Yeremia 52 - Eipomek

Yerusalem mutuku ap, amutuku ulamik ninye ap, Babel mutuku nang arye, malye kibikce, Yerusalem mutuku uluplobikce, sirya dakik ati, nyabuk yupu

¹ Yehuda yala ninye, sik mutuku ninye deiyoknye kibuka, talibuka ulamuknye, el si ara Raja Zedeikia ulamuk. Zedeikia birye, amutuku talina ati, deiyok koubuk talak ara, el keting tamun ara, umur dua puluh satu tahun pamu deikin (21) ulamuk. Winilamukce, elce, “Winipnamlume, winipnamlulume,” nyabuka, yupu nyalamukce, Yerusalem mutuku ap, amutuku ulamik ninye ap, taleamukce, keting tamun sebelas tahun (11) ubuk. Atalak sebelas tahun ara, Raja Zedeikia birye, Yehuda yala ninye taleamuk. Ninye deiyoknye Zedeikia, el deiamuk kil, el lin si ara, Hamutal ulamuk. Ara, yuknye, el si Yeremia birye deibuk kilmu, Hamutal birye, Zedeikia deibuk. (Anye birye Yeremia bira, nabi Yeremia kume. Elda yuknye. Sik si atonun bukni, sikda yuk-yuk ulamdik).

² Minop talak Yehuda tam ulamik ninye ati, taleamuka deiyoknye, el si ara Raja Yoyakim, elce Yehuda yala ninye sik deiyoknye ulamukce, pia malyeuk winilamuk touk, el punubuknye Raja Zedeikia babye, ninye deiyoknye kibuka, Yehuda yala ninye taleamuk talak babye, pia malye weik winilamuk. Ara, Allah el si Yahweh dam, Zedeikia birye, pia malye ninguk talibuka winilamuk.

³ Winilamukba, Allah Yahweh arye, Yerusalem mutuku ulamik ninye ap, tonda, Yehuda tam ulamik ninye ap ati, yu ubukba, sik anang ara, wenebukce, yakwetebukba, sik aninye ati, bico tenebuka, kum melibuk. Allah arye, aninye nirya ati, ‘Sikda pia malye weik winilamika ati, na dam ton kum yanganamake,’ tenelamuk. Atalak ara, Yehuda tam taleamuk deiyoknye, Raja Zedeikia birye, Babel mutuku ninye deiyoknye Nebukadnesar, el yupu kum kekebukce, malye tenebuka ulamuk.

⁴ Winibuka ati, Babel mutuku ninye deiyoknye Nebukadnesar ap, el yin talin nang ap, sik neika, ‘Yerusalem mutuku unyak ninye opnamap’ tenen, yanuka warikmek. Ara, Zedeikia birye, Yehuda tam ninye talibuka ulamukba, keting tamun yupa toupne barye (9) akunum kibuk talak ara, sik Babel mutuku yin talin nang nirya, Yerusalem mutuku yayik. Keting tamun ara, topne barye (9) bukni, wala tagu barye (10), tanggal tagu barye deice arye, Yerusalem yanuka warikmek. Babel mutuku weiknye Nebukadnesar ap, el mapu yin talin nang nirya yayikce, ‘Yerusalem mutuku unyak ninye bikicak’ tenen, weik cang poka yanuka, wibuka antanap dongamikak, sik Babel nang ara, apoka bai tam tia doktakne tenda aik, cang kain arye domik aik ara, el si doltakne tenda aik nirya dobuka ulamik. Ara, ‘Yerusalem mutuku ninye nirya, bai tam kupsakuka bindobicak’ tenen, pia kaliklamika ati, Yerusalem ninye nirya ara, sik wa win dam ap, bai tam ap pia kum binmanto ulamikce, ikin asa ulamik.

