Roma 9 - Eipomek

Aning-aning deice tam unyaka deiyoknye, Allah min arye tenyamuk touk, Israel ninye wipdeiyamuk

^1-2 Na kayapo, na yala ninye anggun Israel ninye ati tenepnirye, ‘Se’ tenen, tuba-tuba ikin kanye bobuka, talima uk dinulule. Na Paulus bira, Kristus ap, talima dukdongobuka unun deice arye, pia dipkoprop yupu nyasunune. Na kanye talima pum tam nirya ara, Allah El Dib Kanye unilirye, “Dipkoprop nyanmalame,” nyabuka nyanilye touk, dipkoprop yupu nyasunune. Tilila yupu kum nyanune.

³ Na yala nang kopropa, nun Israel yala ninye ati, imun kanye bonune. Imun kanye bonuna deiyok ara, nyapnusine. Ara, na yala ninye sik Israel ninye nirya ati, ‘Nun ni Allah arye lyeptue’ tenen, pia se tenenune. Israel yala ninye nirya lyena ati ara, ‘Allah arye na Paulus ati, bataknuturye, Kristus ap, na ap wilibuka yuk-yuk deipnutuba, adeice arye Israel ninye nirya lyeptue’ tenenune. Ara, ‘Se, na yala nang kopropa, Israel ninye nirya lyeptue’ tenen, pataniliba, nyapsine.

⁴ Israel ninye ara, talye ninye kume. Deiyok ara ani. Tonok ning ara, Allah arye Israel ninye ati, ‘Na mapu unamak’ tenen, “Kwaknanamsine,” nyabuka nyalilamuk. Tonda, Allah el mikip ap, pia teleb ulul ning ap, sikti, benelelamuk. Tonda, Allah arye, ninye malye winin ning namin kina ati, “Wininamlulume,” nyalilamuk nyalin yupu ara, sik Israel ninye ati nyalilamuk. Tonda, Allah arye Musa ati, ‘Aning ara wininamlulume, aning ara kum wininamlulume,’ nyalilamuk mem yupu nyalilamuk ning ara, Israel ninye ati nyalilamuk. Tonda, Allah arye, “Na si winibuka erenamnulume,” nyabukabukce, el si erena ati, anyaik pum tam unamik ning nirya ap, tonda Allah arye, “Winibuka melinamsine,” nyabuka nyalilamuk yupu ap, ayupu nirya ara, Allah arye sik Israel ninye ati, arilamuk.

⁵ Tonda, nun apu yapu ara, Israel yala ninye arye delilamikba dadeipdanin, yangalamik nang ara, weik mambul nang ulamik. Tonda, ninye lyena ati, Allah arye wibuka dopkwetepsuknye, Kristus el deiamrik nang bitinye babye, sik apu yapu ara, Israel yala ninyeuk ulamik. Anirya ati ara, sik Israel ninye ara, talye ninye kum unyake, nyapmasine. Aning atonun Kristus babye, talinye kum ulule. Elda, aning-aning nirya talibuka deice tam Weik Deiyoknye kibuka ulule. Elda, dipkoprop Allah ulule. ‘El si ara, pia erenauk unamap’ tenen, Amin nyapsine.

⁶ Bukni, minop talak Allah arye, “Na mapu kopropa, Israel ninye ara, weik ubribanamake,” nyabuk yupu ara, dipkoprop kum suktalipmale. Allah el mapu ara weika arye ton tuba unyake. Bukni, Israel yala ninye arye delilamak mapu nirya ara, nong bol deice ati, Israel ninye unyak bukni, sik kanye talima pum tam ara, Allah el mapu kopropa kum unyake.

