Yeremia 49 - Eipomek

Allah arye Amon mutuku noutam ulamik nang wenepnamle ning ati, nyabuk yupu

¹ Allah Yahweh arye, sik Amon mutuku noutam unyak nang ati, ayupu nyapdeibuk. Ayupu ara, ani. “Anggun nirya moubuka tenipdelulume! Anggun Israel yala nang ara, anggunce deiplum mapu ara, kum dayuka ati, Israel nang bukni, Kat yala nang arye, talibuka unilamik mutuku noutam ton, anggun Israel mapu ton kum binuka unyak do? Anggun Israel yala nang arye, mapu deiplumba, dadeipdanin yangalamikce, deibik mapu ton kum unyak do? Kume, aunyaka ati, Kat yala nang arye talibuka unilamik mutuku noutam ara, yata deiyok ati, amutuku ton binuka kum unyak do? Kume, anggun Israel yala nang weik tuba ululume. Ati ara, yata deiyok ati, isa si Milkom, sik Amoni yala nang arye, el si erenyak nang arye, Kat mutuku nirya talibuka unyaka ara, yata ati do? Yata deiyok ati, amutuku noutam domik asik nirya ara, Miklom el si erenyak nang arye, amutuku Kat yala nang birye domik asik nirya, alubuka dopropkirye, namin asa urdem ukirye, amutuku noutamak aisa siuk erenyak do?

² Ati ara, na Allah Yahweh arye, ayupu dipkoprob nyapsine. Na tenepse sum akunum yalyopura, weik yupu arye nyapniba, Amon mutuku unyak nang, sik Amon yala nang ati yuk mutuku yu nang arye olyanamake. Narye lo arepniba, amutuku noutam, ‘Nun deiyok mutuku ani,’ tenenyak asik, el si Raba mutuku, weik mutuku obuka, sice buklopnamake. Tonda, amutuku noutam nirya, ninye aik nirya ap, desa-desa talibuka, unyak mutuku nirya ap, ayu nang arye, uku dabikiba, uku arye anyasik nirya dibuka, sirya daknamle. Winiplyopura, Amon yala nang unyak mutuku nirya ara, asik oldemuk upnamle. Winibikca deice arye, minop talak, yuk mutuku nang arye, Israel nang taleamik tuku alubuka dopromik touk, amutuku tuku nirya ara, Israel nang tuba tamubuka dopropnamake. Na Allah Yahweh arye, akunum nyapmasina ati, aning nirya ara, dipkoprob nong upnamlarya!

³ Se, Moab mutuku noutam bukni, anggun Hesyebon mutuku ululum nango, malye nyabuka, engepnamlume! Deiyok ara, anggun mutuku dam uamuk mutuku, Ai mutuku babye, yu nang arye, akunum obuka sice buklopmake! Aning atonun, anggun weik asik Raba mutuku noutam ululum kilapu nirya babye, weik yupu arye engenauk winipnamlume! Ngalukuka engelamunyak arye, anggun nong bol deice, parang arye sekuka opdanamalume. Winipmunyopura, ‘Se, nun tam nang akunum opmakeʼ tenen, anggun teleb baju ongolulum ning ara, kwiriplobuka, pia malye baju uk, kain karung ongonamlume. Ara, ‘Nun tam nang ati bicoeʼ tenen, lak kina ati, malye baju uk ongopnamlume. Winipmunyopura, imun kanye bona ap, kanye walwalabuka nyana ap, kipmunce, bikbik abuka otam binmana, atam yanmana, kinamlume. Winibuka wininamluma deiyok ara, ani. Ara, anggunce si erelulum isa, el si Milkon ap, el si erena ati deiyok nang, sik isa si erenyak imam-imam nang ap, apil dona ati melin nang ap, anggun mutuku obuka sice buklopnamsiak nang arye, anang nirya tapu koubikirye, sik mutuku tamubuka bobinamaka ati, anggun nirya engenauk unamlume. Anang bobuka bikirye, yuk mutuku delilbikceba, daunamake!

