Roma 8 - Eipomek

Allah El Dib Kanye arye nun talima talisilya mikip arisiliba, el ap neika unyaba ati nyabuk yupu

¹ Ura, na kayapo, weik mambul yupu ara nyapnusine. Yata ninye do nirya, Yesus Kristus ati diba tenebikirye, el ap kanye talima dukdongobuka neika unyak ninye nirya ati ara, Allah arye, “Anggunda malye winilulume,” nyabuka kum wenepnamsile. Yesus ap kanye talima dukdongobuka unyak ninye nirya ati ara, Allah arye, kum bataknamsile.

² Allah arye wenebuka kum oplopnamsile nyapmasina ara, talye ati kum nyapsine. Aning deiyok ara nyapnusine. Ara, Yesus Kristus pil dopsuka deice arye, Allah El Dib Kanye arisiliba, el melisilya deice arye, dipna ap, malye winina deiyok ning arye, tapu kouamsuka noutamak arye, loltakasulule. Ati, aminyan ara el ap bokuka yuk-yuk kum unamabe. Kum dipnamap bukni, el ap neika pia kamuk unamabe.

³ Ura, Allah arye, “Aning ara wininamlulume, aning ara kum wininamlulume,” nyapdeibukba, Musa birye sekeiyamsuk mem yupu aupsuk bukni, nun tukwak ninye nirya, nun kanye talima pum tam malye una deiyok ning aupmasiliba, nun mikip ninye kum ati, amem yupu talibuka diksukumuk winipmanto kum unyabe. Ayupu talibuka kum dobolbitibye. Tonda, nun bidamang, kum lyepdatibye. Nun bidamang aryuk kum lyepdanmanto bukni, Allah el kanye aryuk el Mi Kopropa dopdeipsukba, ninye nong atonun kibuka yayuk. Allah el Mi Kopropa dopdeipsuk deiyok ara, ‘Ninye sik malye wininyak ning ati lyeplirye, kum daneipnamle’ tenen, dopkwetepsuk. Nun malye wininyap ning ati, talye luparabuka wenepsuturye, oplopsutu bukni, nun malye winin ning kilina ati, Allah arye Yesus arepsukba, yu nang arye obik. Kristus obikba el dibuka deice, Allah arye ninye nirya, nun malye una deiyok ning nirya wenebuka oltaka atonun upsuke. Yesus dibuka deice arye, malye una deiyok ning ara akunum malye kibuk. Yesus ati diba tenebibyopura, malye una deiyok ning arye, kum tapu koupsutue. Yesus dibuka deice arye, malye una deiyok ning akunum malye kibuka ati nyapsine.

⁴ Yesus dibuka deice arye, malye una deiyok ning akunum malye kibuka deiyok ara nyapnusine. Ara, Allah el kanye ara, ‘Tukwak ninye nirya arye pia diksukumuk unamake, tenyamse ning ara, kum winipmanto unyaka anya arye, Yesus pia diksukumuk unmalyani, aminyan talak malye nang arye obikiba, dipnamla deice arye, tukwak ninye sik malye una deiyok ning nirya adiparyuk wenepnirye, kum kibuka deipnamne,’ tenyamuk. Nun malye una ning ati, nun bidamang aryuk kum malye kiptibye. Ati, Yesus pil dopsuka deice arye, malye una deiyok ning kum kilina pil akunum sirya daksuke. Allah arye nun lyena ati, aning nirya pil dopsuka deiyok ara nyapnusine. Ara, Allah arye, ‘Ninye kanye talima pum tam malye una deiyok ning arye talilulba, kum wininamak bukni, na Dib Kanye el mikip deice melilyeba, sikda diksukumuk wininamak,’ tenyamsuke. Utenyamsuka deice arye, Kristus arepsukba, lyepsuke. Ati wini talak nun diba tenenyap nang ara, nun talima pum tam malye un ning aupmasilya babye, aning deice arye kum unyabe. Nunda Allah El Dib Kanye mikip deice arye melisilyeba, telebuk unyabe.

