Wahyu 2 - Eipomek

Allah arye Efesus mutuku diba tenelamik ninye ati, nyabuk yupu

¹ Ninye Mi Koprop Atonunye birye nyapnuk. “Yohanes, ance Efesus mutuku diba tenenyak ninye, sik melin malaikat ati ayupu sekuka dopdeiplyame. Dopdeipnulam yupu ara, ani.” Ayupu nyapmakilinye bira, talinye kume. Na sirik taruk arye kurya tekbarye talinune. Tonda, narye atekbarye weisa dirina ning eipmase ning noutamak banune. Narye ayupu nyapkine.

² Anggun ululum ning nirya ap, anggun ikin pil weika arye dolamlum ning ap ara, kel bikamsise. Anggun nong deice ikin ning awamukba, batakna kumce, pia pi dobuka, na pil tuba dolamlum ning ara, na kele. Anggunce, yuk pia malye wininyak ninye ati, ‘Nun like’ tenen, leibuka yuk ululuma ara, na kele. Tilila ninye arye, “Allah el yupu dobuka peterelbana ati, deiyok kouna deiyok nang, Rasul nang unyabe,” nyabuka talye nyaltakalamik bukni, anggun Efesus mutuku ninye arye, ‘Anang ara dib do, tilila do?’ tenen, asilelamlume, ‘Anang ara tilila nang uka,’ tenebuka kel kiyamlum ning ara, kel bikamsise.

³ Tonda, nati diba tenebuka na siuk erenumunyeba, malye nang arye, ikin ning weika arye anggun nong deice delilamsika babye, anggunce, ‘Nun like’ tenen, kum bataknulum bukni, pia pi dobuka, na piluk tuba dolamnulume. Aning nirya ara, na kel bikamse.

⁴ Bukni, malye ulamluma ati, yupu lepsisikuka bokeipnamsina deiyok ning ara, anye nyapnusine. Ara, winiryuk deiyok kouplum talak ara, nati diba tenebuka, anggun kanye talima weika arye na deiceuk delilamnulum bukni, wini talak ara, mitik anun aryuk nati kanye delinilyame.

⁵ Ati, anggun moubuka tenenamlulume. Minop talak nati kanye deiyamnulum ning ara, pia teleb bukni, wini talak ululuma ara, pia yuk tenebuka ululume. Mitika aryuk kanye delinululume. Amalye winiplum ning ati, batakmunce, urasin tamubuka, minop tam pia teleb ulamlum touk, ila tuba tonap winipmunyopura, telebe nyapsitinye. Wini talak anggun malye winiplum ning ati, kum batakmunyopura, narye anggun dam yanirye, anggun weisa delina deiyok ning deipsa ara, dopnamsine.

⁶ Aning nyapmasin bukni, tonok ning teleb ubuka ululum ning ati ara, na kanye deipsine. Ara, sik pia malye ninye, Nikolaus mutuku ninye arye malye wininyak ning ati, anggunce Efesus mutuku ninye arye, ‘Nun like’ tenelulum touk, na babye atonun, ‘Aning ara na like,’ tenenuna anya arye, aning ati na kanye deipsine.

⁷ Anggun amul wapsilyopura, ‘Ayupu deiyok ara ani’ tenen, kekepmanto ninye nirya ara, Allah El Dib Kanye arye, Allah diba tenenyak ninye nirya ati nyalul yupu ara, moubuka kekenamlulume. Ara, malye winin ning nirya ati, malye kibuka kinyak ninye nirya ati ara, na pia teleb ununa noutamak tikuk yo ati, “Teleb amolul yo duk ara anggunda dakuka diplulum,” nyapnamne. Ayo duk din ning ninye nirya ara, pia kamuk unamak anya arye, ayo el si ara, Kam Una Yo nyanyabe. “Ayupu nirya ara, Efesus mutuku diba tenebuka unyak ninye ati nyapnamlyame,” nyapnuke.