⁵ Sik Babel mutuku nang arye, Yerusalem mutuku ulamik ninye ati, pia asum-asum nirya kalikinauk ulamik. Keting tamun ara, toupne barye (9) arye dipdongobuka, mapra balamika ani, keting tamun koklombarye (11) kibuk. Atalak noutamak nirya ara, ninye deiyoknye Raja Zedeikia birye, Yerusalem mutuku tuba taleamuk bukni, el bidamang, el taleamuk ninye babye, din lilbana ati, bai tam kum binmanto ulamikce, ikin weik ulamik.

⁶ Winilamika ani, sebelas tahun (11) noutamak bukni, wala dumbarye deice, tanggal sembilan ara, Yerusalem mutuku noutamak, ‘Naʼ tenen, deiamik din nirya ara, sirya dakikba, weik kwaning patana kibuk. Winibuk talak ara, sik Yehuda mutuku ulamik ninye nirya ara, dina pia kum ubuk ati, dina patabukba, imun kanye bobik.

⁷ Winibuka ati, sik Yerusalem mutuku noutamak ulamik yin talin nang arye, ‘Kume, amutuku batakuka, bindopnamabe,’ tenebikce, weik cang keil poka wibuka, antanap dongamik ning ara, alukunyan arye, bisik botobikce, bai tam bikbik abuka bindobik. Ara, sik Babel mutuku nang arye, ‘Yerusalem mutuku ninye arye, bai tam bikirye, din libicak’ tenen, weik cang keil poka wibuka, antanap dongamik ning ara, lukunyan noutamak arye, bisik botobikce, batakuka bindobik. Yehuda yala yin talin nang nirya, bai tam sakuka biyik. Atalak babye, sik Babel mutuku nang kalikmek buk, Zedeikia, el yin nang nirya ara, bai tam, Yordan mek duman tamuk biyik. Apoka daklobuka biyik ara, ninye deiyoknye, el ulamuk aik dam, bisik arye, dulbinuka bindobik. Ara, cang poka dana-dana tam arye, yanuka wibuka dakdongamikak arye kupsakuka biyik.

⁸ ‘Bikbik abuka binuyap’ tenen, bikbik abuka bindeyuk bukni, Babel mutuku yin talin nang arye, aminyan dobolbiyikce, bikbik abuka banmek. Banmek bukni, sik Yehuda tam yin talin nang eibikce, ilil ubukba, sik deiyoknye Raja Zedeikia biti batakik. Batakikce, sik yuk-yuk lyeibuka, bai tam sakuka, bindobikba, el yuk banmok. Banmok ani, Yeriko mutuku dam, weik pala lyuak noutamak arye, sik Babel mutuku yin talin nang arye, Zedeikia dam binuka tomobik.

⁹ Raja Zedeikia akunum tomobikopura, adiparyuk dobuka, Babel mutuku nang sik deiyoknye, Nebukadnesar Hamat tam bukni, Ribla mutuku ulamukak bobiyik. Bobiyikba, Nebukadnesar birye, Raja Zedeikia biti, “Winibuka wenepnamkine,” nyapdeibukba, el yin talin nang arye, sik deiyoknye nyapdeibuk touk, winibik. Ara, talye wenena kume.

¹⁰ Babel mutuku ninye deiyoknye birye, ‘Winiplulume,’ nyabukba, el amu tam yin talin nang arye, Zedeikia elce deiamuk mapu nirya tomobuka boyayikba, Zedeikia dinmokak uk, adiparyuk binuka deibikce, obuka sirya dakik. Tonda, Yehuda tam pil deiyok yuk-yuk talibuka dolamik nang, weik nang nirya babye, “Opdeipnululume,” nyapdeibukba, bobiyikce, sik deiyoknye Zedeikia dinmokak, binuka deibikce, obuka sirya dakik. Anang obik mutuku ara, Ribla mutuku.