⁷ Aning atonun, Abraham arye deibukba dadeipdanin, yangalamik nang arye delilamikba unyak ninye ara, ninye yala ap, nong bol deice ap ati ara, sik apu kopropa Abraham ulamuk bukni, sik kanye talima pum tam ara, Abraham el mapu kopropa atonun kum unyake. Aning kum bukni, Allah arye Abraham biti nyapdeiyamuk yupu ara ani. ‘Allah arye nyabuk. “Ance deipnalam mi, el si ara Isak, elce deipliba, dadeipdanin banamak nang ati, ‘Anang ara, Abraham el mapu kopropa unyake,’ nyabuka nyanamsine,” Allah arye nyabuk.’ (Kejadian 21:12)

⁸ Ura, Allah arye ayupu nyabuka deice arye, kel kinyabe. Talye dopdarikce, deiprik mi ara, ami arye deibukba dadeipdanin yangalamik mapu nirya ati, “Allah el mapu kopropa atonun unyake,” kum nyaptibye. Aning kum bukni, Allah arye Abraham ati, “An mi deipnamlame,” nyabuka, nyalilamuk yupu ap, ninye winipmanto kum pil dobuka deice, Sara birye deibuk mi Isak arye, deibukba dadeipdanin, yangalamik ninye ara, “Abraham el mapu kopropa unyake,” nyaptibye. Ati, ‘Ninye tukwak ninye sik bidamang aryuk dopdakirye, sikcuk delinyak mapu ara, Allah el mapu kopropa kum unyake. Bukni, Allah el nyalilamle yupu deice arye, el mapu kopropa kilisulule’ tenen, kel kinyabe.

⁹ Aning ara talye kum nyapsine. Deiyok ara ani. Allah arye Abraham ati nyabuk. ‘Allah arye nyabuk, “Na tenepse talak akunum upliba, tamubuka yanyopura, Sara birye sal mi deipnamle,” Allah arye nyabuk.’ (Kejadian 18:10, 14) Ayupu nyabuk talak ara, Abraham arye Ismael akunum min talak arye deiyamuk bukni, Allah arye nyalilamuk ning ara, ami Ismael ati kum nyabuk.

¹⁰ Ayupu deice arye kel kinyabe. Allah arye wibuka delilul ninyeuk, el mapu kopropa unyake. Tonda, Allah arye Isak wiamuk touk, anyapnusin yupu ton aulule. Isak arye el kil Ribka dobukce, aminyan talak akil arye kwa bitinye mapu deibuk. Amapu bitinye ara, sik ni kopropa ara tonok, Isak ulamuk. Isak bira, Israel ninye nun apu kopropa ati nyapsine.

^11-12 Ribka birye akwa bitinye mapu min kum deiamuk talak ara, Allah arye, ‘Minop talak narye, amapu bitinye ati, tenyamsi touk unamdak’ tenen, akil Ribka ati ayupu nyabuk. ‘Allah arye, “Kwa bitinye mapu deipnalama ara, minyuma deipkwetepnalam mi ara, aminyan deipkwetepnalam mi, el amutamuk pia unamle. Aminyan deipnalam mi ara, deiyok ning talibuka weiknye unamle. El du kopropa ara, weitnye el amutamuk unamle,” Allah arye nyabuk.’ (Kejadian 25:23) Allah arye Ribka ati, ayupu nyabuk talak ara, akwa mapu min kum deibuka ati, sikce teleb winina ap, malye winina ap, min kum winiprik. Bukni, Allah arye tenyamuk touk nyabuk. Tonok ning babye min kum winiprik bukni, Allah arye, ‘Winipnamne,’ tenyamuk touk, Yakup ati wipdeibuk. Wini talak babye, Allah arye wibuka delilamle touk, aninguk unamle. Tonda, ninye arye sik ulamak ning deice arye kum bukni, yukupsilirye, wilisilya deiyoknye, Allah arye tenesilye touk unamle. ‘Anirya ara na tenyamsi touk unamle’ tenen, Allah arye ayupu nyabuk.

¹³ Ayupu nyabuk touk, Allah yupu yuk buku noutamak, Allah arye nyapdeibukba, aminyan winipnamuk ning ati, Allah el yupu laka nyananye, nabi Yesaya birye ayupu ton sekuk. ‘Allah arye nyabuk, “Ribka birye aminyan deipkwetebuk mi Yakup bira, na kanye deipse bukni, du deipkwetebuknye Esau bira, na like tenenune,” Allah arye nyabuk.’ (Maleaki 1:2-3)

¹⁴ Ura, na kwit capu. Arup nyapmasin yupu aupsuka ati ara, nunce yata yupu nyaptibye do? Nun tukwak nang arye, “Se, Allah arye tenelye touk, ton nang ati kanye delilul bukni, yuk nang ara batakalule. Ati nunce Allah ati, malye ulule,” nyabuka, malye nyaptibye do? Kume, Allah arye malye kum winipmantonye anya arye, aning kum nyaptibye.

