Yeremia 7 - Eipomek

Yeremia birye, ‘Anggun Yehuda tam ululum ninye ati, Allah arye wenepnamsile,’ nyabuk yupu

¹ Allah el si Yahweh yayukce, na Yeremia biti, ‘Winipnalyame,’ nyapnuk yupu ara, ani.

² Nara Allah, na si erena ap, arena ap ati, delilyanganyak aik bublan dam binuka tikmince, na nyapmakin yupu nirya, Yehuda yala ninye nirya ati nyapnulyame. Ara, na si eren aik bublan dam wekelyanuce talak ara, nyapnulyame. Anggun Yehuda yala ululum ninye nirya ara, nun ni koprop Allah, el si Yahweh arye nyapsilye yupu ara, kekeplulume. ‘Allah el si erepnuyap’ tenen, anyaik bisik bublan wekelbamunye ninye nirya ara, kekepnululume.

³ Ayupu nyapdeipsilanye bira, Israel ninye ati kalikuka melilulnye, anggun ni koproba Allah, mikip weik ulirye, aning-aning nirya talibuka deice tam, Weik Erenanye birye nyapsile. Elda, im deice unyak yin talin malaikat nirya talibuka, sik weik deiyoknye ulule. Elce nyapsile. Anggunce malye-malye weik winilulum ning nirya batakmunce, telebuk winimunyopura, anggun ap, na ap anyaik ansinipdabirye, teleb ubuka neika utibye. Kumopura, kume.

⁴ Tonda anggunce, ‘Teleb kanye uk bobuka telebuk wininamap’ tenen, anggunce anggun bidamnye atibuk, nyaldalulum yupu ara, ‘Akunuma,’ tenena kume. Anggunce nyaldalulum yupu ara ani. ‘Kume, anyaik ara, Allah Yahweh el si eren aik anya arye, nunda anyaik wekenyapa anya arye, malye ning ton, nun dam yanuka ikin kum upnamsile,’ nyaldalulum bukni, tilila yupu uk nyalulume. Anyaik wekmunya babye, malyeuk winipmunyopura, Allah arye wenepnamsile ati, nyapsine.

⁵ Dipkoprop ning ara, anggunce anggun malye winilamlum ning batakmunce, telebuk winipmunyopura, na Allah arye anyaik yanirye, anggun ap, na ap, neika teleb ubuka unamabe. Ara, tonoknye birye, el kwit yuknye biti, diksukumuk pil doplirye, tilila nyana pia kum diparyuk, teleb ubuka wininamlume.

⁶ Tonda, anggun amutuku ululum ninye arye, ninye asik nang ap, yuk pera mutuku arye amutuku yanganamak ninye ap, kwaknan mapu ap, youwak kilapu ap, sik nong deice, ikin ning kum delinamlume. Aninye nirya ati, diksukumuk wininamlume. Tonda, malye winin ning kum winipmakibuk, ‘Anye bira malye winipmale,’ nyabuka, minina yupu nyapmunce, anang kum onamlume. Yuk ninye talye oltakana pia meme. Tonda kwemdina ara, Isa Mutuku Dongonye ap, ninye arye puturubuka delinyak ning ap, talye-talye ning nirya ap ati, ‘Nun deiyok ning ulula anya arye, aning si erenamabe,’ nyabuka, amutuku noutamak umunce, si kum erenamlume. Awinimunya deice arye, anggunce, anggun bidamnye ati, malye kililalulume.

⁷ Anggun malye-malyeuk winilulum ning nirya batakmunce, diksukum telebuk winimunyeura, na Allah arye, anggun apu yapu ati, ‘Ateleb mutuku noutamak ara, tuba-tuba pia aunamak’ tenen, arelamsise mutuku noutamak ara, anggun wini talak ululum ninye ara, na ap neika unamabe. Ara, minop talak arye, ‘Naʼ tenen, nang Israel ninye, anggun deipkirikdop nang ati, arelamsiba, talibuka ulamik mutuku ara, ‘Anggun babye aunamlum’ tenen, nyapsine.

⁸ “Bukni, sik nirya arye, tilila yupu nyapsikiba, kekebuka, dib tenelulum ning ara, deiyok ton kum ulule. Atilila yupu ara, talye atibuk dib tenelulum bukni, adeice arye, teleb kum winilildalamlume. Anggunce anggun bidamang ati, malye winilildanmalume.

