Ulangan 33 - Eipomek

Allah el pil donanye Musa birye, ‘Allah arye Israel yala ninye ati, teleb kibuka melipnamle’ tenen, teleb kipdeibuk yupu

¹ Musa bira, Allah el pil donanye ulamuk. Tonda, el min kum diamuk talak arye, ‘Allah arye Israel yala ninye ati, teleb kibuka melipnamle’ tenen, Israel yala nang nirya ati, teleb kin ning arebukce, ayupu nyabuk.

² Allah arye, Sinai mutuku dup yayukce, Seir mutuku deice keting sinarya kutukuka, pata tikilamle atonun yayukba, sik eibikba, sikti yanuka melibuk. Tonda, elda Paran mutuku dup, dirin weik arebukba eibik. Allah el yayuk talak ara, Allah el im deici pil don nang malaikat ara, yupa sepuluh ribu (10.000) malaikat nang ap, weik nukmanto kum arye, neika yayikce, el sirik taruk tam ara, uku buk paklamle atonun, ubukba eibik.

³ Dipkoprop, Allah elda, ninye tukwak ninye ati, bico tenelule. Allah arye, pia diksukum ninye nirya ara, el mapu kibice nang ara, elce talibuka melilule. Sik nirya ara, Allah el yan dam gutam tuku dipdongobuka, el si erenyake. Tonda Allah arye, ‘Wininamlulume,’ nyapdeiamuk yupu ati, dib tenebuka talibikirye, dobolbanyake.

⁴ Ara, Allah arye, ‘Wininamlulume, wininamlulume,’ nyapdeibukba, Musa birye sekuka arepsuk yupu, Yakub el yala nang nirya, talinyak yupu ati nyapne. Israel ninye ayupu kekebuka, pia talinamake.

⁵ Israel ninye, sik yala yuk-yuk nirya ap, sik yala deiyok nang ap, bulubuka ulamik talak ara, Allah ara, sik weik deiyoknye ulamuk.

⁶ Musa birye, Ruben yala nang ati, Allah morobukce nyabuk. “Ruben yala nang ara, ton kum dipnamake. Sirya kum daknamak anya arye, ‘Sik ninye weik unamak’ tenen, moropkine,” nyabuk.

⁷ Nyabukopura, Musa birye, Yehuda yala nang ati morobuk. “Na ni Allah, Yehuda yala nang moropkiyaka ati, kekepnulyame. Minop talak ara, Israel ninye bukni, yuk ayala-yala nirya ap, Yehuda ap, bokuka yuk-yuk kibik bukni, wini talak ara, tuba tonap, sik bidamang nang ap, tonokak tamubuka deipnalyame. Yuk nang kum melibikiba, sik bidamang taruk aryuk, sik mal olan nang ati, opiripnamake. Aning ati, na ni Allah, ance Yehuda yala nang ati, melipminyopura, an mikip deice arye, sik mal olan nang ara, obuka sirya daknamake,” Musa birye nyabuk.

⁸ Nyabukopura, Musa birye, Lewi yala nang ati, ayupu ton morobuk. “Na ni Allah, an tenyamsulum ning kel bikna ati, yupu lipsisikuka bokolina deiyok keil, an urim keil ap, tumim keil ap, Lewi yala nang ati areplume. Ara ance, ‘Aninye na kanye deipne,’ teneplum ninguk, Lewi yala ninye areplumba, aning talilamik. Masa mutuku noutamak arye, ‘Anang ara, teleb unamak do, kum do?’ tenen, Lewi yala nang ati, asilen ning arye winipdelume. Tonda, mek pu dolona mutuku si Meriba mutuku noutamak arye, sik Lewi yala nang ati, “Winina meme,” nyabuka, sik ap, an ap arye, yupu deice walalamlumce, asilen ning areplume.

⁹ Sik Lewi yala nang arye, Allah anti, pia weika arye dib tenelamikce, ‘Nun ni yapu ap, nun nin yapu ap, nun weit capu ap, nun du yapu ap, nun mapu ap nirya ara, mitik tonun mambul bukni, Allah el diamuk weik mambule’ tenen, ulamik. Ulamika ati, nun ni Allah ance, ‘Wininamlulume, aning ara, ton kum wininamlulume,’ nyapdeiamsulum yupu ara, pia moubuka taleamikce, kaliklamik. Winilamikce, ance, ‘Wininamsine,’ nyalin yupu nyapdeipsulum ning ara, dib tenebuka dobolbalamikce, ‘Israel ninye ton dobolbanyak do, kel kipnamak do?’ tenen, moubuka kaliklamikce, peterelamike.