¹⁵ Nunce, “Allah malye ulule,” nyabuka Allah ati, el nong deice, malye yupu kum nyaptibye nyapmasina deiyok ara ani. Ara, Allah arye Musa ati nyabuk yupu ani. ‘Allah arye, “Kume, tukwak mutuku tam noutamak unyak ninye nirya ara, talye oploptinye bukni, ton nang ara sik malye wininyak ning ati namin biknirye, kum kibuka delinune. Ton nang ara, wenebuka oltakanune. Aning atonun, na tenenye touk, ton ninye ati bico tenebuka melinune. Tonda, im sirya, mutuku sirya nirya unyak ninye noutamak arye, kume, ton ninye ara wipnirye yupu lipsisikuka bokolina deiyoknye na uka,” Allah arye Musa ati nyabuk.’ (Keluaran 33:19)

¹⁶ Allah arye, ayupu nyabuka deice arye kel kinyabe. Allah elcuk bokuka wisilirye, elcuk, ‘Aninye kum oplopnamne’ tenen, bico tenebuka, nun malye ning namin kisilya deice aryuk wilisulule. Ninye sik kanye aryuk patalyeba, pil dobica deice arye, eipsilirye, kum wilisulule. Allah aryuk bico tenesilya deice arye, wibuka lyelosulule.

¹⁷ Ayupu nyapmasin touk, winipmanto ning ton ulamuk. Ara, minop talak Mesir mutuku talyamuknye el si Firaun, elce Israel ninye talyamukce, yanibuka malye ulamukba, Allah arye elti, nyabuk yupu ara, Musa birye sekiamuk. Ayupu ara ani. ‘Allah arye nyabuk. “Firaun anda, narye erebuka deipkisa deiyok ara, nyapnukine. Ara, ‘Na mikipnye ununa deice arye, anti opbisipkenyopura, ninye mutuku-mutuku nirya kekebikirye, ilil upliba, na Allah si ati, pia erenamniyake’ tenen, an wibuka erepdeipkise,” Allah arye Firaun biti nyabuk.’ (Keluaran 9:16)

¹⁸ Allah arye ayupu nyabuka ati ara, nun kele. Allah el kanye aniryuk tenesilye touk, ton ninye ara, oltakana kumce, bico teneplirye, melibuka lyesulule. Bukni, el tenelye touk yuk ninye ara, ‘Sik kanye talima kat unamle’ tenen, kunukna deiyok ning arilirye, ‘Aninye sik talima kat unamle’ tenen, kunukna ning arilirye, aninye sik talima kat kililule.

Allah el yu arye wenebuka osulul ning ap, bico tenebuka lyelosulul ning ap ati nyabuk yupu

¹⁹ Ura, ‘Allah arye ton ninye lyelul bukni, ton ninye ara oltakalule,’ nyapmasin yupu ara, ikin deice arye kekenyapa anya arye, tonoknye birye, na Paulus ati nyapnutue. “Kume, Allah elcuk, ‘Anang lyepnamne, anang ara wenebuka opnamne,’ tenesilye touk, yupu bokuka wilisulule. Ati ara nun malye winin ning ati, yata ati tuba yupu bokolisululce wenesulul do? El tenelye touk pia ululnye anya arye, tukwak mutuku noutamak ara, yata nang arye, el yupu sektibye do?” nyabuka asipdenutume.

