Ulangan 29 - Eipomek

Allah arye, “Anggun wininamlum ning ara, aning wininamlulume,” nyabuk yupu buk, tonap tabakdongobuk yupu

¹ Allah el si Yahweh arye, Musa dam nyalin yupu nyapdeibuk yupu ara, ani. Ara, sik Israel ninye, Moab mutuku binuka unmek talak arye, yanuka nyapdeibuk. Anyapdeibuk yupu ara, sik Israel ninye, Sinai mutuku unmek talak, Allah arye nyalin yupu yanuka nyapdeiamuk yupu atonunuk, Moab mutuku unmek talak babye, tonap tabakuka, ayupu uk yanuka nyabuk.

Allah Yahweh arye, “Teleb kipdeipnamsine,” nyabuka, nyalin yupu deice nyapdeiamsuk yupu uk, tuba tonap nyabuk yupu

² Musa birye, Israel mutuku noutam ulamik nang nirya ati, “Anggun nirya bulubuka yalulume,” nyabukura, sik nirya bulubukabikce, yanuka wekik. Winibikura, Musa birye sikti, ayupu nyabuk. “Mesir mutuku ninye deiyok kibuka ulamuknye, Firaun ap, el taleamukba, amu tam ulamikce, Mesir mutuku ulamik ninye nirya ati, deiyok kibuka ulamik nang ap, sikce taleamik mutuku nirya ap ati, sik dam Allah arye weik mambul ning, el mikip weik arye nyamuk ning winibukak, anggun Israel ninye, anggun asing arye akunum eiamlume.

³ Ara, ‘Mesir mutuku deiyok nang arye, na nyapye yupu kekepnamak do?’ tenen, weik ikin winilen ning ap, tonda, weik kanye imun ning ap, ninye arye kum winipmanto pil ap, ‘Se, dipkoprob Yahweh arye apil dolule, tenepnamakʼ tenen, sirya dakuka, pil dobuk ning ap nirya ara, sik Mesir mutuku ninye dam, Allah elce winyamuk ning nirya ara, anggun babye akunum eiamlume.

⁴ Aning nirya akunum elilulum bukni, daupnin yangalamluma ani, ayana unmalum talak babye, Allah Yahweh arye, weik kel deiyok ning ton, kum areamsuke. Elce, ‘Anggun anang ara, na winyamse ning kel biktingʼ tenen, ning ton, anggun dam kum arepsuke. Ati ara, anggun asing arye elilalum bukni, tonda amul arye kekelamlum bukni, dipkoprob weik deiyok ning ara, bita kum biklume. Ati, awinyamuk ning nirya ara, anggunce, ‘E deiyok noutam ning ara, aniʼ tenen, moubuka kum bikamlume.

⁵ Nun ni koproba Allah arye, yupa weik keting tamun empat puluh (40) tahun noutam nirya ara, “Tia talak ati, asukum mutuku noutam binuka, unamabe,” nyabuka bobinamsuke. Tonda, na Allah arye anggunti, melilamsisa deice arye, Sinai pata mutuku noutam nirya ara, boyangalamsise. Aboyangalamsise talak ara, anggun liyamlum baju ap, yan bola sepatu ap, ton kum kwiliksakamsuke. Tuba telebuk ulamuk. Allah arye, Israel nang ati nyabukura, Musa birye laka nyabuk.

⁶ “Tonda, pata mutuku noutam ulamlum talak nirya ara, din ning roti kwaning babye, anggur duk yu mek babye, ton kum wamsuk ati, kum dilamlume. Aning kum wamsuka deiyok ara, ani. Atalak noutam aning kum areamsiseba, anggun Israel nang nirya ara, nara Allah, ‘Na si Yahweh unun ning ap, na mikip ap ara, moubuka biknamniyakʼ tenen, anggun patalamsuk ning ara, apatalamsuk touk, ubuka yangalalume. Aning nirya ara, kum areamsise.” Allah arye nyabukura, Musa birye Israel nang ati, laka nyabuk.

