Yeremia 6 - Eipomek

Israel yala ninye arye, ‘Nun Allah Yahweh arye, elce nyasilye yupu ara, kum kekenamabe,’ nyabika ati, ‘Wenen ning yanamle,’ nyabuk yupu

¹ Se, anggun Benyamin yala nango, bikbik abuka bimunce, yuk mutuku binamlume! Yerusalem mutuku batakuka bimunce, Tekoa mutuku arye binuka, terompet lelim nyapnamlume. Tonda, Bet-Kerem mutuku arye, Israel nang lak kina ati, uku binuka sekmumce, ayupu nyapnalume. “Ikin weik una deiyok ap, imun una deiyok ap ara, dabu tam arye yalyeba, dopropnalume,” nyabuka, laka nyapnalume.

² Yerusalem mutuku noutam ubuk mutuku, Sion mutuku asik dolulum mutuku ara, urasin pia teleb mutuku ulul bukni, Allah arye, amutuku dakuka bataklirye, malye kibuka, oplirye uluplopnamle.

³ Mal olan nang, ninye deiyok kibuka unyak nang nirya ap, tonda sik yin talin nang ap ara, omutuku arye yakirye, tia doltakan aik yanuka dopnamake. Yerusalem mutuku, weik asik dobuka ulamikak dana-dana nirya ara, tia domik tenda aik yakirye, dobuka ukirye, warekdongopnamsiake. Sik anang arye, ‘Asukum ara, tia domik tenda aik doptibye,’ tenebuka, talye dopnamake.

⁴ Sik mal olana ati deiyok kipmace nang arye, ayupu nyapnamake. “Winira, sik yanganyakba, arup keting noutam aryuk, Yerusalem mutuku binuka, wareknuyaba ati, kintiniplulume!” nyapnamake. Bukni, tamubuka, ayupu nyapnamake. “Se, nun pirinmap buk keting akunum kumuplarye, lukunyan kiple. Keting akunum kumuplirye, lukunyan kiplirye, nun kanya ara, cang upsile,” nyapnamake.

⁵ “Ati, teleb ning ara, lukunyan talakuk bibirye, binuka warekibirye, opnuyabe. Tonda, amutuku asik dobuka unyakce, cang weik keil poka dobik ning nirya ara, binuka dakuka batakibirye, sice buklopnuyabe,” nyapnamake.

⁶ Allah el mikip weik arye, aning-aning talibuka, deice tam erebuka, mikip weik ululnye birye, Yerusalem mutuku nang, sik mal olana deiyok talibuka wininyak nang ati, akunum nyapdeibuk. “Anggun yamunce, yo nirya ara, yanuka webuka bataknamlume. Tonda, Yerusalem mutuku, weik asik dobuka unyakce, cang weik keil poka domikak nirya ara, tuku palibuka deipmunyeba, langdilya deice arye, welebuka bimunce, Yerusalem mutuku unyak nang dam, binuka opnamlume. Na Allah arye, sik Yerusalem mutuku noutam unyak nang ati, wenepnamne. Ara, amutuku unyak nang, sikce, yuk nang ati, pia malye kibuka, akunum ikin ning delinyaka atia.

⁷ Winipmanto ara, mek pu dobuka, mek tuba-tuba panabuka balamle touk, Yerusalem mutuku unyak nang arye, malye kibuka, malye winin ninguk, tuba wininyake. Sik amutuku unyak nang ara, pia malye kibuka malye yupu uk nyanyak ning ara, na Allah arye, akunum kekenune. Tonda, sik amutuku unyak nang, pia malye kibuka, yupu uk nyanyak ning ara, narye kekenune. Tonda, sikce, malye kibuka, aning-aning nirya, oplobikce ning ara, akunum elinune. Tonda, dan tam mutuku do, sik unyakak nirya ara, dila ulul ning ap, uk dilul ning ap nirya ara, na akunum elinune. Allah arye, Yerusalem mutuku nang, sik mal olan nang ati, nyapdeibuk.

