Roma 7 - Eipomek

‘Musa sekamuk mem yupu amu tam tuba kum unyabe, tenebuka kel kipnamak’ tenen, winipmanto ati, nyabuk yupu

¹ Winira na kayapo, yuk yupu ton nyapnusine. Asurat dopropnamlum ninye ara, Musa sekamuk yupu nirya kekebuka kel kilamlume. Aning ara na kele. Ati, anyapnusin yupu nirya ara, anggun kele. Allah arye, ‘Aning wininamlulume, aning ara kum wininamlulume,’ nyapdeibukba, Musa birye sekeiyamsuk mem yupu amu tam bukuka ulamice ninye ara, sik kam tuba unyak talakuk ayupu talibuka unamake. Dibicopura, ayupu tuba kum tenenamaka anya arye, ayupu amu tam pia kum unamake.

² Winipmanto yupu ton nyapnusine. Musa sekamuk yupu nyasilye touk, tonoknye birye el kil doplyopura, anye kam unamle talak nirya ara, akil el amutamuk bukuka neika pia unamrake. Musa sekamuk yupu nyasilye touk, akil arye anye batakuka yuknye ton kum doproptue. Bukni, akil domlinye akunum diplyopura, akil ara ila tuba tonap kam kil atonun ulula anya arye, yuk nang arye, akil doptinge. Ara, mem yupu nyasilye touk, ‘Ninye yuk nang tonap dona meme,’ nyalul yupu amu tam tuba kum ulule.

³ Aning ati ara, akil el akanye tuba kam ulul talak noutamak arye, anye batakuka yuknye doplyopura, yuk ninye arye akil ati, “Akil ara, malye kil ulule. El akanye batakuka, yuknye dobuka anya arye, ubula yolamak kil atonun ulule,” nyanyake. Bukni, akil el akanye akunum diplyopura, amem yupu amu tam tuba kum ulula ati, akil arye yuknye doptua babye, yuk ninye arye elti, “Ubula yolamak kil atonun ulule,” kum nyaptinge. El akanye min arye domuknye akunum dibuka anya arye, ayupu kum nyaptinge. Ayupu ara winipmanto ning ati nyapsine.

⁴ Aning ati ara, na kayapo, arup nyapmasin touk, Kristus el nong dibuka deice, Allah arye anggun ap, Yesus ap, kanye talima dukdongopsuk ati, adeice arye anggun babye diplume. Kristus dibuk talak arye Musa sekamuk mem yupu amu tam tuba kum ulul touk, Kristus ap dukdongopsuk deice arye, anggun babye amem yupu amu tam tuba kum ululume. Allah arye winipsuka deiyok ara nyapnusine. Allah arye utenelamsuke. Ara ‘Narye nyapsiba, Musa birye sekamuk yupu talibuka ulamik bukni, wini talak ara, el dibukba narye kam bukeipsinye, Yesus Kristus, elcuk sik talilulba, el amutamuk unamake. Unyakce diksukumuk kibuka winibikirye, na Allah ati, kibuka na si erenamniake,’ Allah arye tenelamsuke.

⁵ Nun min diba kum tenelamubu talak noutamak arye, nun kanye talima nirya ara, pia malyeuk ulamsuka anya arye, Musa sekamuk yupu deice, “Winina meme,” nyapdeipsuk yupu kekelamupa deice arye, malye winin ninguk patalamsuke. Ara, ‘E amalye winin ning ati ara, Allah arye, ‘Winina meme,’ nyapdeipsuk bukni, aning ara pia wininamap’ tenen, patalamsuke. ‘Awinipye ning ara, malye ulule’ tenen, moubuka tenelamubu bukni, aninguk patalamsukba, malyeuk winilamubu. Winilamupa deice arye, nong upsuk ning ara, dipna deiyok uka. Winibuka malyeuk wininyaba deice arye, nun nirya dipnauk unyabe.

⁶ Bukni, minop talak Musa birye sekamuk mem yupu amutamuk ulamamuburye, malyeuk winilamupe noutamak arye, wini talak Allah arye nunti wini talak akunum lyebuka lopdeipsuke. Ara Kristus dibuk talak ara, nun ni Allah arye Yesus ap, nun ap, kanye talima dukdongopsuk deice arye, akunum loplopsukba, Musa sekamuk mem yupu amu tam tuba kum unyabe. Ati ara, wini talak ara, Musa sekuka deiyamuk yupu uk talibuka, kum dobolbanyap bukni, Allah El Dib Kanye arye el mikip arisilirye, melisilya deice arye, Allah el winiryuk bisikuk banyabe. Winibuka akunum loplopsukba, wini talak, Allah El Dib Kanye mikip deice arye, Allah el teleb piluk nunce talibuka donyabe.