¹⁰ Wininyakce, an mapu Israel ninye ati, an yupu bobuka peteresinyake. Ara, Yakub birye deibukba, dadeipdanin yangalamik ninye, el yala ninye Israel ninye ati, ance, ‘Wininamlulume, aning ara, ton kum wininamlulume,’ nyabuka, nyapsulum yupu peteresinyake. Wininyakce, “Nun ni Allah telebe,” nyabuka, nintong teleb ning ap, ninye weilamak ning ap, obuka boyakirye, Allah el arena ati, pala keil lelebuka, yangapdeibika deice, uku sekuka dabikirye, Allah an si erenyake.

¹¹ Ati nun ni Allah, Lewi yala nang ati, teleb kipdeipmince, melipminyopura, sik kel bikamikce, pil dolamak ning nirya, mikip weik kipnamle. Tonda, sik bidamang taruk arye, pil domikce ning nirya ara, ance kanye deipnamlame. Utenena ati, anti moropkine. Winipmince, Lewi yala nang, sik mal olan nang nirya ara, Allah ance obuka kum kipdeipmince, onauk winipminyopura, tuba tonap, sik mal olan nang kum tiknamake,” Musa birye, Allah morobuk. Ara, ‘Allah arye sik Lewi yala ninye melipnamleʼ tenen ati, morobuk.

¹² Nyabukopura, Musa birye Benyamin yala nang ati, morobukce nyabuk. “Anggunda, Allah bico tenyamsuk nang anya arye, Allah el dam umunyeba, elce anggunti, kalikuka dipdesilirye, keting noutam babye, lukunyan babye nirya ara, ilil pia kum aniryuk, teleb kanye bobuka unamlume. Tonoknye birye, el mi kwaknapnin balamlibuk, ami arye, talye kanye bobuka balamle touk, unamlume. Allah arye, aning atonun winibuka kalikinamsile atia.” Musa birye, Benyamin yala nang ati nyabuk. Ara, ‘Allah arye, sik Benyamin yala ninye melipnamleʼ tenen ati, morobuk.

¹³ Nyabukce, Musa birye, Yusup yala nang ati, nyabuk. Yusup elce deiamuk yala nang ati, nyabuk. Na ni Allah Yahweh, aninye sik unamak tuku nirya ara, kurye dei ap, mok purya ap, arepnamlyame. Tonda, ance sik melipminba, tuku pum amu tam arye, mek kutukuka panapliba, sik kwebuka dinamake.

¹⁴ Tonda, Allah ance melipminba, keting deipliba, tonda wala tikamliba, atuku deice arye aning-aning nirya bongoplirye, duk weika arye mouplibuk, pia teleb ning dakikirye, ‘Weik arye dinamak’ tenen, moropkine.

¹⁵ Tonda, minop talak danirye abukamuk mutuku pungkona ara, pia teleb ning aubuk ning ara, ‘Ance melipminba dopropnamaka,’ tenen, moropkine. Aning atonun, minop danirye, abukamuk mutuku taram noutamak, ance melipminbuk, ‘Pia teleb ning moulamle ning nirya dakikirye, lipnamak’ tenen, moropkine.

¹⁶ Aning atonun, Allah ance, sik Yusup yala nang ati, tukwak teleb ning aubuk ning nirya, pia teleb ning arepminya deice arye, ‘Teleb ning weik arye kanye deibuka dopropnamaka’ tenen, moropkine. Minop talak, yo mutmuta tiklamuka noutamak arye, uku dinmoka noutam unmoknye, ‘Allah ancuk, Yusup yala ninye ati, pia melipnalam’ tenen, moropkine. Aning-aning nirya, teleb kin ning moropmakin ning nirya ara, Allah ance, ‘Yusup el yala ninye dam deipnalam’ tenen, moropkine. Ati ara, Yusup el yala ninye arye, ateleb ning nirya dopropnamaka deiyok ara, Yusup el du yapu nirya ara, aulamik bukni, Yusup bira, sik deiyoknye, sik deice tam ulamuka ati, aminyan talak, el yala nang ara, teleb ning weik arye dopropnamake.