⁵ Yata ninye do nirya, sik talima pum tam malye winina deiyok ning tuba auplyeba, amalye winin ninguk tenebuka, malye-malyeuk wininyake. Aninye ara, amalye ning ati, tenenauk unyakce, malye winin ninguk patalyeba, pia malye wininyake. Aninye wininyak bukni, yata ninye do nirya, Allah El Dib Kanye arye, nun talima pum tam usilirye, nyasilye ning uk, kekebibirye teleb kibuka wininyap ninye ara, Allah El Dib Kanye arye tenesilye ning ati, tenenauk unyabe. Winibuka tenebibirye, diksukum ning uk, talibuka teleb winin ninguk wininyabe.

⁶ Yata ninye do nirya, Allah El Dib Kanye arye sik kanye talima talipliba, el patalul touk tenebuka unyak ninye ara, kanye deibuka telebuk ulamica ani, aminyan talak dibica babye, Allah ap neika kam pia unamake. Bukni, sik malye ninguk talibuka wininyak ninye ara, amalye winin ninguk tenebuka winilamica ani, aminyan dibicopura, Allah ap neika pia kum unamake.

⁷ Sik malye ninguk tenebuka, malye wininyak ninye ara, sik kanye tenen ning noutamak arye, Allah el winilul ning nirya ati, yanibikirye, batakanauk unyaka ati nyapsine. Aninye ara, Allah arye ninye ati, “Teleb kibuka un ninguk wininamlulume,” nyabuka laka nyasilye yupu nirya ara, kum kekebikirye, el nyasilye yupu amu tam kum unyake. Malye ninguk tenenyak ninye ara, Allah el yupu kum kekepmanto unyake. Aninye ara, Allah el amu tam bukuka kum dobol binmanto unyake.

⁸ Aninguk kum bukni, yata ninye do nirya, malye una deiyok ning arye, sik kanye talima talilulba, malyeuk wininyak ninye ara, Allah arye aninye ati kanye pia kum delinamle ning, kum winipmanto unyake. Ati aninye ara, Allah arye kum kanye delinamle.

⁹ Sik malye ninguk tenebuka unyak ninye ara, wininyak bukni, anggun Roma mutuku tam noutamak umunce, akunum diba tenelulum ninye ara, aning atonun kum winilulume. Deiyok ara, Allah El Dib Kanye arye, anggun kanye talima pum tam akunum weksukba, kanye talima dukdongobuka ululum ninye ara, Allah El Dib Kanye arye anggun talima talisiliba, ululume. Nun babye atonun unyabe. Allah elcuk talisiliba unyaba anya arye, nun talima pum tam malye una deiyok ning awabsilya babye, aning arye nun kanye talima kum talisulule. Bukni, yata ninye do nirya, Kristus el Sambala ap neika sik talima dukdongobuka kum unyak ninye ara, dipkoprop Kristus el mapu kum unyake. Sikda, talye nanguk unyake.

¹⁰ Bukni, yata ninye do nirya, Kristus ap kanye talima dukdongobuka unyap ninye nirya ara, Allah arye nunti, “Anggunda diksukum un ninye,” nyabuka akunum teleb kipdeipsuka ati, nun dib kanya ara kam pia unamsile. Nun nong ara malye una deiyok ning upsuka ati ara, dipnamap bukni, nun dib kanya ara, kam pia aunamsile.

¹¹ Tonda, Yesus dibukba, elti, kam bukdeibuknye Allah, El Dib Kanye arye, anggun talima pum tam usilye ninye ara, aminyan talak anggun dipmunya babye, Allah arye kam bukeipnamsile. Ara, Yesus dibukba, kam bukeibuknye, Allah arye anggun diba tenelulum ninye babye, aminyan talak kam bukeipsilyeba, kam pia unamlume. Anggun kam bukeipnamsila ara, anggun talima pum tam usilinye, Allah El Dib Kanye melipsilya deice arye, kam bukeipnamsile.

¹² Aning ati ara, na kayapo, nun kanye talima pum tam malye una deiyok ning aupmasil bukni, amalye winin ning arye talisiliba, malye ninguk tenebuka kum unamabe.

