Yeremia 8 - Eipomek

Sirya talak kanye imun ning upnamsil ning ati, nyabuk yupu

¹ Allah arye nyabuk. Sirya talak ara, weik kanye imun ning wenebuka arepnamsine. Na Allah Yahweh arye nyapsine. Atalak akunum yalyeura, min talak Yehuda mutuku talibuka ulamik Raja-Raja nang nirya ap, sik amu tam, ninye deiyok kibuka, pil dolamik nang ap, na si eren aik pil dolamik nang, sik imam-imam nang ap, tonda Yerusalem mutuku noutam ulamik bukni, akunum diamikba, ninye arye, akunum weiamik nang nirya ara, sik mal olan nang arye, opsikcak arye, malye kipnamsiake. Ara, min talak akunum diamikba, weilamlum nang, sik apu yapu arye weilamikak tuku pum bisik arye, anang sik yoka nirya lukuka, ‘Anang malye kilinamapʼ tenen, tukwak deipnamake.

² Aning ara, dipkoprob malye ning ninye pia winipman kum ning bukni, atalak ara sik mal olan nang arye, min arye akunum diamikak, tuku pum tam weiamik nang, sik yok bulubuka, tukwak deipnamak nang ara, tuku pum tam arye, lukuka kata deiplopnamake. Winibikceura, ila tamubuka, tuku pum tam kum weipnamake. Ara, ninye arye sik dei yalamak atonun, tuku deiceuk deiplopnamake. Ninye arye, talye bam ning do, yuk malye ning do, tukwak talye lubakibuka donoklamak atonun, anang yok nirya ara, talye tukwak, deice anyuk aupnamle. Deiyok ara, sik mal olan nang arye, amutuku akunum diamikba weilamik nang ati, pia malye kipdeibibyeba, ‘Sik yala nang, tuba kam unyak nang ara, alye weik dakdanamakʼ tenen, anang yok lukuka, tuku deice kata sukum bataknamake. Ton deiyok ara ani. Ara min talak, sik amutuku ulamik nang arye, na Allah ati bataknarye, keting ap, kurya ap, tonda wala ap ati, ‘Nun ni ani,’ nyabuka, aning ati, si erelamika winipnamake. Ati sirya talak ara, sik akunum diamik nang yok ara, talye lakak lukuka, tuku deice batakikceba, kata sukumuk bataknamle. ‘'Amutuku nang, sikda talye-talye ning dam, si erelulum ning ap, kanye deiplumce, aning amu tam pil domlum ning ap, talye ning ati, si erebuka pil melibuka domlum ning ap, tonda, ‘Se, nun wininamap ning ara, anggunce peterepsululume,’ nyabuka, morolulum ning ap, aulula ati, akunum diamikak, tuku pum tam weiamik nang, sik yoka nirya lukuka, kata sukum tuku deice bataknamake. Ara, sik mal olan nang arye, ‘Sik Yehuda mutuku tuba kam unyak nang nirya, alye weik dakdanuka unamakʼ tenen, akunum winibikceura, ayok ara, tamubuka tuku pum tam kum weipnamake.

³ Tonda, sirya talak weik arye wenepnamsin talak ara, na Allah arye, min talak, ton tam nang yakuka, yuk pera mutuku nirya akunum donokse nang bukni, wini talak tuba kam unamak nang ara, ikin weik unamake. Sik anang arye, imun kanye bobikirye, ‘Se, teleb ning ara, nunda dipnauk uptibye. Pia ikin weik unyaba ati, kam una ara, nun like,’ tenenamake. Nara Allah Yahweh, im deice unyak yin talin malaikat nirya, sik deiyoknye ununa ati, mikip weiknye unune. Ati, naryuk ayupu akunum nyapmasina ati, aning nirya nong upnamlarya! Allah arye, sik Israel nang upnamuk ning ati nyabuk.