⁷ Nyabuk ning ara, Musa birye aninguk ton dukdogobuka nyabuk. Tonda, nun nirya amutuku yapu talak babye, Hesyebon mutuku deiyok kibuka ulamuknye Raja Sihon ap, tonda Basan mutuku deiyok kibuka ulamuknye, el si Ok ap arye, nun Israel nang nirya ati, “Nun bitinye arye opnunamʼ tenen, mal pilamsirik bukni, nunce sik anang ap, sik tam nang ap, obuka sirya dakupu.

⁸ Sik anang talibuka, ulamdik mutuku nirya ara, nunce yanuka, alubuka doprobupak arye, nunce amutuku nirya ara, Ruben yala nang ap, Gad yala nang ap, tonda Manasye yala nang, ton tam noutam arye, bokdobik nang ap ati, arebupu.

⁹ Aning nirya ara, nun nirya ati, Allah arye nyalin yupu deice arye, “Aning ara, wininamlume. Aning ara, pia kum wininamlume. Winipmunyopura, narye pia telebuk kipdeipnamsine,” nyapdeipsuk yupu uk, talibibyak arye, pia wininamabe. Winibuka upyopura, nun unamap ning nirya ara, pia teleb kibuka, nong unamsile.

¹⁰ Arup sum arye anggun nirya ara, Israel yala nang ati, yuk-yuk deiyok kiplum nang ap, amutuku talibuka unyak nang ap, tonda yin talina deiyok kibuka unyak nang ap, ninye yala nirya ap ara, anggun bulubuka, anggun si erelulum Allah, el si Yahweh dam yanuka wekmalumba, eipmasile.

¹¹ Tonda, anggun kilapu ap, anggun mapu nirya ap, anggun ululum mutuku noutam unyak ninye asik nang nirya ap, tonda anggun melina ati yo takun pil ap, mek kwen pil ap, dosinyak nang babye, asukumuk bulubuka awekmalume.

¹² Ura, anggun nirya awekmaluma deiyok ara, talye ati kume. Deiyok ara, anggun ni koproba Allah Yahweh arye, anggunti nyalin yupu nyapdeiamsuk ning ara, talibuka wininamluma atia. Ati abulubuka wekmalum nang nirya ati, nyalin yupu deice arye sekdongopsila ati, Allah elce, “Aning-aning nirya talibuka winimunce, apil dobuka unamlume,” nyapdeipmasil touk, anggunce, “Dipkoprob, aninguk talibuka wininamabe,” nyapdeipmunce, Allah Yahweh, elce nyalin yupu nyapsilye touk, ubuka wininamlume.

¹³ Anyalin yupu deice arye, anggun Israel nang nirya ara, arup arye anggun ni koproba Allah arye, ‘Sikda na mapu, na ‘Naʼ tenen nang unamakʼ tenen, akunum wipdeipsile. Adeice arye, ‘Sikda na mapu unyake. ‘Nara sik ni koproba Allah unamneʼ tenen, winipsile. Ara Allah arye, “Anggunda, na mapu ulalumba, nara anggun ni koproba Allah unamne,” nyabuka, anggun apu yapu nang Abraham ap, Isak ap, Yakub ap, sik dam nyapdeiamuk touk ubuka, na Musa birye, anggun dam ton nyapsine.

^14-15 “Aning-aning talibuka winimunce, pil donamlume,” nyabuka, Allah Yahweh elce nyalin yupu deice, nyalilamuk yupu ara, anggun arup bulupmalum nang atibuk, kum nyapsine. Bukni, arup Allah Yahweh dinmasilak, el dam yanuka bulubuka wekmalum nang, anggun nirya ati, anyalin yupu nyapdeipsile. Tonda, nun ayanuka wekmap nang babye, arup kum wekmak nang babye, nunce deibibiba, dodeipdanin banamak nang nirya babye ati, ayupu nyapdeipsile.

“Allah arye nyalin yupu nyapdeibuk ning yanibicopura, deken ning yaliba, dolonamake,” nyabuk yupu

¹⁶ Anggunda, nun apu yapu nang, Mesir mutuku ulamik talak, ikin pil dolamik ning ara, biklumce, tuba teninamlume. Tonda, yuk mutuku nang ulamik kan-kan, sik bisik yangalamik ning ara, aning babye tuba tenilulume.