¹³ Aning ara talye ati kum nyapsine. Deiyok ara ani. Ara, nun kanye talima malye ulina deiyok ning arye talisiliba, malye winin ninguk talibuka upra babyopura, dipkoprop aminyan talak dipnamabe. Bukni, Allah El Dib Kanye melisilya deice arye, malye winin ning aning-aning nirya ati, ‘Nun like,’ tenebuka batakipyopura, kam pia unamabe. Ara malye winin ning oltakana atonun unamaba ati nyapsine.

¹⁴ “Kam unamabe,” nyapmasina ara deiyok ani. Ara, Allah El Dib Kanye arye, anggun talima pum tam usilirye, “Wininamlum, wininamlum,” nyasilye touk, aninguk tenebikirye, el yupu uk kekebuka talibikirye dobolbanyak ninye ara, dipkoprop Allah el mapu unyaka ati, kam pia unamake.

¹⁵ “Allah el mapu ululume,” nyapmasina ara, urdem ati kum nyapsine. Deiyok ara ani. Allah arye el Dib Kanye arepsukba, anggun talima pum tam akunum wekuka usulula ati, anggunda el mapu kopropa akunum ululume nyapsine. Talye pil melibuka don nang arye sik deiyok nang ati, ilil weik ulamak touk, Allah arye el Dib Kanye arepsuka ara, ‘Anang ara, nati ilil weik unamniak’ tenen, kum arepsuke. Aning kum bukni, el Dib Kanye arepsukba weksuk deice arye, Allah el mapu kipdeipsuke. El mapu kipdeipsukba, el Dib Kanye pil dosilya deice, nunce Allah ati, “Nun ni,” nyanyabe.

¹⁶ Allah El Dib Kanye arye, nun kanye talima pum tam yupu nyalisilya deice arye, nun kanye bokoltona kum diparyuk, ‘Nunda, dipkoprop Allah el mapu dipkoprop unyabe,’ tenebuka kel kinyabe.

¹⁷ Aning ati ara, ayupu ton nyapsine. Nunda, Allah el mapu kopropa unyaba anya arye, el tenyamsuk touk, el talilye ning bokuka arenamsile. Allah arye el talilul ning bokuka, el mi kopropa Kristus ati arenamle touk, nun babye atonun tonap, bokuka arenamsile. Malye nang arye Kristus ati, ‘Nun like’ tenen, el nong deice ikin ning delilamik touk, nun nong deice ikin ning delisinyake. Ati, Kristus ikin ulamuk touk, nun babye atonun, ikin unyaba anya arye, wini talak Kristus weik mambulnye, pia teleb ubuka ulul touk, aminyan talak nun babye, teleb kipdeipsilyopura, el ap neika atonun, mambul weik pia teleb nang unamabe. Paulus birye, sik Roma mutuku ninye ati, nyabuk.

“Allah arye aminyan talak pia teleb kipdeipsiliba, kanye deibuka unamabe,” nyabuk yupu

¹⁸ Ura, yuk yupu ton nyapnusine. Wini talak ara, malye nang arye nunti, ‘Nun like’ tenen, nun nong deice, ikin ning weik delisinyakba, imun kanye bobuka unyabe. Bukni, na kanye ara, Allah arye aminyan talak nunti erepdeipsilirye, pia teleb unamaba ati, wini talak ikin usilye ning ara, mitik tonun mambul uka.

¹⁹ Allah arye kwepdeiyamuk ning, aning-aning nirya ara, ‘Se’ tenen, mambul kanye bobuka kintinipdeibuka dinauk unyake. Ara, ‘Se, Allah el mapu kopropa lakak kibuka deiplirye, erepliba, pia teleb kibuka unamak talak ara, dan talak upliba eipnamap do?’ tenen, kanye deibuka kintinibuka dinauk unyake.

