Roma 6 - Eipomek

“Nun ap Kristus dukdongobuka unyap nang ara, tuba malye kum wininamyabe,” nyabuk yupu

¹ Ura, na kayapo. Ton nang ara nyanyake. “Kume, nun malye winilamububuk, Allah arye bico tenepsukce, el kanye aryuk lyepsuka anya arye, weika arye tonap bico tenepsilirye, melinamsile. Ati ara, nunda tonap tabakuka malyeuk wininamabe,” nyanyake. Nyanyak bukni, aning ara wininamap do?

² Kume. Aning pia kum wininamabe. Akunum diamice ninye arye, aning-aning nirya patalyeba kum ulamak touk, nun babye atonun malye winin ning nirya ati ara, akunum batakupa anya arye, malye winin ning ara tonap pia kum tenenamabe. Ati yata ning ati tonap talye luparabuka malye winiptibye do? Kume, nunda winiryuk talima arepsuk ninye anya arye, aning kum winiptibye.

³ Na kwit capu anggun ton moubuka kum kel kiyamlum do? Nun nirya diba tenebupuba, Yesus Kristus el si deice arye mek dongopsik deice arye, Kristus ap kanye talima dukdongopsuke. Kristus ap kanye talima dukdongopsuk deice arye, elce nun malye winilamubu ning pununa ati dibuk ning babye, nun ap dukdongopsukba, nun babye atonun dibupu. Winipsuka anya arye, malye winin ning ati ara, akunum diamice ninye arye sik talyamice ning tuba tamubuka kum dolyangalamak touk, amalye ning patasiliba tonap pia kum wininamabe.

⁴ Mek dongopsik deice arye, nunti Allah el kanye ara, nunti, ‘Aninye ara, Yesus dibukba tuku pali weibika atonun, winibake,’ tenesulule. ‘Tonda, sik Yesus ati diba tenenyak ninye nirya babye, akunum deamikba tuku lukamik ninye atonun unyake,’ tenesulule. Ati, ‘Winibuka unamak,’ tenesilya deiyok ara nyapnusine. Ara, Kristus dibukba, el Li Kopropa Allah, el weik mikip deice arye kam bukeibuk touk, ‘Sik babye minop talak malye winilamik ning nirya batakuka, winiryuk ninye atonun ubikirye, diksukumuk unamak’ tenen, Yesus dibuka deice arye, Yesus ap kanye talima dukdongopsukba, nun ap dibupu. Ara, Allah el kanye aniryuk utenesulul ning ati laka nyapsine.

⁵ Aning ati ara, nun akunum kele. Allah arye Yesus dibuk ning ap, dipmoka ani, tuba tamubuka kam bukuk ning ap, adeice arye nun ap tonok dukdongopsuke. Tonda, Yesus dipmoka ani, Allah arye kam bukeibukba, pia kam ulul touk, adeice arye nun ap tonok dukdongopsuke. Ati, wini talak Yesus kam ulul touk, aminyan talak nun babye kam bukeipsilyeba, el ap kam pia unamabe.

⁶ Akunum kel kinyabe. Minop talak ara, nun kanye tenen ning ap, talima ap, pia malyeuk wamsuk bukni, Yesus wanwanun yo deice obikba dibuka deice, Allah arye Yesus ap, nun ap, dukdongopsuk deice arye, nun min arye malye wamsuk ning nirya kum kipdeipsuke. Ara, Allah arye nun malye wamsuk ning nirya dobuka, Yesus deice deibuka ati, nun babye akunum diamik ninye atonun kipdeipsuke. Winipsuka deiyok ara ani. Ara, Allah arye nunti, ‘Kume, sik kanye talima nirya arye, malye winin ning ati mikip weik uamuk ning ara, narye malye kibuka lyepnirye loplopnamne. Aninye sik malye winilamik ning noutamak arye loplopnyopura, aminyan talak telebuk unamake. Ara, malye una deiyok ning arye, sikti, tapu koubuka deipliba, malye un ning amu tam ton pia kum unamake. Telebuk unamak,’ tenyamsuk. Ati, Allah arye Yesus dibuka deice arye, nun ap dukdongopsuke.

⁷ Malye winin ning noutamak arye lobuka lyepsuke nyapmasina ara, talye ati kum nyapne. Deiyok ara, ani. Akunum diamice ninye arye, malye ning patalyeba, kum wininyaka anya arye, nunda akunum diamice ninye atonun kipdeipsuka ati, malye una deiyok ning arye, tapu koubuka deipsiliba, malye winin ning mikip ulamuk ning amutam, tonap kum unamabe. Yesus dibuka deice arye, lopdeipsuk anya arye, aminyan talak ara telebuk unamabe.

⁸ Ura, aninguk kume. Nun kele. Kristus dibuk talak ara, Allah arye nun ap, Yesus ap dukdongopsuk ati, Yesus dibuk talak ara, nun ap dibupe. Kristus ap, nun ap neika dibupa anya arye, nun kele, Kristus pia kam unamle touk, nun babye Kristus ap kanye talima dukdongobuka pia kamuk unamabe.

