Wahyu 22 - Eipomek

Kam Una Deiyok Mek balamukba, eibukce nyabuk yupu

¹ Aning nirya kel kipsirye, amalaikatnye birye kapdeipnukba, anyasik noutamak balamuk mek, Kam Una Deiyok Mek eipse. Amek ara, luma kum, pia mirin teleb mek ak balamuk ati ara, amek noutamak ara kuna kum dakamukak eipse. Amek pu ara, Allah ap, Domba Mi Atonye ap, sik weik ninye deiyok nang bun ning deice bururak sukum arye balule.

² Aminyan anyaik dana-dana noutamak ubuk bisik, emas bisik noutamak amek balule. Amek kup-kup, dana-dana ara, Kam Una Deiyok Yo tikamuk. Tikamukce, el yo duk moulamle li talak ara, awala-awala nirya duk pia moulule. Keting tamun tonok noutamak ara, yuk-yuk bukni, like 12 kali duk moulule. Kam Una Deiyok Yo, el yo bok ara, atalak kam unamak ninye mutuku-mutuku nirya, sik kwetena ati, pia ayo punduk arye kwetenamle.

³ Doryanamle talak noutamak nirya ara, Allah arye, ‘Aning ara na like,’ tenelul ning ara pia kum unamle. Allah arye ninye wenena ati, kintinilin ning ara, amutuku pia kum unamle. Anyasik noutamak ara, Allah ap, Domba Mi Atonye ap, sik weik bun ning deice burikirye, sik bitinye arye aning nirya ap, amutuku nirya ap, talibuka weik deiyok nang unamrake. Anyasik noutamak unamak ninye nirya arye, Allah el amu tam bukuka, el pil atibuk pia donamake.

⁴ Allah el mapu nirya arye, el urasin, sik asing arye eipnamake. Sik asok deice Allah el si sekeipnamle.

⁵ Dotalak yanamle keting tamun nirya noutamak ara, lukunyan malamap atonun kum upnamle. Pia berekeltaknauk upnamle. Tonda, Yerusalem Winiryuk mutuku (Yerusalem Baru nyalamiknye) noutamak unamak ninye ara, weisa dirin ap, keting dirin ap ati, pia kum patanamle. Nun Weik Deiyoknye Allah arye, el dirin deice aryuk, dilamikirye banamake. Dotalak yanamle keting tamun nirya noutamak ara, Allah arye talilulba, amutuku noutamak unamak ninye nirya ara, el ap aning-aning nirya talibuka, deiyok ninye pia unamake.

⁶ Malaikat arye ayupu ton nyapnuke. “An kekepmamu yupu nirya ara, pia dib yupu uk ulula ati, ninye nirya arye ayupu diba tenepnamake. Nun Weik Deiyoknye Allah, el yupu laka nyalamik ninye, sik nabi-nabi nang sik kanye talima talyamukba, sikce el yupu laka nyabuka seklamik. Anye elcuk, ‘Na mapu nirya arye aminyan winipnamle ning kel kipnamak’ tenen, el malaikat dopkwetebukba, an Yohanes ati laka nyapmakile,” amalaikat arye nyabukba, kekepse.

Aminyan talak, Yesus arye tamubuka yanamla ati, nyabuk yupu

⁷ Ayupu kekepse talak ara, aminyan yanamlannye Yesus arye nyabuk. “Anggun kanye mouplulume. Na minopce yanamne. Yata nang do nirya, Yohanes arye sekeipnusil buku noutamak ulul yupu kekebikirye, ayupu nyasilye touk pia talibuka unamak ninye ara, Allah arye teleb kipdeipsiliba, kanye deibuka pia telebuk unamake,” Yesus arye nyapnukba, na Yohanes arye nyapsine.

⁸ Na Yohanes arye abuku noutamak sekeipmasin ning nirya ara, narye eipse. Abuku noutamak ulul yupu nirya ara, narye kekepse. Aning-aning nirya kekepsirye, eipsopura, ‘Se’ tenen, mambul kanye bopsirye, aning nirya kapdeipnuk malaikat ati, ‘Si erepnun’ tenen, el yan dam gutam tuku dipdongobuka bukse.

⁹ Winipse bukni, amalaikatnye birye nyapnuke. “Na ti si erena kume. An ap, Allah ati diba tenelamikce, Allah el yupu laka nyanyak nabi-nabi nang, an du yapu atonun ninye ap, abuku noutamak seknulam yupu talibuka unamak ninye nirya ap, anggunce Allah el amu tam bukuka, el piluk dolulume. Anggunce winilamlum touk, na babye Allah el piluk donuna ati ara, nati si kum erepnunilam bukni, Allah eltibuk kibuka, el siuk pia erenamlulume,” nyapnuke.

¹⁰ Ayupu nyapnukopura, ayupu ton dukdongobuka nyabuk. “Amenyan sirya talak upnamle ning ati, abuku noutamak seknulam yupu nirya ara, duknuna ara meme. Aning nirya wininamle talak akunum dam yanmala ati, aning kum wininamlulume. Abuku seknulam ning nirya, ‘Ninye nirya kel biknamak’ tenen, laka aryuk nyanamlyame.

¹¹ Bukni, pia malye wininyak ninye ara, tuba malyeuk wininamake. Allah el ulul ning nirya ati, ‘Nun like’ tenen, yanibikirye, malye winin ninguk talibuka unyak ninye ara, apia unamake. Teleb winin ninguk talibuka diksukum wininyak ninye ara, tuba teleb ninguk wininamake. Malye ning pia kum ululba, diksukumuk wininyak ninye, Allah el mapu koprop ara, diksukumuk wininamake,” nyapnukba, kekepse.