⁸ Se, anggun Yerusalem mutuku ululum nango, anggun kanye imun usulul ning ara, na Allah arye anggun wenena ati, aresunune. Winipsiniba, anggun pia malyeuk winilamunyopura, narye anggunti, bataksinirye, anggun ululum mutuku ara, tamubuka, pia kata mutuku uk kipdeipniba, anggun mutuku oldemuk kipdeipniba, sik yuk nang babye, amutuku ton yanuka kum unamake.

“Israel nang malye winin ninguk patapliba, tenibuka wininyake,” nyabuk yupu

⁹ Allah Yahweh, el mikip weik arye, aning-aning talibuka, deice tam erebuka, mikip weik ululnye birye, im deice yin talin malaikat nirya ara, sik deiyoknye ulule. Elce, na Yeremia dam yanuka, ayupu nyapdeipnuke. “Israel nango, anggun mal olan nang arye ton kum bataknamsiake. Israel yala nang nirya ara, kum kipdeipnamsiake. Winipmanto ara, anggur wa wibuka kouamikirye, daklamikca ani, duk sirya ning, dakikcopura, anggur duk nirya kum ulamle touk, anggun mal olan nang arye, anggun Israel nang ton, kum kipdeipnamsiake. Winipnamak bukni, anggur duk lilamak nang arye, ‘Anggur tapu deice, duk mitik tonun ton tuba aupmal do?’ tenen, tuba anggur tapu nirya dipdekirye, tonok ning babye kum bataklamaka touk, anggun mal olan nang ara, lo tuba aupmal talak aryuk, anggun mutuku noutam nirya, tuba aunmak nang babye, yanuka opnamsiake,” Allah arye nyapdeipnuke.

¹⁰ Nyapdeipnukba, na Yeremia birye, Allah ati ayupu tamubuka asipdese. “Naio, narye yata nang, sik dam wenen yupu binuka nyaptiniba, sikce kekepnamak do? Sik anang ara, kum kel bikmanto nang, pia malye kin nang unyaka atia. Na ni Allah Yahweh, an nyapdeipminye yupu, sik anang dam binuka nyapnyopura, sikce, “Kume, ayupu ara, talye yupu uka. Aning ara, mambul kume,” nyabuka, nalibikirye, akutunyake. Narye an yupu bobinuka, sik dam binuka nyaptinya babye, sikce, ayupu ati, kanye deibuka kum kekepnamake.

¹¹ Na ni Allah, an yu tenipminye touk, na babye sik anang ati, yu uniliba derenune. ‘Na yu unulul ning ara, tuba pia kum darapdongobuka utinye,’ nyabuka, Allah dam lak nyapse. Nyapsiba, Allah arye tamubuka, na dam yanuka nyapnuk. “Ayu ukilye ning ara, ance ayu bobinuka, amutuku nang, sik mapu bisik banmakca noutam ap, tonda amutuku wel nang, bulubuka unamakak ap, na yupu bobinuka, laka nyapnulyame. Tonda, sal babye, sikce domik kilapu babye, tonda wisi nang babye nirya ara, sik deice ayu yupu bobinuka, lak nyapminyeba, dopropnamake.” Allah arye, ayupu nyapdeipnuke.

¹² Nyapnukopura, ayupu dukdongobuka nyabuk. “Na Allah arye, sik amutuku nang unyak asik ap, wa win sukum ap, sik kilapu ap, anirya ara bobinuka, yuk mutuku nang ati arepnamne. Na Allah ara, na mikip weik taruk erepdeipnirye, amutuku Israel nang wenebuka opnamna ati, nyapsine.”

¹³ Amutuku unyak nang nirya ara, weik nang babye, mitik nang babye atonun, ‘Nun ton yo bok uang weik dobuka, bona talin nang uptibyeʼ tenen, eibuka dolonyak ning ara, diksukum pil dona deice arye, kum dolonyake. Aninguk kum bukni, tonda, sik imam nang babye, nabi nang babye, sik nirya arye, yuk nang ati, tilila yupu nyabikca deice arye, yuk nang, sik yo bok uang ubula dolonyake.

