Rut 4 - Eipomek

Boas birye, Rut dobuk yupu

¹ Ura, amutuku ara, sik anyasik dana-dana ara, cang poka dobuka antanapdongamikce, bisik bublan tonok botopdeiamik. Boas bira, amutuku ninye bisik eldanak, abublan dam binuka bukmok. Binuka bukmokce, dinmok bukni, ‘Elimelek el weit koproba, Rut doplirye, el imun ning ati, lyebuka melinamle do?’ tenepmoknye, el tamnye, yangayukba, eibukce, “Na ka anyaka yanuka buklyame,” nyabukura, yanuka bukuk.

² Yanuka bukukopura, Boas birye, ‘Nun yupu talipnamap ning ara, sik ton kekenamak’ tenen, amutuku ninye talibuka, ulamik wisi nang, tagu barye nang wipdeibukce nyabuk. “Anggun nirya kekepmunce, bulubuka yanamalulume,” nyabukura, sik babye, ayanuka bukik.

³ Bukikopura, Boas birye, Elimelek el weit koproba, Rut lyepropturye, minop dopmantonye biti nyabuk. “Moab mutuku arye, tamubuka yayuk kil, Naomi birye tuku deknamle. Wini talak ara, nun yalanye Elimelek, el taleamuk tuku, akil arye deknamala ati, nyapsine.

⁴ Ati utenepse. Anda moubuka tenipnulyame. Na kanye ara, akil arye, atuku deknamle ning ara, ‘An ton kel biktum’ tenen, laka nyapkine. Ati, ance, ‘Atuku deknun,’ tenepminyopura, sik awekmak nang noutamak arye, laka nyapnulyame. Anang ara, nun mutuku deiyok kibuka unyaka ati, nyapkine. Tonda, kum dekminyopura, ance, ‘Kum winipnune,’ nyapnulyame. Ati ara, aning deiyok ara, atuku dekmanto nang ara, nun bitinyeuk aunyame. Bukni, anda nun yala min yuma anye unmalame. Nara, an amu tamnye unune. Ati, ance kum dopropminyopura, na aminyan dopropnamne. Ati, ‘Narye dopropnamne,’ tenepminyopura, atalak aryuk nyapnamanilyame.” Boas birye nyabuk. Nyabukba, el ka koprop arye, “Telebe, narye atuku deknune,” nyabuk.

⁵ Nyabuk bukni, Boas birye nyabuk. “Telebe tenepminyopura, Naomi ap, Moab kilmu Rut ap, sik melina ati, sik dam arye, atuku dopropnalam bukni, atuku deknuminye sum aryuk, tonda nun yalanye Elimelek, el mi Mahlon dibuka anya arye, el yuwak kil Rut babye, dopnalyame. ‘Dopnalyame,’ nyapmakin deiyok ara, ani. Ara, winipminye deice arye, nun yalanye Elimelek, el taleamuk tuku ara, el yala nang arye, ‘Elimelek, el taleamuk tuku ani. Elce deibukba dadeipdanin, balamica ani, deipnamak ninye tuba talipnamake. El yalanye birye, el domuk kil dopliba, mapu deipnamdak ara, atuku tuba talinamake,’ nyanamaka ati, nyapmakine.” Boas birye, el yalanye biti nyabuk.

⁶ Ura, ayupu nyabuka ati, atuku minop dopropmanto deiyoknye birye, tamubuka nyabuk. “Diba atuku ap, ayukwak kil ap, ‘Aning nirya ara, adiparyuk dopropnalyame,’ nyapnilama ara, dib nyapnilame. Bukni, nara, atuku ap, ayouwak kil kum dopropnamne. Narye sakdebuka, winipmanto kumnye unun atia. Deiyok ara, ‘Narye deipniba, dadeipdanin binamak mapu, sik dopropnamaka ara, mitik uplyak’ tenen, nyapkine. Ati, an Boas ancuk, atuku dopropnulyame. Narye sakdebuka, kum winiptininye unun atia,” nyabuk.

⁷ (Ura minop talak Israel ninye winilamik ning ara, ani. Ara, tuku do, yuk weik ning do, deknamice talak ara, deknamice ning taleamna deiyoknye birye, el yan kinikuka, ban ning el si sandal kwiribuka, deknamananye biti, arelamik. Winilamik ning ara, deiyok ara, ani. ‘Adekmalam ning ara, dipkoprob akunum dekmalam anya arye, aning ara, an ning akunum upmale. Akunuma, kunum sah upmale,’ nyana ati, sik sandal kwiribuka arelamik. Mambul ning deknunanye birye, sandal kwiribuka arelamik deice arye, Israel ninye deklamik ning nirya ara, dipkoprob ‘Sah, akunuma,’ nyalamak touk, winilamik.)

⁸ Sik Israel ninye winilamika ati ara, aning mitik tonun, akil Rut minop dopmantonye birye, Boas biti, nyabuk. “Nara, ayukwak kil Naomi dam arye, narye kum deknamana anya arye, ancuk Naomi el akanye koprop taleamuk tuku dekmince, ayukwak kil Rut babye dopnulame,” nyabukce, el ongolamuk sandal kwiribuka, Boas biti, arebuk.