¹¹ Winibuka, Zedeikia el mapu nirya akunum obikopura, sik deiyoknye, Raja Zedeikia, el asing babye tulubuka obik. Winibikopura, el nong tapu koubuka, sik mutuku, Babel mutuku tamubuka bobiyikce, Babel nang sik ninye wenena ati, domik aik noutamak ara, Zedeikia delilbiyik. Abinuka deiamik talak nirya ara, aik dam ton, bana pia kumce, tonok sukumuk tunim abuka bulamuka ani, adiparyuk el dipnamuk talak akunum ubukopura, asukumuk dibuk.

Allah Yahweh, el si erena ati domik aik, Babel mutuku nang arye, ulubuka batakik yupu

¹² Ara, Babel mutuku ninye deiyoknye, Nebukadnesar birye, Babel mutuku taleamuka ani, keting tamun ara, tek dikin (19) noutamak bukni, pamubarye wala noutamak tanggal sepuluh deice ara, Babel mutuku yin talin nang arye, Yerusalem mutuku yanuka wekik. Adeiyok koubuka, yayiknye bira, Raja Nebukadnesar, el melibuka balamuknye, el amu tam pil melibuka dolamuknye el si ara, Nebuzaradan birye, Yerusalem mutuku noutamak wekuk. Nebuzaradan bira, Babel mutuku ninye deiyoknye, Nebukadnesar biti, melibuka kaliklamuknye ani. Ara, ‘Yuk nang arye, nun deiyoknye obicak’ tenen, kaliklamuk. Ati, el deiyoknye birye, ‘Winipnamlyame,’ nyapdeibuk touk, Yerusalem mutuku yanuka wekuk.

¹³ Babel mutuku ninye deiyoknye birye, nyapdeibuk touk, elti, kalikina deiyoknye, Nebuzaradan birye, Yerusalem mutuku wekukce, el ap, el yin talin nang ap arye, Allah el si eren aik yanuka uluplobik. Ara, Yahudi yala ninye, sik Allah si eren aik ap, tonda, Raja Zedeikia, el teleb weik ulamuk aik ap, tonda el amu tam pili yuk-yuk deiyok kibuka, dolamik nang ulamik aik ap, amutuku weik aik nirya ap, adiparyuk yanuka uluplobikce, uku dabuka sirya dakik.

¹⁴ Aninguk kume. Babel mutuku yin talin nang, sik deiyoknye Nebuzaradan ap, el mapu sik yin talin nang nirya ap arye, Yehuda yala ninye, Yerusalem mutuku bai tam antanap dongobuka, wiamik weik cang keil poka yanuka, ulubuka batakik.

¹⁵ Aning nirya akunum winibikopura, Yerusalem mutuku, tuba aunmek nang, puturun pil dona weik kel nang ap, talye bona utotoa talina kum nang ap, tonda, ‘Nunda Babel mutuku nang tam kipnamabe,’ nyalamik nang ap, tonda Yerusalem tuba kam ulamik ninye ap nirya ara, Nebuzaradan el amu tam yin nang arye tongobikce, sik anang babye bobuka, Babel mutuku uk tamubuka bobiyik.

¹⁶ Winibik bukni, amutuku ulamik ninye noutamak arye, pia bona utotoa talina kum nang ton bokdeibuk. Ara, weiknye Nebuzaradan birye, “Sikda kum tongobuka bobinamne. Ara, anggun nirya ara, Yehuda yala nang ulamik mutuku uk umunce, anggur tapu duk wa ap, yuk koun ning ayala-yala nirya kouamik wa ap ara, wa wipmunce, tuku palibuka, awa pil nirya ara, pil donamlulume,” nyabuk.

¹⁷ Babel mutuku nang arye, Yahudi yala nang, Allah Yahweh el si eren aik bai tam, pia urasin teleb ning, el si perunggu, aning arye memebuka, ayukumna ikamik ning ap, tonda anyaik pum tam bukni, perunggu arye, meja atonun ning, memamik ning ap, tonda perunggu arye, mek kwebuka delina ati, bukam kibuka memebikce, deiamik ning ap nirya, uluplobikce bopdakuka, sik mutuku bobiyik. Aning nirya ara, dekna weik ning ati, teleb lobuka bobiyik.