Allah arye Semirna mutuku diba tenelamik ninye ati, nyabuk yupu

⁸ Ninye Mi Koprop Atonunye birye nyapnuke. “Yohanes, ance Semirna mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara, ani.” Aning-aning nirya min kum uamuk talak ara, na akunum ulamse ati, nara Deiyok Kina Deiyoknye unune. Tonda, aning-aning nirya akunum kum uplye talak babye, na pia kam unamne anya arye, nara Sirya Dakna Deiyoknye unune. Na dipse bukni, ila tuba tonap kam buksirye, pia kam unune. Narye anggun Semirna mutuku ninye ati nyapsine.

⁹ Anggun imun kanye dobuka umunye ning ap, ikin usilye ning ap, aning-aning nirya kum dasukba, talye bona utotoa kum ninye umunye ning ap ara, na kel bikamsise. Aning-aning nirya kum talilulum bukni, na kanye ara, anggunda bona uto-uto talin ninye atonun ululume. Sik yuk nang arye, “Nunda, dipkoprop Yahudi yala ninye, Allah el mapu unyabe,” nyabuka talye nyaltakalamak ninye arye, anggun Semirna mutuku diba tenena nang ati, malye yupu weika arye nyasinyak deice arye lululisinyaka ara, na kele. Aning ara, Isa Mutuku Dongonye arye talilulba, el siuk erenyake. Na mapu kum unyake.

¹⁰ Amenyan talak ikin ning weik, anggun nong deice upsilyeba, kanye imun kanye bonamluma ati ara, ilil una meme. Na dipkoprop nyapsine. Isa Mutuku Dongonye arye, anggunti, ‘Aninye malye winipting’ tenen, yupu nyapliba, malye nang anggun kan-kan arye, ton ninye dopdobikirye, wenena aik dongonamsika deice arye asilenamsile. Anggunce nati diba tenepnuluma ati ara, ikin ning weika arye anggun nong deice delinamsiake. Ara yupa weik 10 sum deice arye, ikin ning delinamsiake. Winipnamsiaka babye, natibuk diba tenebuka darapdongobuka umunyebuk, malye nang arye oplopsica babye, pia kum bataknamnulume. Pia kum bataknumunyopura, narye anggun dekna ning dolona ati, pia kam una deiyok ning arepsinyeura, pia kamuk unamlume.

¹¹ Aning ati ara, anggun amul aupsililiba, ayupu kekepmanto ululum ninye nirya ara, Allah El Dib Kanye arye, Allah diba tenenyak ninye nirya ati nyalul yupu ara, moubuka kekenamlulume. Malye winin ning nirya ati, malye kibuka kinyak ninye nirya ara, ninye dipna like bitinye talak dipnamak ning ara, sik kum dipnamake. Malye winin ninye ila tuba tonap like bitinye dipnamak bukni, malye ning ati, ‘Nun like’ tenebuka, malye kilamice ninye ara kume. Kamuk unamake. Ayupu nirya ara, Semirna mutuku diba tenebuka unyak ninye ati nyapnamlyame. Ayupu nirya nyapnuke.

Allah arye Pergamus mutuku diba tenelamik ninye ati, nyabuk yupu

¹² Ninye Mi Koprop Atonunye birye nyapnuke. “Yohanes, ance Pergamus mutuku diba tenenyak ninye, sik melin malaikat ati ayupu sekuka dopdeiplyame. Dopdeipnulam yupu ara, ani.” “Narye parang ya dana-dana tam, si taca weik ulul ning talinanye birye, sik Pergamus mutuku nang ati ayupu nyapsine.

¹³ Anggun ulamlum mutuku ara, na kele. Isa Mutuku Dongonye arye amutuku ninye nirya ati talilulba, el yupu kekebuka dobolbanyake. Amutuku ninye weika arye wininyak bukni, anggunda, nati kum bataknulumce, tuba diba tenebuka dobolyanganululume. Batakna pia kum aryuk, na yupu dobuka peterelamuknye, el si ara Antipas, anggun mutuku malye nang arye oplomika ati, ikin weik ulamsuk bukni, wini talak noutamak babye, nati kum batakamnulume. Tuba diba tenelulume. Bukni, anggun mutuku noutamak ara, Isa Mutuku Dongonye ulule.”