⁹ Utenemunya deice arye, anggun tuba malye winilamlum ning ara ani. Anggunda, ubula dona ap, ninye talye ona ap, kilapu talye yolana ap, tilila yupu lena ap, minina yupu lena ap deice arye, ‘Dib nyapmabe,’ nyana ap, tonda, Isa Mutuku Dongonye si, Bahal ati, kam ning obuka uku dalbana ap, tonda sik deiyok ning kel bikna kum diparyuk, talye kwemdina ning ati, ‘Nun ni,’ nyabuka, si erena ap, winimunce, malyeuk tuba winilulume.

¹⁰ Anyapmasin ning nirya, awininmamuncuk, na Allah si eren aik pum tam, na dam yamunyopura, ‘Kume, nun nirya ara, telebuk wininyaba anya arye, anyaik tuba yanuka wekipyopura, ikin ning nun dam ton, kum yanamsile. Nunda telebuk wininamabe,’ nyalyangalulume. Anyaik ara, na Allah arye, na si dobuka, anyaik deice deipse bukni, anggunce pia malye ning winilulum ning ara, narye, “Aning ara, na pia like, winina ara meme,” nyapdeipsise ning bukni, malye ninguk tuba winimunye bukni, aning tenena kumce, na si eren aik tuba yangalulume. Anyaik wekmunyeura, adiparyuk tuba tamubuka, anggun min arye malye winilamlum ninguk, tamubuka winilulume. Winibuka winimunye ning ara, pia malye weik ati nyapsine.

¹¹ Na Allah arye, na si dobuka, anyaik deice deipse bukni, anggunce na Allah si eren aik ati ara, ‘Anyaik ara, ubula don nang arye, malye ninguk talibuka, winilamak aik atonun ulule,’ teneluluma arye, anyaik dam nyalyanganululum do? Kume, anggun tuba-tuba malye weik wininmalum ning nirya ara, na Allah arye akunum elisunune. Aning ara, kel bikamlum bukni, tuba luba kiplume. Moubuka kum tenelulum do?

¹² Anggunda luba kinauk winilulum ninye ati ara, nyapsine. Minop talak ara, na Allah arye Silo mutuku ati, wibuka kintinyamse mutuku ara, ‘Na tenena ninye arye, na si erepnamniak’ tenen, na Allah arye, na mapu koprop Israel ninye ati, wibuka deiamseba, anggun si Israel nang, anggun apu yapu arye, amutuku ulamik talak ara, malye weik winilamikba, sik wenena ati winipse ning ara, tuba tonap tenenamlulume. Ati, anggunda minopce tamubuka, Silo mutuku bimunce, adiparyuk dipdenamlulume.”

¹³ Anggunce tuba malye-malyeuk winiluluma ati ara, na Allah Yahweh arye nyapsine. Narye anggun malye winilamlum ning ati, “Aning ara, winina meme, bataklulume,” nyabuka, tuba-tuba ayupu nyalamsise bukni, anggunda tuba na yupu kum kekenululume. Narye anggunti, “Malye winilulum ning nirya ara, batakmunce, na dam tamubuka yangamunce, telebuk wininamlume,” nyabuka yukupsisirye, tuba nyasini bukni, anggun kekena kumce, talye kanye bobuka, na dam tamubuka kum yangamunce, na yupu kum kekenululume.

¹⁴ Ati ara, ‘Na Allah si erenamniak’ tenen, anyaik deice, na si deiamse aik ara, bataknamne. Ara, narye, ‘Amutuku talibuka, pia unamak’ tenen, sik deipkirikdop nang ap, anggun wini talak ululum ninye ati, arelamse mutuku babye, bataknamne. Tonda, na si eren aik ati, anggunce, ‘Kume, anyaik tuba wekibirye, Allah ati teleb ning tuba arepipyopura, adeice arye, ikin kum upnamsile. Tonda, Allah arye kum wenepnamsile,’ tenelulume. Bukni, tuba malyeuk winimunya ati ara, Silo mutuku ap, Silo mutuku ulamik ninye nirya ap ati, wenepsirye, obuka sirya dakamse touk, anggun wini talak ululum ninye, anggun mutuku ap, na si eren aik dolulum ning ap, anggun wenena ati, kum kipdeipnamne. Ara, na si eren aik, Silo mutuku ninye arye domikba, kum kipdeiamse touk ubuka, anggun ning babye, kum kipdeipnamsine.

