Ulangan 17 - Eipomek

Malye wamlye domba ato ning dobuka, Allah el si erena ati, ‘Arena meme,’ nyabuk yupu

¹ Anggun ni Allah Yahweh, el si erena ati, arena ning ara, pia teleb domba basam ap, sapi basam ap, aninguk arenamlume. Nong bol malye ning ara, arena meme. Aning ara, Allah arye, ‘Aning ara na pia lik,’ tenebuka bataknamsile.

“Yuk talye ning ati, ‘Nun ni koproba aniʼ tenen, si erena ara, pia meme,” nyabuk yupu

² Anggun unamlum mutuku noutam arye, sal do, kilapu do, Allah arye, ‘Aning ara, pia na like, aning ara, pia kum wininamlume,’ nyapdeiamuk yupu, sikce yaniptabikirye, yuk nang arye eibuka bikikirye, lak nyabikiba, anggunce moubuka kekenamlume.

³ Tonda, anggun anye ap, akil ap arye, tukwak mutuku talye ulye ning do, isa do, ato talye ning, ‘Nun ni koproba aniʼ tenen, si erebikcopura, anye babye, pia malye winilule. Aning atonun, na Allah si erebuka kina ati kum bukni, sikce kutam tuku dipdongobuka kinyak ning, keting do, wala do, kurya do, aning ati si erebikirye, ‘Nun ni koproba aniʼ tenen, atalye ning ati kanye deibuka si erenmakiba, yuk nang arye aning eibuka bikikirye, sik deiyok nang ati lak nyabikiba, moubuka kekenamlume. Deiyok ara, awinin ning nirya ati, nun ni Allah arye, “Meme,” akunum nyapdeiamsuke.

⁴ Ati ara, sal do, kilapu do, talye un ning ati si erenmakiba, yuk nang arye eibuka, lak nyapsikcopura, anggun deiyok nang arye, ‘Anggunce aning ara, dipkoprob winipmak do?’ tenen, moubuka kalikuka dipdemince, amalye winina deiyok ning ara, dipkoprob sik Israel mutuku noutam arye winipmacopura, awinipmace nang, tongopnamlume.

⁵ Yuk talye ning ati si erenmaca deice arye, pia malye winipmalye kil do, sal do, anang ara bobinuka, sik mutuku aik ulamicak arye dopmunce, anyasik bai bana ati, bisik bublan dam, binuka deipmunyopura, anang ara, sik wenena ati, anggun Israel nang nirya arye, keil donokuka opmunyeba, dipnamnyake.

⁶ Ura, amalye ning winipmace nang, ikin deibuka ona ati ara, tonoknye biryuk, ‘Sik malye winipmangu ara, narye eipmanue,’ nyablya deice kum bukni, dipkoprob ninye bitinye nangto, tonda winilye nangto, anang nirya arye eibikirye, ‘Talye ning si erenyak ning,’ lak nyabikca ati ara, amalye winipmace nang, adiparyuk onamlulume. Bukni, tonap nyapne. Tonoknye biryuk eipmalirye, lak nyaplyopura, adeice aryuk, anggun anang kum onamlulume. Ara, ‘Dipkoprop amalye winin ning winipmak do, kum doʼ tenen, teniltona upsilyopura, anang batakanamlume, ona kume.

⁷ Tonda, dipkoprob winibikiba, ninye weik tonun eibikcopura, sik minop eipmakce nang arye, keil dobuka amalye winipmace nang obikcopura, aminyan tam ara, anggun amutuku ululum Israel nang nirya arye, keil dobuka onamlulume. Aning winipmunya deice arye, amalye ning winipmace nang ap, sikce malye winipmace ning ap ara, kum kilinamlume. Anggun Israel nang unamlumak ara, ato malye winin ning pia kum wininamlume.