Malye winina ap, wenena ap ati, nyabuk yupu

⁴ Allah Yahweh arye, na Yeremia biti, “Ance na mapu Israel nang, sik dam nyalbinalam yupu ara, ani,” nyapnuke. Ara, “Anggun ton tenenipdelulume! Nong cebuka tukwak saklinye bira, ila tamubuka bululul do, kum do? Tonda, bisik balamnak talak arye, tamubuka yuk bisik bilyeba, bisik walwala ululnye bira, akunum biklirye, adiparyuk ila tamubuka, min banmalye teleb bisikuk yangalul do, kum do? Kume, dipkoprob min arye banmalye bisik telebuk banyake.

⁵ Aning ati ara, anggunda na mapu koproba, sik Israel nang ara, yata ati, asum-asum nirya, mania kanye bopmunce, malye winin ninguk, pia talibuka winilamunya ani, na dam batakuka banululum bukni, ila tamubuka, na dam pia kum yangalulum do? Anggunda, talye ning ati bukni, ‘Aninguk diba tenebuka, pia kalinamapʼ tenen, tilila yupu uk, tuba talinyake. Sikda, na Allah dam, tamubuka kum yanganyake.

⁶ Anggunce nyanululum yupu ara, na akunum moubuka kekesunun bukni, anggunda teleb yupu ton, kum nyalulume. Anggun umunya kan-kan arye, tonoknye babye, ‘Se, na malye wininun ning ara dan do? Nara, yata ati, aning tuba wininun do? Aning nirya ara bataknirye, kanupdongobuka, Allah dam tamubuka binune,’ tenebuka, kum batakalulume. Anggun nirya ara, anggun kanye aryuk teneplum bisikuk balulume. Winipmanto ara, ninye olan talak ara, sik kuda basam arye, ‘Olanyak nang arye opsikcake,’ tenena kum aryuk, talye kanye boplirye, bikbik abuka olanmakce tam, talye balamle atonun, anggun babye, ‘Allah arye wenebuka opsilyak,’ tenena kum arye, tuba malye winilulume.

⁷ Ura, anggun nirya tenenipdelulume! Bangau maka babye, el kanye aryuk, ‘E, atalak akunum kiplyopura, na mutuku koprop tamubuka yanamneʼ tenen, bikilule. Tonda yalma ap, borom-boromanye maka ap ara, yuk-yuk yala maka ap, ‘Amutuku ulamepya ani, teleb talak akunum kiplyeura, anirye koubuka, nun mutuku koproba tamubuka binamapʼ tenen, akunum bikinyake. Bukni, nara Allah, na mapu koproba nirya ati, narye, “Aning ara wininamlume. Aning ara, pia kum wininamlume,” nyapdeipsise yupu ara, anggunce moubuka kum bikilulume.

⁸ Anggunce na yupu kum bikinululuma ati, anggunda yata deiyok ati, ayupu nyaptum do? Anggunce pia kanye moubuka, kum teneplumce, nyalulume. “Kume, nunda Allah arye, ‘Aning ara wininamlume. Aning ara, kum wininamlume,’ nyapdeipsuk yupu ara, akunum talibuka winibibirye, weik kel nang unyabe,” nyalulume! Nyalulum bukni, anggun nirya ara, moubuka biklulume! Allah yupu sekna ap, peterena ap ati, deiyok talibuka, pil donyak nang ara, sikce tilila yupu nyan nang unyake.

⁹ Ati, narye dipkoprob nyapsine. Anggun amutuku ululum nang arye, sik mutuku noutam ubuka pil don deiyok nang ati, ‘Kume aning ara, pia weik kel bikamik nang unyake tenebuka, anang ati si erebuka kilulum bukni, narye nyapsine. Narye anang nirya ara, amu tam deipniba, alye weik dakdanamake. Narye sik wenena ati, lo arepnyeba, ninye arye wena webmakcak, youlamle touk winipnamle. Ara, sik mal olan nang arye, anang dam yanuka obikirye, tomobuka tapu koubuka, sik mutuku tamubuka bobinamake. Bobinuka, yuk karin mutuku akunum deibikceura, atilila yupu nyanyak nang arye, ‘Se, yata wiriptibye do?’ tenen, sik kanye babye kum kiplyeba, teniltonauk unamake. Deiyok ara ani. Sik anang nirya ara, na Allah arye, ‘Winipnamlume,’ nyapdeipsise yupu nirya ara, batakaninyaka ati, sikda yatato weik kel bikin nang upting do? Kume, sik anang ara, weik kel bikamik nang dipkoprob kum unyake.

