Yeremia 33 - Eipomek

Allah arye, “Yerusalem mutuku ap, Yudea tam nirya ap ati, doyanamle talak ara, tamubuka teleb kipdeipnamne,” nyabuk yupu

¹ Babel mutuku ninye deiyoknye biti, kalikna deiyok nang, sik wenen aik tuba ulamse talak ara, Allah Yahweh arye, yuk yupu ton, na dam yanuka nyapdeipnuke. Ayupu ara, ani.

² Nara Allah Yahweh arye, mutuku sirya, im sirya, nirya kwepdeipsirye, ‘Asukumuk pia aunamleʼ tenen, kwepdeibuka mikip kipdeipsinye birye, ayupu nyapkine. Na si ara, Yahweh unune.

³ Anggunce amutuku ulamlum ninye arye, nati, ‘Nun ni Allah, aminyan talak upnamle ning ara, lak nyapsilyame,’ nyabuka, moropnimunyopura, narye anggun moropnimunye ning kekebuka, laka nyanamsine. Ara, narye anggun bikina kum yupu, pia mambul weik ning, minop talak min kum laka nyapdeipsise ning, lak arye laka nyapdeipsiniba, kekepmunce, biknululume.

⁴ Aning ara, talye ati kum nyapkine. Deiyok ara, na Allah Yahweh arye anti, nyapkine. Nara, Israel nang nirya melibuka kalikisununa ati, anggunce na si erenululume. Narye amutuku talibuka, ninye deiyok nang, Yehuda tam Raja-Raja nang arye domik asik ap, tonda amutuku Yerusalem weik asik domik mutuku noutam, ninye asik weik tonun uluplomik ning ati, ayupu ton nyapnukine. Ara mince, anggun mal olan nang arye, amutuku warekdongobuka olyayikba, anggun amutuku noutam ululum nang arye, ‘Se, nun mal olan nang arye opsicak ati, amutuku mikip kipdeipnuyap,’ tenen ati, anggun asik weik tonun, akunum uluplopmunce, akeil ap, ayo ap dobuka, anggun mutuku dana-dana tam antanap dongobuka doamlum keil poka ati, tonap tabakuka, mikip kibibirye, dopnamabe. Ara, anggun mal olan nang, sik Babel mutuku yin talin nang arye, ‘Yerusalem cang keil poka dam, tuku lukuka deipmaba deice welebikirye, poka deice tam welebuka, amutuku noutam weknamapʼ tenen, tuku lubuka, Yerusalem cang keil poka dam deibik. Winibikba, anggun Yerusalem mutuku ululum nang arye, ‘Kume, nun mal olan nang arye, ninye on parang arye opsicakʼ tenen, anggun aik ap, Raja nang, sik aik ap uluplopmunce, aning dobuka, anggun poka mikip kipnamle ati, tonap tabakuka dopnamlume.

⁵ Atalak ara, anggunce Yerusalem mutuku ulum nang arye, ‘Kume, sik Babel nang arye yanuka opsicakʼ tenen, kitinipnamlum bukni, aminyan talak upnamle ning laka nyapnusine. Ara, anggun uluplopmalum aik, mitik tonun tuba aupmalye ning ara, sik Babel mutuku yin talin nang arye, anggun mutuku ninye pia weik tonun obikirye, anang sik nong dobuka, anggun aik weik tonun pum tam dongobikiba, anyaik nirya ninye nong aryuk lipnamsile. Ara, anggun amutuku nang malye tuba winiluluma ati, anggun wenena ati ara, na Allah yu pia weik upnuka ati, narye lo arepniba, sik Babel yin nang arye, anggun amutuku ululum nang weik tonun opsikiba, anggun ululum mutuku nirya ara, ninye nong aryuk lipnamsile. Awinipnamna ara, talye ati kum bukni, deiyok ara, anggun amutuku ululum nang, tuba malye-malye weik winiluluma ati, anggun wenena ati, narye amutuku ara, tonap kum eipnamane. Anggun ti, ‘Sikda dauaplye,dadipnamakʼ tenen, tuba kalekuka kum melinamsine.

