Ulangan 4 - Eipomek

Musa birye Israel ninye ati, “Allah arye nyalisilye yupu kekebuka, amutuku unamlulume,” nyabuk yupu

¹ Atalak ara, Musa birye, Israel ninye ati nyabuk. Anggun nirya moubuka kekeplulume. Allah arye, ‘Aning ara, wininamlulume. Tonda, aning ara kum wininamlulume,’ nyapdeipsuk yupu, narye anggunti laka nyapnusine. Ayupu moubuka kekepmunce, nimalya ap asa arye, Allah el amu tam umunyopura, kam pia unamlume. Winibuka umunyopura, Allah arye winiryuk ning arepnamsil, pia teleb weik mutuku binuka wekmunce, amutuku talibuka unamlume. Ara, anggun ni koproba, el si Yahweh, anggun apu yapu ati, kalikuka meliamukba, sikce el si erelamik Allah, elcuk nyapsuk yupu ati nyapsine.

² Anggun ni koproba Allah, el si Yahweh arye, ‘Aning ara, wininamlulume. Aning ara, ton kum wininamlulume,’ nyapdeipsilyopura, narye nyapsinye yupu ara, anggunce tonap tabakana ap, kolukulina ap pia meme. Allah arye anggunti, ‘Aning ara, wininamlulume. Aning ara, kum wininamlulume,’ nyalisilye yupu, narye dobuka anggunti nyapsine. ‘Anggunce ayupu nirya, pia moubuka kekebuka unamlum’ tenen, ati nyapne. Tonok ning babye batakna meme.

³ Ati ara, anggun asing koproba arye, akunum eiplume. Anggun kele, ara mutuku si Bahal-Peor mutuku noutamak ara, Isa Mutuku Dongonye el si Bahal ati, el si erelamik nang nirya ara, Allah el si Yahweh arye, aisa si erelamik nang nirya oplobuk. Ara, anggun Israel ninye noutamak babye, Bahal si erelamik nang nirya obuk.

⁴ Isa si erelamik ninye obuk bukni, anggunda pia tuba Allah el tibuk tuba talibuka, el siuk erelulum ninye ara, tuba kam ululume. Tonoknye babye, kum oplobuk. Kam tuba ululume.

⁵ Anggun babye ton teneipdelulume. Allah el si Yahweh arye, ‘Aning ara, wininamlulume. Aning ara, kum wininamlulume,’ nyapdeipsuk yupu nirya ara, na kekepsirye peterelamsise. Deiyok ara, anggunce binuka wekmunce, talibuka unamlum mutuku noutamak ara, ‘Allah arye nyapdeipsuk yupu nirya kekebuka, kanye lamapdongobuka unamlum’ tenen, peterelamsise. Ayupu talibuka umunyopura, Allah arye winiryuk mutuku arepsiliba, teleb ubuka, kanye lamapdongobuka, amutuku noutamuk unamlume. Musa birye Israel ninye ati, nyabuk.

⁶ Nyabukce, ayupu ton nyabuk. “Ura, anyapmasin yupu kekepmunce, moubuka kintinip deibuka umunyopura, im sirya, mutuku sirya nirya unyak ninye eipsikirye, biknamsiyake. Sik asing arye elinamsiyake. Eipsikirye, tonda Allah nyapdeibukba sekamik yupu kekebikirye, nyanamsiyake, ‘Se, sik Israel ninye ara, pia mambule. Sikda, weik kel ninye unyak ati ara, aning-aning nirya teleb ubuka unyake.’ Yuk mutuku nang arye nyanamsiak ati nyapsine,” Musa birye nyabuk.

