Se, yata wiriptibye do?’ tenen, imun kanye bobikirye, teleb kibuka, tenipmanto kum unamake. Sik amutuku unyak nang ara, uk weik dipnamle. Ara winipmanto ara, mi bomice kilapu, mi deiyok dilamle touk, upnamle. Weik kanye imun uk dipliba, imun kanye bobuka unamake. Winipliba, narye wenepnamne nang, sik ninye dipdandekirye, engepnamake. Ara, sik weik ilil upnamalya ati, awiniplye ning ati, engepnamak deice, sik urasin deice ara, tin weik upliba, pia nong mek butupnamle.

⁹ Anggun nirya moubuka dinamlulume! Na Allah Yahweh arye, tenepse nang, amutuku-amutuku nang nirya wenepnamne talak ara, akunum dam kipmale. Atalak akunum kiplyeura, anggun nong deice, weik ikin ning deipnamsina ara, ninye ati, bico pia kum tenenamne. Yu pia weik upnilyeura, sik unyak mutuku nirya, malye weik kipnirye, amutuku nang nirya obuka, sirya daklopnamne. Ara, narye malye ning talibuka, malye unyak nang nirya ati, wenebuka opnirye, kum kipdeipnamne atia. Winipyeba, anggun mutuku noutam ara, ninye una kumce, maning dem upnamle.

¹⁰ Malye unyak nang nirya, wenepnamne talak ara, kunauk upnamle ati, kurya tonok-tonok tikilul ning ap, tonokak bulubuka, deiyok tikinyak kurya nirya ara, daksaknamle. Tonda, dirina ara, pia kum eipmanto upnamle. Tonda, keting puruplye talak beren tam, keting dirina ton kum uplirye, kunuknamle. Atonun wala dirina babye, kum eipnamake. Kunuknamla atia.

¹¹ Na Allah arye, tukwak mutuku im sirya, mutuku sirya nirya noutam, pia malye-malye weik wininyak nang ati ara, ninye yupu bokeipnirye, wenepnamne. Tonda, sikce pia malye ninguk talibuka, malye wininyak nang ati, wenebuka opnamne. Tonda, sik kanye eren nang ara, amu tam kipdeipnamne. Aning atonun, kwalibikirye, malye wininyak nang babye wenebuka opnyeura, sik kwalibuka erelanyak ning nirya, kum kipdeipnamne. Aning nirya ara, pia amu tam kipdeipnamne.

¹² Atalak ara, narye ninye pia weik opnamne ati, tuba kam unamak nang ara, mitik tonunuk unamake. Dipkoprob, ninye arye dekna weik ning, el si emas, ‘Pia teleb ning doproptibyeʼ tenen, pia moubuka dipdekce bukni, aning weika arye, kum elilamak touk, ninye weik opnyeura, ninye ton dipdenamak bukni, yupa weik kum eipnamake. Ara, pia urasin teleb ning, Ofir mutuku arye palibikirye, pia teleb kibuka memebik emas ara, mitik tonun ulye touk, atalak ara, tukwak nang babye, mitik tonunuk kam tuba unamake.

¹³ Aning nirya winipnamne ati ara, na mikip weiknye birye, im deice ulye ning nirya, talibuka lulukniba, dalupsaknamle. Tonda, mutuku-mutuku bukuka nirya ara, narye lontokneba, tukwak mutuku nirya loknamle. Ara Allah Yahweh, aning-aning nirya talibuka, mikip weik ununye bira, im deice unyak yin talin malaikat nirya, sik deiyoknye unune. Ati, atalak ara, na yu pia weik upnilyeura, im deice ning ap, tukwak mutuku bukuk ning ap, aubuk ning nirya loknamle.

¹⁴ Atalak ara, ninye nirya pia ilil weik upnamle ati, atalak unyak nang nirya arye, ‘Se, nun ton opsicakʼ tenen, bai sakuka bindopnamake. Winipmanto ara, rusa basam on nang arye donmaceba, bai sakikcak arye, yukak balamle touk kibuka, ninye nirya ara, ‘Se, yata nang ton melibuka kaleksiting do?’ tenen, sik mutuku yuk-yuk bokuka, bindopnamake. Tonda, sik anang nirya ara, domba basam weina deiyok nang arye, talibuka weilamcebuk, sik domba basam yupa tonok, kibuka balamak touk kum ati, sik domba basam nirya ilil ukirye, sik yuk-yuk tamubuka, sik mutuku uk tamubuka, pola balamak touk, anang babye atonun upnamake.