¹⁵ Aninguk kum bukni, tonda, anggun wini talak umunce, malyeuk ululum ninye ara, na dam arye yakdonoknamsine. Anggunda, na kum eilinamsine. Ara, sik minop talak ulamik ninye, anggun apu yapu nang ara, Efraim birye deibukba, dadeipdanin yangalamik ninye, Israel yala ninye ara, na mapu koprop ulamik bukni, sikce na dam malye winililamnik ati, na dam arye dopropse touk, anggun babye atonun, yakdongoknamsine. Tuba malyeuk winimunya ati, yakdongoknamsine. Allah arye, Israel ninye ati nyabuk.

Allah el mapu koprop atonun, Israel ninye ara, “Pia mandipna weik ninye unyake,” nyabuk yupu

¹⁶ Allah arye, na Yeremia biti nyapnuke. An Yeremia birye, sik amutuku noutamak unyak Israel ninye ati, ‘Naio, sik melibuka lyeplyame,’ nyabuka, na Allah ati kum moronamnyelame. Winina kume. Tonda, ance nati, ‘Sik Israel ninye malye wininmaka ati, namin kipmince melipnamlyame,’ nyabuka, morona kume. Ara, Yeremia ance nati, nyabuka moropnimya babye, na lik ati, an yupu pia kum kekenamkine.

¹⁷ Ara, urdem ati kum nyapkine. Yeremia an asing arye, Yehuda yala ninye asik dobuka unyak mutuku noutamak, sik malye-malye ning pia weik wininyaka ara, kum elilyam do? Tonda, Yerusalem mutuku noutamak bakirye, malyeuk wininyak ning nirya ara, kum elilyam do? Aning elilyam bukni, moubuka kum bikilyam do?

¹⁸ An babye kel bikilyame. Sikce malye wininyak ning ara, laka nyapnamkine. Ara, sik mapu arye, uku dalamak, yo dobuka bobikirye, sik ni yapu arye, dobuka uku danyake. Akunum uku dabiceura, sik kilapu arye, din ning el si roti memen ning arye tabakuka, dabicopura, sik isa kil ati, “Nun deiyok kil ani. Elda im deice deiyok kil ulula ati, el si erepnuyabe,” nyabuka, si erenyake. Sik Isa Mutuku Dongonye si erenyak ning ati, din ning, el si kue dabuka, memelinyake. Tonda, anggur tapu duk, purubuka memelinyak mek dobuka, kwemdina ara, daunyak isa ap, ninye arye puturunyak ning ap ati, ‘Nun ni koproba,’ nyabuka, si erenyake. Winibuka malye wininyaka deice, narye, ‘Yata deiyok ati, talye ning si erenyak do?’ tenen, na kanye talima uk dinilirye, yu pia weik unulule.

¹⁹ Dipkoprop, Isa Mutuku Dongonye si erenyaka deice arye, na pia lik unilirye, yu weik unulule. Bukni, dipkoprob ning ara, na Allah Yahweh, na dam malye kum kipdeipnitinge. Dipkoprop ning ara, sikce sik bidamang ati, weik malye winililanyake. Sik malye wininyaka deice arye, kanye imun ning, sik nong deice uk yanamle. Ati sik diamuk malye winilildanyaka anya arye, aminyan ara, alye dakaldanamake.

²⁰ Sik Israel ninye arye, pia malye weik tuba wininyaka ati ara, na si ara, Allah Yahweh arye nyapsine. Nara, aning-aning nirya deice tam talibuka, Weik Erena Deiyoknye ununa anya arye, narye, ‘Winipnamne,’ tenepnye touk, wininune ati ara, na weik arye wenepnamsine. Nara sikti, lik kanye bobuka, yu weik unulula anya arye, amutuku unyak ninye ap, amutuku ap ati, mikip weik deice arye, wenena ning weik arye arenamsine. Weik mek makau arye, mek kwebikirye, tonok talak aniryuk amek nirya dikiltaklamak atonun, sik deice wenen ning weik arye, aninye ati arenamne. Ara, na si erena ati dobik aik ara, weik yu deice arye, dakuka bataknamne. Tonda, amutuku noutamak unyak ninye ap, amutuku unyak kam ning nirya ap, bai tam palamle yo nirya ap, tonda ninye arye koulamak ning nirya ap, ninye arye weinyak kam ulul ning ayala-yala nirya ap, kum kipdeipnamne. Na yu ara, weik uku dinmalirye, kum tangapmanto ulamle touk, weik uku dopkwetepniba, amutuku noutam ulul ning nirya, uku dinamle. Auku ara, ninye arye kum tangapnamake. Pia dilamlya ani, aning nirya diplyak arye, sirya daknamle. Allah arye, Yeremia biti laka nyabuk.