²⁰ Aning asipdenutum bukni, anggunti tamubuka nyapsine. “Kume, anggunda talye tukwak ninye ululuma anya arye, Allah ati yata wiribuka, asipdetumce, elti, wenena yupu nyaptum do?” Nabi Yesaya birye sekeiamuk touk, ayupu dobuka, anggunti nyapsine. Elce sekuk yupu ara ani. ‘Allah arye kwepdeibukba, talye aulul ning aning-aning nirya arye, aning-aning nirya kwepdeiamuka deiyoknye Allah ati, “Anda yata ati, na unye touk kwepdeiamnulm do?” nyabuka, weneptu do? Kume, aning ara kum winipmantoe.’ (Yesaya 29:16)

²¹ Aning atonun, na Paulus birye winipmanto yupu ton nyapnusine. Ara ngatukutilibuka, dina yuna memena deiyoknye birye, tonok tuku doproplirye, bokuka ton tam ning ara, urasin pia teleb mambul ning kibuka, teleb ubuka deiplirye, uku dongopliba miklirye, kat ulule. Bukni, atuku telebuka noutamak bokuka ton tam ara, talye ninguk tilibuka kumulilule. Atonun atuku noutam akuk, ton tam ning ara, batakalule. Elda, tuku pinina deiyoknye birye tenelye touk winilule. Atuku tilina ap, apil dona ap, deiyoknye ulula anya arye, el tenelye touk winilule.

²² Ura, Allah arye tenelamuk touk, ‘Ninye nirya, na yu unilye ning ap, na mikip weik unilye ning ap, na wininye ning nirya ap kel kipnamniyak’ tenen, malye winin ning ap, malye winin ninye ap ati, malye kanye bomturye, el weik mikip deice arye, adiparyuk oltakalamtue. Akunum oplomtu bukni, Allah arye, ‘Minopce wenebuka kum oplopnun’ tenen, namin asa arye namin kibuka dinauk ulamuk. Winibuka ulamuka ati ara, tukwak ninye kan-kan arye, yatanye birye Allah ati weneptu do?

²³ Kume. Nun tukwak unyap ninye nirya ati, adiparyuk oplopsutu bukni, minop talak ara, ‘Aninye ati, sik malye ning namin kipnirye, namin arye unamne. Winipnyopura, na pia telebnye unye ning, eibuka kel biknamniyake. Sirya talak ara, aninye ereipnirye, pia teleb kipdeipniba, sik ap na ap neika unmabe,’ tenyamsuk. Utenyamsuka ati, adiparyuk wenebuka kum oplomsuke.

²⁴ “Ereipnirye, teleb kipdeipniba, sik ap, na ap neika unamabe,” nyabuka, Allah arye yukupsuk ninye ara, nun Israel ninye kan-kan ap, anggun Roma mutuku ululum ninye, Yahudi yala kum ninye kan-kan ap ati nyapsine. Ara, Allah arye akunum yukupsuk ninye umunya ati nyapsine.

²⁵ Allah arye, ‘Na mapu unamak’ tenen, anggun Roma mutuku tam ululum ninye ati yukupsuka ara, aminyan winipnamuk ning laka nyalamuknye, nabi Hosea birye minop talak anggunti, ayupu sekeiyamsuk. Ayupu ara ani. Allah arye nyabuk. “Na mapu kopropa kum unyak ninye bukni, aminyan talak aninye ati, ‘Anggunda, na yala ninye kopropa unamlulume,’ nyanamne. Tonda, aninye ati, min kum arinirye, bico kum tenesinun ninye bukni, aminyan talak, narye anggunti, ‘Talima arepniliba, bico tenesinune,’ nyanamsine,” Allah arye nyabuk. (Hosea 2:23)

²⁶ Aning atonun, nabi Hosea birye ayupu ton sekamuk. ‘Allah arye nyabuk. Anyapnusin ning ara, dipkoprop nong upnamle. Ton nang arye, yuk mutuku ninye ati, “Anggunda, Allah el mapu kopropa kum ululume,” nyalamik ninye ara, aminyan talak amutuku ninye ati, “Wini talak anggunda, kam una Deiyoknye Allah, el mapu kopropa ululume,” nyanamake.’ (Hosea 1:10)

²⁷ Ura, yuknye, Allah el yupu laka nyalamuknye, nabi Yesaya birye Israel ninye ati, ayupu sekamuk. ‘Laut mekwen kup-kup arye, keil wenenga pia weik uliba ninye arye wibuka, nukmanto kum ulamak touk, Israel ninye arye delilamikba, dadeipdanin yangalamik mapu ara, yupa weik unyak bukni, aninye noutamak, Allah arye ninye mitik tonunuk wibuka lyepnamle.