¹⁰ Sik mutuku noutam uceba, anggunce, ‘Se aning ara, weik kel nang unyake,’ nyalulum nang ati ara, wenepnirye, narye lo arepnyeba, yuk nang arye, sik akunum domik kilapu nirya, narye yuk nang ati arepyeura, anang arye akilapu alubuka dopropnamake. Aning atonun, sikce wa tuku wilamice mutuku ara, na Allah arye dobuka, yuk nang ati arepnamnarya! Winibuka wenepnamsina deiyok ara, ani. Ara, anggun amutuku noutam ululum nang nirya ara, weik bona talin nang babye, amu tamuk mitikto unyak nang babye, ‘Se, aning-aning nirya, nun ton weika arye doproptibye,’ tenen, pia patasilyeba, enauk ululume. Tonda, anggunce, tenebuka aryuk nyabibyeba, ‘Yuk nang ning pia weika arye alubuka doprobibyeba, bona talin nang uptibyeʼ tenen, tilila yupu nyalulume. Ara talye daunyak nanguk kum bukni, anggun mutuku noutam, Allah si eren aik pum tam pil donyak nang, sik imam-imam nang babye, na yupu ap, aminyan upnamle ning ap ati, laka nyana deiyok nang, sik nabi-nabi nang babye, tilila yupu deice aryuk, nyabikirye, enyake.

¹¹ Sik imam nang babye, nabi nang babye, na mapu koproba, sik Israel nang nirya ati, ‘Yo, daupye, anggunce malye winilalum ning ara, tenena kume. Aning ara, weik malye winin ning kume,’ nyabuka, pilinyak deice arye, pia malye wininyake. Winipmanto ara, pia weik suse dilamle bukni, anang arye, ‘Kume, nun asuse disulul ning ara, weik mambul kume. Aning ara malye. Asuse ara, talye suse disulula ati, aning nirya ara, el yuk lopliba, telebuk unamabe,’ tenebikirye, nyanyake. Nyasinyak bukni, na Allah arye, dipkoprob nyapsine. Anggunda, talye kanye bobuka, telebuk kum unamlume. Ikin weik unamsila ati, imun kanye tuba bobuka, unamlume.

¹² Tonda, adeiyok nang nirya arye, “Se, nunda malye winin ning talibuka wininyap bukni, nunda dipkoprob ilil kum upsutue. Nun awininyab ning nirya ati ara, alye kum dakdanamabe,” nyabuka, mania kanye weik bonyake. Wininyaka ati ara, na Allah arye dipkoprob nyapsine. ‘'Amutuku nang wenepnamsin talak ara, anggun mutuku deiyok-deiyok nang babye, weik arye wenepnamsine. Narye lo arepnyeba, anggun mal olan nang arye, mal olyanamsiak talak ara, adeiyok nang babye obikiba, sakuka dipnamake. Anggun amutuku ululum nang ati, opsikiba saklamlum touk, sik adeiyok nang nirya babye sakiceba, amu tamuk unamake.

¹³ Winipmanto ara, ninye arye, ‘E, nun anggur wa wiamupu noutam arye, aning-aning nirya lin li yalyeura, anggur duk ap, kwarang yo duk ap, yuk lin ning ap ton dakuka linamabe tenenyake. Bukni, ‘Aning lipnamap tenen, li talak uplyopura, aning-aning nirya, duk kum moulamle touk, tonda ayo yala-yala nirya yo bok nirya babye akunum koulubukaplirye saklamle touk, upnamlume. Ara, aning nong ara, ani. Na Allah arye, ‘Na mapu koproba bulubuka deipnamneʼ tenen, pia patanilye bukni, narye areamsise ning nirya kum kipmalba, anggun babye malye-malyeuk tuba winilulum ati, kum bulupdeipsitinye. Aning ati ara, narye, ‘Na mapu koproba ati, aning-aning nirya arepnyeba, Sikda pia telebuk unamake,’ tenyamse ning nirya ara, wini talak min arepsitinyeba, Anggunda ikin uk unamlume. Ati, narye, sik yuk mutuku nang ati nyapyeba yakirye, sikda na mapu unyak mutuku nirya ara, yanuka alubuka dopropnamake. Na Allah Yahweh arye nyapmasina ati, aning nirya ara dipkoprob nong upnamle, nyapsine!