Nun kanye talima pum tam ara, ‘Malye winiptinye do? Teleb winiptinye do?’ tenen, kanye bokoltosiliba, ikin usilye ning ati, nyabuk yupu

⁷ Yuk nang arye, “Musa sekamuk mem yupu talyamupa deice arye malye winin nang kipdeipsuka ati, Allah arye mem yupu nyapsuk ning ara, malye yupu ulule,” nyapting do? Kume, aning kum nyapsitinge. Allah arye, “Aning ara wininamlulume, aning ara pia kum wininamlulume,” nyapdeibukba, Musa birye sekeiyamsuk mem yupu, kum uamtu toura, yata yupu deice arye, ‘Malye winin deiyok ning ara ani,’ tenebuka kekeptibirye, kel biktibye do? Musa birye sekamuk mem yupu deice arye, ‘Malye winin ning ara ani,’ tenen kel kiyamupe. Winipmanto ara, Musa sekamuk yupu noutamak arye ayupu ton aulule. ‘Yuk nang sik talinyak ning ap, sik wininyak ning ap ati, ‘Se, naryuk taliptinye’ tenen, patasiliba kanye talima engena pia meme.’ (Keluaran 20:17) Bukni, ayupu kum wamtopura, yata ning deice arye, ‘Aning ara malye’ tenen, kel kiyamtibye do? Kume, aning nirya babye min kel kiyamtibye.

⁸ Mem yupu deiyok ning kum wamtopura, nunce, ‘Aning ara malye’ tenen, moubuka kum kel kiptibirye, talye mankau kanye bobuka ulamtibye. ‘Aning malye winibupu,’ tenebuka, kum kel kiyamtibye. Bukni, Musa birye, “Yuk nang sik ning ati, kanye talima engena meme,” nyabuka sekamuk yupu deice arye, kel akunum kipsopura, akunuma, aning kel bikse. Aning atonun, Musa sekamuk yupu kel kiyamsa deice arye, adiparyuk na talima pum tam pia malyeuk winilamnuka anya arye, ‘Se, malye winin ning aning-aning nirya winiptinye’ tenen, kanye talima bouku sukulamnukce, patalamnuk ning nirya ara, lakak ubukba, aning nirya kel kiyamse. Mem yupu pia kum uamtu toura, aning nirya kum kel bikamtinye.

⁹ Minop talak, Musa sekamuk mem yupu kum kel kiyamse talak ara, talye mankau kanye bobuka, talya demuk ulamse bukni, amem yupu nirya peterelamnikba, kekebuka kel kiyamsa deice arye, na malye winilamse ning nirya moubuka tenelamsirye, ‘Se, na malye winilamse deice arye, dipkoprop Allah arye wenebuka opmiliba, dipnamnarya’ tenen, moubuka kel kiyamse.

¹⁰ Atalak ara, Musa arye sekamuk mem yupu talibuka dobolbanyopura, kam unamne,’ tenelamsi bukni, ayupu talibuka, kum dobol binmanto upsopura, ‘Kume, ayupu kum winipmanto unulule ati, na malyeuk wininuna anya arye, Allah arye wenebuka opniliba, dipkoprop dipnamnarya’ tenen, amem yupu deice arye kel kiyamse.

¹¹ Na kanye talima pia malye ulamnukce, na kanye talima lipdopnukba, tilila ninguk talibuka diba tenelamse. Ara, ‘Musa arye sekamuk mem yupu nyalul touk, anirya talipnirye, diksukumuk wininamne’ tenen ulamse bukni, Musa el yupu deice, na malye winilamse ning nirya lakak kipnukba, ‘Se, na dipkoprop malyeuk ununa anya arye, Allah arye wenebuka opniliba, na dipnamnarya’ tenen, kel kiyamse. Musa sekamuk mem yupu ara, teleb yupu ulul bukni, ayupu kel kiyamsa deice arye, ‘Se, na dipkoprop dipnamnarya’ tenen, kel kiyamse.

¹² Aning ati ara, Musa birye sekamuk mem yupu ati ara, “Ayupu ara malye yupu uka,” kum nyaptinye. Kume, ayupu ara, dipkoprop pia teleb yupu uk ulule.

¹³ Musa birye sekamuk mem yupu, teleb yupu ulul bukni, nara, “Dipnamne,” nyapmasina ara, Musa sekamuk yupu kel kiyamsa deice arye, malye kipdeipnuka ati, “Dipnamne arya,” nyapmasin do? Aning ara kum bukni, ateleb yupu kel kiyamsa deice arye, ‘Malye winin ning ara, dipkoprop ani’ tenen, moubuka kel kiyamse. Kel bikamsirye, ‘Se, na dipkoprop pia malinye unune,’ tenyamse. Tonda, ‘Dipkoprop dipnamnarya’ tenen, kel kiyamse. Allah arye nyapdeiamsuk mem yupu ara, teleb yupu ulul bukni, na kanye talima malye weik unulule anya arye, ateleb yupu kekelamsa deice arye, ‘Se, na dipkoprop dipnamnarya’ tenen, kel kiyamse.

¹⁴ Ura, nun nirya kele. Allah arye, “Aning ara wininamlulume, aning ara pia kum wininamlulume,” nyapdeibukba, Musa birye sekeiyamsuk mem yupu ara, el kanye aryuk kum sekamuk. Allah arye nyapdeibukba, Musa birye seklamuk ati, ayupu ara dipkoprop teleb yupu uk ulule. Bukni, nara talye tukwaknye unirye, na kanye talima nirya ara, malyeuk unulule. Malye una deiyoknye birye, tapu koulongonululce, talilulba, el amutamuk unune. Na bidamang mikip deice arye teleb kum uptinye.