⁷ Nyabukce, ayupu ton dukdongobuka nyabuk. “Ati ara, teneipdelulume. Yuk ninye im sirya, mutuku sirya nirya weik aunyak bukni, sikda nun Israel ninye atonun kum unyake. Nun ni koproba Allah ara, mining dam usulula anya arye, nunce, Yahweh ati morobibyopura, el dam ulirye kekesulule. Sik yuk mutuku ninye ara, aning atonun kum winiptinge. Sikda talye Isa Mutuku Dongonye siuk erenyake.”

⁸ “Tonda aning atonun, yuk mutuku im sirya, mutuku sirya nirya, ninye weik daunyak bukni, nun unyap touk, kum unyake. Allah arye nyalisilye yupu, narye nyapnusin yupu ara, pia telebe, pia kam yupu ulule. Ayupu noutam ara, malye ning ton kum ululue. Teleb ninguk ulule. Ara, nun ni koproba Allah Yahweh arye, ‘Aning ara, wininamlulume. Tonda aning ara, kum wininamlulume,’ nyapdeipsuk yupu ara, pia teleb yupu nyapdeipsuke. Yuk mutuku ninye nirya ara, ato yupu kum talinyake. Ton kum upmale. Ati, arup ara, narye Allah nyalisilye yupu peterepnusine.” Musa birye, Israel ninye ati nyabuk.

Musa birye Sinai mutuku dup deice arye kekebuk yupu ati, tuba tonap tamubuka nyabuk yupu

⁹ Musa birye Israel ninye nirya ati, nyabuk. “Na kwit capu kekeplulume. Anggun nirya pia moubuka unamlulume. Ara, ‘Anggunce akunum kekelulum yupu ap, elilalum ning ap, luba kipmunyak’ tenen, anggun kam unamlum talak nirya ara, aning nirya pia tenepmunce, moubuka unamlume, nyapsine. Aning nirya ara, luba kina kumce, pia tenenamlulume. Aning atonun, anggunce delilulum mapu ap, sik mapu arye dadeipdanin, banamak mapu ap ati, ‘Allah arye nyasulule,’ nyabuka, nukmunce peterenamlulume.”

¹⁰ “Nun ni koproba, Allah el si Yahweh arye, Sinai mutuku deice, el yupu nyapnuk talak ubuk ning ati ara, tonap tuba laka nyapnusine. Anggun kele, Sinai mutuku dam buluplum buk, Allah arye nyapnuke. ‘Ance nyapminba, sik Israel ninye nirya bulubikiba, na yupu nyapnamne. Deiyok ara, sik unamak mutuku noutamak, tonda sik kam unamak talak nirya ara, na ati biknikirye, na si diamuk erenamniyake. Tonda, sikce sik mapu nirya ati, ‘Allah arye el nyasilye yupu kekebuka talinamlulume,’ nyabuka peterelanamake.’ Allah arye nyapnuke,” Musa birye nyabuk.

¹¹ Nyabukce, ayupu ton nyabuk. “Anggun kele, Allah arye el yupu nyapnuk talak ara, anggun nirya amutuku dam amu tam yanuka buluplumba, Sinai mutuku dup deice ara, weik uku buk pakanmokce, uku buk im noutamak welebuka biyuk bukni, amutuku dana-dana nirya ara, dua weik ubukba, Sinai mutuku lelipdobukba, asukum nirya kunukuk. Awinibuk ning nirya, anggunce akunum eiplume.

¹² Winibuk talak ara, uku buk noutamak tikukce, Allah el si Yahweh arye, el yupu weika arye anggunti nyabuk bukni, el nong ara, kum eiplume. Dipkoprop elce nyanmok yupu kekeplum bukni, el nong ara, kum eiplume.”

¹³ “Tonda wini talak babye, amutuku noutamak Allah arye, el yupu deiyok tagu barye (10) nyabukce, keil pala bitinye deice arye sekeipsuk ning ara, laka nyapnuke. Elce nati, laka nyapnukba, narye anggunti, laka nyapsiseba akunum kekeplume. Ayupu deiyok ara, Allah arye, ‘Israel nang ara, ‘Naʼ tenen, ninye unamak’ tenen, ‘Na Allah arye anggunti, wininamsine. Tonda, anggunda wininamlulume, aning ara ton kum wininamlulume,’ nyapdeipsuk yupu atia.”