⁶ Bukni, narye akunum tenyamse talak, dounamle talak ara, na Allah arye amutuku ap, amutuku unamak ninye ara, tuba tonap, lipsisikuka, teleb kipdeipnamne. Narye anggun ikin unamsil ning ap, anggun suse weik unamsil ning ap ara, tuba teleb kipdeipsinirye, kwetepnamsine. Na tenyamse talak ara, tuba tamubuka, teleb un ning ton arepnamne. Tonda, teleb kipnirye, melibuka kaliksinyopura, aminyan talak anggun mal olan nang arye, tonap kum olyanganamsiake. Anggunda talye kanye bobuka, telebuk unamlume.

⁷ Atalak ara, na Allah arye, sik Yehuda mutuku tam unyak nang ap, anggun Israel yala nang ap ara, pia teleb kipdeipnamsine. Ara, anoutam talak ara, anggun mal olan nang arye, akunum obuka, sice buklopnamsiak bukni, aminyan doyanganamle talak ara, mince pia teleb kibuka ulamlum touk, narye tonap, teleb kipdeipsiniba, aminyan talak babye, pia telebuk unamlume.

⁸ Aning kum bukni, tonda, anggun amutuku ululum nang arye, na deice akunum malye winilinumunye ning nirya ara, wipnirye, kum deipnirye, tonap teleb kipdeipnamsine. Tonda anggunce, nati, “Kume, Allah arye, ‘Wininamlume. Aning ara, pia kum wininamlume,’ nyapdeipsuk yupu ara, nunce pia kum kekenamabe,” nyabuka, yaniptapnulumce, malye weik winilamlum ning ap, narye, ‘Anang ara, bita oploptinye,’ tenyamsise ning ara, namin kipnirye, kum kipdeipnyopura, anggunda tuba teleb kipdeipnamsine.

⁹ Teleb kipdeipsinyopura, amutuku weik asik dolamlum ning, Yerusalem mutuku ati, narye ‘Pia telebe,’ tenepnirye kanye deipnamsine. Winipnyopura, amutuku ap, amutuku unamlum nang ara, sik yuk-yuk mutuku im sirya, mutuku sirya nirya unamak nang arye eibikirye, ‘Seʼ tenen, ilil upliba, sik nong sirim talipnamake. Tonda, na Allah ati, sikce si erenamniake. Deiyok ara, aminyan talak, sik Yerusalem mutuku unamak nang ati, narye teleb kipdeipnirye, sik amutuku noutam unamak nang ati, tuba tamubuka, pia teleb kipdeipnyopura, sikce talibuka wininamak ning ara, pia telebuk unamle.

¹⁰ Na Allah Yahweh arye nyapsine. Aminyan talak ara, yuk-yuk mutuku unyak nang arye, amutuku eibikirye, “Se, amutuku ara, oldemuk ulule. Ninye ap, ninye arye weilamak domba ato ning ap ara, pia kum ubuka ati, kam ton pia kum unyake. Tonda, Yehuda mutuku noutam dolamik asik nirya ara, akunum kum dayuke. Atonun, Yerusalem mutuku noutam bisikak nirya ara, ninye ton yanibuka, kum banyaka ati, louk ulule. Amutuku nirya ara oldemuk ulule,” nyanamake. Aning nyanamak bukni, aminyan doyanamle talak ara, narye aning nirya, tonap teleb kipdeipnamne.