²⁰ Pia minop talak, deiyok kouamuk talak ara, aning-aning nirya ap, dipna ap, lyuna ap, malye winina ap, kum uamuk. Bukni, wini talak ara, tukwak mutuku ulul ning aning-aning nirya ara, dipna ap, lyuna ap, malye winina ap noutam akuk ulule. Tukwak mutuku ulul ning nirya ara, talyauk ulule. Nong kum upnamle ninguk ulule. Ulula deiyok ara, Allah arye tukwak ulul ning nirya wenena ati, malye yupu nyabuka wibukba, talyauk ulule.

²¹ Wini talak ara, aning-aning nirya dipna ap, lyuna ap ubuka talyauk ulul bukni, Allah arye kwepdeiamuk ning nirya arye, ‘Se, malye ning arye tapu koupdongamsuka noutamak arye, dipna ap, lyuna ap noutamak unyaba ara, Allah arye dan talak lopdeibuka lyepsilirye, teleb kipdeipnamsil do?’ tenen, kanye deibuka kintinipdeibuka dinauk unyake. Atalak ara, Allah arye el mapu nirya ati, lobuka lyeplirye, pia teleb kipdeipnamle touk, elce kwepdeiamuk ning yala-yala nirya ap, malye winina noutamak lobuka, ila tuba tonap teleb kipdeipnamle.

²² Ura, winipmanto yupu ton nyapnusine. Ara kilapu, mi bomica ani, mi deipnamace talak deiyok uk weik dinmalyeba, ‘Se, na mi adiparyuk deiptinye’ tenen, malye kanye bobuka dolamak touk, Allah arye kwepdeiamuk ning nirya ara, ‘Se, Allah lobuka lyepsilirye, teleb kibuka deipnamsil talak ara, dan talak do?’ tenen, mi deiyok dolamaka atonun unyake. Ara, ‘Se, adiparyuk Allah arye ila tuba tonap teleb kibuka deipsutue,’ tenen unyake.

²³ Talye aubuk ninguk kum bukni, nun diba akunum tenebupuba, Allah El Dib Kanye areamsukba, nun talima talisiliba, unyap ninye babye, malye kanye bobuka mi deiyok dolamak touk, unyabe. Ara Allah arye el Dib Kanye minopce areamsuk ninye ubirye, nunce mambul kanye bobuka, ‘Se, Allah arye el mapu una ati kwaknapsuk ninye sirya dakna ara dan talak arye winipnamsil do? Nun ninye nong pununa ati, im deice nong pia teleb ning arepnamsila ara dan talak arye arepnamsil do?’ tenen, kanye deibuka kintinibuka dinauk unyabe.

²⁴ Allah lyepsuk talak arye dipdongobuka, wini talak anoutamak talak nirya ara, ‘Allah arye nun tukwak nong punupsilirye, im deice pia teleb ninguk arepnamsile’ tenen, kanye deibuka dinauk unyabe. Bukni, ‘Wininamsile’ tenen, kintinibuka dinauk ulamibya ani, aminyan talak aning akunum arepsiliba eibibyopura, akunuma. Wini talak arye dipdongobuka doryanamle talak ara, ‘Dan talak winipnamsil do?’ tenen, dinauk kum unamabe. Akunum doprobibye ning ati ara, ‘Se, dan talak arye doproptinye do?’ tenen, dilamak touk kum unyabe. Yatanye do nirya, ‘Se aning ara na doproptinye’ tenen, patalyeba dinauk ululnye bira, akunum doproplyopopura, ‘Dan talak do?’ tenen, dinauk pia unamle do? Kume.

²⁵ Bukni, nun min kum doprobupu ning ati, ‘Dan talak arepnamsil do?’ tenen, kintinibuka dinauk unamap talak noutamak nirya ara, kanye bokoltona ap, ‘Se,’ tenena ap kum diparyuk, teleb kanye bobuka, batakna kumce, pia talibuka unamabe.

²⁶ Ikin upsilya babye, kanye deibuka dinauk ulamap touk, nun mitang usiliba, mambul kanye bobuka unyap talak noutamak nirya ara, Allah El Dib Kanye arye melisulule. Ikin usilye talak, ‘Allah morona ara, teleb ning ani’ tenen, moubuka tenebibirye, kum kel kinyap bukni, nun melina ati, Allah El Dib Kanye arye melibuka Allah morosulule. Elce nun melina ati, imun kanye bobuka morosilye ning ara, ninye yupu deice arye laka kum nyaptibye. Nun melina ati ninye kum nyapmanto yupu deice arye, teleb ubuka morosulule.