¹⁴ Na mapu nirya ara, sik wenena ati, malye kibuka akunum oplopse. Winipsa ati, sik nirya ikin weik unyake. Winipmanto ara, sik deice pia dila weik ubuk bukni, amutuku nabi-nabi nang ap, imam-imam nang ap, sik ning ara, ‘Kume daupmalye, amutuku nang ara, ikin weik kum unyaka ap, ara mitik tonun dila atonunuka tenebikirye, nyanyake. Utenebikirye, yuk nang ap epdakce talak ara, anang ati, “Yo, telebe nun kayapu. Nun nirya ara, teleb kibuka wininyabe. Nun wininyap ning ara, telebe uka, dauaplye. Nun nirya ara, teleb aryuk tunim abuka unamabe,” nyanyake. Bukni, sikce nyanyaka ara, tilila yupu uka. Amutuku nang nirya ara, teleb aryuk tunim abuka kum unyake. Sik nirya ara, tuba malyeuk wininyake.

¹⁵ Sikce wininyak nang nirya ara, dipkoprob pia ninye kum winipnamting ning akunum malye wininyaka ati, sik wininyak ning ati, alye uptue bukni, sikda pia mandipna nang unyaka ati, sikda, ‘Seʼ tenen, ilil tenen ning ap, alye un ning ap, kum ubuk nang unyake. Ati, na Allah arye, sik anang wenena ati ara, sik mal olan nang arye, yuk nang obikiba, sakuka dibinyak touk, sik anang babye, obikiba, sakuka dipnamake. Narye sik anang wenepnyopura, sik nirya ara dipnamake. Narye lo arepniba, sik mal olan nang arye, sice buklopnamake.

¹⁶ Aning ati ara, Allah el si Yahweh arye, el mapu koprop Israel yala ninye ati, nyabuk. “Anggunda bisik kwak tikmunce, asipdenamlume. ‘Abisik binuyab do? Abisik binuyab do?’ tenen, moubuka tenipmunyeura, ‘Min talak nun apu yapu arye, balamik teleb bisik dan do?’ tenen, moubuka asipdamunce, tenipnamlulume. Teleb bisik akunum eipmunyeura, abisikuk dobolbalulume. Winipmunyaura, anggun ikin kanye bona kum diparyuk, kanye deibuka, telebuk kam wininamlume. Na Allah arye, Israel ninye ati nyapse bukni, sikce, ‘Abisik teleb upmatu babye, abisik ara, pia kum banamabe,’ nyabuka, bataknik.

¹⁷ Tonda, na Allah arye sik melina ati, kalikina deiyok nang wibuka dopdeiamsiba, sik dam yangalamik. Sik akalekna nang arye, cang pong-pong ana, el si ara terompet bobuka, nyalamikba, lelim kekelamikce, ‘E opnamsil ning yanuka opsilyak, tenen, nyanmasiyake,’ tenelamik bukni, na mapu koprop Israel ninye sikda, ‘Kume, ara talye nyanmaka anya arye, kum kekepnamabe,’ nyalamik.”

¹⁸ “Winibuka malyeuk winilamika ati ara, na Allah arye nyapne. Tukwak mutuku-mutuku nirya, ululum ninye nirya, anggunda ayupu nirya moubuka kekepnululume. Se, na dipkoprob nyapne. Na mapu koprop Israel ninye, sik wenena ati, sik dam arye, ikin weik upnamle ning ati, kekeplumce, kel biknamlume.

¹⁹ Se, anggun tukwak mutuku ululum ninye nirya kekeplumce, kel biklulume. Ara, na wepdeipse ninye, na mapu koprop Israel ninye ati, wenena ning arepnamne ning ara, kekepnululume. Ara, urdem ati kum bukni, aninye ara, ‘Allah arye nyasilye yupu, pia kum kekenamabe,’ tenelamikce, nati bataklamnik. Tonda, narye sikti, petelamse ning nirya, batakalamnik. Winibuka batakalamnikce, sikce tenelamik ninguk winilamikce, ‘Nunda, yuk winin ninguk wininamabe,’ tenelamika deice arye, sik damak, weik ikin ning arepnamne.

²⁰ Yata winipnamaka ati, siltong teleb ning, el si ara kemenyan ara, weik pera mutuku el si ara, Syeba mutuku arye bobuka, na dam boyanganyak do? Tonda, pia teleb gwei ap, yuk-yuk bona ap, weik pera mutuku arye bobuka, na dam boyanganyak do? Tonda, kam ning obuka, ‘Nun malye winin ning kum daneipnamsil’ tenen, boyakirye, uku dongonyak do? Aning atouk, yuk teleb ning ayala-yala nirya, na si erena ati, arelyanganyaka ara, yata deiyok ati do? Aning-aning nirya boyakirye, nati areninyak bukni, sik talima ara, na dam pia kum ulule. Malye wininyak diparyuk aning areniyake. Ati, aning nirya ara, ‘Na like,’ nyapsine.”