¹⁸ Tonda, sik anang aniryuk, bukam ngolol makau ap, atu lulin ning ap, uku lana ap, tangaldongona ap ati, delilamik ning ap, tonda kam ning obuka, ining kwebuka lilamik makau ap, siltong teleb ning ongobuka, delilamik makau ap, yuk yala-yala ning, dekna weik ning el si perunggu arye, puturubuka deiamik ning ap, aning nirya deiamikce, Allah si eren talak pil dobuka, winilamik ning nirya ara, bobiyik.

¹⁹ Tonda, Babel mutuku yin talin nang, sik deiyoknye, Nebuzaradan birye nyabukba, dekna weik ning, el si emas ap, perak ap deice arye, memamik ning nirya babye, ubula doprobik. Ara, mitik ngolol makau ap, kam ning Allah arena ati obuka boyanopura, uku dalamik makau ap, ining kwebuka boyangan makau ap, atu lulin ning ap, Allah arena ati, anggur mek kwelin ning, mitik makau ap, yangalin ning nirya ap, uku delina ati, deiamik ning ap nirya ara, Nebuzaradan birye, aning nirya dalubuka doprobukce, Babel mutuku tamubuka bobiyik.

²⁰ Minop talak ulamuknye, Israel ninye, sik ninye deiyoknye, Raja Salomo birye, Allah Yahweh el si eren aik domuka ati, urasin pia teleb ning, el si perunggu arye memebukce, ayukumna ikamuk ning ara, bitinye ubuk. Tonda, mekwen kwebuka delina bukam weik ngolol makau ara, tonok puturubuka deiamukba, aubuk. Tonda, abukam weik ngolol makau ap, meja dibuk ning ap, tuku amu tam ton kintinibuka memebuk ning ara, obarye (12) sapi basam urasin atonun ning ton, perunggu arye puturubuka, dana-dana deiamukba aubuk. Aning nirya ara, perunggu arye memebuka deiamik anya arye, pia ikin ati, kum tomopmanto ning deiamik. Aning-aning nirya ara, dekna pia weik. Aning nirya babye, Babel mutuku nang arye, dalubuka bobiyik.

²¹ Weik ayukumna bitinye, perunggu arye puturubuka, ikamuk ning ara, sik cang ara ato touka. Ara, delapan (8) meter ubuk. Ayukumna yo nong noutamak ara, pamubarye meter noutam ton ubuk. Winibikce, ayukumna yo nong noutam ara, lo uk batakamik. Ayukumna yo nong bol atonun ning ara, el pala ara, delapan centimeter ubuk.

²² Ayukumna yo bitinye mouse tam ara, bitinye meter ap, ton meter noutamak (2.3) ubuk. Ayukumna yo bitinye mouse tam ara, aning eibikirye, ‘Urasin pia telebe, tenepnamak’ tenen, amutuku yo duk, el si delima nyalamak ning, urasin atonun ning ara, puturubuka deiamik. Ara, dekna weik ning, el si perunggu nyalamak ning arye, puturupdeibuka dana-dana tam nirya, palepdongamik. Ayukumna yo bitinye uamuk ning ara, urasin neiktoto ulamuk.

²³ Ayukumna yo bitinye mouse tam ara, urasin teleb ning, amutuku yo duk, el si delima arye deibuka, palepdongamik nirya yupa ara, seratus bukni, ton tam ara, sembilan puluh enamuk (96) awamukba, utam arye, ei dilamik. Aning-aning nirya ara, dekna weik ning arye, puturubuka deiamik ati, Babel mutuku yin talin nang arye, aning nirya ulubuka, ubula doprobikce, sik mutuku bobiyik.

