Yakobus 4 - Eipomek

“Dib tenena kum nang arye, sik wininyak ning talibuka winina meme,” nyabuk yupu

¹ Anggun yu upsiliba, walana ap, yupu deice malye yupu nyaldana ap ululuma ara, yata ning deiyok arye usulul do? Kume, teleb ning ap, malye ning ap, anggun talima noutam patatapsilyeura, teneluluma deice arye, anggun talima noutam anyak olalulume.

² ‘Aning doproptinye’ tenen, pia patasilye bukni, kum dololulume. ‘Yuk nang talinyak ning dalubuka doproptibye’ tenen, ton talak arye pia patapsiliba, teniltonauk ululume. Ton talak ara, anang ara oltakanauk ululume. Winilulum bukni, anggun patatapsilyeura, tenelulum ning ara, kum usulule. Tonda, anggun patapsilye ning ara, kum dopmanto ululume. Anggun patapsilye ning ara, ‘Allah elce arilnamsil’ tenen, Allah ati kum morolulume anya arye, kum dololulume. Walana ap, yupu deice malye yupu nyaldana anyuk winilulume.

³ Ton talak ara, Allah ati morolulum bukni, anggun talima noutam malye ning patapsilyeura, atenen deice arye morolulume ati, Allah arye aning kum arisulule. Kum arisilya deiyok ara, ani. Ara, ‘Aning doproptibirye, nun patasilye ninguk, talibuka unamabe’ tenen, patapsilibuk teneluluma deice arye morolulume ati, Allah arye kum arisulule.

⁴ Anggunda, Allah el tonok kanye deibuka dobolbalamtum bukni, yuk ning patapsilyeura, kanye delilulama anya arye, sik donyak kil batakuka, yuk kil dololamak nang atonun winilulume. Ara, Allah ti batakuka, yuk ninguk teneluluma atia. Anggunce aning kum tenipmalum do? Talya tukwak ubuk ning ap, diba tenena kum nang arye, Allah El Dib Kanye nyasulul yupu yaniltakirye, malye unyak ning ap, malye ning patapsilye ning ap ara, ‘Allah lik,’ tenebuka winina atonun nyapsine. Yata nang do nirya, ‘Talye tukwak ubuk ning nirya, anyuk talibuka unamne,’ tenebuka ulamice nang ara, atenenyak deice arye, ‘Allah na like,’ tenebuka akunum unyake. Ara tukwak malye ning ap, diba tenena kum ninye arye, malye unyak ning ap, Allah ap neika talibuka kum upmanto atia.

⁵ Allah el yupu deice arye nyasulule. “Allah arye arepsukbuk nun talima ak Dib Kanye usilya arye, ‘Anang ara na’ tenen, tenepsilirye, ‘Yuk ning pataplibuk na bataknicak’ tenen, pia kalikisulule.” Ayupu nyapsuka ara, talye yupu uk nyapsuka tenelulum do? Kume, Allah El Dib Kanye arye, ‘Yuk malye ning talibuka bicak’ tenen, pia kalikisulul ati, Allah arye, ‘Sik malye ubicak’ tenen, el mikip arisilya deice arye, pia tuba-tuba talibuka melisulule.

⁶ Aning ati ara, Allah yupu deice ayupu nyapsine. ‘Allah arye sik kanye talima erena nang ati, yaniltalule. Bukni, sik kanye talima darabuka amuak unyak nang ati, el mikip arilula deice arye, talibuka melilule.’ (Amsal 3:34)

Talima nimalye arye ubuka, Allah el amuak una ati, nyabuk yupu

⁷ Aning ati ara, anggun kanye talima nimalye arye ubuka, Allah el amuak umunce, el yupu uk kekenamlulume. Isa Mutuku Dongonye ati ara, el yupu kekebuka dobolbana kum arye, manya deibuka tunimapmunyopura, Isa Mutuku Dongonye anggun dam arye, sakdakuka yukak binamle.

⁸ Allah el tam kipdopmunyopura, Allah elce anggun dam unamle. Sik malye ning paliplibuk, taruk mek liklamak touk, anggun malye winimunye nang ara, anggun malye ning batakanamlulume. Anggun kanye bitinye kisululbuk, kanye bokoltosulul nang ara, anggun kanye talima noutam malye upsilye ning nirya batakanamlulume. Allah arye nyasilye yupu kekebuka wininamlulume. ‘Tonok kanye bobuka unamlum’ tenen, nyapsine.

