Yeremia 4 - Eipomek

Israel nang ati, ‘Malye-malye winilamik ning batakuka, na dam yanamlume,’ nyabuk yupu

¹ Allah arye, el mapu koproba Israel nang ati, nyabuk. Anggunda, nun ni Allah dam tamubuka yanuyabe,’ tenepmunyopura, adiparyuk yanululume. Winibuka yanamlum ning ara, Anggunda min talak arye, talye-talye ning ati, Nun ni Allah,” nyabuka, si erelamlum ning ara, na yu unulule. Ati, anggun adiparyuk aning batakmunce, tamubuka yamunyopura, natibuk moubuka talipnumunce, na siuk erenamnulume.

² Winimunce, na Allah si deice arye, “Dipkoprob uk unamabe,” nyapmunce, Nun ni koproba Allah, pia kam ulye touk, elce nyapsilye yupu nirya babye, pia dipkoprob uk ulule. Ati nun babye teleb diksukum una ap, tonda tilila yupu nyana ap, kum nyanamabe,” nyabuka, antonun winipmunyopura, yuk mutuku nirya unyak nang arye, anggunti eibuka biksikceura, sikce nati, “Naio, nun ton melipsilyame,” nyabuka moropnamake. Winibuka morobikceura, na Allah arye sik ayuk mutuku nang ati, melibuka teleb kipdeipnamne. Winipnyeba, sikce nati, na si pia erenamniyake. Allah arye nyabuk.

³ Allah arye Yehuda mutuku nang ap, Yerusalem mutuku nang ati nyabuk. Anggun wa wilamlum mutuku ara, wa wipnamlume. Anggun wa wibuka, yala koululumak ara, taice pabuka belelye tuku ara, kouna meme.

⁴ Anggunce na anggun ni koproba Allah dam, nyalin yupu nyapdeiamuk ning moubuka talipnamlume. Tonda se, sik Yehuda yala nang ap, Yerusalem mutuku ululum nang ati, ayupu nyapsine. Anggunce, ‘Nara Allah el ninguk wininune,’ tenenamlume. Aning kum winipmunyopura, na yu, uku buk dilamle touk unilye ning ara, anggun deice deipnamsine. Winipsinyeba, uku buk dilamle touk unamle ning ara, ninye yuk nang arye, tangapmanto kum upnamake. Winipnamak ning nirya ara, anggun malye un deice aryuk, ikin anggun dam yanganamsile.

‘Yehuda mutuku nang opnuyap’ tenen, warekdongobik yupu

⁵ ‘'Amutuku noutam nirya ara, pong alamle ning, el si terompet bobuka, pung apmunyeba, leilim weik nyapnamle! Yehuda mutuku nang ap, Yerusalem mutuku unyak nang ap, anggunti, leilim weik nyana deice arye laka nyapnamlume. Winipmunyeba, sik adiparyuk, bikbik abuka minop, ‘Ninye yuk nang arye opsikcak’ tenen, ati, asik noutamuk wekuka kalikinamake.

⁶ Allah el unak, Sion mutuku deice ban, bisik nuknulyame. Tunim abuka, una kume. Adiparyuk panabuka binunyake. Allah Yahweh arye, amutuku noutam ara, weik kanye imun una deiyok ning dopdeipnule. Ara, amutuku pia obuka batakna ati, dabu tam arye yanamake.

⁷ Yehuda yala nang, sik mal olan ati yanamak nang ara, winipmanto, Singa kus duknubuka ulamlya ani, ‘Din ton obuka diptinye’ tenen, elamle atonun, Yehuda nang, anggunti, yu tenesinyak nang ara, akunum kintinibuka yanamake. Ara, Yehuda mutuku nang, asik dobuka ulamikce mutuku nirya, daklobikba, asik oldemuk uplirye, tunim apnamle. Ninye ton amutuku pia kum unamake.