Yehuda mutuku ulamik ninye nirya tongobuka, Babel mutuku bobiyik yupu

²⁴ Babel mutuku ninye deiyoknye, kalikina ati, yin talin nang, sik deiyoknye, el si Nebuzaradan birye, Yahudi yala ninye tongobukce, tapu koubuka, bobiyuk ninye ara, ani. Ara, sik Allah si eren aik pum tam, pil talibuka, pil dolamuknye, imam Seraya ap, el amu tam pil melibuka donanye, el si Zepanya ap, tonda anyaik bublan wekelbanak kaliklamik nang, winilye nang ap nirya, Nebuzaradan birye tongobukce, Babel mutuku bobiyuk.

²⁵ Tonda, Yerusalem mutuku noutamak dungnupmek nang noutamak arye, Yudea tam yin talina deiyoknye tonok ap, tonda Raja Zedeikia, el melina ati, ‘Winipnalyame, winipnalyame,’ nyabuka, el ap melibuka yupu nyalamik nang, tekbarye nang ap, yin talin nang, sik deiyoknye, el amu tam ulamukce, yupu sekena deiyoknye, Sekretaris arye, ‘Yin talin nang unamluma ati, yanuka buluplulume,’ nyalamuk deiyoknye ap, tonda amutuku noutamak enam puluh nang (60), pil dona deiyok yuk-yuk talibuka, pil dolamik nang nirya ara, tongobikce, tapu koubuka, Babel mutuku tamubuka bobiyik.

²⁶ Amutuku weiknye Nebuzaradan birye, sik anang nirya, tongobuka tapu koubukce, bobuka, Babel mutuku tamubuka bobiyukce, Babel mutuku ninye deiyoknye, Nebukadnesar dam, el Ribla mutuku ulamuk sukumuk bobiyuk.

²⁷ Sik aninye nirya ara, Hamat mutuku otam, ninye wenena aik delilbinuka wenelamna ani, obuka bataklamik. Ati ara, Yehuda mutuku ulamik ninye nirya dobuka, Babel mutuku bobinuka wenebikce, ninye weik tam ara, adiparyuk obik. Mitik tam ninye, kam tuba ulamik ninye, Babel mutuku noutamak akunum bobinmek nang ara, ikin pil delilamikba, ikin weik ulamikce, asukumuk ulamik.

²⁸ Yehuda tam ulamik ninye ara, yupa weik obik bukni, yuk Israel ninye ara, kum obik bukni, tapu koubukabikce, sik mutuku Babel mutuku tamubuka bobinamik. Ara, ‘Nun amu tam ukirye, nun ikin pil donamsiak’ tenen, bobinamik. Aninye yupa nirya ara, yupa taku deikin nang (empat ribu enam ratus 4.600) ninye tapu koubuka bobinamik. Ara, tonok talak aryuk, dobuka kum obik bukni, aketing tamun, aketing tamun deice arye, yupa yuk-yuk bobuka, sik mutuku tamubuka bobinamik. Nebukadnesar birye yanuka, tomobukce, tapu koubuka bobalamuk talak ara, ani. Babel mutuku taleamuk talak noutamak bukni, keting tamun ara, tekbarye noutamak, ninye yupa ara, tiga ribu dua puluh tiga (3.023) ninye tongobuka, tapu koubuka bobinamik.

²⁹ Tonda, Nebukadnesar elce Babel mutuku taleamuk talak noutam ara, keting tamun delapan belas (18) ning noutamak arye, Yerusalem mutuku nang ara, yupa-yupa tonok keba pamubarye, delapan ratus tiga puluh dua (832) ninye ton tongobuka, tapu koubukabikce, Babel mutuku tamubuka bobinamik.