Ninye yupu bokolina ati, nyabuk yupu

⁸ Tonda, winipmanto ara, anggun yupu deiyok talin nang arye, amutuku noutam unyak nang arye, malye un ning talibuka winibicopura, ninye yupu ton lipsisikuka bokeipnamlume. Bukni, ayupu kekepmamunye talak ara, ‘Se, nun mitik tonun walwal upmasile. Walwal upmasila anya arye, yata wiripnamap do, dipkoprob winipmak do, kum do?’ tenen, teniltona kipsilyopura, bataknamlume. Ara, tonye birye, tonye biti opnun do, kum do? Tonda, nong bol deiceuk opdakiba dila sakana do, kum do? Tonda, ninye dipkoprob opnamak ning ap, mangkau arye opnamak ning ap, tonda, yuk nang taleamikce ning ati, yupu nyabuka yeb-yeb an ning ap, aning-aning nirya ati, anggun yupu deiyok talin nang arye, kum sirya dakmanto upmakce ning ara, anggun adiparyuk, anggun ni koproba Allah Yahweh arye, ‘Na si eren mutuku ara ani,’ nyabuka, elce kintinip deibukakuk binamlume.

⁹ Bimunyopura, Allah el si eren aik pum pil don nang, sik Lewi yala nang, imam-imam pil don nang ap, tonda yupu lipsisikuka bokolina deiyok nang, (Hakim) nang ap, sik damuk binuka, aning nirya ara, lak nyalbinamlume. Winipmunyopura, sikcuk, ‘Aning ara winipnamlumʼ tenen, nyapnamsiyake. Winibikirye, yupu bokolina deiyok nang, sik hakim nang arye nyabikce ning ara, sik imam-imam nang arye, lak nyalyanganamsiyake.

¹⁰ Imam-imam nang ap, yupu lipsisikuka bokolina deiyok nang, hakim nang ap, sikce, ‘Aning ara, aning winibuka winipmalume,’ nyabikcopura, anggunce moubuka, sik nyapmakce ning nirya ati, bikuka unamlume. Ara, anggun ni koproba Allah Yahweh arye, ‘Na si eren mutuku ara ani,’ nyabuka, elce kintinip deibukakuk, kekelbanamlume. Adeiyok nang arye, ‘Winibuka unamlume,’ nyabicopura, anggunce moubuka, sik nyapmace ning nirya ati, bikuka unamlume. Tonok ning babye, batakna kume.

¹¹ Sik imam-imam nang ap, hakim yupu lipsisikuka bokolina deiyok nang ap, sikce, ‘Aning ara, winipmaka anya arye, sik wenena ati, winipnamlume,’ nyapmace ning nirya ara, ‘Dibaʼ tenen, moubuka aninguk wininamlume. Tonda, sikce, ‘Aning ara wininamnyake,’ nyapmace ning nirya ara, mitik tonun ning babye, ton batakna kume. Pia talibuka wininamlume. Aning winipnuyap do, aning batakuka yuk ning winipnamap do?’ tenena kume. Sik yupu lipsisikna deiyok nang arye nyabikce ninguk, wininamlume.

¹² Tonda, anggun ni koproba Allah Yahweh, el si eren aik pum pil don nang, sik imam-imam nang ap, hakim yupu lipsisikuka bokolina deiyok nang ap, wipdeipmaliba, sik anang arye, ‘Aning ara wininamake,’ nyabuka, nyapmace ning ati, yata nang do nirya, sik yupu malye kibuka yaniploplinye bira, adiparyuk wenebuka opnamlume. Ara, aning winipmunya deice arye, anggun Israel nang unamlum noutam ara, amalye winin ning winipmalinye ap, elce malye winipmalye ning ap, kum kibuka kilinamlume.

¹³ Anyapmasin touk akunum winipmunyeba, amutuku unamak nang arye, kekebikcopura, akunuma. Amutuku noutam unyak nang nirya ara, awinipmunye ning kekebuka bikikirye, sik ilil upnamle. Unipliba, aminyan talak ara, amalye ning ton, tamubuka kum wininamake.