¹⁷ Sikda, amutuku ulamik Mesir mutuku nang arye, talye-talye ning ati, ‘Aning ara, nun niʼ tenen, si erelamik ning ara, yo ap, keil ap tonda perak ap, emas ap, deice arye puturubuka deiamikce, ‘Nun deiyoknye,’ nyabuka, si erelamikce, malye ulamik ning ara, akunum laka nyabikura, anggun ton eililamlumce, kekelamlume.

¹⁸ Ati ara, sal do, kilapu do, anggun bon ning do, tonda, anggun Israel yala nang do, arup anyak yanuka wekmalumce, ayupu kekeplum nang nirya noutam arye, anggun ni koproba Allah Yahweh, el si erena kum, batakmunce yuk mutuku nang, sik si erenyak ning ati, ‘Se, Allah batakuka, yuk mutuku nang arye, si erenyak ninguk erenamne do, kum do?’ tenen, kanye teneniltonauk ululum do? Na walwal, bukni, atalye ning ara, si kum erenamlume. Anggunce, talye ning si erepnamluma ara, winipmanto ning ton nyapnusine. Ara, ninye arye koubikirye, dinyak ning bukni, adinyak ning ara, tamubuka sik nyalamle touk, yuk talye ning ati, si erepmunyopura, aminyan talak dipkoprob pia ikin weik upnamsile. Ati ara, anggun unamlumak nirya ara, ‘Talye ning ati, si erebipyopura, malye weik ubibyakʼ tenen, moubuka kalikdamunyak arye, unamlume.

¹⁹ Anggun ayan bukuka kekenmalumak, Allah elce, “Malye ning si erebikce nang ara, ikin ning dopnamake,” nyabuka, nyalin yupu deice arye, ‘Aninguk wininamakʼ tenen, mikip arye nyapsuk ning nirya ara, anggunce kekeplume. Anyalin yupu akunum kekeplum nang ara, ‘Nunda, ayupu akunum kekebabe ati, aminyan talak ara, nun babye patapsilye touk, talye malye wininamabe. Aning ara, teleb uka,’ pia kum tenenamlume. Anggun mining kanye tenepmunye ninguk, dekmunyeura, anggun dam babye, ikin ning yalyeura, dopropnalume. Ara, Allah arye, sik malye wininyak nang ati, weneplirye, deken ning arepsilyeura, teleb un ning babye, malye winin ning babye, ikin ning yalyeura, sik nirya ikin ning dolonamake. Atouk, malye winin ninguk talibuka winilamlinye bira, ikin ning yalyeura, dolonamle.

²⁰ Anyalin yupu akunum kekepmalya babye, yata nang arye do, malye un ning winiplinye bira, Allah arye, ‘Anye bira, namin kiplirye, teleb kipdeipnune,’ pia kum tenenamle. Bukni, atouk winiplinye bira, Allah yu weik uplyeura, ikin ning tamubuka, el nong deice delinamle. Ara, “Anggunce, malye winipmunye nang ara, aikin weik ning, anggun dam yanganamsile,” nyapdeipsiba, abuku noutam sekeibik touk, ubuka yasiliba, donamlume. Adeice arye, amalye winin nang nirya ara, Allah arye sik malye winin nang ati, namin kina kumce, obuka sirya daknamle.

²¹ Ara, Allah el yupu yanibikirye, malye wininyak nang ara, Allah el si Yahweh arye, Israel yala nang unyaka noutam arye wipdeiplirye, “Aning-aning wininamne,” nyalin yupu nyabukura, abuku noutam sekuka, deibik touk ubuka, wenebuka suplirye, kum kipdeiplyeura, yuk Israel yala nang nirya, aning eibikirye, ‘Se aning ara, Allah arye winipmaleʼ tenen, bikinamake.

²² Aning winipnya ati, doryanamle talak ara, anggunce deimunyeba, deipdanin banamak nang arye deipnamak nang ap, tonda yuk pera mutuku arye, anggun mutuku noutam dayanganamak nang ap nirya arye, Allah elce ikin weik ning ap, kanye imun ning ap, anggun malye winipmunya ati, anang dam arepsiliba dopnalum ning ara, sikce eibikirye, biknamake.