¹¹ Bukni, aminyan doyanamle talak ara, amutuku noutam nirya, tuba tonap teleb kipdeipyopura, weik kwalya kwalibuka dinmakirye, kanye deibuka, yupu ding weik nyanmakiba, yuk mutuku nang arye kekepnamake. Tonda, wel nang arye, dopdakirye, sik kilapu donamak nang ap, sik sal donamak kilapu ap ara, kanye deibuka, pin-pin kanye arye nyanamak yupu ara, yuk mutuku nang arye kekepnamake. Tonda, yuk nang babye, na Allah ati, telebe nyana ati, arin ning, sikce boyanuka, na si eren aik dam boyangakirye, kanye lon mot nyanmakiba, yuk mutuku nang arye kekepnamake. Sik amutuku unamak nang arye nyanamak yupu ara ani. “Se, nun ni koproba Allah Yahweh ara, pia telebnye ulule! Elda, im deice yin talin malaikat nirya ara, sik deiyoknye ulula ati, el mikip pia weik aulule. El ti, nunce ‘Pia telebe,’ nyanyabe. Allah ara, nunti, pia bico tenesulula ati, elce nunti, ‘Wininamsine,’ nyalin yupu deice nyapdeiamsuk yupu nirya ara, pia melibuka arenamsile. Elce bico tenesilye ning ara, pia min kume kum danamle!” Anang arye, ayupu nyanamake. Sikce, na Allah ati ayupu nyanamniaka ara, talye ati kume. Deiyok ara, ani. Anggun mal olan nang arye, malye weik kipdeibik bukni, narye tonap, pia teleb kipdeipniba, minop talak, pia teleb ulamuk touk upnamle. Narye winipnamsina ati, na si erena ati, ayupu nyapmakine. Na Allah Yahweh arye nyapmasina ati, aning nirya ara, dipkoprob nong upnamlarya!

¹² Ati ara, na Allah Yahweh, im deice yin talin malaikat nirya, sik deiyoknye ununa ati, na mikip ara, pia weik unulule. Narye dipkoprob nyapsine. Amutuku noutam ara, aminyan talak oldemuk upliba, ninye ap, ninye arye winyak kam ning ap, kum danamle bukni, aminyan talak ara, aning nirya teleb kipdeipnamne. Tonda, amutuku noutam nirya ara, sik asik dolamik mutuku dam ara, sik weilamik domba basam ato ning dilamik, maning palamukak touk, dounamle talak ara, narye tuba tonap arepniba, weik tonun tonap paplirye, telebuk upnamlarya! Winiplyopura, sik domba basam weina deiyok nang arye, sik domba basam bobinuka, amaning wa noutam deipnamake. Binuka deibikcopura, adomba basam arye, maning ap, mutmuta ap, pia weik upliba, dibikcopura, kanye deibikirye, dikdik sebuka, asukumuk mapnamake.

¹³ Tonda, aning atonun, mutuku kon tam asik donamakak ap, Yerusalem mutuku dipdongobuka, keting kumulban tam mutuku amu tam ning ap, Yehuda tam dipdongobuka, iknapnye tam (arah selatan tam) buta mutuku ulyak ap, tonda Beyamin yala nang, sik mutuku tam donamakak ap, Yerusalem mutuku mitik asik donamakak ap, tonda Yehuda mutuku noutam, ninye arye asik donamakak nirya ara, sik domba wein nang arye, amutuku-amutuku wekikirye, sik domba nukunamake. Ayupu ara, na Allah Yahweh arye akunum nyapdeipmasina ati, dipkoprob nong upnamlarya nyapsine.

¹⁴ Na Allah Yahweh arye nyapsine. Na akunum tenyamse talak akunum kiplyopura, narye anggun Israel yala nang ap, Yehuda mutuku tam unyak nang ati, “'Winipnamsine,’ nyalin yupu, anggun deice nyapdeipsise ning ara, dipkoprob nong upnamle. Aning ara, ani.