²¹ Malyeuk wininyaka ati ara, na Allah Yahweh arye nyapsine. Ninye arye, bisik balamikirye, yanilamak keil, awamlya ara, el lina kumce, talye bakibuk, sik yan dum dukliba, kot sakuka poulbalamak atonun, na Allah arye, sik Israel ninye ati, keil yan dum duklamle atonun ning arepneba, sik nirya kote saknamake. Ara, sik ni yapu ap, sik nin yapu ap, sik mapu ap, neika saknamake. Tonda, sik ap, sik mining dam unyak ninye ap, sik kayapu nang ap, sik tam nang ap nirya, neika opnirye, kum kipdeipnamne. Allah arye Israel ninye ati, wenebukce, nyabuk.

Dabu tam mutuku ulamik nang arye, warikil yanamika ati, nyabuk yupu

²² Allah el si Yahweh arye nyapsile. Anggun nirya urasin erebuka dipdelulume. Weik pera mutuku ninye ara, mikip weik nang, utam mutuku aik dobuka, unyak nang arye, ‘Israel ninye warikuka opnamap’ tenen, kintinibikirye, dipkoprob olyanamsiyake. Anggun kum eililulum mutuku bukni, weik pera mutuku arye, yu una ap, mikip una ap, weik unyak ninye, yupa weik bulubikirye, mutuku sirya unyak nang arye, olyanamsiyake.

²³ Anggun Israel ninye ona ati, sik bopmak ning ara, ninye on yin ap, ninye olamak yo tace ap, kintinibuka bopmakce, olyanamsiyake. Sik anang ara, pia yu ninye anya arye, sikce yuk ninye ati, bico tenebuka, kum batakanyake. Olan talak ara, ninye nirya obuka, sirya dakanyake. Sikda pia bisina weik nang unyake. Ati, sik kintinibuka yangakirye, yan lelim lepnamla ara, weik kumanya arye, weik laut mekwen deice doupliba, amekwen nirya, longteng-longteng alamle tonun, yanganamake. Sik ayanamak talak ara, lelim weik arye, nyapliba kekenamlume. Sik ninye olbinuca ati, kuda basam balye deice bukuka balamake. Sik yin talin nang nirya ara, ninye olamak ning nirya bobikirye, kat baju ongobuka yanamake. Urdem ati, kum yanamak bukni, anggun Israel yala ninye nirya ona ati, Yerusalem mutuku bukni, tonda Sion mutuku nyabuka, si nyalulum mutuku noutamak unyak ninye babye, olyanamsiyake.

²⁴ Allah arye anyuk nyapdeibukba, Israel mutuku noutam ulamik ninye kekebikura, ayupu nyabik. “Se, ayupu nyabuk ning kekebibirye, Yerusalem mutuku unyap ninye ara, mikip kum unyabe. Nun nong ara, mikip kum, mitanguk unyaba anya arye, nun taruk erena kum diparyuk, talye lamapdongobuka tiknamabe. ‘Se, yu weik ninye olyanamsiyake’ tenen, ilil kanye uk usulule. Winipmasil deice arye, nun Yerusalem mutuku unyap ninye nirya ara, mi bomlye kil mi deiya donmalirye, mikip kum, mitang ulamle touk, usulule.

²⁵ Ilil upsiliba, nyanyabe. “Yerusalem mutuku ululum ninye nirya ara, anggun wa win dam lilbana ap, bisik bana ap nirya ara, kum banamlume. Tunim abuka, aik pumuk unamlume. Ara, nun oldan nang aryuk, ya bopmakirye, dana-dana tam nirya arye, olyanmasiyaka anya arye, ilil weik upsile.” Israel ninye arye nyabik.