¹⁵ Atalak kam unamak nang ara, bikbik abuka bendopnamak bukni, yata nang do nirya, yu yin talin nang arye, anang eibicopura, tomobuka ninye on tatce ning arye, aninye opnamake. Dipkoprob, na tenepse mutuku nang yukak bindobikceba, sik anang olalbinamak yu yin nang arye, eibicopura, anang nirya ara, parang ya arye lukuka opnamake. Ayin talin nang arye, eibuka tomopnamak nang nirya ara, adiparyuk lukdanuka obikceba, dipnamake.

¹⁶ Aninguk kum bukni, atalak opnamne nang, sik yu yin talin nang arye, amutuku nang, sikce winiryuk delilamak mitik mapu nirya babye, doprobikirye, sik wisi nang dinmace sukum aryuk, amapu keil deice tomobuka dopouklobiceba, sik nong nirya dila saklirye, dipnamake. Tonda, sik ayu yin talin nang aryuk, na opnamne mutuku unamak nang, sik aik wekuka, sik bona nirya alubuka dopropnamake. Tonda, sik ayin nang aryuk, amutuku nang, sik domikce kilapu, ubula dobuka yonamake.

¹⁷ Allah arye nyabuk. “Narye Madai mutuku nang, sik kanye noutam, yupu nyapnirye, lo arepnyeura, sikce na tenyamse nang, Babel mutuku nang ati, mal olyanamake. Babel mutuku nang arye, Madai mutuku nang ati, ‘Se, sikce kum opnamsiyak ati, yupu seknamapʼ tenen, ninye mikip kin yo bok dekna ati, emas ap, perak ap, areptinga babye, Madai ninye arye, aning kum tenenyake ati, Babel mutuku nang ati, olyanamake.

¹⁸ Sik Madai mutuku yin nang arye, mal ap, yin ap arye, Babel mutuku noutam unyak wel nang nirya ara, opnamake. Aning atonun, winiryuk moum din mapu nirya babye, eipnamak bukni, bico tenena kum aryuk, amitik mapu babye, sik du yapu nirya babye, bico kum tenebikirye, amapu nirya ara, opnamake.

¹⁹ Atalak ara, yuk mutuku-mutuku daunyak nang nirya arye, Babel mutuku weik asik domik ning ati, ‘Se, anyasik ara, dipkoprob pia telebuk ulule,’ tenenyake. ‘Mutuku-mutuku yuk ara, mitik teleb bukni, Babel mutuku tonok ara, pia urasin teleb mutuku ulule,’ tenenyake. Tonda, sik Kasdim mutuku unyak nang arye, Babel weik asik donyak ning ati, ‘Se, anyasik ara, urasin pia teleb mutuku ululeʼ tenen, kanye delinyake. Bukni, na Allah arye, Babel mutuku nirya obuka bataknamne. Ara, winipmanto, min talak narye Sodom mutuku ap, Gomora mutuku ap obuka, sice buklopse touk, winipnamne.

²⁰ Babel mutuku nirya, akunum sirya oplyeura, amutuku noutam ara, tonoknye ton batakneba, atalak arye dipdongobuka, doupnamle talak nirya babye, amutuku noutam pia kum unamle. Tonda, Arab mutuku nang arye, sik domba basam amutuku weina ati, tiya dolina tenda aik babye, kum yanuka dopnamake. Tonda domba basam ap, kambing basam ap, wein nang arye, sik wein ning amutuku mutmuta dina ati, pia yanuka kum weinamake.

²¹ Bukni, amutuku noutam ara, bai tam talye kam ulamle ninguk, yanuka weinamake. Babel mutuku nang arye, sik asik nirya, dobuka ulamik ning noutam ara, ninye kum wekuka unamak bukni, bai tam ulamle kout maka, tonda lu mutuku unyak sanip maka yanuka, anyaik wekuka unamake. Tonda, bai tam yuk-yuk ulamak kambing basam ton, anyaik wekuka amutuku ukirye, dipde-dipde bikirye, im kurukikirye, banamake. Babel mutuku weik asik domika ara, aik ol dem upleba, abai ninguk yanuka papnamle.

²² Tonda, bai tam mutuku ulamle kam sisa, el si bai kam, ngalukna ap, bai kam atonun ning, sirigala nyalamak ning, sik aik pia teleb domikak wekuka ukirye, ngaluknauk unamake. Allah arye Babel mutuku dakuka bataklirye, sirya opnamle talak ara, akunum dam uple. Allah Yahweh arye, ‘Amutuku obuka sice buklopnamne,’ tenebuk talak, dipkoprob upnamle. ‘Amutuku tuba unamleʼ tenen, ninye arye yupu kum sektinge. Allah arye tenyamuk touk, amutuku kum kipdeipnalamlarya. Nabi Yesaya birye, nyabuka taruk piplubukce, anang nirya ati, wenebuk.