²⁷ Nun diba tenenyap ninye nirya ati, Allah El Dib Kanye arye nun melina ati, melibuka Allah morosulule. Allah El Dib Kanye arye nun melina ati Allah morosulula ara, Allah arye, ‘Winibuka unamak,’ tenesilye touk, tonokuk tenebuka morosulula anya arye, Allah El Dib Kanye tenelul ning nirya ara, Allah el babye kele bikilule. Aning atonun, nun kanye talima pum tam tenepye ning nirya babye, Allah arye kel kisulule.

Kristus bico tenesilirye, melisilya deice arye, nunda malye winin ning nirya malye kibuka, un nang unyaba ati, nyabuk yupu

²⁸ Na kayapo, nun kele. Nunce Allah ati diba tenebuka, nun kanye el deiceuk delinyap ninye nirya ati ara, yata winin ning do nirya, ikin usilye ning babye, kanam usilye ning babye, Allah arye awinisilye ning nirya dobuka, nunti teleb kilisulule. Ikin ning usilye talak babye, kanam usilye talak babye, atalak nirya ara, Allah arye pil dobuka melisilya deice arye teleb ulisulule. Winibuka melisilye nang ara, talye nang ati kum bukni, Allah arye, ‘Na mapu ubikirye, na tenyamse pil teleb kibuka donamake’ tenen, yukusilirye, wibuka deilisilye ninye ati nyapsine.

²⁹ Ayupu ara talye ati kum nyapsine. Deiyok ara ani. Ara, minop talak Allah arye akunum tenebuka kel bikamsukce, ‘Sikda, na mapu unamake anya arye, aninye teleb kipdeipniba, na Mi Kopropa el teleb kibuka ulul touk, sik babye atonun unamak’ tenen, akunum wibuka deiamsuke. ‘Unamake’ tenen, wipdeiyamsuka deiyok ara ani. Ara, Allah arye, ‘Na mi kopropa Yesus Kristus ara, minyuma du mi atonunye ulyopura, el weit yapu ara, noutam mapu atonun kibuka tabaknin bakirye, weik upra banamake,’ tenyamsukce, wipdeiyamsuka ati nyapsine.

³⁰ Tonda, minop talak arye akunum wibuka deiamsuk ninye ati, ‘Na damak yalulume,’ nyabuka, nun talima pum tam yukupsuke. Allah arye yukupsuk ninye ara, nun malye winin ning kilipsukce, “Sikda diksukum un ninyeuk akunum keipsine,” nyabuka, teleb kipdeipsukba, el mapu kopropa unyabe. Diksukum teleb ninye akunum teleb kipdeipsuk nang ara, aminyan sirya talak pia teleb kipdeipsilyopura, weik arye erepdeipnamsile.

³¹ Arup talak, “Allah arye akunum teleb kipdeipsuk ning ani,” nyabuka laka nyapmasin yupu ati ara, yata yupu ton tabakuka nyaptibye do? Kume, Allah arye akunum bico tenyamsukce, nunti wipdeipsukce, melibuka pil dosulula anya arye, yatanye ap, yata ikin ning ap arye, malye kipsutu do? Aning nirya ara, malye kum kipsutue.

³² Anggun ton teneipdelulume. Allah ara, el Mi Kopropa tonokuk ulul bukni, ‘Na mi ara tonoknye anya arye, na tenen kum arepnune,’ tenena kumce, nun lyena ati, arepsuk. Ati, el mi kopropa dobuka, nun lyena ati akunum arepsuka anya arye, yatato ning do nirya, nun patasulu ning nirya bico tenesilirye, el kanye deibukap, talya demuk kum arenamsil do? Kume, nun patasilye ning nirya ara urdem arenamsile.