¹⁴ Aninguk kum bukni, Allah arye nati ayupu ton nyapnuk. “Ance, Israel nang ati, na arepnamsin yupu peterenamlyame. Ara, narye, ‘Aning wininamlulume. Tonda aning ara, kum wininamlulume,’ nyabuka, laka nyapnukin yupu ara, Israel ninye ati peterenamlyame,” nyapdeipnuke. Aning ati, anggunce ayupu bobuka, Yordan mek koubuka, otam mutuku, Allah arye arepnamsil mutuku noutamak bimunyopura, ayupu pia moubuka kekepmunce, talinamlulume. Allah arye, ‘Amutuku ara, anggun dokola mutuku pia unamle’ tenen, arepsuka ati ara, elce nyapdeipsuk yupu dopropmunce, pia kum bataknamlulume. Ayupu talinauk unamlume. Musa birye Israel ninye ati, nyabuk.

“Yuk-yuk ning urasin atonun puturubuka memepmunce, ‘Aning ara, Allah atonun ulule,’ nyabuka, aning si erena meme,” nyabuk yupu

¹⁵ Musa birye Israel ninye ati, nyabuk. “Anggun pia tenebuka unamlulume. Ara, Sinai mutuku, tonda mutuku si Horeb mutuku deice, Allah arye weik uku buk noutam arye, yupu nyapdeipsuk talak ara, el yupu kekeplum bukni, el nong ara, pia kum eiplume.

¹⁶ Ayupu nyapmasina deiyok ara ani. Ara, ‘Anggunce mangkau kanye bobuka, malye winipdeipdamunba, Allah arye derepsilirye, wenepsilyak’ tenen, nyapsine. Anggunce anggun bidamang ati, moubuka kalikdanamlulume. Pia kum wininamlum ning ara, ani. Ara, ‘Aning ara, nun ni koproba ulula ati, el si erepnamap’ tenen, anggun dem aryuk keil ap, yo ap dobuka, ninye urasin atonun kibuka, puturubuka kum deipnamlulume. ‘Winipmunce, aning siuk talye kanye bobuka, si erepmunyak’ tenen, nyapsine. Ati, anggunce memebuka delin ning ati, ‘Nun ni ani,’ nyabuka, si erena pia meme, nyapsine.

^17-18 Aning atonun ton, tuku deice talye balamle ning nirya ap, maka im noutam laklamle ning yala nirya ap, kwising ayala-yala nirya ap, mek pum tam balamle mek pum bal ikan yala nirya ap, yata ning do nirya, aning urasin atonun kintineibuka, si erena pia meme,” Musa birye nyabuk.

¹⁹ Nyabukce, ayupu ton dukdongobuka nyabuk. “Yuk ning urasin atonun memebuka deipmunce, aning si erena meme, nyapmasin yupu deiyok ton ani. Ara, sik im deice unyakba eiplum ning ati, ‘Si erebuka malye winipmunyak’ tenena ati nyapne. Ati ara, pia winina meme. Ara, keting ap, wala ap, kurya ap, Allah arye kwepdeibukba, im deice ulul ning nirya babye, eipmunce, ‘Se, aning ara, mambul ati ara, aning si erenamabe,’ tenen ati nyapne. Allah el si Yahweh arye, aning-aning nirya kwepdeibukba, yata mutuku do nirya, ninye mutuku-mutuku nirya arye, aning talye elinyake. Ati ara, aning-aning nirya, si erena meme, nyapne.