¹⁷ Yusup yala nang, sik mikip ap, sik mambul unamak ning ap ara, weik sapi basam yim ning, min yuma deibice ning, mikip weik ning atonun ulule. Ninye arye tapu kirikuka, kum weipmanto bai sapi basam, yim ning ara, el yang yu weik upmalya arye, ninye lukuka olamle. Aning atonun, Yusup yala nang, mikip weik ubikirye, sik mal olan nang ton obikirye, malye kipnamake. Yusup yala nang arye, yuk mutuku ninye, mutuku sirya, im sirya unyak ninye nirya babye, dipdongobuka, obuka sirya daknamake. Yim sapi basam arye, el yang bitinye arye, ninye lukuka olamle atonun, winipnamake. Tonok yang ara, Yusup el mi Efraim birye deibukba, dadeipdanin yanganyak yala nang, beribu-ribu nang unyake. Bitinye yang ara, Yusup el mi Manasye birye deibukba, dadeipdanin yanganyak yala nang, beribu-ribu nang unyake. Aning ara, kum nukmanto bukni, sik yin talin nang arye, pia weik arye upnin banamake. Musa birye, Yusup yala nang ati, nyabuk. Ara, ‘Allah arye, sik Yusup yala ninye melipnamleʼ tenen ati, morobuk.

¹⁸ Nyabukopura, Musa birye, Zebulon el yala nang ati, Allah morobuk. “Na ni Allah, ance melipminba, Zebulon yala nang ara, sik weik laut mekwen deice bikirye, yuk-yuk mutuku nang dam binuka dekdakiba, ‘Sik ning weik uplyopura, kanye deipnamak’ tenen, moropne. ‘Aning atonun, ance melipminbuk, sik Isakar yala nang ara, sik tenda aik dobuka unyak sukumuk, teleb ning weik upnin banamsil’ tenen, moropne. Ati, kanye deipnamake.

¹⁹ Ayala nang bitinye arye, sikce yuk-yuk mutuku nang ton yukubikiba, amutuku deice yakirye, Allah el si erena ati, elti, arepmanto ning dipkoprob teleb ning arelyanganamake. Atalak ara, sik ap, yuk-yuk mutuku nang ap, weik laut mekwen deice arye, boyanganamak ning dekdakcopura, aning-aning nirya, weika arye dopropnamake. Tonda, laut mekwen sirya bukni, mek wenenga deice deibikirye, dekdanamak ning weika arye dopdobikirye, weik bona utotoa talin nang unamake. ‘Wininamak’ tenen, moropkine na nio,” Musa birye Zebulon yala nang ap, Isakar yala nang ap ati, Allah morobuk. Ara, ‘Allah arye sik Zebulon yala nang ap, Isakar yala nang ap, melipnamleʼ tenen ati, morobuk.

²⁰ Nyabukopura, Musa birye, Gad el yala nang ati, Allah nyabuk. “Nun ni Allah ati, an si weik arye erekinyabe. Deiyok ara, ance Gad yala nang ati, sik unamak mutuku tabakuka weik tonap, arepminyopura, Allah ance teleb kipdeipnamsilyame. Gad yala nang ara, weik singa kus arye, yu weik ulirye, ninye taruk do, kisok do, obuka dilamle touk, Gad yala nang babye, yuk mutuku nang ati, ona mikip weik nang unyake.

²¹ Gad yala nang arye, ‘Tup pia teleb ning ara, nun ning ati ara, nun dem alabuka dopropnamabe,’ tenelamikce, tup pia teleb ninguk, dalubuka dololamikce, daunyake. Amutuku weik deiyok nang arye, pia telebak dopropmanto ning doprobik. Atuku weika arye, sik Gad yala nang tonok ara, sikce sik bidamang ati, doprobikce, sirya dakik. Israel ninye, sik weik deiyok nang nirya, bulubuka wekik talak ara, Allah arye Israel yala nang ati, ‘Wininamne,’ tenyamuk ning atonun, Gad yala nang arye winibik. Tonda, Allah arye, Israel ninye ati, ‘Wininamlulume, winibuka unamlulume,’ nyapdeiamsuk ning ara, sik Gad yala nang arye winibik.” Musa birye Gad yala nang ati nyabuk. Ara, ‘Allah arye, sik Gad yala nang melipnamleʼ tenen ati, morobuk.

²² Nyabukce, Dan yala nang ati nyabuk. “Dan yala nang anggunda, weik singa kuse winiryuk neltakne ning, kaplibuka bai sakuka balamle touk, winiplirye, anggunda Basan mutuku noutamak arye, duknubuka unyakakuk, talye karin arye, anggun mal olan nang ati, kaplibuka mikip arye olbinamlulume.” Musa birye, Dan yala nang ati nyabuk. Ara, ‘Allah arye sik Dan yala nang melipnamleʼ tenen ati, morobuk.

²³ Nyabukce, Naftali yala nang ati nyabuk. “Naftali yala nang anggunti ara, Allah arye pia bico tenelule. Ati, Allah arye Naftali yala ninye ati, weik arye melilule. Allah arye arepliba, Naftali yala ninye dopronamak mutuku ara, Galilea mekwen tam arye dipdongobuka, keting wekelbalamle tam, mutuku nirya ara, dopropnamake. Tonda amekwen tam arye dipdongobuka, itam mutuku ton dopropnamake.” Musa birye Naftali yala nang ati nyabuk. Ara, ‘Allah arye sik Naftali yala nang melipnamleʼ tenen ati, morobuk.