⁸ Winiplyeba, aning sik eibikirye, malye nyabuka ngalukikirye, engepnamake. Sikda, malye baju karung koni arye kinikuka laka kibikirye, malye nyanamake. Ara, Allah el yu, pia uku buk dilul touk unamle ning ara, Yehuda mutuku noutam ara, min kum winipmanto unamle.

⁹ Allah Yahweh arye nyabuk. “Atalak kiplyopura, Raja ninye deiyok nang ap, tonda ninye deiyok kibuka, amutuku talebik nang ap nirya ara, pin-pin kanye kum upnamle. Lik-lik asa uk upnamle. Tonda, Allah el aik pil don nang, sik imam-imam nang ara, ilil uplirye koulkoula daksaknamle. Tonda, Allah el yupu laka nyana deiyok nang, sik nabi-nabi nang ara, lukdakirye ilil upnamle.

¹⁰ Ati ara, na Yeremia birye ayupu nyapse. Na ni Allah Yahweh, anda mikip weiknye ulyame. Ance Yehuda yala nang ap, Yerusalem mutuku unyak nang ati, talye minin yupu nyanyake. Ara, anggunti, ‘Teleb kipdeipnamsine,’ nyapsulum bukni, wini talak yu nang arye, nun akunum ya lukuka opsiake.

¹¹ Atalak akunum yalyopura, “Yehuda yala nang ap, tonda Yerusalem mutuku unyak nang ati, tukwak ulul buppu weik kumanya ara, anggun dam pu abuka yangalamle,” nyabuka, laka nyabikiba kekepnamake. Akumanya ara, talye balamle ning yalirye, pu abuka dopnin balamle touk, kumanya kum yanamle.

¹² Ara talye kumanya kume. Mikip weik kumanya ara, Allah elcuk nyaplyeba yalirye, el mapu, sik Yehuda yala nang ap, Yerusalem mutuku unyak nang ap, sik wenena ati, dopnamle.

Yehuda yala nang yakirye, warekuka opnamaka ati, nyabuk yupu

¹³ Dipdebuka, sik mal olan nang yangana ara, dua arye mutuku nirya lipdongobuka yangalamle atonun ubuka yanamake. Tonda, ninye olyangana ati, balye deice bukuka balamak ning, sik mal olan nang kereta-kereta kuda ara, kumanya mikip arye pu abuka yangalamle touk upnamake. Maka on maka, lakuka yangalula ara, sik arye yangalul bukni, akuda basam nirya ara, minop bikbik abuka yanganyake. Winibuka yakirye, se, nun nirya yanuka, obuka sirya daknamsiake.

¹⁴ Yerusalem mutuku nang ati nyabuk. Anggun talima noutam arye, malye un ning tenelulum ning nirya ara, adiparyuk bataknamlume. Winipmunyeba, narye anggun nirya ara, lyepropnamsine. Yata talak arye do, anggun talima noutam arye malye teneplulum kanye ara, pia delinamlum do?

¹⁵ Dan yala nang unyak mutuku tam ap, tonda mutuku tam bukni, Efraim yala nang unyak mutuku tam ap arye, wipdeibikceba, malye yupu boyanuka, sik dam nyalyanganamake.

¹⁶ ‘Sik amutuku-amutuku noutam nirya, daunyak yala yuk-yuk nang nirya kekenamak’ tenen, yupu boyanuka nyanamlyame. Ara, sik Yerusalem mutuku unyak nang ap, tonda sik Yudea tam unyak nang nirya ap, anggun kanye moubuka unamlulume. Anggun mal olan nang ara, pia pera mutuku arye, anggun nirya ona ati yanganmak talak ara, akunum dam upmal atia.