¹⁴ “Ikin ulamsuka babye, nati kum bataknulumce, teleb winilamlum bukni, ton ning ara, malye winiplum ning ati, wenebuka yupu bokeipnamsine. Tonok ning ara, anggun kan-kan noutamak ara, ton nang arye minopnye Bileam el nyalamuk yupu talibuka dobolbanyake. Bileam birye, yuknye el si ara, Balak biti laka nyabukba, Balak birye Israel ninye sik kanye talima lipdobukba, malye-malye winilamik. Peterebuka deice arye malye winilamik ning ara, Isa Mutuku Dongonye si erena ati, kam ning obuka arilamik ning tup dobuka dilamik. Tonda, ubula yolana ning aning-aning nirya winilamik. Bileam malye yupu peterelamuka deice arye, Israel ninye amalye ning winilamik touk, anggun Pergamus mutuku noutamak ton ninye arye atonun wininyake.”

¹⁵ “Bitinye ning ara, arup nyapmasin touk, sik pia malye ninye Nikolaus ninye arye peterenyak yupu kekebuka dobolbanyak ninye ton, sik Pergamus mutuku noutamak unyake.

¹⁶ Aning babye pia malye ati, aning nirya batakuka donga tamubuka, diksukumuk unamlulume. Kumopura, narye anggun dam minopce batakdongopnyopura, na si bam bol pum belepnuk parang ya arye, atilila yupu talibuka dobolbanyak ninye ati, oplopnirye malye kipnamne.”

¹⁷ “Aning ati ara, anggun amul aupsililiba, ‘Ayupu deiyok ani’ tenen, kekepmanto ululum ninye nirya ara, Allah El Dib Kanye arye, Allah diba tenenyak ninye nirya ati nyalul yupu ara, moubuka kekenamlulume. Malye winin ning nirya ati, ‘Nun like’ tenebikirye, malye kilamice ninye nirya ati ara, narye duknyamse kwaning, el si ara manna, bokuka arenamsine. Tonda anggun winiryuk si ati, tenebuka wipnirye, silye keil kurun ning deice seknyopura, aninye ati arepnamsine. Anggun winiryuk si ara, yuk ninye kum kel biknamake. Doprobica ninye aryuk, sik bidamang siuk kel biknamake. Ayupu nirya ara, Pergamus mutuku unyak diba tenena ninye ati nyapnamlyame,” nyapnuke. Ninye Mi Koprop Atonunye arye, na Yohanes ati nyapnuke.

Allah arye, Tiatira mutuku diba tenelamik ninye ati, nyabuk yupu

¹⁸ Ninye Mi Koprop Atonunye birye nyapnuke. “Yohanes, ance Tiatira mutuku diba tenenyak ninye, sik melina malaikat ati ayupu sekuka dopdeiplyame. Ayupu ara, ani.” “Nara, Allah el Mi Kopropa arye nyapkine. Na asing ara, weik uku buk dilamle touk unulule. Tonda, na yan ara besi ning dobuka uku noutamak dongobikiba, diplirye, mereng-mereng nyalamle touk unululnye birye nyapsine.

¹⁹ Anggun ululum ning nirya ara, akunum kel bikamsise. Ara, anggunce yuk ninye ati bico tenebuka melilulum ning ap, Allah ati weik arye diba tenemunye ning ap, na pil ati batakna kum pia domunye ning ap, ikin ning upmasilya babye, pia pi dobuka pil dolulum ning ap, anirya ara, na kel bikamsise. Tonda, winiryuk deiyok koubuka diba tenyamnulum talak ara, aning-aning nirya mitik anun arye ulamlum bukni, wini talak ara weika arye winimunye ning ara, akunum kel bikisunune.”

²⁰ “Aning nirya ara, teleb bukni, aning awabsilya babye, anggun tuba malye umunye ning ati, wenebuka yupu bokeipnamsine. Ara, tonok malye winilul kil, el si ara Isebel birye, ‘Nara, Allah yupu ap, aminyan winipnamle ning ap ati, laka nyana deiyok kil, nabi kil unune,’ nyabuka, el bidamnye erelalulce, talye nyaltakalul bukni, dib kum nyalule. Akil ara, pia malye kil bukni, anggunce Tiatira mutuku ninye arye, ‘Dauplye, nun ap, akil ap neika unyaba ara, malye kume’ tenen, neika tuba ululume.” “Aning ara malye umunya ati nyapsine. Akil arye el yupu peterelula deice arye, na mapu dobuka yuk malye bisik kirikuka bobalule. Malye bisik bobaliba, sik talye ubula yolana ning aning-aning nirya unyake. Tonda, yuk nang arye, isa mer si erena ap, isa mer si kina ap ati, kam ning obikirye, tupto ubuka delilamikba, na mapu arye atu dekikirye, dinyake. Aning ara pia malye weik wininyake, tenenune.”