²³ Allah arye ikin ning weik areplyopura, amutuku noutam unamak nang, sik wa winak teleb tuku nirya ara, tuku miklirye, kata dem kipnamle. Tonda, tong weik nyalamle ning, el si belerang ap, garam ap, weik tonun arenamle. Adeice arye, anggun wa tuku nirya ara, sice butbuta arye, atuku deice lipdongoplyeura, malye kinamsile. Aning deice arye, tuku malye uplye ning ara, atuku deice koupnamak ning nirya, kum papnamle. Tonda, tuku deice papmanto mutmuta babye, kum papnamle. Ara min talak Allah el yu weik ubukba, Sodom ap, Gomora mutuku ap, Adma mutuku ap, tonda Seboim mutuku ap nirya ara, kum kipdeiamuk touk, anggun unamlum mutuku babye, kum kipdeipnamsile.

²⁴ Kum kipdeipsiliba, mutuku nirya unyak nang nirya arye, aning eibikirye, ‘Se, yata ati Allah arye, sik anang ulamik mutuku ara, kum kipdeibuk do? Tonda, sik amutuku ulamik nang arye, yatato ning winilamik ati, Allah el yu pia weik ubukba, sik anang ap, sik mutuku ap, malye kibuka kum kipdeibuk do?” nyabuka asipnamake.

²⁵ Nyabuka asibiceura, tamubuka nyapnamake, “Kume, deiyok ara, aning ati winibuke. Sik amutuku ulamik nang arye, sik apu yapu nang si erelamik Allah, elce sikti, “Aning-aning winamlulume,” nyabuka, nyalin yupu deice nyalamuk ning ara, sik amutuku ulamik nang arye, kum kekebuka winilamik ati, winibuke,” nyanamake. “Sik amutuku binuka ulamik nang ati, sik ni koproba Allah arye, sik anang nirya ara, Mesir mutuku ulamikak, bobuka yayukce, nyalin yupu nyapdeiamuk ning nirya ara, batakik deice arye winibuke,” nyanamake.

²⁶ Anang arye, malye winin ning pia weik winilamik ning ara, ani. Ara, sik ni koproba Allah dipkopropnye batakuka, talye ning, sik bikina kum ning atibuk, “Nun deiyok nang ani,” nyabuka, si erebik deice arye winibuke,” nyanamake. Tonda, asi erelamik isa nirya ara, sik ni koproba Allah arye, “Atalye ning nirya ara, kum si erenamlume,” nyapdeiamuk ning, si erelamik ati, winibuke,” nyanamake.

²⁷ Deiyok aning ati, “Allah el si Yahweh arye, el mapu ati, yu weik ubukba, kanye imun ning nirya bobuka, sik deice deibukura, ikin kanye bobuka unyake,” nyanamake. Tonda, aikin ning arebukura, doprobik ning nirya ara, abuku deice sekuka deibike,” nyanamake.

²⁸ “Allah Yahweh, el yu weik ubukba, aning ara, adiparyuk winilamuk. Tonda, Allah el yu pia weik ubuka deice arye, sik Israel nang amutuku ulamika ani, amutuku noutam arye dobuka, sik yuk ninye asik nang mutuku donoknamuke. Winibukura, sik Israel nang nirya ara, yuk nang mutuku binuka, ulamike,” nyanamake.

²⁹ Tonda, yata barye yala ning nirya ara, nun ni koproba Allah Yahweh, ‘Elcuk aning winiptinyeʼ tenen, bikilul. Bukni, aning ara, nun kum bikinyabe. Ara duknuning ulule. Allah Yahweh elcuk bikilule. Bukni, Allah elce nunti, “Anggunda, aning ara, wininamlume. Aning ara, pia talibuka kum wininamlume,” nyapdeiamuk ning ara, nun ap, nunce deibibiba, deipdanin banamak nang deice, akunum nyapdeiamsuke. Ati ara, nun nirya arye, aninguk talibuka wininamabe.” Musa birye, sik Israel nang ati nyabuk.