¹⁷ Winibikirye, Yerusalem mutuku nang ona ati, ninye arye wa win dam kaliklamaka atonun winipnamake. Sik ona ati, antanap dongobuka warikdongopnamake. Aning winipnamaka deiyok ara, sik Yehuda mutuku unyak nang ap, Yerusalem weik asik unyak nang ap, na Allah dam pia malye winikirye, nati bataknikirye, na nyanun yupu pia kum kekeninyaka ati, na Allah arye wenepnamsine.

¹⁸ Se, Yehuda mutuku ululum nang ap, Yerusalem mutuku ululum nang ap, angguncuk malye weik ululuma deice arye, ikin dobuka, anggun dam deipdanamlume. Anggun domunye pil dolulum ning ap, tonda anggun deice ikin yalirye, anggun talima yanuka luksilyeba, uk dinamsile.

Yeremia birye Allah el mapu ati tenipdeyukce, talima uk dibuka ati, nyabuk yupu

¹⁹ Se, na imun kanye bobuka unamne! Nara namin asa arye kum uptinye ati, na kanye imun upnilyeba, pia ikin deice uk unune. Nara kanye darapdongobuka kum uptinye. Ara mal olalbinuca ati, terompet lelim nyabikce talak ara, kekepnirye, na talima duk-duk anulule. Na talima noutam ara, duk-duk anulule. Aning wininilya ara, ninye onyak nang arye, terompet deice lelim weik tonun yupu nyabikceba, na kekepnirye, talima uk dinulule.

²⁰ Weik kanye imun ning yalyopura, adiparyuk tuba ton ap, yuk kanye imun ning ton yanganamle. Tuba-tuba yangana uk ulirye, amutuku nirya ara, malye kililule. Tonda talye karin arye, natia doltakna aik ulubuka batakaninyake. Tonda, natia doltakan tenda aik dona ati, kambing bola wiamse ning nirya ara, minopce kwilikiltakanyake.

²¹ Nun mal olan nang arye, sik ninye olban talak ati ara, weik bendera ikmakcak, eilinyaka ara, yata talak ton ap, aning epnamne do? Danto talak arye, aning kum dalyeba, kum eipnamne do? Tonda, ninye olyanukce talak arye, bung-bung ana el si terompet, lelim weik nyalamle ning ara, yata talak ton ap, aninguk kekepnamne do? Dan talak arye aning kum datuba, tuba kum kekepnamne do? Nabi Yeremia birye nyabuk.

²² Allah Yahweh arye ayupu ton nyabuk. “Na mapu Sikda, pia walwal nang unyake. Sikda nati, kum bikininyake. Sikda amul kunukne nang atonun unyake. Sikda mitik tonun babye, ton moubuka kum bikinyakce, malye un ning weik tonun bikinyak nang unyake. Adeice arye teleb kibuka una ara, kum bikinyakce, nong kum ulule.”

Yeremia lengdar mapninto ubukce, dilamukak kanye imun weik ning yanganmokak, eibuka ati, nyabuk yupu

²³ Nabi Yeremia birye nyabuk. Lengdar mapninto upmasirye, tukwak mutuku tam dinmase ara, urasin ton kum kintinibukce, aning-aning nirya kum kibukba, pia lo uk ubukak eipse. Tonda, im deice tam erebuka dipdese ara, se, dirina kum ubukce, kunukna uk kibukak eipse.

²⁴ Narye aning nirya dilamsak, weik mutuku kon ap, tonda mitik mutuku dup ap nirya ara, pia weik lulukunmokce, pia weik tonun ning wininmokak, eipse.

²⁵ Narye dilamsak, tukwak mutuku nirya ara, ninye tonok nang babye ton unmikak, ninye ton kum eipse. Tonda, maka yala-yala nirya babye, amutuku ton kum unmikce, maka yala-yala nirya akunum lakuka bendopmikak, eipse.