²⁰ Aning nirya ara, talye ning ulul bukni, anggun Israel ninye tonok ara, Allah arye akunum wipdeipsukce, ‘Na tenena ninye’ nyabuka, akunum nyapsuke. Tonda, ninye arye besi do, emas do, ‘Malye ning kum dalirye, teleb ning pia upnamle’ tenen, uku dalamikiba, uku diplirye, malye ning kum danalule. Aning atonun, Mesir mutuku noutamak, Allah arye anggun Israel ninye malye winin ning ati, kilipsukce, ‘Winira, anggunda diksukum ninye unyake,’ nyapdeipsukce, teleb ninye uk kipdeipsuke. Teleb kipdeipsukce, Mesir mutuku noutamak arye, ikin weik ulamupu buk, dalubuka dobukapsukce, lyepsuke. Wini talak, anggunda, el ‘Naʼ tenen, ninye akunum ululume. Allah arye anggunti, ‘Na mapu’ tenen, melibuka pia talipnamsile.” Musa birye nyabuk.

²¹ Nyabukce, ayupu ton nyabuk. “Anggunda winiryuk arepnamsil mutuku wekelbinamlum bukni, nara kume. Amutuku noutamakuk dipnamne. Deiyok ara ani. Min arye engebuka, malye-malye nyalamlumba, na malye kanye bopsirye, yu arye malye upsa ati, Allah arye nati, derebnuke. Derebuka wenepnukce, nyapnuke. ‘Kume, Musa anda Yordan mek koubuka, otam keting wekelbalamle tam noutamak, Kanaan mutuku pia kum weknalame. Israel ninye ati arepnamne mutuku ara, anda kum weknamlame, asukumuk dipnalame,’ nyabuka, Allah arye wenepnuke. Allah arye yuk mutuku arepsiliba, anggun nirya ara, Yordan mek koubuka otam, teleb tukwak talibuka unamlume. Nara, kum binamne, asukumuk dipnamne,” Musa birye nyabuk.

²² Nyabukopura, ayupu ton nyabuk. “Ati ara, nara Yordan mek koubuka, otam mutuku kum binamne, amutuku noutamakuk dipnamne. Bukni, anggunda Yordan mek koubuka otam pia teleb mutuku bimunce, amutuku binuka dopropmunce, talibuka unamlume.

²³ Ton ning ara, anggunce luba kina meme! Allah el si Yahweh arye, ‘Israel ninye ara, ‘Naʼ tenen, ninye unamak’ tenen, ‘Wininamlulume. Aning ara, kum wininamlulume,’ nyapdeipsukce, nyalisilye yupu nirya ara, pia moubuka tenepmunce, unamlume. Tonda, Allah el si Yahweh arye anggunti, akunum nyapdeipsuk touk, yata ning do nirya, talye ning urasin atonun kipdeipna arye, si erena ara pia meme. Allah arye aning ati, akunum ‘Meme,’ nyasilye ning, pia kum wininamlulume.

²⁴ Aning kum wininamluma deiyok ara, nun ni koproba Allah, Yahweh, elda uku buk arye, malye ning nirya dilamle atonye ulule. Tonda el mapu ara, yuk-yuk ning ton, si erebikcopura, elce pia yu weiknye ulule. Anggunce, yuk ning si erepmunyopura, aning ara namin kibuka, talye dem arye kum bataktue.” Musa birye Israel ninye ati, ayupu nyabuk.

Musa birye, Isa Mutuku Dongonye si erena ati, nyabuk yupu

²⁵ Musa birye nyabuk. “Tonda yuk talak anggun amutuku binuka umunce, mapu deipmunyeura, sikce dadeipdanin, banamak mapu weik ubicopura, malye ning pia kum wininamake. Ara, aning-aning nirya kintinibikirye, malye ning si kum erenamake. Aning atonun, yuk malye ning ton, pia kum wininamlulume. Malye winipmunba, Allah arye anggunti, yu weik uplyopura, Allah arye wenebuka opsiliba, ikin weik upnamsile.” Musa birye nyabuk.