¹⁵ Atalak ara, Daud birye deiamukba, dadeipdanin yanganyak nang, sik kan-kan noutam arye, narye tonoknye wipdeipnamne. Ara, pia diksukumuk talibuka wininamlanye wepnirye, ‘Elda ninye deiyoknye, Raja ton unamleʼ tenen, anye wipdeipnamne. Aninye deiyoknye bira, elce pia teleb, diksukum piluk donamle. Tonda, ninye yupu bokolin talak ara, dipkoprob ninguk nyaplirye, yupu bokolinamsile. Amutuku noutam diksukum dem teleb arye winibuka pil donamle.

¹⁶ Atalak noutam ara, Yehuda mutuku noutam unyak nang, anggun mal olan nang oplopniba, anang ap, tonda, Yerusalem mutuku weik asik noutam unyak nang ara, lyepropniba, sik anang nirya ara, teleb kanye deibuka unamake. Sikce, ‘Se, nun mal olan nang arye olyasicakʼ tenen, tuba kum teninamake. Atalak ara, amutuku nang arye, Yerusalem mutuku weik asik ati, “Amutuku el si ati ara, ‘Allah Yahweh nunti lyepsilirye, pia melibuka kalikinamsile,’ “nyabuka, si erenamake.

¹⁷ Awinipnamning ning ara, el deiyok ara ani. Na Allah Yahweh arye, nyalin yupu akunum nyapdeipsine. Ara, “Daud birye deiplyeba, dadeipdanin, banamak nang aryuk, ninye deiyok nang kibuka, Israel nang nirya pia talinamake. Yuk yala nang arye, Israel nang kum talinamake,” nyapsine.

¹⁸ Tonda, sik Lewi yala nang aryuk, na si eren aik pum tam pil dona ati, tuba-tuba imam piluk donamniyake. Sik yala nang ara, pia kum kum danamle. Tonda, sik Lewi yala nang aryuk, Israel nang, sik malye winin ning kum kina ati, na arena ati, domba ato ning obuka, uku dongolyangana ap, gandum duk arelyangana ap, tonda na si erebuka kina ati, yuk arin ning pil dona ap ara, sik Lewi yala nang aryuk, na dam yakirye, apil pia dolyanganamake. Yuk yala nang arye, na dam apil kum donamake. Allah arye nyabuk.

Allah arye, “Daud el yala nang ati nyalin yupu nyapdeipsise ning ara, pia aunamle,” nyabuk yupu

¹⁹ Allah Yahweh arye, na nabi Yeremia dam yanuka, ayupu nyapdeipnuke.

²⁰ Na Allah Yahweh arye, anti nyapkine. Daud ap, el yala nang ap ati, nyalin yupu deice, ‘Winipnamsine,’ nyapdeipse ning ara, pia unamle. Ayupu nyapse ning ara, ninye arye yupu kum seknitinge. Winipmanto ati nyapkine. Narye nyalin yupu deice arye, “Keting noutam babye, lukunyan babye, pia aunamle. Narye, ‘Atalak ani,’ akunum tenyamse touk, keting pia panaplirye, deipnamle. Tonda, keting pia kumupliba, kunuknamle,” nyapse. Anyapdeipse yupu ara, ninye arye min kume, kum kipdeiptinge. Aning nirya ara, na tenepse touk, pia aunamle.

²¹ Aning atonun ton, narye, na amu tam pil dolamnuknye, Raja Daud biti, nyalin yupu deice nyapdeipsirye, akunum koupdongopse. Aning babye, ninye arye pia kum yupu seknitinge. Ara, Raja Daud birye deiamukba, dadeipdanin banyak nang ara, sik kan-kan noutam arye, tuba tonoknye birye, Raja kibuka, Israel nang pia talinamle. Yuk yala nang arye, ‘Naʼ tenen nang kum talinamake. Tonda, aning atonun, narye sik Lewi yala nang ati, “Angguncuk, na si eren aik pum tam, imam pil ara, tuba-tuba donamlume,” nyapdeiamuk yupu deice nyapsirye, akunum kitipdongopse. Narye anyalin yupu nyapse ning babye, ninye arye yupu seknitingba, na nyapdeipsise yupu nirya, kume kum datu bukni, aning ara pia kum winipmanto ati, narye akunum nyapdeipsise nyalin yupu nirya ara, pia kum kum daneipnamake. Aning ara, pia kum winipmanto.