¹⁵ Tuba-tuba aninguk winuna deice arye, na kanye pia walwal unulule. Aning ara laka nyapnusine. Ara, na kanye talima pum tam arye, ‘Se, ateleb un ninguk wininamne’ tenen, patanulul bukni, dipkoprop teleb ning ara, tuba-tuba kum unune. Na talima pum tam arye, ‘Aning ara malye winin ning ati na like,’ tenenun ning uk, tuba malye upra banune.

¹⁶ Ara narye, ‘Awininun ning nirya ati, dipkoprop malye winin ninguk ulule,’ tenenune. ‘Aning nirya ara na like,’ tenenun bukni, aninguk tuba winipnyopura, adeice arye akunum lakak unulule. Musa birye sekamuk mem yupu ara, teleb ninguk ulule. Deiyok ara, ‘Amalye ning winibicak’ tenen, “Meme,” nyabuka, yupu sekisulula anya arye, ayupu ara telebuk ulul bukni, nauk ara kanye talima malinye unune.

¹⁷ Na talye kanye bobuka, malye kum unun bukni, na kanye talima pum tam nirya ara, malye winin ninguk unulule anya arye, malye winin ninguk patanulula deice arye, malye-malye weik kilinululba, malyeuk unune. Aning ara na bidamang aryuk kum melipdatinye.

¹⁸ Na akunum kel kiyamse. Nara, talye tukwaknye ununa anya arye, na kanye talima pum tam nirya ara, diksukum una deiyok ning tonok ning babye kum unulule. Ayupu nyapmasina deiyok ara ani. Ara, na kanye tenenuna deice arye, ‘E, diksukum winin ninguk talibuka wininamne’ tenen, patanulul bukni, dipkoprop ning ara na mikip deice aryuk teleb un ning ara kum winiptinye.

¹⁹ Aning ara talye ati kum nyapsine. ‘Telebuk kibuka unamne’ tenen, patanilye ning ara, aupmal bukni, teleb ning kum unune. Aning kum bukni, na kanye talima pum tam nirya arye, ‘Aning ara malye winin ning ati, na like,’ tenenun ning uk, tuba-tuba talibuka malye wininune.

²⁰ ‘Aning ara malye winin ning ati, na like,’ tenenun ning bukni, pia malyeuk wininune. Winibuka wininun ning nirya ara, deiyok aupmal ning atibuk unune. Aning ara talye kum unune. Kume, deiyok ara, na kanye talima pum tam nirya ara, malyeuk unilya deice arye, malye winin ninguk tuba-tuba wininune.

²¹ Unilya ati, na kanye talima pum tam nirya ara, olana atonun unulule. Ati narye, ‘Teleb ninguk talibuka wininamne’ tenen, pia patanilye talak nirya ara, malye winin ning ati patan ning nirya babye neika unulule. Teleb winin ning ap, malye winin ning ap, na talima pum tam olana atonun unulule.

²² Ati, talye kum nyapsine. Deiyok ara ton nyapnusine. Na kanye talima pum tam ara, Allah arye nyasilye yupu nirya ati, ‘Aning ara pia teleb’ tenen, kanye delinune.

²³ Aning ara, aupmalya babye, na kanye talima pum tam unilye ning ara, deiyok yuk ning ton unulule. Aning ara malye winin deiyok ning ati nyapsine. Diksukum tenen ning ap, malye winin ning ap arye, na kanye talima pum tam nirya ara, walana ap, olana ap atonun unulule. Olaniryecopura, malye winina deiyok ning tapu koulongonilyeba, malye winin ning amu tam tuba unune. Na bidamang mikip deice arye aning nirya pia kum lopdatinye.

²⁴ Wininuna ati, nara pia imun kanye bobuka unune. Nara, weik malye wininanye bira, nauk unune. Na talye tukwak mutuku unun talak ara na nong yokuk unamne. Unmanya ani, aminyan talak dipkoprop dipnamana anya arye, yatanye birye lobuka lyepdopnutu do? Aning atonun, yatanye birye, teleb kipdeipnutu do?

²⁵ Kume, na kayapo, na kele. Na kanye talima pum tam tenenye ning nirya ara, Allah elce nyabuk yupu, diksukum ninguk pataniliba, el yupu uk talibuka, el amutamuk unune. Unun bukni, nara talye tukwaknye ununa anya arye, na kanye talima pum tam ara, malye winina deiyok ning aryuk talinululba, amalye winin ning el amutamuk tuba unirye, malye wininune. Bukni, Nun Deiyoknye Yesus Kristus ap, nun ap kanye talima dukdongopsuka deice arye, nun ni Allah elce akunum lobuka lyesulule. Ati, narye nun Ni Kopropa Allah ati, “Anda pia telebe,” nyanune. Na Paulus birye nyapsine.