²⁴ Nyabukce, Asyer yala nang ati nyabuk. “Anggun apu koproba, Israel birye deiamuk mapu ara, weik daunyak bukni, Allah arye sik nirya ara, mitik tonun arye melinamle bukni, sikce deibik mi Asyer biti ara, elda pia mambule. Anya arye, Allah arye el yala nang ati, weika melinamle. El ti weik teleb kin ning arenamle. El weit capu silip ati ara, Allah mitik tonun arye, kanye deipnamle bukni, el Asyer biti ara, ‘Elda pia telebe’ tenen, weik arye kanye delinamle. Allah arye melipliba, Asyer el mutuku noutamak ara, zaitun yo duk pia weik moulamliba, zaitun duk dakuka purubikiba, zaitun minyak weik upnamle. Asyer yala nang ara, bona weik talin nang diamuk unamake.

²⁵ Teleb ulamikiba, sik ninye asik domikirye, anyaik dana-dana tam poka domica ara, el bublan tirikilongon ning ara, kat ning besi ap, tembaga ap arye, memepnamake. Apoka bublan ara, sik mal olan nang arye, dakuka kum daluploptinge, pia aunamle. Asyer yala nang nirya ara, keting tamun weik kam unamak touk, sik mikip babye pia weik unamle. Yuk mutuku nang arye, Asyer yala nang ati, malye kibuka kum bisipnamake.” Musa birye Asyer yala nang ati nyabuk. Ara, ‘Allah arye sik Asyer yala nang melipnamleʼ tenen ati, morobuk.

²⁶ Nyabukopura, ayupu ton nyabuk. Israel ninye ati kalikuka melilul Allah ara, el atonunye ton, pia kum ulule. El tonoka. Sik yuk yala ninye yuk-yuk Isa Mutuku Dongonye si erenyak ning ara, talye ninguk. Israel yala ninye, sik si erenyak Allah, elda pia teleb, mikip weiknye ulule. Sik ni koproba Allah arye, ‘Israel ninye melipnamne’ tenen, im ap, dua ap, deice arye, yanuka melisulule.

²⁷ Allah ara, pia unamle. Atalak-atalak nirya, anggunti melipsilirye, kalikilamsiliba, malye ning ara, anggun dam ton kum yanamle. Allah el taruk mikip arye, anggun amu tam talipsilirye, el taruk deice arye, pia kalikinamsile. Anggun mal olan nang ati, Allah arye yupu sekliba, anggun dam kum yanganamake. Allah arye anggunti, mikip arepsilirye, melipsilyopura, anggun mal olan nang ati, ‘Anang opnuyabe,’ nyabuka yakmunyeba, bai sakuka bindopnamake. Winibikiba, anang obuka, sirya daknamlume.

²⁸ Ati ara, Israel ninye nirya ara, sik yuk teleb touk unamake anya arye, Yakub el deipkirikdop nang nirya ara, kanye deibuka, telebuk unamake. Malye nang arye sikti, yanuka kum opnamake. Amutuku ara, din ning weik aupnamle. Ara, mok purwu im deice arye saklirye, sik unak teleb kipdeipliba, gandum ap, anggur mek ap, weik unamle. Sik mutuku noutamak ara, telebuk unamake.

²⁹ Ati ara, anggun Israel ninye ara, anggunda pia telebuk unamlume. Allah arye, pia teleb kipdeipnamsile. Allah el si Yahweh arye, anggun Israel ninye ati, lyepdeipsukce, wiamsuk bukni, yuk mutuku unyak ninye ati, aning atonun, sikti, ton kum wipdeiamuk. Allah arye, anggunti melisulule. Yin talin nang arye, ‘Mal arye opsicak’ tenen, ting kiniklamik touk, Allah arye anggunti, moubuka kalikisulule. Ninye arye, pia teleb parang ya bobikirye, kalikilalamak touk, Allah arye anggunti, kalikuka melipsilirye, anggun mal olan nang ati, obuka sirya daknamle. Winilula ati, el melipsilyopura, anggun mal olan nang dam bimunyopura, anang arye, ilil weik upliba, kanulongonamake. Winibikirye, ‘Se, nun ona kume, bico tenepsululume,’ nyabuka moropnamake. Anang nirya obuka, sirya dakmunce, sik nong deice yaniptapnamlume. Tonda, sik Isa Mutuku Dongonye, el si erena ati, mutuku deice delilamak ning nirya ara, daklopmunye deice, yanibuka banamlume.