⁹ Anggun malye winimunye ning ati, kanye imun kanye bobuka, talima sukupsilirye, malye nyabuka engenamlume. Anggun malye winilamlum ning ap, talye-talye ulamlum ning ap, tenebuka tenepra bamunce, akutunamlulum ning ara, amalye ning pununa ati, talima sukupsilirye, pia engenamlume. Tonda, malye winilalumce kanye deibuka winimunye ning ara, amalye ning pununa ati, yokdaksilibuk kanye pia teniltonauk ulamunce, kanye sukunauk unamlulume.

¹⁰ Anggun kanye talima nimalye arye ubuka, Allah el amuak kipdopmunyopura, Allah arye anggunti erepdeipnamsile.

“Yuk nang ati, minina yupu nyana meme,” nyabuk yupu

¹¹ Na kayapu nang, nun dib tenen nang unyaba anya arye, anggunce anggun kayapu nang ati, minina yupu kum nyalanamlulume. Anggun diba teneplum nang arye, yuk diba tenebik nang ati, malye yupu ap, minina yupu ap nyapmunce, sik nong deice deipmunyopura, ara Allah arye, ‘Wininamlulume, aning ara, kum wininamlulume,’ tenen, nyapsuk yupu yanina atonun ululume. Ara talye ati kume. Anggun babye diba teneplum nang arye, yuk diba tenenyak nang ati, “Anggunda malye nang ululume,” nyabuka, malye yupu nyalalulumopura, ara anggunda yupu bokolina deiyok nang atonun ululume. Aning ara, pia malye winilulume. Allah el yupu deice arye, “Malye yupu kum nyalanamlulume,” nyapsuk bukni, aning akunum winipmunyopura, el yupu akunum yaniplume. Allah arye nyapsuk yupu noutam bukni, ayupu nirya dobolbana kum arye, ton yupu yaniltana, ton yupu kekena kum umunya deice arye, yupu bokolina deiyok nang atonun akunum umunce, el yupu nirya yaniltalulume. Ati aning ara winina meme nyapsine.

¹² Allah arye, ‘Ninye nirya wininamak, aning ton kum wininamak’ tenen, yupu deiyok arepsuka Deiyoknye bira, Allah el tonok ulule. Tonda, ninye nirya sik winin ning ati, Yupu Bokolina Deiyoknye bira, el tonok ulule. Allah arye ton ninye ara lyelilulce, ton ninye ara weneplirye, oltakalule. Winilula deiyoknye bira, Allah el uka. Allah el aniryuk winilul bukni, anggunda yatato weik nang umunce, anggun kanye dukdongobuka neika ululum nang ati, “Anda telebe, anda malye,” nyabuka yupu bokolilalulum do? Aning nirya ara, winina meme nyapsine.

“Kwalibuka una ap, maknya kintinilina ap, pia meme,” nyabuk yupu

¹³ Ura, anggunce, ‘Ambusum do, arup do, otam weik karin mutuku bibirye, keting tamun tonok deice arye pil dolamibya ani, sirya dakeipyopura, yo bok weik dolonamabe’ tenen, talye luba kibuka nyalulum nang ati, na nyapnusin yupu kekepnululume.

¹⁴ Anggun ayupu nyalulum ning ara yata ati do? Ambusum winipnamasil ning, aning babye tenebuka kum kel keptuma ati, nyana meme. Anggun kam unamlulum talak nirya atonun ning nyapnusine. Dua puto welebli ani, keting deiplirye, keting bupu arye minopce kum danalamle touk ululume.

¹⁵ Ati ara, “Wininamabe, wininamabe,” nyaluluma atonun kum bukni, teleb yupu nyaptum ning ara, nyapnusine. Nyanamluma ara, “Allah arye, ‘Wininamake, wininamake,’ tenepsutu opura, elce milipsitu deice aniryuk winilamibya ani, apil ton, apil ton donamape,” nyaptume.

¹⁶ Winibuka nyaptum bukni, wini talak, ‘Wininamabe’ tenen, talye luba kibuka nyalulum ning ara, kwalina nang yupu nyalamak touk nyalulume. Ayupu atonun kwalina yupu nyana ara, pia malye. Ati ara aning winina meme.

¹⁷ Ati, yata nang do nirya, ‘Teleb un ning ani,’ tenebuka, akunum kel kinyak bukni, ‘Aning dauplye’ tenen, tunim abuka lubakinauk ubicopura, ara malye akunum wininyake.