²⁶ Nyabuka ayupu ton nyabuk. “Arup narye nyapnusin yupu ara, kekepnululume. Aminyan talak, anggunce malye winiplumce, talye ning si erena ati, puturubuka deipmunyopura, Allah arye anggunti, yu uplyopura, weik arye wenepnamsile. Tonda, im deice ulul ning ap, tukwak ulul ning ap nirya, awamlye ning nirya disinyaka deice arye, ‘Narye, dipkoprob yupu nyapsine,’ nyabuka, mikip arye nyapsine. Ara, yuk ning si erepmunyopura, Allah arye anggunti, obuka sirya daknamsile. Ura wini talak ara, anggunce, ‘Yordan mek koubuka, otam mutuku pia binuka unamap,’ tenepluma ara, aupmal bukni, malye winipmunyopura, keting tamun weik kum upnamlume. Minopce Allah arye anggunti, amutuku noutamakuk wenepsilirye, obuka sirya daknamsile.

²⁷ Tonda, malye winipmunyopura, Allah el si Yahweh arye, anggun talye bataksilirye, amutuku noutam arye, yuk mutuku dopkwetepsiliba, anggunda mutuku-mutuku nirya unyak ninye noutamak binuka unamlume. Talye tikilyangan nang atonun unamlume. Yuk mutuku noutamak unamlum talak, ninye pia weika arye dipnamlum bukni, anggun yupa mitik tonun dem kam unamlume.

²⁸ Tonda, amutuku noutamak ara, Allah ati diba tenen nang noutamak kum unamluma anya arye, amutuku unyak ninye arye, talye ning ati, ‘Nun ni koproba’ tenen, puturubuka deibikirye, aning si erelamak touk, anggun babye, talye ning deipmunce, si erenamlume. Wininamlum bukni, yo ap, keil ap, yuk kat ning ap dopropmunce, si erepmunya babye, aning ayala-yala nirya ara, asing arye kum eipsitinge. Tonda amul arye kum kekepsitinge. Din ning dobuka kum diptinge. Nintong teleb ning kum kekeptinge. Ninye taruk arye, memebuka delilamak ning nirya ara, talye ning uka. Aning nirya ara, talye ninguk bukni, aminyan talak ara, aning ati si erenamlume.” Musa birye nyabuk. Nyabukopura, ayupu ton nyabuk.

²⁹ Aning winina atonun kum bukni, anggunce otam teleb mutuku noutamak arye, ‘Nun ni koproba Allah, el yupu kekebibirye, el kanye deipnamsil’ tenen, ‘Yata wiriptibye do?’ tenebuka winipmunce, Allah ati kipmunce, el siuk erepmunyopura, Allah el si Yahweh arye, kekepnamsile. Anggun dam yanuka unamle. Ura, ‘Dib do, tilila do?’ tenena kum diparyuk, anggun talima arye dib pia tenepmunyopura, dipkoprob anggun dam unamsile.

³⁰ Ura, luba kina meme. Malye winipmunyopura, ikin ning weik upsiliba, anggun kanye talima pum tam arye, ‘Se, yata wiripnamap do?’ tenen, malye kanye bobuka upmunyopura, anggun ni koproba Allah, Yahweh ati, pia se tenepnamlume. Yahweh el dam tamubuka yanamlulume. El ti, diba tenebuka, pia tenenauk upmunce, el yupu kekebuka dobolyamunyopura, Allah el si Yahweh arye anggunti, tuba tonap melinamsile.