²² Winipmanto ara, im noutam ap, im deice kurya weik tiklamak touk, im noutam aulye ning ara, pia nukman kumto ulye touk, dabu tam weik laut kwen lilun, mek wininga weik ulamliba, ninye arye nukman kum ulamle touk, narye wipdeipnamne pil don nang babye, nukman kum unamake. Ara, na amu tam pil donanye, Raja Daud birye deiamukba, dadeipdanin banamak nang ap, Lewi yala nang arye deiamikba, dadeipdanin banamak nang, na si eren aik pil dona deiyok imam nang ap ara, na Allah arye, tuba tabakuka arepniba, sik yupa ara, pia weik unamake. Ayala bitinye nang ara, nukmanto kum unamake.

²³ Allah arye ayupu akunum nyabukopura, ayupu ton, na Yeremia dam yanuka nyapnuk. Ayupu ara, ani.

²⁴ Allah Yahweh arye nyabuk. Anda Yeremia akunum eibuka, bikilyame. Ton nang arye, anggun dam nyanyake. “Kume, sik Israel yala nang ap, Yehuda mutuku noutam unyak nang ara, Allah arye wipdeiamuk yala nang bitinye ara, Yehuda mutuku nang ap, Israel yala nang ap ara, mince Allah wipdeiamuk bukni, el babye, ‘Na likʼ tenen, akunum batakuke,” nyanyake. Tonda, talye daunyak nang arye, na mapu koproba sikti, ‘Kume, sik abitinye yala nang ara, talye nanguk unyake. Tonda sikda, mambul nang ulamika, negara khusus, teleb nang ulamik bukni, aning ara, tuba kum unyake,’ tenebikirye, malye yupu nyanyake.

²⁵ Bukni, na Allah Yahweh arye nyapsine. Narye keting noutam babye, lukunyan babye nirya ara, tonok nyalin yupu anggun deice nyapdeipsirye, akunum koulongolamak touk, ubuka deipse. Tonda, aning atonun, narye, ‘Im noutam ap, im deice ap, tukwak mutuku noutam ulye ning nirya ara, winibuka-winibuka unamlumʼ tenen, nyalin yupu nyapdeipse ning ara, pia aunamle. Aning ara, pia aunamla ati, kum punubuka bataknamne. Ayupu ara, akunum nyapdeipsa ati nyapne.

²⁶ Aning atonun, na mapu koproba, Yakub birye deiamukba, dadeipdanin banamak nang ap, tonda Raja Daud birye deiamukba, dadeipdanin banamak nang ati, ‘Winipnamsine,’ nyapdeiamuk yupu deice nyapdeipsise ning ara, punubuka kum bataknamne. Ayupu babye, pia talipnamne. Ati, Raja Daud birye deiamukba, dadeipdanin banyak nang kan-kan arye, tonoknye Raja wipdeipyopura, na mapu koproba, pia talipnamle. Ara, sik apu yapu mambul weik nang, Abraham ap, Isak ap, tonda Yakub ap, sikce deiamikba, dadeipdanin, banyak nang nirya ara, Daud el tamnye birye, pia talipnamle. Deiyok ara, narye na mapu koproba ati, bico tuba tenenune. Sik malye winilamik ning ati, adiparyuk wenebuka optinye bukni, aning kumce, na kanye aryuk, bico tenepnirye, sik malye ning namin kibuka kilipnamnarya. Winipnyopura, na mapu ara, telebuk kipdeipniba, minop talak, pia teleb ulamik touk, tuba tonap, telebuk kipdeipniba, telebuk unamake.