⁴ Se, dipkoprob anggunda, Allah arye nyasilye yupu, moubuka kekena kum arye, elti, yaninauk winilulume. Winipmanto ara, tonoknye birye, deiamuk kilmapu, sik ni koproba batakikirye, yuk mutuku balamak touk, akunum winilulume. Winimunya ati ara, anggunda yata ati, ‘Kume, nun mutuku tuku ara, pia teleb sukun tuku ulula ati, telebuk unamabe. Nun mikip ara, weik usulula ati, telebuk unamabe tuba nyalulum do? Dipkoprop ning ara, anggun mikip akunum kum kipnin banmasilyeba, anggun mutuku tuku nirya babye, malye kipnamsile. Anggunda bicoe! Min talak babye, wini talak nirya babye, anggunce, ‘Kume, nunda bona talin nang unyaba ati, yuk mutuku yu nang arye, yu kanye bobuka, nun tam kum olyanamsiake. Yata ati, anggun sukun tuku ap, bona talin nang talilulum ning ap atibuk, diba tenepmalum do? Dipkoprob ning ara, yata nyaptum do? Tonda, ninye tonoknye alye weik upmatunye birye, olyasutu do?

⁵ Anggunce, ‘Yata mutuku nang arye, yu kanye bobikirye, nun mutuku olyasiting do?’ tenen, maknya kintinin yupu nyalulum bukni, wini talak ara, na Allah Yahweh arye, anggun olan ati, sik dana-dana tam unyak nang dopdeipnyeba, anggun Amon mutuku ululum nang ati, mal olyanamsiake. Nara, im deice unyak yin talin malaikat nirya, sik deiyoknye ununa ati, nara mikip weiknye birye nyapsine. Nara, aning-aning nirya talibuka, deice tam erebuka ununa ati, na tenenun ning nirya ara, dipkoprob aninguk wininune. Ati, winipsinye talak ara, weik ilil un ning, anggun dam yanuka deipnamsine. Winipsinyeba, anggun kanye talima daksaksilye ati, bikbik abuka binamlume. Anggun nirya, yuk-yuk kanye tenibuka, ‘Naryuk lyepdatinyeʼ tenen, pia pi dobuka binamlum bukni, aminyan talak ara, anggun kanye arye, bulubuka tonokak deipmanto deiyok nang ara, yanuka kum melinamsiake.

⁶ Anggun wenena ati, ikin ning arepnamsin bukni, aminyan doyanamle talak ara, na Allah arye, anggun Amon yala nang ati, tamubuka teleb kipdeipnamsine. Ara, min talak telebuk ulamlum touk, aminyan talak babye, teleb kipdeipnamsine. Ati nara, Allah Yahweh arye, ayupu akunum nyapdeipmasina ati, aning nirya ara, dipkoprob nong kunupnamle!

Allah arye, Edom mutuku nang ati wenepnamle ning ati, nyabuk yupu

⁷ Nara, Allah Yahweh arye, im deice yin talin malaikat nirya ara, sik deiyoknye ununa ati, mikip weiknye unune. Narye, anggun Edom tam ululum nang ati, ayupu nyapsine. Edom tam bukni, weik asik Teman mutuku unyak nang arye, moubuka kum tenebikirye weik kel deice nyapmanto yupu ara, akunum kum ubukba, min nyanyaka ara yata ati do? Tonda, ‘Moubuka tenebikirye, namin aryuk pil donamabeʼ tenen, teleb un yupu uk nyanyak deiyok nang ara, sik mutuku tuba kum unyak do? Sik weik kel bikamika deice arye nyalamik yupu nirya ara, akunum kum upmal do?