³¹ Anggun ni koproba Allah, elda ninye ati minopce kum wenepnamsil bukni, bico tenebuka melisululnye ulula ati ara, anggunce el dam tamubuka yamunyopura, eipsilirye melinamsile. Tonda, elce anggun apu yapu ati, ‘Na tenena ninye unamlume,’ nyalilamsuk yupu ara, kum luba kipnamle. Elce anggun apu yapu ati, ‘Winibuka melinamsine,’ nyalilamsuk ning ara, pia tenenauk unamsile. Tonda, anggunti, pia kum bataksilirye, obuka sirya kum daknamsile. Tuba melinamsile. Allah arye wininamsile. Musa birye nyabuk. Ara, Musa birye, “Allah arye nyapdeipnuk yupu ara, bobuka anggun Israel ninye ati akunum laka nyapsine,” nyabuk.

“Nun ni koproba Allah, el si Yahweh, el tonok ulule,” nyabuk yupu

³² Musa birye Israel ninye ati, nyabuk. Ura, anggun ton teneipdelulume. Tonda yuk ninye ati asipdenamlulume. Minop talak arye dipdongobuka, wini talak nirya ara, anyapmasinto ning, minop talak ton ulamuk do, kum do? Aning atonun, pia kum ulamuk. Allah arye ninye kintinip deiamuk talak bukni, adipdongobuka wini talak babye, tonda, im sirya, mutuku sirya anoutamak mutuku nirya babye, aning atonun ning pia kum ulamuk. Tonda, ninye mutuku-mutuku nirya arye, minop talak noutam arye ato ning ati, pia kum tenelamikce, yuk nang ati kum nyalamik. Wini talak Allah arye, anggunti melibuka winisilye ning nirya ara, pia mambul weik ulula ati nyapsine.

³³ Tenipdelulume. Ara, yata yuk mutuku ninye arye, uku buk dinmoka noutamak arye Allah el yupu nyabukba, kekelamik bukni, kum dibik do? Sik kel do? Kume, aning atonun minop talak arye kum winilule. Bukni, anggun Israel ninye tonok ara, Allah arye anggunti, uku buk noutamak arye, el yupu nyabukba mining dam arye kekeplum bukni, dipna kum aniryuk tuba kam ululume. Aning ara, weik mambule.

³⁴ Aning atonun, anggun kel do? Dan mutuku ninye ati, yuk mutuku ninye talilamika noutamak, Allah arye dalubuka lyebukce, yukak bobiyuk do? Bukni, Allah arye anggun Israel ninye ati, Mesir mutuku noutam arye lyebuka boyanamsuka deiyok ara, ‘Israel nang, ‘Naʼ tenen, ninye unamak’ tenen, winibuk. Kume, yuk ninye nirya ara, ‘Allah arye aning atonun winipsuke,’ kum nyaptinge. Anggun Israel ninye uka. Allah arye aning winibuka deiyok ara, ‘Israel ninye ‘Naʼ tenen, nang unamak’ tenen, winibuk. Tonda, Allah arye anggun Israel ninye ati, Mesir mutuku noutamak arye dalubuka dobukapsukce, lyepsuk talak ara, winilina ap, ninye kum winipmanto ning ap, im deice mambul pil dona ap, ninye olana ning ap, el bidamang mikip weik kina ap, el taruk koproba arye mikip weik pil dolamuk ning ap, anirya deice arye, anggunti dalubuka lyepsuke. Aning babye, weik mambule. Aning-aning nirya ara, anggun ni koproba Allah, Yahweh, el bidamang taruk arye, mikip weik ning winibukba, ninye nirya ilil weik ulamukba, anggun Israel ninye arye, aning-aning nirya ara, anggun bidamang asing arye elilalumce, akunum kel bikamlume. Aning ara, weik mambule.

³⁵ Tonda, Allah arye minop talak, el mikip deice arye winipra yangalamuk ning nirya babye, wini talak winilul ning nirya, yupu nyasilye ning nirya deice arye, akunum laka nyamsukce, tuba nyasulule. Ara, ‘Nun ni koproba Allah, el si ara Yahweh, el tonok ulule. Yuk Allah ton pia kume. Yuk Allah ton kum unyake, el uka,’ tenepmunce, ‘Kel kinamlulumeʼ tenen, mambul pil weik dolamsuke.