³⁰ Tonda, Babel mutuku ninye deiyoknye birye, amutuku taleamukce, pil dolamuk keting tamun ara, dua puluh tiga (23) deice, el amu tam yin talin nang, sik weiknye Nebuzaradan birye, Yerusalem mutuku ninye yupa ara, tujuh ratus empat puluh lima ninye (745) ton tongobuka, Babel mutuku tamubuka bobiyuk. Aninye nirya ara, Babel mutuku nang arye, ikin pil dilamikba, talye piluk dolamikce, Babel mutuku noutamakuk, imun kanye bobuka ulamik.

Minop talak Yehuda tam taleamuknye, Raja Yoyakin, Babel mutuku ninye wenen aik pum tam arye, lopdeibik ati, nyabuk yupu

³¹ Babel mutuku ninye arye, Yehuda mutuku nang, min obuka sirya kum dakamik talak ara, Yehuda mutuku ninye deiyok talibuka ulamuknye, el si Yoyakin ulamuk. Bukni, Babel mutuku yin talin nang arye, Yerusalem mutuku nirya, sirya obikce, Raja Yoyakin babye, tapu koubukabikce, Babel mutuku bobinuka, wenen aik pum tam dongobik. Sik nirya daulamika ani, Yehuda yala nang ulamik mutuku taleamukce, pil dolamuka deiyoknye, sisinanye Raja Yoyakin bira, wenen aik keting tamun yupa tonok keba pamubarye (tiga puluh tujuh tahun 37) noutamak bukni, wala obarye nirya (12), tanggal yupa tonok (dua puluh lima 25) akunum mabukopura, Babel mutuku ninye deiyoknye dibukba, yuknye birye, deiyok koubuka, el dolamuk pil punubukce, Babel mutuku talibuk. Babel mutuku, sik winiryuk deiyoknye bira, el si sisinanye Ewil-Merodak birye taleamuk. Aketing tamun deice, anye birye, Yehuda mutuku Raja Yoyakin biti pia bico ubukba, ‘Elda wenen aik tuba una kume,’ nyabuka lyepdobuk.

³² Raja Babel el si Ewil-Merodak birye, Yehuda mutuku sisinanye Raja Yoyakhin biti, ‘Telebe, na kwito,’ nyabuka, pia teleb kipdeibukopura, elti, pil deiyok ton arebukba, ninye deiyoknye kipdeibuk. Sisinanye Ewil-Merodak, el amu tam ulamik weik deiyok nang, weik ton aulamik. Ninye deiyok nang babye, minop talak arye, sik Babel mutuku yin nang arye, sik mutuku nirya, akunum malye kibika ati, tapu kuamikce, Babel mutuku bobinamikba, daulamik. Anang ara, kum lyelamik bukni, Raja Ewil-Merodak birye, Yehuda tam taleamuknye, Raja Yoyakhin erepdeibukba, sik yuk-yuk mutuku nirya, sik weik nang deice tam ulamuk. Yoyakin tonok ara, Ewil-Merodak birye pia teleb updeibukce, lyepdomuk.

³³ Lyepdomuka ati, Yoyakin bira, ninye wenen aik pum tam, ongolamuk baju kwiriplobukce, teleb baju ongobuk. Tonda, Babel mutuku Raja birye, Yoyakin biti nyabuk. “Anda na ap, pia neika unimirye, na aikuk din dinaname,” nyabuk. Nyabuka ati, asum arye deiyok koubuka, anerye dipdongobuka, oketeng tamun nirya ara, Yehuda mutuku taleamuknye, Yoyakhin ap, Babel mutuku sisinanye ap, neika din dilamdik.

³⁴ Tonda, sisinanye Raja Babelnye birye, Yoyakin biti, “An patapkilye ning dekna ati ara, narye asum-asum nirya, yo bok arepkiniba, an patapkilye ning, dekuka dinalame,” nyabuk. Nyabuka ati, asum arye dipdongobuka anoutam talak nirya ara, yo bok dololamukce, daulamuka ani, el kam ulamuk talak, akunum sirya dakukce, dibuk.