⁸ Se, anggun Edom tam bukni, iknapye tam (arah selatan) Dedan mutuku noutam ululum nang ara, anggun adiparyuk tamubukamunce, bibik abuka binululume! Anggunce, ‘Se, weik ikin ning nun dam yasilyeba, kanye imun unamapʼ tenen, bikbik abuka bimunyeura, pia moubuka duknupnamlulume. Deiyok ara ani. Ura, na Allah arye, anggun deipkirikdop anye, Esau birye deibukba, dadeipdanin yangalamika ani, wini talak delisinyak nang nirya ara, obukapnirye, atu kiplopnamne. Deiyok ara, narye sik wenen sum akunum dam upmale.

⁹ Ura winipmanto yupu ton nyapnusine. Ara, anggun tenipdelulume! Anggun pil melin nang arye, ‘Amutuku nang, sik anggur tapu duk dakuka lipnuyapʼ tenen, yanuka pil dobikceura, anggur tapu deice, mangkau kanye arye, kum ebikirye, batakamice, anggur duk ton, mitik tonun ton tuba aulamle. Tonda, ubula don nang, lukunyan noutam yakirye, sikce, ‘Anyaik unyak nang, sik bona ubula dopropnuyabʼ tenen, pataplyeura, aning tenebikirye, dipkoprob eibikce ninguk, alubuka dolonyak bukni, mangkau kanye arye, kum eibice ning ton, batakanyake.

¹⁰ Bukni, na Allah arye winipnamsin ning ara, yuke. Na din ning ara, Esau birye deibukba, deipdanin banyak nang arye, talibuka unyak ning nirya ara, kum kipdeiplirye, tonok ning babye, ton pia kum upnamle. Tonda, amutuku nang, ‘Se, opsilyakʼ tenen, sik duknupmanto ning ara, pia kum winipnamake. Ninye duknumantoak nirya ara, narye laka kipdeipnamne. Winipye ning ara, anggun mal olan nang arye, sik Edom tam unyak nang nirya ap, sikce delilamik mapu ap, sik kayapu nang ap, tonda sik mining asik nang ap nirya ara, obikirye, kum kipdeipnamake. Winibikceura, sik yala nang, tonok nang babye, kam kum unamake. Nirya oltakanauk winipnamake.

¹¹ Se, anggun Edom mutuku ululum nango! Anggunce deiplum bukni, aminyan yanuka unamak mapu nirya ara, na damuk batakdopnululume. Winipmunyeba, narye sik kwaknamne mapu ati, moubuka kalikinamne. Aning atonun, youwak kilapu babye, na damuk deipmunyeba, narye kalekuka melinamne.

¹² Aning deiyok ara, na Allah Yahweh arye nyapsine. Malye ning talibuka, kum winipmalyebuk, el deice ikin ning yanuka dopropnamlanye babye, ikin ning dolonauk upnamle ati, anggun yuk Edom tam nang ara, dipkoprob malye winin ning weik, talibuka winilamluma ati, anggunce imun kanye bon ning dopropmunce, ikin asa kum unamlum do? Kume, diba anggun nirya ara, dipkoprob ikin ning weik dolonauk upmunyopura, imun kanye bobuka unamlume!

¹³ Anyapmasin yupu ara, talye kum nyaplopmasine. Aning kum bukni, na Allah Yahweh ara, dipkoprob na si deice arye, nyalin yupu akunum nyapmasine. Ara, Edom tam bukni, anggun weik asik domlumce, ‘Nun mutuku weik deiyok anyeʼ tenen, Bosra mutuku asik noutam unyak nang babye, sik nirya ara, kum kipdeipnamnarya. Winipyeura, yuk mutuku nang arye, akota eibiceura, sikce, ‘Se, Allah arye, anang sik wenena ati, obuka malye kibuk ning ara, weik ikin,” nyabuka, malye nyanamake. Ton nang ara, sik amutuku nang ati, nalibuka akutupnamake. Ton nang ara, anggunce, ‘Nun like,’ tenenyak nang ati, “Edom mutuku nang ati, Allah arye subukce, oplobuk touk, anggunti, opsuturye, bataksutue,” nyabuka, sik deice malye yupu nyabuka supnamsiake. Winipniba, ninye arye akutunamake. Tonda, sik anang si deice ara, sulamak nang atonun unamake. Edom mutuku noutam domik asik nirya ara, uluplobikceba, asik oldem upnamle. Tonda, aminyan talak babye, anyasik nirya, tamubuka tonap, lipsisikuka pia kum donamake. Narye malye kibuka bataknamnak nirya ara, pia kum danamle.” Allah arye sik Edom tam ulamik nang ati, nyabuk.