²⁸ Aning ara talye kum nyapsine. Ara, Allah arye tukwak ninye im sirya, mutuku sirya nirya ati, minopce wenebuka, yupu lepsisikuka bokeipsilirye, sirya daknamsile. Ati, Israel ninye kan-kan noutamak arye, ninye mitik tonun dem wibuka lyepnamle.’ (Yesaya 10:22-23)

²⁹ Ura, nabi Yesaya birye minop talak nyalilamuk touk, akunum upsile. Elce nyabuk yupu ara ani. “Aning-aning nirya talibuka deice tam mikip weik ululnye Allah arye, nun yala ninye mitik anun arye bokuka, ‘Na’ tenen, ninye kum wipdeiamsutoura, nun ayala ara akunum kum ulamtibye. Nunda, Sodom mutuku ninye ap, Gomora mutuku ninye ap nirya, weik arye wenebukce, obuka sirya dakamuk touk, akunum obuka sirya dakamsutu bukni, nun yala ninye ara, mitik anun arye na tenen deiamsuke.” (Yesaya 1:9)

Israel ninye arye Yesus ati, diba kum tenelamik ning ati, nyabuk yupu

³⁰ Na kayapo. Arup nyapmasin yupu nirya ara, yata nyaptibye do? Kume. Sik Yahudi yala kum ninye ara, ‘Allah el diksukum winilul touk, nun babye diksukum winin ninye unamabe,’ kum tenelamik bukni, Allah arye sikti, diksukum un ninye akunum kipdeibukba, el mapu kopropa akumum unyake. Diksukum winina deiyok ning doprobik ning ara, sikce teleb asa ubuka ulamika deice arye kum doprobik bukni, Allah ati dib tenyamika deice arye, el kanye aryuk sikti, diksukum winina deiyok ning aribukce, sikti, teleb ninye kipdeibuk.

³¹ Bukni, sik Yahudi yala ninye ara, ‘Nunce Musa sekeiyamsuk yupu talibuka ulamibirye, moubuka dobolbalamibya deice arye, Allah arye diksukum ninye kipdeipnamsile’ tenen, pia pirilelamik bukni, winipmanto kum ulamika ati, diksukum winina deiyok ning kum dolamik diparyuk ati, wini talak babye, talye urdemuk unyake.

³² Sik Yahudi yala ninye ara, deiyok yata ati, diksukum una deiyok ning kum dolamik do? Kume, sikda, ‘Nuncuk pia pi dobuka, teleb pil weik dobibya deice arye, Allah arye diksukum ninye kipdeipnamsile,’ tenelamike. Sik Israel ninye ara, ‘Nun dib tenebibya deice arye, diksukum ninye kipdeipnamsile,’ kum tenelamike. Allah yupu noutamak domon yupu deice arye Yesus ati, “Ninye yan dum dukne keil atonun ulule,” nyabuk ning ara, ayupu nyabuk touk, “Yahudi yala ninye, sik akeil arye yan dum dukukba, kote sakuka obuk,” nyapsine. Ayupu nong ara, sik Yahudi yala ninye arye Yesus ati, diba kum tenelamika ati nyapmasine.

³³ Nabi Yesaya birye sekamuk yupu ara, ani. ‘Allah arye domona yupu deice nyabuk. Anggun moubuka dipdelulume. Sion mutuku bana ati, bisik noutamak ara, yan dum dukne keil deipne. Ninye arye talye luparabuka bakiba, akeil deice arye, sik yan dum dukliba, kote saknamake. Bukni, abisik noutamak deipnamnanye bira, pia diksukumnye unamla anya arye, elti, diba tenebice ninye nirya ara, na Allah arye dipkoprop lyepnamna ati, alye pia kum dakdanamake. Aning ara, nong upnamle anya arye, sikce nati diba tenebikcopura, aminyan talak, ‘Se, nunda talye ninguk diba tenelamupu’ tenen, sik talima pia boktoplirye, kum uk dinamle. Dipkoprop na Allah arye aninye lyepnamne. Ati, aninye ara alye pia kum alye dakalanamake.’ (Yesaya 28:16)