²¹ Nyabukce, Allah Yahweh arye Yeremia biti, ayupu ton dukdongobuka nyabuk. Se, anggun na mapu Israel ninyeo. Na Allah arye, ‘Anggunda ‘Naʼ tenen, ninye’ tenen, pia melibuka kalikesunune. Na Allah Yahweh, aning-aning nirya ap, im deice yin talin malaikat ap nirya talibuka, weik deiyoknye unune. Bukni, anggunda pia malye winiluluma ati, ayupu nyapsine. Na si erena ap, na si kina ap ati, arenululum ning nirya ara, kintinipnamlulume. Tonda anggunce, ‘Nun malye winin ning ati, Allah arye talye opsutu bukni, namin kipsilirye, lyepnamsil’ tenen, kam ning opmunce, uku dongobuka, arepnamnulum ning nirya ara, dobuka kintinipnamlume. Aning ayala-yala nirya, anggun yuk dibuka, sirya dakanamlume. Nati, tuba arena kume, nyapsine.

²² Aning ara, urdem ati kum nyapsine. Dipkoprop anggun deiyok nang ara, Mesir mutuku noutamak, ikin kanye weik bobuka ulamik bukni, narye aninye nirya, lobuka lyepsirye, bobuka amutuku boyanamse. Winyamse talak ara, narye anggun apu yapu ati, ayupu kum nyapse. “Na si erena ati, anggunce na si erepnumunce, anggun malye winin ning kum danalina ati, kam ning obuka, tup dopropmunce, na arena ati, uku dalyanganamlume. Tonda, na si erena ati, yuk teleb ning, ayala-yala nirya nati, arelyanganamnulume.” Ayupu atonun ara, narye anggun apu yapu nang ati, Mesir mutuku noutamak arye lyepropsirye, boyanamse talak ara, sikti, kum nyapse.

²³ Atalak ara, narye anggun apu yapu melibuka boyangalamsirye, nyapse yupu ara, ani. Nara, anggun ni koproba Allah ununa anya arye, narye nyasinye yupu uk kekepmunce, moubuka talinamlume. Narye nyasinye yupu talibuka winimunyeura, narye anggunti, pia melinamsine. Adeice arye, ‘Anggunda, na mapu koprop unamlume,’ nyalamse. Tonda, narye anggunti, “Abisik binamlume, abisik kum binamlume. Aninguk wininamlulume. Aning ara, pia kum wininamlume,” nyabuka nyalilamse yupu, ‘Dipkoprop ninguk winipmunyopura, anggun wininamlum ning nirya ara, telebuk unamsile,’ nyalamse. Na Allah arye, anggun apu yapu ati, ayupu uk nyalamse. Winilamsi buk, ayupu kekebuka yangalamik talak ara, pia telebuk winipnin yangalamik.

²⁴ Bukni, anggun apu yapu arye, na nyalamse yupu kekebuka, kum dobolbalamik. Narye nyapdeiamse touk, kum winilamik. Narye nyalamse yupu talibuka, yangalamting toura, pia telebuk winipnin yangalamting bukni, sikce sik bidamang kanye tenepman touk, winipnin yangalamik. Sikda pia mandipna kanye dobuka, kekena kumce, kat kanya bon nang winilamikce, malye-malyeuk winipnin yangalamik. ‘Sik anang ara, telebuk wininamak,’ tenelamse bukni, tuba tamubuka, malye winin ninguk tenelamikce, malye winin ninguk talibuka, malye winipnin yangalamik. Aminyan teleb upnamle ninguk tenipting bukni, aning batakuka minop talak malye ninguk winipnin yangalamik. Winibuka winilamika ati, aminyan talakuk, “Aning wininamlulume. Aning ara, pia kum wininamlume,” nyabuka, mem yupu ton tabakuka, sik deice deiamse.

²⁵ Minop dorapce, anggun apu yapu, Mesir mutuku ulamikba, dobuka boyanamse talak arye, dipdongobuka, anggun aunmalum talak babye, na Allah arye, na yupu nyaipneba, laka nyana deiyok nang, nabi-nabi wibuka deipnin yangalamsa ani, tuba wibuka delinune. Anabi nang nirya ara, anggun Israel ninye ati, ‘Aning wininamlume. Aning ara, pia kum wininamlume,’ nyabuka, ‘Allah arye wenepsilyak’ tenen, ‘Malye ning batakuka, teleb ninguk wininamlume,’ nyalyangalamik.