¹⁴ Nara, Yeremia biti, Allah Yahweh arye, tonok yupu ton nyapnukba, dopropnamne. Allah arye nyapdeibuk yupu ara, ani. “Se sik yuk-yuk mutuku unyak nang ayala-yala nirya ati, na yupu laka nyana deiyok nang wipdeipseba, sik anang yuk-yuk bukni, sik dam nyalbinmake. Sikce kam yupu nyanamak yupu ara, ani. “Anggun nirya kekeplulume! Anggun mutuku nirya ululum nang arye, sik yin talin nang wipdeipmunce, Edom tam unyak nang ati, mal olbinamlume! Sika arye kuma! Adiparyuk mememunce, Edom tam nang dam olbinamlume,” nyabuka nyanamake.

¹⁵ Tonda, Allah Yahweh arye, anggun Edom tam ululum nang ati, ayupu ton nyapsuke. Na Allah arye, sik Edom yala nang ati, anggun mikip ara, mitang kilin ning arepsinyeba, amu tamuk deipnamsine. Winipsinyeura, yuk mutuku nang arye, anggunti, ‘Kume, sik Edom tam nang nirya ati, lik upsiliba, nun lik,’ tenenyabe,” nyabuka malye yupu nyanamsiake.

¹⁶ Min talak ara, anggun Edom tam nang arye, yuk-yuk mutuku nang ati, ilil una pia kumce mikip asa arye, ‘Sik mal olyangamabe,’ nyabuka, yu yupu nyaplumba, sik yuk-yuk mutuku nang arye, ilil weik ulamukba, sik nong nirya sirim talilamuke. Tonda, sik Edom tam nang arye, sik kanye tenina deice arye, ‘Nunda pia teleb nang unyabe,’ tenepdaluma arye, anggun kanye talima deiplumce, talye yupu uk nyalamlume. Winibuka maknya kintinilamlum bukni, wini talak ara, anggunce yuk nang ati, ilil upsilirye, ‘Yuk mutuku nang arye, yanuka opsikcakʼ tenen, keil deiya damuk duknulbinamlume. Tonda, ‘Nunda amutuku kon deice tam unmaba ati, nun mal olan nang ara, amutuku deice kum welebuka opsitinge,’ teneplum bukni, na Allah arye anggun bobuka, amu tamuk dipnamsine. Wini talak ara, anggunda keil deiya pum dungnubuka unmalume. Tonda, mutuku deice arye lopdakuka, pera noutam unmalum bukni, pia amu tamuk kipnamsine. Anggunce weik mutuku kon weleptumce, seng-seng alamle maka, Raja wali maka, el aik pia cang yo deice dolamle touk, doptuma babye, adomunye buk, na Allah Yahweh arye dobuka, anggunda amu tamuk dopkwetepnamsine. Aning nirya ara, na Allah Yahweh arye nyapmasina ati, dipkoprob nong upnamle!”