²⁶ Winibuka nyanmekba, Yeremia birye nyabuk. “Se na kayapu nang, anggun Israel nango. Anggun malye-malye weik winilamlum ning ara, ‘Allah arye namin kipsutue. Nun malye winin ning kilibuka, kum kipdeipsutu’ tenen, anggun nirya, malye kain, el si kain sarong ongopmunce, butbuta deice mabuka donamalulume. Anggun ara, uku diplop malye atu dobuka, anggun kisok deice deipdanamalume. Ara, ‘Se, nun dipkoprob malye winilamupu’ tenen, lak kin ning ati, wininamlume,” nyabuk. “Tonda, winiplumce, min yuma mi dipnulirye, imun kanye bobuka, ngalukunmakirye, engelamak touk winibuka, engenamlume. Ara, ‘Anggun obuka kumdanyetibye’ tenen nang, anggun kel kum bikmamun buk, talye karin arye, anggun dam akunum olyanamsiyaka ati, nyapsine.” Yeremia birye, Israel ninye ati nyabuk.

²⁷ Allah arye Yeremia biti, ayupu nyabuk. Yeremia, winipmanto ara, ninye arye, ‘Uang logam, keil duk pia teleb ning eiptinye’ tenen, asilelamak touk, narye na mapu koprop Israel ninye ati, asipdenamne. Ara, ‘Sik malye wininyak ning ara, aning nirya bataktingirye, telebuk winin ning ara, dan do?’ tenen, winipnamne. Winipnamna ati, an wibuka deipkine. An dopdeipkinirye, Israel ninye, sik kanye noutamak tenenyak ning ara, yata tenenyak do? ‘Yata wiripnamak do?’ tenen, ance sikti, asipdenamlyame. Ati, Yeremia anuk dopdeipnamkine.

²⁸ Sik Israel ninye nirya ara, pia mandipna kanye bobokirye, na nyanye yupu nirya, yaniltanauk wininyake. Sikce na Allah ati, ‘Nun like,’ tenekirye, batakaninyake. Sik ap, yuk nang ap, neika banyak nang ara, pia malye wininyaka anya arye, sik kayapu nang ara, yuk ninye ati, minina yupu nyanyake. Sik babye atonun wininyake. Aninye, sik kisok yung, pia kat ninye anya arye, na yupu kum kekelninyake. Sik kanye tenina ara, pia kat ning, besi ap, perunggu kat ulamle atonun ninye unyake. Ati sik nirya arye, tilila yupu nyana ap, minina yupu nyana ap, ubula dona ap, wininyake. Awininyak ninye ara, sik talima noutamak ara, pia malye winin ninguk, pia talibuka wininyake.

²⁹ Winipmanto ara, kat ning emas do, perak do, dekna pia weik ning deice, malye ning ton palyamlya ati, narye, ‘Weik uku deipniba, apalyamlye ning, uku arye dipnamle’ tenen, asilen ning arepnamne. Ara, ninye arye, kat ning ap, ton malye ning palyamlya ati, weik uku noutamak dongobikiba, malye ning nirya dipdopliba, pia kat ning ara, uku kum dilamle touk, sik Israel ninye aning atonun unyake. Ati narye, ‘Sik malye wininyak ning ara, bataknamak do?’ tenen, sik dam wenena ati ikin ning deiptinya babye, teleb kum wininamake. Deiyok ara, sik kanye noutam arye, teleb diksukum ning tonok ning babye, kum ulula anya arye, asilen ning weik arye, sik nong deice deiptinya babye, teleb kum winiptinge. Ati, talye atibuk, sik dam winilden ning tuba-tuba kum delinamne. Sikda pia dipkoprob kat kanye bobuka, weik malye ning wininyaka anya arye, sik malye wininyak ning ara, kum batakanyaka ati, nyapne.

³⁰ Ati ara, ninye arye malye perak bataklamaka touk, na Allah arye aninye sik si ara, ‘Malye Perak,’ nyanamne. Deiyok ara, narye sik malye wininyak ninye ati, akunum lik weik upnila ati, sik batakse nyapne. Perak ara, pia teleb ning bukni, talye donoklamak ning atonun wininyaka ati nyapne. Na Allah Yahweh arye sikti, akunum batakse.” Allah arye Yeremia biti, nyapdeibukba, Yeremia birye, ayupu sekuk.