²⁶ Bukni, anggun Israel ninye arye, anabi nyalamik yupu ton, kum kekelamlume. Anggun apu yapu arye, sik nabi nyalamik yupu, kum kekelamik touk, anggun atalak ululum ninye babye, tuba kum kekelulume. Sik nabi-nabi nang arye, na yupu anggun dam nyalilamikba, anggun deiyok nang arye, mandipna kanye bobuka lamikce, kat kanye bobuka winilamik touk, anggun wini talak ululum ninye babye, pia weik arye malye winibuka, mandipna kanye bobuka, ulamaka atonun, anggun babye mandipna kanye bobuka ululume. Sik minop talak ulamik ninye ara, malye winilamik bukni, anggun wini talak ululum Israel ninye ara, pia weik arye tabakuka malye-malye ninguk winilulume. Anggun deiyok nang arye, malye winilamik ning ara, mitik anun uka. Anggun wini talak ululum ninye, malye winilulum ning ara, pia weik, nyabuk. Ara, Allah arye, sik Israel ninye ati, wenebukce nyabuk.

²⁷ Allah arye nyabukopura, na Yeremia biti, nyapdeipnuke. Israel ninye ara, malye weik tuba wininyaka ati ara, Yeremia, ance na mapu Israel ninye dam, na yupu laka nyalbinulyame. Ayupu nirya, binuka laka nyapnalam bukni, anyanmaminye yupu nirya, sikce kum kekenamkiyake. Ance sikti, ‘Se Israel nango, kekelyalulume,’ nyabuka, yukupnalam bukni, sikce kum kekebikirye, ‘Nunda ayanuka kekelyanamabe,’ kum nyapnamake.

²⁸ Ati ara, an Yeremia birye, sik Israel ninye ati, laka nyanalam yupu ara, ani. Allah arye nyapmasile. Se, anggun Yerusalem mutuku umunye ninyeo, anggunda, anggun ni koprop Allah, el si Yahweh arye nyasulul yupu ara, pia kum kekemunce, ayupu talibuka kum winilulume. Tonda, na Allah arye wenen ning ap, ikin ning ap, arelamsise talak ara, anggunce, ‘Se, nunda malye unyap ninye’ tenen, malye nyabuka kum ngaluk wininamlulume. Tonda, anggun malye winilulum ning ara, kum batakalulume. Ati ara, dipkoprob nyan yupu ara, tuba kum nyalulume. Anggun noutamak arye, tonoknye babye, diksukum yupu tuba kum nyalulume. Anggun nirya ara, tilila yupu uk nyalulume.

²⁹ Ati ara, na Allah arye nyapsine. Anggun Yerusalem mutuku ninye arye, ‘Se, nun malye unyabe,’ tenemunce, unamlume. Tonok ning ara, anggunce, ‘Nun malye wininyabe’ tenen, anggun kisok potong nirya, kobuka donoknamlume. Winipmunce, weik mutuku konak tikmunce, ngalukuka, malye nyapmunce, imun kanye bobuka, engena deice mot senamlume. Ara, urdem ati kume. Deiyok ara, anggun ni koprop Allah, el si Yahweh arye, anggun wini talak ululum ninye nirya ati, akunum bataknamasile. Anggunda, malye weik winiluluma deice arye, Allah el weik yu upliba, lik ati, anggun akunum bataknamasile. Anggun ti, tuba melibuka kum dinamsile. Anggun ti, akunum batakuka, luba kipnamsile.

Hinom mutuku arye, malye ninguk talibuka winilamika ati, nyabuk yupu

³⁰ Allah el si Yahweh arye, ayupu ton nyabuk. Yehuda tam ululum ninye ara, pia weik malye akunum winilulume. Anggun malye winilulum ning ara, na tuba eilisunune. Ara, anggunce, ‘Nun ni koproba,’ nyabuka, Isa Mutuku Dongonye si erenyaka, eipnirye, na Allah arye, ‘Sikda, pia malye wininmake,’ tenesunune. ‘Aning ara, na pia like,’ tenenun ning bukni, sik Israel nang arye, akunum dopropmakce, na Allah si eren aik noutamak yanuka deipmake. Anyaik ara, na si dobuka, anyaik deice deipsirye, ‘Anyasik noutamak ara, na siuk erenamake,’ tenelamse bukni, anggunce pia malye ning ap, Isa Mutuku Dongonye si erena ati, taliplum ning ap dobuka, na aik noutamak deipmaluma deice arye, na aik akunum malye kipdeipmalume. Winira, na si eren aik ara, akunum anggunce malye kipdeipmanulume.