¹⁴ Winibuka nyapmasina ati, anggun amutuku ululum nang arye, atalak ara, winibuka nyapnamnululume. “Se, imun kanye bobuka unamaba ati, yata ati, nunce asukumuk talye bukmap do? Anggun dana-dana tam ululum nang nirya ara, nun dam yamunyeba, nun nirya neikauk, yuk mutuku weik asik dobuka ukirye, ‘Nun mal olan nang arye, talye luparabuka, yana opsikcakʼ tenen, cang keil poka dobibyak arye, amutuku binuka, ulamepye bukni, amutuku arye dibibyeura, telebe uka. Deiyok ara ani. Nun ni koproba Allah, min arye melibuka kaliklamsuk bukni, nun ni koproba Allah el dam malye winilamupu buk, wini talak ara, elce nunti, “Sikda dandobikirye, kum kipnamake,” akunum nyapdeipsuk atia. Bukni, aning awinipnamsil ning deiyok ara, nunca!

¹⁵ Wini talak ara, nun amutuku unyap nang arye, ‘Se, teleb kipdeipsutuba, talye kanye bobuka telebuk wininamabeʼ tenen, patasulul bukni, min teleb kipdeipsilyeba, aning kum dinyabe. Aning atonun ton, nunce, ‘Se, nun imun kanye usulul ning ara, kum kipdeipsutuba, nun suse disulul ning ara, kwetepsutuba, lopsuturye, tonap teleb uptibyeʼ tenen, patasulul bukni, Allah arye teleb kum kipdeipsilya ati, aning babye, kum dinyabe. Allah arye, el yu nun deice deipsilyeba, ikin ninguk, nun dam yanuka tuba usilirye, weik imun kanye bobuka, unyabe. Israel nang arye nyapnamake.

¹⁶ Wini talak ara, ayupu ton akunum nyanyake. Ara, “Se, Israel tam bukni, pia dabu tam (arah utara) arye, dan mutuku asik noutam unyak nang arye, nun mal olan nang kintinibuka yanamak deice arye, weik lelim kekebikirye, ‘Se, nun mal olan nang, sik kuda basam, sikce nyanyak lelim ara, kekenmap buk, amutuku unyap nang nirya ara, ilil weik unamsile. Tonda, sik mal olana ati yanganamak kuda basam ara, tuku deice mikip arye yanibuka yanganmakba, lelim weik nyaplyeba, nun asik, Yerusalem mutuku dobuka unyabak ap, nun amutuku noutam unyap ninye nirya ara, aning ilil arye sirim talipnamsile. Nun mal olan nang arye, nun dam yanuka opsikirye, amutuku noutam ulye ning nirya ap, amutuku nang nirya ap, opsikirye, sice buklopnamsiake. Tonda, kum daneipnamsiake.” Israel nang arye nyapnamake.

¹⁷ Ati, na Allah arye ayupu ton nyapsine. Anggun nirya moubuka dipdelulume! Winipmanto ara, na Allah arye, anggun wenena ati winipnamsin ning ara, ani. Ara, anggun kan-kan, ninye on kwatima dobuka deipniba, anggun si topnamsil ning ap, tonda, ayu kwatima ati ara, akunum arepsinyeba, anggunce merye nyabuka yakdonoktuma babye, yukak kum bindoptue. Anggun wenena ati, na Allah arye, ninye on kwatima atonun dopdeipyeura, yu kwatima arye ninye ati si toplyeba, ninye dibilamak touk, narye arepsinyeba, anggunda ikin ning weika arye dopropnamlume. Na Allah arye, ayupu dipkoprob nyapsine. Allah arye Yeremia biti, laka nyabukak, kekebuk.