³⁶ Allah arye, ‘Na tenena ninye wenepneba, na tenenye touk unamak’ tenen, im deice arye el yupu nyalamukba, anggun kekelamlume. Tonda, Sinai mutuku weik uku buk dinmokak arye, nyapdeiamsuke. Tonda, mek kum mutuku noutamak, Allah arye nyalamsukba, akunum kekelamlume. Aning ara, weik mambule.

³⁷ Tonda, Allah arye anggun apu yapu ati, bico tenelamuk deice arye, sikce delilamik mapu, anggun Israel ninye ati, akunum wibuka deipsuk. Ara, ‘Aninye ara, na dokola ninye unamak’ tenen, wibuka deipsuk. Winibukopura, Allah el bidamnye arye Mesir mutuku yayukce, el mikip weik deice arye, Mesir mutuku noutamak arye, anggun dalubuka dopromsukce, asukumuk boyasuke.

³⁸ Amutuku boyasuka deiyok ara ani. Ara, yuk mutuku-mutuku nirya, ninye weik unyakce, sik mikip weik daunyak bukni, Allah elce sikti, malye kiplirye, aninye sik mutuku dobuka, anggun Israel ninye ati arepnamsile. Winiplyopura, anggun amutuku binuka, dobuka wekmunce, anggun dokola ning upnamla ati, binuka talibuka unamlume. Anyapmasina nirya ara, wini talak ara, amutuku aulye touk dopropnamlulume. Musa birye Israel ninye ati, nyabuk.

³⁹ Nyabukopura, ayupu ton dukdongobuka nyabuk. “Arup arye dipdongobuka, yuk talak nirya ara, luba kina kume. Pia teninamlulume. Anggun ni koproba Allah, el si Yahweh, el tonok im deice ap, im noutamak ap, tukwak mutuku im sirya, mutuku sirya nirya ap, eluk talibuka ulule. Yuknye ton, Allah atonun pia kum ulule.

⁴⁰ Tonda namin asa arye umunce, Allah arye, ‘Aning ara, wininamlulume. Tonda aning ara, kum wininamlulume,’ nyabuka, el yupu nyapdeibukba, asum arye narye anggunti, peteresinye ning nirya ara, kekenamlulume. Ara, arup arye dipdongobuka, dorunamle talak nirya ara, Allah arye nyalul yupu, pia moubuka talibuka wininamlume. Aninguk winipmunyopura, aminyan talak nirya, anggun ap, anggunce deipmunyeba, deipdanin banalum ninye nirya babye, telebuk wininamlume. Tonda, winipmunyopura, Allah arye wini talak arepnamsil mutuku, binuka unamlum talak ara, keting tamun pia weik talibuka unamlume. Allah arye, ‘Aninye ara, amutuku pia talibuka unamak’ tenen, arepnamsile.” Musa birye, Israel ninye ati nyabuk.

Israel nang, sik kayapu nang mangkau arye opnabuk, ‘Yuk nang arye, yu upliba, kwang dakuka obikcakʼ tenen, dopdeipnaba, binuka unamik mutuku ati, nyabuk yupu

⁴¹ Aminyan talak ara, Musa birye Yordan mek koubuka otam, keting panalyangan tam, weik asik winilye binuka, kintinip deibuk.

⁴² Akintinip deibuk mutuku deiyok ara, winipmanto, sik Israel yalanye, yu una kum arye bukni, mangkau arye winilirye, el kwit oplyopura, yuk nang arye, yu upliba kwang dakuka, ‘Anye obikcakʼ tenena ati, mangkau arye ninye talye oplinye bira, anyasik winililye, wekelbinuka, telebuk una ati, kintinip deibuk mutuku uk wekelbinmake. Ninye mangkau arye oplinye birye, winiplirye, ilil kumce, talye mau arye telebuk unamake.