¹² Ayupu kekepseura, Yesus arye ayupu nyapnuke. “Anggun kanye mouplulume. Nara, minopce anggun dam yanamne. Narye tukwak ninye sik dekna ati, menenga ning ap wenen ning ap ara, akunum kintinipse. Ninye im sirya, mutuku sirya nirya ati ara, sik wininyak ning aupmalye touk, anirya dipdenirye, anggunti yupu lipsisikuka bokeipsenirye, wenepnamsene.

¹³ Nara, aning-aning nirya min kum uamuk talak ara, na ulamse. Aning-aning nirya akunum kum dalyeura, nauk pia unamne. Nara, Deiyok Kouna Deiyoknye ap, tonda Sirya Dakna Deiyoknye ap unune. Min Deiyok Kounanye ap, Aminyan Sirya Daknanye ap, anirya ara na uka.”

¹⁴ “Ninye arye, sik baju nininga bolpipliba, ‘Lek upnul’ tenen, mek liklamak touk, yata nang do nirya, na Yesus ati diba tenebica deice arye, sik malye ning kum daneiamsesi ninye ara, Allah arye aninye ati teleb kipdeipliba, kanye deibuka telebuk unamake. Aninye ara, Kam Una Deiyok Yo, el duk dakuka diptinge. Tonda, ananguk Yerusalem Winiryuk dana-dana dobik poka buplan noutamak arye, talye urdem wektingce, anyasik noutamak talye urdem wekenamake.

¹⁵ Bukni, anyaik noutamak pia kum wekmanto ninye, bai tam atonun unamak ninye ara, pia malye-malye ninguk talibuka wininyak ninye. Ara, kir dona ap, bai mal ona ap, isa mirye tenekirye, aning ayala-ayala nirya pil donyak ninye ap, talye yolanyak ninye ap, ninye oltakanyak ninye ap, talye ning ati, ‘Nun ni kopropa’ tenen, si erenyak ninye ap, tilila winin ning aning-aning nirya ati kanye deibuka tilila pil donyak ninye ap, sik nirya ara, Yerusalem Winiryuk mutuku pia kum weknamake.”

¹⁶ “Na Yesus arye, na im deice pil dona nang, malaikat dobuka an dam dopkwetepmakina ara, ‘Ayupu nirya laka nyapkikiba, ance nati diba tenenyak ninye nirya, laka nyalbinalam’ tenen, amalaikat dopdeipmakine. Minop talak ulamuknye Raja Daud birye deibukba, dadeipdanin yangalamika ani, deibik mi, weik mambul mi ara, na uka. Na si ati, ‘Berentam Talak Panabuka Tikilamla Kurya,’ nyaninyake.”

¹⁷ “Allah El Dib Kanye ap, tonda Domba Mi Atonye birye, el dopnamle kil ato nang, sik diba tenenyak ninye ap, sik nirya arye nati, ‘Yanamle,’ nyabuka moroninyake. Ayupu kekebikirye, diba tenenyak ninye nirya arye nati, ‘Yalyame,’ nyabuka moroninyake. Yata ninye do nirya, kam una deiyok mek ati patalul ninye nirya ara, na dam yangana telebe. Tonda, ‘Se, amek ara dobuka diptinye’ tenen, pia pataliba, kanye talima engelul nang nirya ati, narye kam una deiyok mek, dekna kum urdem arye kwebuka arenamsin ati, amek patalul ninye nirya arye kam una deiyok mek dolyangana telebuka.”

¹⁸ “Bukni, yata ninye do nirya, aminyan talak upnamle ning ati, abuku noutamak nyalul yupu dobuka peterebikiba, kekenamak ninye nirya ara, nyapsine. Anggun kanye mouplulume. Ayupu noutamak arye sik kanye aryuk tenebice yupu ap tabakuka nyabikcopura, Allah arye aninye ati weneplirye, abuku noutamak kanye imun ning laka nyapmakina nirya ara, sik nong deice deipnamle.

¹⁹ Aning atonun, abuku noutamak aminyan winipnamle ning ati, lak len yupu ton wilibuka batakikirye, ‘Aning kum nyapnuyap’ tenen, ayupu tonok ning babye batakanyak ninye ati ara, Allah arye aninye ati weik arye wenepnamle. Ara, abuku noutamak laka nyapmakin ning, kam una deiyok yo duk dina ap, Allah el teleb asik el si ara, Yerusalem Winiryuk mutuku una ap, aninye dopdopmanto ning, Allah arye aning ila tamubuka dopropliba, aninye amutuku wekuka pia kum unamake.”

²⁰ Abuku noutamak ulul yupu nyalulnye, na Yesus arye, “Na dipkoprop minopce anggun dam yanamne, nyapsine,” nyabukba, kekepse. Ati ara, na Yohanes arye, “Nun Deiyoknye Yesus, adiparyuk yalyame,” nyanune. Tonda, ‘Aning dipkoprop winipnamle’ tenen, “Amin,” nyapne.

²¹ Winira, ‘Nun Deiyoknye Yesus, el kanye aryuk bico tenesilirye, melisilye ning ara, Allah el mapu nirya ati, weika arye arenamsile’ tenen, anggun nirya ati, Allah morosunune. Ati, “Amin,” nyapne. Telebe, na Yohanes arye nyapsine. Asukumuk deipne. Akunuma