³³ Tonda, Allah arye nunti, “Sikda pia diksukum ninye kipne,” nyabuka akunum teleb kipdeipsuka anya arye, nunda Allah arye akunum weiamsuk ninye unyabe. Ati ara, yata nang arye nunti, “Sikda malye ninye,” nyabuka, yupu lepsisikuka bokeipsiting do? Kume. Allah arye, nunti, ‘Na ap neika teleb ubuka unamak’ tenen, “Diksukum ninye ululume,” nyabuka teleb kipdeipsuk.

³⁴ Aning atonun, yatanye birye, nunti wenebuka oplopnamsil do? Kume. Yesus Kristus arye nun lyena ati dibuk. Yesus dipsuka ara aupmal bukni, weik mambul ning ara, Yesus dibukba, Allah arye tamubuka kam bukeibukba, Yesus ara Allah el sirik taruk tam bulbiyuk. Allah el dam bul biyukce, Yesus nun melina ati, melibuka Allah ati morosulule. Aning ati ara, yatato nang arye, nunti, “Anggun malye winimunye ning ati, Allah weik arye wenepnamsila ati, el ap neika pia kum unamlume,” nyabuka wenepsitingce, yupu lepsisikuka bokeipsiting do? Kume, aning ara kum nyapsiting.

³⁵ Tonda, yata ikin ning upsutuba, Kristus bico tenesilirye, kanye talima arisilya ara, yupu seksuturye, wilibuka yuk-yuk deipsutu do? Ikin usilye ning ap, kanye imun usilye ning ap nirya ara, Yesus diba tenenyaba ati, yuk nang arye nun nong deice ikin ning delisinyak ap, din ning nirya kum upliba kwaning patana ap, baju ongolamap ning nirya kum upliba, talye nong banang una ap, opmanto ning nirya ap, malye nang arye yu tenesinyakce, ‘Ya arye opnuyabe,’ tenesinyak ning ap, anirya aupmasilya babye, Kristus arye bico tenebuka melisilye ning ara, yupu kum sekmanto anya arye, aning ara kum bisipmanto. Yesus arye pia bico tenenamsile.

³⁶ Kanye imun usilye ning tenena ati, minop talak Mazmur yupu noutamak sekamik yupu nyapnusine. Ayupu ara ani. ‘Allah anda, ‘Na’ tenen ninye unyaba anya arye, malye nang arye ‘Nun like’ tenen, tuba-tuba opmanto usinyake. Ara ninye arye talye domba basam ati, ‘Domba basam ara talye ninguk ulula anya arye, talye luparabuka optibye,’ tenenyak touk, sik malye nang arye, nunti atonun tenesinyake.’ (Mazmur 44:22)

³⁷ Bukni, na kayapo, Yesus Kristus arye nunti bico tenyamsukce, kanye talima arisilya deice arye melisulula anya arye, ikin ning ap, kanye imun ning ap awabsilya babye, el mikip arisilya deice arye malye kibuka mikip ninyeuk unyabe. Aning-aning nirya arye nunti, kum malye kipsutue.

³⁸ Aning ara talye ati kum nyapsine. Na kele, kanye teniltona pia kum diparyuk unamabe. Allah arye nunti kanye talima arilamsukce, bico tenesilye ning ara, nun Deiyoknye Yesus Kristus ap, talima dukdongobuka unyaba deice arye pia usulule. Aning ara, min kum winipsutue. Yata ikin ning do nirya arye, nun ap, Kristus ap, wilibuka yuk-yuk kum deipsutue. Dibina ap, kam unyap talak ikin usilye ning ap, im deice melin nang malaikat ap, isa mer ap, wini talak mambul usilye ning ap, aminyan talak winipnamsil ap, nirya ati mikip kibuka unamabe.

³⁹ Mikip ulul ning, aning-aning nirya ara, im deice tam ulul ning ap, tukwak mutuku amu tam ulul ning ap ara, Allah arye kwepdeiamuk ning noutamak ulul ning nirya ap, aning-aning nirya aupmal bukni, aning nirya arye, Kristus bico tenesilye ning ara, kum danipkusitinge. Tonda, Yesus ap, nun ap, wilibuka yuk-yuk kum kipdeipsitinge.