²⁶ Tukwak mutuku-mutuku nirya dipdesiba, Allah arye, el mapu ati, yu ubukba wenebuk ning ara, min talak teleb sukun tuku uamuk bukni, adilamsak, tuku ara sisal sebuka, pia kata uk ubuk. Tonda, weik asik dobuka ulamik mutuku nirya ara, anyasik nirya akunum dakuka batakikba asik oldemuk ubukak, eipse. Allah Yahweh el dam, aning-aning nirya, pia malye ubukba, asik oldemuk ubuk. Ara, Allah Yahweh el weik yu arye, el mapu koproba, sik wenena ati winibuk.

²⁷ Aning-aning eipse deiyok ara, ani. Allah Yahweh arye nyabuk. Amutuku ubuk tuku deice nirya ara, sisal sebuka pia kata upnamle. Bukni, amutuku tuku, weik tam nirya ara, malye kipdeipnamne bukni, aning nirya ara, Sice buklobuka, kum kipdeipnamne.

²⁸ Narye na mapu koproba anggun wenena ati, ‘Winipnamsine,’ nyapdeipse yupu ara kum bataktinye. Ati ara, tukwak mutuku nirya ara, ikin uplyeba kanye ikin uplyopura, ninye nirya arye weik engenamake. Im deice tam nirya ara kunuknamle. Aning nirya winipnamla deiyok ara, ani. Na Allah arye, ‘Sik wenena ati, atalak ara winipnamsine, winipnamsine,’ nyabuka, akunum nyapdeipse ati, narye teinibuka nyapdeipse ning ara, kum kipdeiptinye. Na kanye tenyamse ning ara, punupnirye, kum bataktinye. Nyapdeipsuk talak uk akunum yalyopura, aning nirya dipkoprob nong upnamlarya!

²⁹ Sik mal olan nang, kuda basam balye deice bukuka, yin talibuka yangaceba, sik amutuku weik asik dobuka unyak nang ara, alelim kekebikirye, amutuku batakuka, bai sakuka, bikbik abuka bindopnamake. ‘Nun mal olan nang arye obuka sirya daksikcak’ tenen, sik bai mutuku ap, keil deiya duknubuka bindopnamake. Winibikceba, amutuku weik asik domika nirya ara, tunim nyalirye, oldemuk upnamle. Tonda, aning winiplyopura, amutuku nirya ara, ninye tonok ton pia kum unamake.

³⁰ Ati ara, se, anggun Yerusalem mutuku nang ap, Yudea mutuku nang ap ululum nango, Anggunda yata deiyok ati, ‘Urasin teleb kipdanuyabe’ tenen, Anggunda, baju ining bi ning ongolulum do? anggun bol deice emas ap, perak ap, deliluluma ara, yata deiyok ati do? Tonda, anggun asing potong dam ara, urasin teleb una ati likimunya ara, yata ati do? Anggunda, ‘Urasin teleb kidanamap’ tenen, winilulum ning ara, talye ati winilulume. Dipkoprob ning ara, anggun moun dosinyak nang ara, ton ap anggunti kum tenenamsiake. ‘Aning ara dauplye’ tenebuka, bataknamsiake. Sik anang arye tamubuka anggunti opnamsiake.

³¹ Na Yeremia lengdar mapsa deice arye kekelamsak, anang ara, kilapu mi deipnukca ati, mi deiyok dinmaliba, donmakce talak, ngalukulamak atonun unmikce, engenmikak kekepse. Sik ngalukna ara wel kil winiryuk mi deipnamlirye, uk dinmalyeba, ngaluklamak atonun unmikce, engenmikak kekepse. Akekepse ning nong ara, ani. Ara, sik Yerusalem mutuku unyak nang nirya ara, isin welebuka, ngosoklamak touk, nyabikirye engenamake. Sik amutuku unyak nang ara, taruk erebikirye, nyapnamake, “Se, nun amutuku unyap nang ara, ikin upsile. Ara, nun mal olan nang arye, opnusiake,” nyabuka, weik yupu arye ngalunamake. Nabi Yeremia birye nyabuk.