³¹ Tonda, Isa Mutuku Dongonye, el si erena ati, tukwak ning ap, yuk din ning ap, arelbanak kintinibuka deibikak, amutuku si ara, Tofet mutuku sisinyak sukumak bikirye, Isa Mutuku Dongonye si tuba erenyake. Ara, ninye si, Hinom birye deibuk mi taleamuk mutuku bikirye, sik erenyak isa si, el si Tofet, el si erenyake. Amutuku bikirye, aisa si erena ap, arena ap ati, sik mapu koproba uk, obuka uku dalbanyake. Wininyak ning ara, na Allah arye, ‘Aning ara wininamake,’ kum nyapdeiamse bukni, sikcuk wininyake. Tonda, ‘Sikce na si erena ati, aning winiptinge,’ tenen, pia kum tenelamse. Tonda, ‘Anggun dawiniplulume,’ kum nyapdeiamse. Kume, sik yuk aryuk, tenebuka wininyake.

³² Sikce amutuku bikirye, pia malye weik wininyaka ati, wini talak ara, amutuku ati, Tofet mutuku, tonda amutuku si ati, ‘Hinom el mi arye taleamuk mutuku lyu ak,’ nyabuka, sisinyak bukni, Tofet nyabuka memepdeibik ara, na tenepse talak akunum uplyopura, amutuku ara, yuk sisinamake. Tonap, ‘Hinom mutuku ap, Tofet mutuku ap ara, tuba aubuk,’ nyabuka, kum sisinamake. Amutuku si ara, aminyan talak, ‘Ninye weik oplomik mutuku,’ nyabuka, amutuku ati sisinamake. Deiyok ara ani. Na Allah arye, Tofet mutuku unyak ninye ap, amutuku banyak ninye ap, pia weik arye, opnamne. Ninye weik opneba, dipnamak ninye, yuk nang arye, sik nong bobuka tuku palibuka, weinamak bukni, dipnamak ninye kum nukmanto anya arye, tuku palibuka, ninye weipmantoak ara, lo kum upnamle. Lo kum upliba, tonoknye babye ton, kum weipmanto upnamake.

³³ Na Allah arye, sik malye wininyak ninye weik arye opneba, sik aninye dibikiba nong ara, tuku palibuka weipmantoak, lo kum uplyeura, talye lak-lak deiplopbikiba, talye lakuka balamle maka ap, bai tam ulamle kam ning ap arye, yanuka dipdopnamake. Adipnamak talak ara, ninye nirya sirya daknamaka ati, sik kam unyak nang arye, ‘Se, dipmak ninye, sik nong ton adinmake’ tenen, sik kum lukuldanamake. Maka ap, bai tam ulul ning ap arye, aninye nong talye dipdopnamake.

³⁴ Aninguk kum winipnamne. Tonda, sik Israel ninye wenena ati winipnamne ning ara, ani. Ara, sik unyak mutuku nirya noutamak ara, ninye arye kanye deibikirye, mot senmakirye, lelim nyalamak ning ap, kanye deibuka, akutunyak ning ap, pin-pin kanye bobuka, lelim nyalamak ning nirya ara, tuba tonap nyakiba, kum kekepnamake. Weik kanye imun ning arepnamsine ati, nyapsine. Tonda, Yerusalem mutuku noutamak ap, Yehuda yala ninye talibuka unyak mutuku noutamak nirya ara, tuku pia malye kipdeipnamne. Winipniba, aning-aning nirya koluplirye, aning nirya kum danamle. Amutuku ara, weik kanye imun ning dopdeipnamna anya arye, amutuku noutamak nirya ara, sal ap, kilapu ap, pia kum dolanamake. Sal ap, kilapu ap, dopdace talak, kanye deibikirye, lelim nyalamak touk, atalak ara, lelim nyakiba, pia kum kekenamake. Tunim abuka unamake. Narye arepneba, amutuku nirya malyeuk unamle ati, nyapsine. Na Allah arye nyapne.