²¹ ‘Akil el malye winin ning nirya bataklirye, urasin tamubuka diksukumuk unamle’ tenen, lo areamse bukni, akilce, ‘Kume, na malye un ning pia kum bataknamne,’ tenelule. Elce kekena kumce, malye weik ulule.

²² Kekena kumce malye weik ulula ati, ikin ning weik el nong deice deipniba, uk weik dinamle. Tonda, akil ap ubula yolalamikce, neika malye wininyak ninye ap ati, sik malye wininyak ning kum batakikcopura, weik kanye mun ning arepniba, sik malye wininyak ninye malye nyanyakce, weika arye engenamake.

²³ Akil arye deiyamuk mapu nirya ara oplopnamne. Winipniba, amutuku-amutuku diba tenenyak ninye nirya arye, moubuka kel kipnamake. Ara, ‘Se, ninye kanye tenen ning ap, ninye talima pum tam usilye ning nirya ap ara, elce kel kisulule. Nun nirya arye ulamap touk, yupu bokeipsilirye, wenesulule,’ tenebikirye, kel kipnamake.

²⁴ Ura, anggun Tiatira mutuku ululum ninye bukni, akil nyalul yupu talibuka kum dobolbalulum ninye ati yupu ton nyapnusine. Tonda, yuk nang arye, “Isa Mutuku Dongonye el winilul ning, duknulul ning pia noutamak ning ara, ani,” nyalamak ning ati ara, anggunce kum bikilulumce, ayupu kum taliplulum ninye ati, yuk yupu nyapnusine. Anggunti ara, ikin ning tonap, anggun nong deice kum delinamsine.

²⁵ Yuk ikin ning tonap, anggun nong deice kum tabaknamsin bukni, wini talak arye dipdongobuka aminyan tamubuka yanamne talak, anoutamak nirya ara, na yupu akunum diba tenebuka talilulum ning ara, batakna kum pia talipmunce, lamapdongobuka unamlulume.

²⁶ Wininmamunyeba, malye winin ning nirya ati, ‘Nun like’ tenen, malye kiyamikirye, na tenyamsise touk, aninguk talibuka unyak ninye ati ara, ereipnamsine. Weik arye ereipsinirye, anggunda ninye ayala-ayala im sirya, mutuku sirya nirya ati, weik deiyok ninye keipsinyopura, aninye nirya talinamlume.

²⁷ Ninye ayala-ayala nirya ati, talibuka deiyok nang unamluma ati, Mazmur buku noutamak ayupu sekik. ‘Anye birye ninye ayala-ayala nirya ati, weik mikip deice arye talinamle. Mitang ning, telelamle ning dobuka keil deice mikip asa arye pouklobikiba, cobuka telebuka bulamle touk, el amu tam unyak ninye malye winibikcopura, weik mikip arye wenebuka oploplirye, kum kipdeipnamle.’ (Mazmur 2:9) Ati, na ni Allah arye, ‘Ninye mutuku sirya, im sirya taliplirye, weik sisinanye unamle’ tenen, adeiyok ning areamnuk touk, na Ninye Atonunye birye, anggun dib tuba tenelulum ninye babye, ninye deiyok talin ning arepnamsine.

²⁸ Tonda, malye kilamice ninye ati, beren tam yanuka tiklamle kurya arepnamsine.

²⁹ Ati, anggun amul aupmasiliba, anyapmasin yupu ati, ‘Deiyok ani’ tenen, kekepmanto ululum ninye ara, Allah El Dib Kanye arye, anggun diba tenelulum ninye ati nyasilye yupu ara, moubuka kekenamlulume. “Ayupu nirya ara, Tiatira mutuku unyakce, diba tenena ninye ati nyapnamlyame,” nyapnuke. Allah arye, na Yohanes ati nyapnuke.