¹⁷ Aning nirya akunum winipnyeura, yuk mutuku nang arye, Edom tam mutuku eibikirye, “Se, Allah arye anang sik wenena ati, obukce, malye kiplobuk ning ara, weik ikin ulule,” nyabuka, malye nyabikirye, ilil weik unamle. Ton nang arye ura, anggun mutuku nang ap, anggun mutuku ap eipsikceura, anggunti nalibuka, akutupsikirye, ‘Se anango, sikda pia malye winilamik,’ nyabuka, malye nyanamake. Edom mutuku noutam banamak yuk-yuk nang nirya arye, aning wininmalyak eibikirye, ‘Se, Edom mutuku kanye imun weik imun ning, sik dam yayuk ning ara, pia mambul,’ tenena ap, ilil ap unamle.

¹⁸ Edom mutuku nirya, malye kipdeipyopura, awinipnamle ning ara, min talak Sodom mutuku ap, Gomora mutuku ap, anggun dam ulamik nang ap, opsirye pia malye kipdeipse, amutuku noutam nirya kum kipdeiamse touk, aminyan talak ara, Edom mutuku nirya ati, atonun malye kipdeipnamne. Amutuku ara, asik oldem upnamle. Winipnamne talak ara, amutuku noutam ara, ninye tonok babye, asukum kum unamake. Aning nirya ara, na Allah Yahweh arye, akunum nyapmasina ati, aning nirya nong kunupnamle, nyapsine.

¹⁹ Tonda, Yordan mek biyuka, lilun tam, bai tam arye, weik yu singa arye ubuka, domba basam sik maning dilamakak, tikilyakirye olamle touk, na babye, talye karin arye, Edom mutuku yanamne. Winibuka tikilyanirye, sik Edom nang ati, sik mutuku noutam unamakak arye, yakuka dopkwetepniba, sik bikbik abuka bindopnamake. Akunum bindobikcopura, na Allah arye, ‘Anye wibuka deipnamne,’ tenenye touk, amutuku noutam talibuka ulirye, ninye deiyok kibuka, yupu nyanamlanye biti, wipdeipnamne. Aning ara, talye ati kum nyapsine. Na mikip weik unye touk, yatanye ton aulul do? Tonda, yatanye do, ilil tenena kumce, mikip kanye bobuka ululnye birye, na tenepman ning ati, ‘Kume aning ara, kum kiptume,’ nyabuka, yupu seknutu do? Aning atonun, yata ninye deiyoknye ton, na yupu yanipnuturye, malye kipnutu do? Kume, tonoknye babye, pia ton kum ulule. Nara, na tenenye touk wininune.

²⁰ Aning ati ara, anggun moubuka kekepnululume. Na Allah arye, ‘Winipnamne,’ tenebuka, sik Edom nang wenena ati, winipnamne ning ap, tonda sik Teman mutuku noutam unyak nang wenena ati, ‘Winipnamne,’ tenepsirye, winipnamne ning ap, anggun moubuka kekepnululume. Lo arepsiba, yuk mutuku yu nang arye, anang sik mapu nirya ara, tomobuka bobinamake. Winibikcopura, sik Edom mutuku nang nirya ara, kum danamake. Narye sikti, kum daneipnamne!

²¹ Edom mutuku noutam unyak nang, kum kipdeipnamne talak ara, lelim pia weik nyanmakiba, pera mutuku nang arye, alelim kekepnamake. Tonda, mutuku sirya, im sirya nirya luluknamle. Aweik ngalukuka engenamaka nirya ara, weik laut mekwen, el si Laut Gelaga dam unyak nang nirya arye, kekepnamake.

²² Winipmanto ara, Raja Wali maka, ‘Mitik maka obuka dipnunʼ tenen, el pol arye, lakuka yangalamle touk ubuka, sik yuk mutuku yu yin nang arye, ‘Bozra mutuku nang opnuyapʼ tenen, minopce olyanamake. Yu ap, mikip ap arye, olyanamak talak ara, sik Edom mutuku noutam yin talin nang nirya ara, ilil weik uplyeba, sik mikip kum danamle. Winipmanto ara, kilapu mi bomikca ani, mi delilamak talak ara, uk pia weik diplyeba, sik mitang ulamle touk upnamake.