⁴³ Akintinip deibuk asik si ara, ani. Min yuma asik ara, Beser mutuku kata mutuku noutam bukni, mitik tonun kon deice uamuk. Amutuku ara, Ruben yala nang doprobikba, ulamik asik tonok, asukum kintinip deibuk. Bitinye asik ara, Gad yala nang mutuku, Gilead noutam bukni, asik si ara, Ramot mutuku. Sik Gad yala nang ulamik mutuku, tonok asik kintinibuk. Tonda, winilye asik ara, Manasye yala nang arye, Basan tam bukni, anyasik si ara, Golan mutuku kintinip deibuk.

Allah arye, “Aning ara, wininamlum bukni, aning ara, pia kum wininamlume,” nyapdeibuk ning ati, Musa birye, Israel nang sik dam, lak nyabuk yupu

⁴⁴ Musa birye, sik Israel yala nang nirya ati, “Allah arye, ‘Aning ara, wininamlume. Aning ara, pia kum wininamlume,’ nyapdeipsuk yupu nirya ara, sik kekenmek sukum arye, lak nyabuk.

⁴⁵ Ayupu ara, Allah arye, “Aning-aning ton wininamlum bukni, aning ara, pia kum wininamlume,” nyapdeiamuk yupu ap, tonda, “Aning ara, moubuka talipmunce, pia wininamlume,” nyapdeiamuk ning ap, tonda, “Teleb winina ara, aninguk wininamlume,” nyapdeiamuk ning ap, Musa birye, sik Israel nang bikna ati, lak nyabuk. Ayupu nyabuk talak ara, sik Israel nang, Mesir mutuku ulamika batakuka, bisik balamik talak arye, ayupu lak nyabuk.

⁴⁶ Atalak ara, sik Israel nang ara, Yordan mek koubuka, keting panalyangan noutam bukni, mutuku si ara, Bet-Peor otam uamukak bukni, atam tonok mutuku luak asukum, amutuku dam biyik talakuk, ayupu lak nyapbuk. Amutuku noutamuk, sik Amori yala nang ati, ninye deiyok kibuka, taleamuk Raja Sihon, elda Hesyebon mutuku ulamikakuk, sik Israel nang arye elti, obuka sirya dakamik mutuku, amutuku uk unmek talak, Musa birye ayupu nyabuk.

⁴⁷ Israel nang arye, Raja Sihon obukabikce, el min arye taleamuk mutuku noutam nirya yanuka dopromik. Tonda, Basan mutuku taleamuknye, Raja Og ap, el tam nang ap nirya ati, obuka sirya dakamik. Abitinye mutuku ara, sik Amori yala nang ulamik. Ara, Yordan mek koubuka, otam keting panalyangan tam talibuka ulamik mutuku, sik Israel nang arye malye kibikce, amutuku nirya talibuka ulamik.

⁴⁸ Sik Israel yala nang arye, malye kibikce, talibuka ulamik mutuku ara, outam, arah selatan tam ara, weik balamle mek, el si Arnon mek lilun bukni, asik domik ning, amutuku si Aroer mutuku anyapce dipdongobuka, eitam, deice tam (arah utara) arye dipdongobuka, weik mutuku bukamuka si ara, Sirion mutuku dam, amutuku nirya talibuka ulamik. Ura, Sirion mutuku ara, ton weik tam nang arye, amutuku uk bukni, el si ara, Hermon mutuku nyanyake.

⁴⁹ Tonda, sik Israel nang arye talibuka ulamik mutuku bukni, Yordan mek koubuka, otam keting panalyangan tam nirya ap, anyapce dipdongobuka, outam (arah selatan) tam ara, weik laut mekwen deiamukak, el si Laut Mati, asukum arye dipdongobuka, otam keting panalyangan tam ton, Pisga mutuku dana-dana arye yanuka, dipdongamuk mutuku biyikce, amutuku nirya talibuka ulamik.