Yeremia birye, sik Israel tam nang ati tenepdeyukce, bico ubukba, engebuka ati, sekuk yupu

¹⁸ Ura, Allah arye ayupu nirya laka nyapnukba, kekepsirye, na talima noutam arye, pia uk dinilye ning ara, min kum winiptue. Ati, na kanye delinulula ning ara, dipkoprob akunum kum kipnuke. Imun kanye weik bobuka ununa ati, na kanye talima noutam ara, uk weik dinulule. Winipmanto ara, ninye dibikceba, aning ati tenebuka, tuku luklamak atonun, na kanye arye, tuba tenenun ning ara, na talima uk dinulul ning ara, kum kwetepmanto unulule.

¹⁹ Anggun amutuku noutam ululum nang nirya ara, kekeplulume! Amutuku noutam nirya ara, dam arye do, pera arye do, dana-dana tam arye, na mutuku nang arye, malye nyabuka ngalukuka, engenyaka deice arye, sik asing mek sakalule. Sik weik arye engenmaka ara, nun nirya kekenyabe. Ati, anggunce, “Se, se, Yerusalem mutuku noutam ara, nun ni koproba Allah Yahweh, akunum bindobukce, asukum tuba kum ulul do? “Wini talak amutuku ara, ninye deiyoknye Raja kibuka talepsuknye, Allah ara, akunum batakuka bindopsuk do, kum do?” nyabuka asinyake. Nyaceba, ninye deiyoknye Allah arye, tamubuka nyapsile. “Se, yata deiyok ati, ‘Naʼ tenen, nang, sik Israel nang arye, talye ning, pia nong kum ning ati, ninye urasin atonun puturubuka deiamice, isa siuk erelamik ning ara, tuba erenyak do? Yata deiyok ati, yuk karin ninye asik nang arye, talye ning ati, si erenyak ning dobuka, yana deibikba, ‘Naʼ tenen, nang arye, aisa ati, ‘Nun ni ani,’ nyabuka, si erelamik ning ara, tuba wininyak do? Wininyaka ati ara, na yu weik upnukba, na talima uk pia dinulule,” Allah arye nyabuk.

²⁰ Nyabukura, sik Israel tam noutam unyak nang arye nyanmek. ‘Se, din lina li ap, dou man li talak ap ara, akunum bisikbuke. Nun wini talak ara, nun ni Allah arye, yanuka lyepdopnamsil,’ tenebupu bukni, “Nunda, min kum lyepdopsukba, tuba ikin asa unyabe,” nyabuka, ngalukuka malye nyabik.

²¹ Nyabikopura, nabi Yeremia birye, nyabuk. Na kanye noutam ara, pia malye unulule. Ara, na mutuku ninye, sik talima uk weik dilula ati, na babye, imun kanye bopsirye, talima uk dinulule. Winipmanto ara, ninye dibikceba, anggun kayapu nang arye, baju koubukabikirye, aik bukikirye, weik arye engelamak touk, na babye pia imun kanye bobuka unune. Winilyeba, na talima daksaknilye, Ura, yata wiripnamsil do?’ tenena ati, na kanye tenen ning arye, kum tenenipmanto unune.

²² Ati, narye asipdene. Yata deiyok arye winibukba, na mutuku nang ara, wini talak babye, tuba uk dilul ning ara, min kum kwetep deipmanto ulul do? Tonda, ‘Gilead mutuku noutam ara, ninye kwetena kelnye tonok ning babye, kum ulirye, suse kwetepmanto ning ton kum ulul do? Tonda, yata deiyok ati, na tam nang, ikin weik unyaka noutam ara, Allah arye min kum lyepsukce, tamubuka teleb kum kipdeipsuk do?’ tenebuka nyanune. Nabi Yeremia birye nyabuk.