Damsyik mutuku ikin ning deipnamle ati, nyabuk yupu

²³ Allah Yahweh arye, Damsyik mutuku noutam unyak nang ati, nyapdeibuk yupu ara, ani. Ara, Damasyik mutuku dam bukni, Hamat mutuku noutam unyak nang ap, tonda Arpad mutuku unyak nang arye, engen yupu kekebiceura, sikce, ‘Se, aning ara mambule,’ tenena ap, ilil una ap, unamle. Ara, yuk nang arye, Damsyik mutuku nang, akunum opnamake,’ nyabuka, engen yupu ton nyabikiba, kekebikirye, malye kanye bobuka, teniltonauk unamake. Sik anang talima noutam ara, nemalyap arye, dakeiam asa kum unamake. ‘Se, yata wiripnamap do?’ tenen, imun kanye bona ap, ilil una ap, kanye windung-wandung ana ap, unamake. Winipmanto ara, kumanya mikip arye dopliba, weik laut mekwen deice, mek kait mikip weik arye welelamle touk, upnamake.

²⁴ Damsyik mutuku noutam unyak nang nirya ara, ‘Se, yata wiriptibye kume,’ tenebikirye, ‘Yuk mutuku bikbik abuka bindopnamapʼ tenen, piripdenamak bukni, kikliman kum ati, aning batakikirye, sik mutuku uk daunamake. Deiyok ara, atalak ara sik nong mitang upliba, sik ilil pia weik upnamla ati, adiparyuk, sik talima daksakliba, imun kanye bobuka unamake. Bikbik abuka binmanto kum upnamake. Winipmanto ara, atalak ara, anggun Damsyik mutuku nang nirya ara, kilapu mi bomikca ani, mi deiyok dinmaliba, uk dolamak touk, sik anang babye atonun winipnamake.

²⁵ Aning winiplyeura, yuk nang nirya ara, “Se, Damsyik mutuku nirya ara, mutuku-mutuku nirya unyak nang arye, akunum bikamupu bukni, wini talak ara, Allah arye, sik wenena ati, el kanye talima noutam aryuk, ‘Amutuku nang dauaplyeʼ tenen, anang akunum batakmale,” nyabuka, malye nyanamake. Min talak ara, Damsyik mutuku nang ara, telebuk ulamika ati, sik pin-pin kanye bobuka ulamik bukni, wini talak, sik nirya ara, kanye deibuka kum unyake. Ikin kanye dem bobuka unyake.

²⁶ Na Allah arye, amutuku nang wenepnamne talak ara, Damsyik mutuku unyak wel nang nirya, amutuku noutam weik bisik banyak sukum arye, sakuka poulbikirye, dipnamake. Tonda, amutuku yin talin nang nirya ara, tonok sum deice aryuk, yuk mutuku yu nang arye, yanuka obikirye, malye kipnamake. ‘'Amutuku yin talin nang nirya ara, kum kipdeipnamake.”

²⁷ “Na Allah Yahweh, im deice unyak yin talin malaikat nirya ara, sik deiyoknye ununa ati, nara Pia Mikip Weiknye unune. Ati, naryuk, Damsyik mutuku noutam, weik uku dongopnamne. Auku buk arye dinmalya ani, sik min talak arye, kat weik keil dobuka, poka domik tembok nirya ap, tonda sik ninye deiyoknye Raja Benhadad, el pia teleb aik, el si istana, aweik aik nirya ap, uku dibuka, kum danamle. Nara, Allah Yahweh arye, ayupu akunum nyapmasina ati, dipkoprob nong kunupnamle!”