⁹ Aning akunum winibukopura, Boas birye, amutuku taleamik deiyok nang ap, yuk nang anyaka wekmek nang ap ati, nyabuk. “Anggun awekmalum nang nirya arye eibuka kekeplumce, kel biklume. Anye birye, el sandal kwiribuka arepnil deice arye, akunuma, nun yalanye dibuknye, Elimelek ap, el mapu bitinye nang, sik si Kilyon ap, Mahlon ap, taleamik tuku nirya ara, Naomi dam arye akunum dekmane,” Boas birye nyabuk.

¹⁰ Nyabukce, ayupu ton dukdongobuka nyabuk. “Tonda, Mahlon domuk kil, Moab mutuku kil Rut bira, ‘Na kil unamnil’ tenen, akunum dopropne. Nara, diamuknye Elimelek yalanye ununa ati ara, winipman deice arye, Elimelek taleamuk tuku ara, elce deiamukba, dadeipdanin yanganyak nang ap, el yala nang arye, delinamak nang ap arye, atuku tuba talinamake. Ara, akil ap, nunce delinanam mapu ara, diamuknye, el yala nang noutamak unamake. Tonda, anyasik damuk unamake. Tonda, nun mutuku ninye si, sekenyap buku noutam, Elimelek el si tuba upnamle. Ara, nun yala punun nang arye, nun apu yapu deibikba, dadeipdanin yanganyak nang winipnin yangalamik ning ap, sekenyap buku ati nyapne. Ura, na kwit capu nang, arup ara, anggun nirya kekepmalumce, aning nirya eibuka, kel bikmalume. Ati, tuba tenenamlume.” Boas birye nyabuk.

¹¹ Nyabukopura, sik amutuku deiyok talibuka ulamik nang ap, anyasik ban bisik dam poka bublan dam bulamik nang ap arye, nyabik. “Diba, nunce akunum eipkiyabe. ‘Allah el si Yahweh arye, teleb ubuka melinamkil’ tenen, nunce moronamkiyabe. Ara, ance dopmalam kil Rut bira, minop ulamrik kilapu, Rahel ap, Lea ap arye, mapu weik delilamrikba, ‘Israel ninye weik kipnin balamik atonun, wininamkile’ tenen, moronamkiyabe. Tonda, Allah arye melipkiliba, Efrat mutuku tam noutam ara, anda weik bona utoto talinanye unalame. Tonda, Betlehem mutuku noutam unyak ninye nirya arye, ‘An si kel bikikirye, elda weik mambulnye, tenenamkiyak’ tenen, moronamkiyabe,” nyabik.

¹² “Tonda, Rut birye deilinamle kilmapu ara, teleb-telebuk, weik mambul nang unamake. Winibikiba an yalanye bira, Yudah, el kil Tamar birye deiamuk mi, Peres birye deibukba dadeipdanin yangalamik nang, teleb ubuka weik mambul nang ulamik touk, an yala babye, ‘Weik mambul nang unamak’ tenen, moronamkiyabe,” nyabik.

Boas ap, Rut ap arye, sik mi Obed deiprik yupu

¹³ Atalak ara, Boas birye Rut dobuk. Neika daulamdika ani, Allah el si Yahweh arye, melibuka deice arye, Rut mi bomuka ani, sal mi tonok deibuk.

¹⁴ Deibukura, amutuku ulamik kilapu arye Naomi biti nyabik. “Allah el si Yahweh ati, ‘Pia telebe,’ nyapmabe. Ara, wini talak ara, Allah arye melipkukba, an yamal kil arye, sal mi deipmakile. Ami neplyopura, an patapnamkil ning ati, pia melinamkile. Tonda, ami ara, Israel ninye nirya arye, kel bikikirye, ‘Elda weik mambulnye, nyanamak’ tenen, Allah moronamabe.

¹⁵ Tonda, an yamal kil Rut bira anti, weik bico tenekulule. Ance sal mapu tekbarye nang deiptumba, mitik anun arye, teleb ubuka melinamkiting bukni, akil Rut bira, pia weik arye melinamkile. Rut birye, sal mi deipmakil ning ara, ami arye wisi daminye talak, pia melinamkile. Ati, an kanye, pia deipnalyame,” nyabik.

¹⁶ Nyabikopura, Naomi birye, asal mi ati, bico tenebukce, el keil deice deibuka iribukce, atalak dipdongobuka, dotalak nirya, ami ati, pia melilamuk.

¹⁷ Amutuku kilapu arye, Naomi biti nyabik. “Ami el si ara, Obed,” nyapdeibik. Nyabikce, “Naomi bira, el mi koproba atonun, sal mi tonok akunum deipmale,” nyabik. Daulamika ani, aminyan talak ara, Obed birye deibuk mi si ara, Isai nyabuka deibuk. Tonda, Isai birye deibuk mi si ara, Daud nyabuka deibik. Aminyan talak ara, anye bira, Raja Daud ulamuk.

¹⁸ Ura, Boas el yala deipdanin yanamik nang si ara, ani Peres. Peres birye deiamukba, dadeipdanin balamik nang, sik si ara, ani. Peres birye deiamuk mi si ara, Hesron.

¹⁹ Hesron birye, deibuk mi si ara, Ram. Ram birye deibuk mi si ara, Aminadab.

²⁰ Aminadab birye deibuk mi si ara, Nahason. Nahason birye deibuk mi si ara, Salmon.

²¹ Salmon deibuk mi si ara, Boas. Boas birye deibuk mi si ara, Obed.

²² Obed birye deibuk mi si ara, Isai. Isai deibuk mi si ara, Daud. Anye Daud bira, Israel ninye, sik ninye deiyoknye, Raja Daud ulamuk.