Ninye deiyok nang, sik Raja kibikce nang arye, talibuka winin ning ati, nyabuk yupu

¹⁴ Allah Yahweh arye, ‘Ateleb mutuku arepnamsine,’ nyapdeiamuk yupu deice arye nyamsuk mutuku, akunum wekmunce talibuka, amutuku noutam umunye talak ara, na kele, aminyan talak ara anggunce, ‘Kume, amutuku dana-dana tam unyak nang, sik ninye deiyok kibuka, Raja unyak nang arye talibuka unyak touk, ‘Nun babye ton uptibye ati, Rajanye wipdeipnamabe,’ tenenamlume.

¹⁵ Winibuka tenepmunyopura, anggun ni Allah arye, ato nang ton wipdeipnamsutue. Anggunce, ‘Dipkoprop anye bira, nun ninye deiyoknye kipsuturye, Raja unamsilʼ tenen, bikamlumnye binyuk, wipdeipnamlume. Anye bira, Allah arye wipdeiamlinye binyuk, wipdeipnamlume. Tonda, awipdeipnamlum nang ara, anggun amutuku koproba nanguk erelinamlume. Yuk mutuku ninye asik nang atonun nang ara, wilina pia kume. Anggun Israel nang noutamuk wipdeipnamlume.

¹⁶ Tonda, anggunce wipdeipnamlum Raja ninye deiyoknye bira, ‘Kuda basam weik tonun doproptinyeʼ tenen, kum winipnamtue. Aning ara malyeuka. Tonda aning atouk, anggun Raja deiyok nang arye, ‘Mesir mutuku tamubuka bibirye, kuda basam weik tonun ton dolona ati, dekelbinamabe,’ kum nyaptue. Deiyok ara, Allah Yahweh arye, “Na mapu ara, Mesir mutuku tamubuka kum yanganamnyake,” nyamuka ati, ayupu nyapsine.

¹⁷ Tonda, anggun ninye deiyok Raja kipdeipnamlumnye bira, kil weik tonun dona kume. Tonda, aning atouk, dekna weik ning emas ap, perak ap, weik tonun kum dolonamle. Aning tenelamlinye bira, wilina kume. Deiyok ara, aning patana ap, dolona ap uplya deice arye, ‘Anggun ni Allah el si yaniplirye, bataklyakʼ tenen ati nyapsine. Yuk talye ning pataplya deice arye, Allah ati bataklyake.

¹⁸ Raja wipdeipnamlumnye bira, adiparyuk Allah arye, “Aning ara, wininamlume. Aning ara, pia kum wininamlume,” nyabukba, imam-imam Lewi yala nang arye dobuka, sekuka deibik ning ara, narye ayupu nyapsinye yupu nirya ara, sekukabikirye arebikiba, el damuk delinamle. Aning ara, pia tuba teneplirye, talinamle.

¹⁹ Ayupu sekuka arebice buku ara, aRaja el damuk delinamle. Tonda, el kam unamle talak nirya ara, ayupu ara, asum-asum nirya nukunauk unamlule. Aning uplya deice arye, elce si erelul Allah Yahweh ati, ilil upliba, el siuk erebuka, ‘Elda weik mambule, pia telebeʼ tenen, Allah elce, ‘Aning wininamlume. Aning ara, pia kum wininamlume,’ nyapdeiamsuk yupu ati, pia moubuka taliplirye unamle.

²⁰ Abuku noutam sekik ning ara, elce asum-asum nirya moubuka nuklirye, el kayapu nang Israel nang dam arye, ‘Nara, pia telebnye, yuk nang ara, na amu tam unyake,’ teneplirye, el kanye erebuka kwaliplirye, kum unamle. Tonda, Raja ninye deiyoknye birye, Allah arye, ‘Aning wininamlume. Aning ara, pia kum wininamlume,’ nyapdeiamsuk yupu ton, pia kum yanipnamle. Winiplya deice arye, el ap, elce deipliba, dadeipdanin banamak nang ap, anggun kan-kan noutam arye, sik Israel nang nirya ati, weik tonun ninye deiyok nang ubikirye, Raja kibuka, sikce talibikiba, pia upnin banamake.