Kedar yala nang ap, Hasor mutuku nang ap, sik dam ikin ning yanamuka ati, nyabuk yupu

²⁸ Ura, na Allah Yahweh arye, Kedar yala nang ap, Hasor mutuku noutam unyak nang ati, ayupu ton nyapsine. Ara, ninye deiyok kibuka, Hasor mutuku ulamik nang ap, sik mutuku ap, Raja birye taleamuka ati, ayupu nyapdeipsine. Hasor mutuku nirya ara, Babel mutuku talibuka ulamuk ninye deiyoknye, Raja Nebukadnesar birye olamukce, alubuka dololamuk. Hasor mutuku ati ara, narye winipnamne. Yuk mutuku yu yin talin nang ati, “Anggun minop tikmunyak arye, omutuku, Kedar yala nang unyak mutuku olbinamlume. Ara, keting panalyangan tam mutuku noutam unyak nang nirya ati, olbimunce, anang nirya adiparyuk opmunce, kum daneipnamlume!

²⁹ Winipmunyopura, sikce talibuka weinyak kam ning domba basam ap, unta basam ap, sikce tenda arye domik asik nirya ap, amutuku nang arye taleamik bona nirya ap, alubuka dopropnamlume. Winipmunyopura, sik atam unyak nang nirya ara, weik yupu deice arye nyapnamake. Se, kanye imun weik ning, nun dam akunum yanmasile! Nunda ilil weik upmasile nyabikirye, ngalukuka engenamake.”

³⁰ “Aning ara, na Allah Yahweh arye, anggun Hasor mutuku ululum nang ati nyapsine. Se, anggun adiparyuk bai sakuka, yuk mutuku bikbik abuka binamlume! Tonda, pia pera mutuku bimunce, yuk nang arye kum eipmantoak, pia duknulbinamlume. Ilil upliba, duknulbinamluma deiyok ara ani. Ara, Babel mutuku taleamuk ninye deiyoknye, Raja Nebukadnesar birye, anggun Hasor mutuku ululum nang ati, ‘Anang olbinamneʼ tenen, Winipnamne, winipnamne,’ nyabuka, yupu akunum nyabuka, kintinipmale.”

³¹ “Bukni, narye Raja Nebukadnesar biti nyapne. Kume, anda, ‘Aminyan talakʼ tenena kume. Adiparyuk, sik Hasor mutuku unyak nang ati, minop olbinulyame! Sik Hasor mutuku nang ara, sik namin asa arye, talye kanye deibuka unyake. Tonda, sikce domik weik asik ara, keil poka ton kum domika ati, caknam aryuk, sik mutuku wekmince, opnamtume. Tonda, sik melipmanto nang ara, dam kum unyake. Sik Hasor mutuku ara, yukakuk ulule. Tonda, sik mutuku wekna ati, bisik bublan kat ning, besi arye deibuka, kum domikce, pia kum lelibika ati, caknam aryuk olbitume.

³² Winibuka unyaka ati, sik anang arye talibuka weinyak kam ning, aning-aning nirya ap, unta basam ap, sapi basam ap, yuk ning nirya ap, alubuka dopropnamlume! Tonda, anang ap, tonda amutuku noutam, sik potong ara bumang arye kobik nang nirya ara, narye yuk mutuku dana-dana yakuka dopkwetepnirye, ikin ning weik arepnamne. Ara, na Allah aryuk, kanye imun weik ning dobuka, sik anang deice deipnamna ara, sik unyakak bukni, dana-dana tam nirya arye, yuk-yuk yala nang nirya babye, ikin ning ara dobuka, sik deice deipnamake.

³³ Winipnyopura, Hasor mutuku noutam nirya ara, amutuku nang opniba, kum dakcopura, sik mutuku ara, pia ati louk ubuka, oldem upnamle. Winiplyopura, amutuku noutam nirya ara, bai ulye kam dungnuna ati, amutuku uk yanuka unamle. Winipnamne mutuku noutam ara, ninye tonoknye babye, ton pia kum unamle. ‘Amutuku tuku babye, pia malye kipdeipnamne. “Nara, Allah Yahweh arye, akunum nyapdeipmana ati, aning ara, nong kunupnamle!” Allah arye nyabuk.

Allah arye, “Elam mutuku nang nirya ati, ikin ning dobuka deipnamne,” nyabuk yupu

³⁴ Ura, Yehuda mutuku nirya talina ati, Zedekia birye ninye deiyoknye, Raja winiryuk kibuk talak ara, Allah Yahweh arye, na nabi Yeremia dam yanuka, yupu ton nyapdeipnuk. Ara, Elam mutuku noutam unyak nang, sik wenena ati yupu, yanuka nyapdeipnuk yupu ara, ani.

³⁵ Nara Allah Yahweh, im deice unyak yin talin malaikat nirya, sik deiyoknye ununa ati, na mikip weiknye nyapnune. Ara, sik Elam mutuku noutam unyakce, ninye ona ati, mal ap, yin ap arye, ninye on ning nirya ara, kel weik bikamika ati, sikda mikip weik nang unyake. Bukni, na Allah arye, ayin talin nang nirya ara, obuka sirya daknamne.

³⁶ Winipnamne talak ara, na Allah arye, ‘Elam mutuku noutam unyak nang nirya, yakuka dopkwetepniba, dana-dana tam nirya, bikbik abuka bikiba, kum danamakʼ tenen, narye im deice ulye mikip weik kumanya dobuka, dana-dana tam nirya ara, dopkwetepnamne. Ara, narye winipniba, Elam mutuku dana-dana tam arye, yuk mutuku yu nang arye, yanuka opnamake. Winibikcopura, Elam mutuku noutam unyak nang nirya ara, ilil upliba, dana-dana mutuku nirya, bikbik abuka bindopnamake. Winipnyopura, sik mutuku batakikirye, amutuku dana-dana ulye mutuku nirya ara, sik amutuku binuka unamake. Tonok mutuku babye, ‘Amutuku binuka kum unamabeʼ tenen, kum luba kipnamake.

³⁷ Tonda, Elam mutuku nang ona ati, narye dopkwetepnamne yu nang ara, ‘Elam mutuku nang obuka, sirya daknuyabʼ tenen, sik dam yakcopura, Elam mutuku nang nirya arye, aning eibikirye, ilil weik unamle. Aning ara, na yu weik upnil ning ara, sikti, pia ikin ning arepnamne deice arye, wenepnamne. Ati, narye winipnya deice arye, yuk mutuku yu nang, sik ninye on parang ya bobikirye, sik Elam mutuku nang ati, olbinamake. Deiyok ara, narye sikti, wenepnirye, obuka sice buklopnamne. Ati narye yin talin nang arye, sik Elam nang ati, olbinamica ani, anang nirya akunum kum kipdeibikiba, sik mutuku noutam ara, pia tonoknye babye, ton kam kum unamle. Na Allah Yahweh arye, ayupu akunum nyapmasina ati, dipkoprob nong kunupnamle!

³⁸ Winipnyeura, anggun mutuku ninye deiyok nang Raja-Raja ap, anang amu tam pil dobuka deiyok talin nang ap, sik anang nirya akunum obukapnirye, sice buklopnamne. Winipnirye, anang yupu bokolina ap, atam mutuku nirya talina ati, Elam mutuku noutam, na ninye deiyoknye buna ati teleb ning, el si tahkta, dobuka deipnamne.

³⁹ Aning nirya ara, dipkoprob, anyapmasin ning atouk winipnamne. Bukni, aminyan doyanamle talak ara, Elam mutuku tamubuka teleb kipdeipyeba, sik min talak, pia telebuk ulamik touk, tuba tonap teleb kipdeipniba, anang arye teleb kanye bobuka, telebuk unamake. Ayupu nirya ara, na Allah Yahweh arye, akunum nyapdeipne. Allah arye nyabuk.