⁹ Ayupu nyapmasina ara, talye kum nyapsine. Deiyok ara, ani. Nun kele, Kristus dibuk bukni, Allah arye akunum kam bukeibukba, pia kam unamla anya arye, aminyan talak ila tuba tonap kum dipnamle. Ninye dipna deiyok ning ara, Kristus ati kum malye uptue. Ati, nun kele, Kristus pia kam unamle touk, nun babye Kristus ap kanye talima dukdongobuka pia kam unamabe.

¹⁰ Yesus Kristus dibuk ning ara, nun malye un ning ap, malye una deiyok ning ap ati, kum kilina ati, like tonok talakuk dibuk. Bukni, Allah arye Yesus kam bukeibukba, wini talak kam ulirye, Allah el si kina ap, el si erena ap ati, pia unamle.

¹¹ Kristus arye ulye touk, anggun diba tenelulum ninye babye, atonun tenebuka unamlume. Ara, ‘Nunda malye winin ning nirya ati ara, akunum diamice ninye atonun unyaba anya arye, aning tonap patapsiliba, pia kum wininamabe. Aning kum bukni, nun kam unamap talak nirya ara, Yesus ap, nun ap, kanye talima dukdongopsuk deice arye, Allah el siuk erebuka, wininamabe.’ Aninguk tenebuka unamlume.

¹² Aning ati ara, wininamlulume. ‘Malye una deiyok ning malye kipsilirye, nun kanye talima talisilirye, lilosululba, malye winin ninguk patasilya deice arye, malye winibibyak’ tenen, kanye moubuka, malye winin ning nirya batakmunce, telebuk unamlume. Malye winin ning nirya, ila tuba tonap pia kum wininamlulume.

¹³ Tonda, anggun kanye tenen ning ap, anggun taruk ap, anggun nong nirya ap arye, malye winin ning aning-aning nirya talibuka kum wininamlume. Aning kum bukni, ‘Allah aryuk talinamsile’ tenen, anggun kanye talima ap, nong nirya ap, Allah ati arenamlulume. Ara anggunce anggun bidamang ati, ‘Kume, nunda akunum diamupa ani, Allah arye kam bukeipsukce, winiryuk ninye atonun kibuka, akunum teleb kipdeipsuke’ tenen, anggun nong nirya ara, Allah ati arepmunyeba, Allah arye anggunti melipsilya deice arye, diksukumuk wininamlume.

¹⁴ Wininamluma deiyok ara nyapnusine. Wini talak ara, Allah arye, “Aning ara wininamlulume, aning ara kum wininamlulume,” nyapdeibukba, Musa birye sekeiyamsuk mem yupu amu tam tuba kum ululume. Wini talak ara, Allah bico tenesilirye, el kanye aryuk el mikip arisilirye, melisilyeba, el amutamuk ululume. Ati ara, malye una deiyok ning arye, anggunti malye kum upnamsil bukni, telebuk unamlume.

“Diksukum un ninguk pia tenebuka unamlume,” nyabuk yupu

¹⁵ Ura, na kwit capu, yuk yupu ton nyapnusine. Ton nang ara nyanyake, “Kume, Musa birye sekeiyamsuk mem yupu talibuka, aning amu tam ton kum unyabe. Allah bico tenesilirye, el kanye aryuk melisilya deiceuk unyabe. Ati ara, talye kanye bobuka malye winin ning nirya, talye luparabuka uptibye,” nyanyake. Utenebuka nyanyak bukni, ayupu nyanyak touk wininamap do? Kume, aning ara pia kum wininamabe.

¹⁶ Yata ati, anggun walwal tuba ululum do? Narye nyapnusin yupu ara, anggun ton moubuka teneipdelulume. Ayupu ara, kum kel kipmaluma anya arye, kum tenelulum do? Winipmanto ning ara nyapnusine. Yata ninye do nirya, sikce yuk nang ati, ‘Anang sik nyanyak yupu kekebibirye, sik amutamuk unmabe,’ tenebice ninyeuk, anang aniryuk ninye deiyok talibuka, sik deice tam ubikirye, sikce aninye talinyakce, sik tenebice piluk arukunyakbuk, sik amu tam unyakce apiluk donyake. Aning atonun ton, malye winin ninguk tenebuka patapsilyopura, amalye una deiyoknye birye tapu koupsilirye, anggun kanye talima talisiliba, malyeuk winipra balamunya deice arye, aminyan talak dipkoprop dipnamlume. Akumopura, Allah arye nyasilye touk, ayupu uk kekebuka dobolbamunyopura, Allah elcuk talisilirye, diksukum ninye kilinamsile. Ati, malye winin ninguk talibibyopura, dipkoprop dipnamabe. Allah arye nyasilye touk, teleb ninguk talibibyopura, kam pia unamabe.

¹⁷ Bukni, narye anggunti tenepnerye, Allah ati, “Telebe,” nyabuka el si erenune. Wininuna deiyok ara ani. Ara, minop talak anggun Roma mutuku ninye ara, malye una deiyoknye birye tapu kouamsukba, el amutamuk ulamlumce, pia malyeuk ulamlume. Bukni, wini talak ara, nunce Allah el yupu peterelamsupu touk, kanye bokoltona kumce, anggun kanye talima nirya arye, adipkoprop yupu talibuka diksukumuk ululume. Wini talak ara, Allah elcuk anggun kanye talima pum tam talisiliba, el amutamuk bukuka ululume.

¹⁸ Minop talak malye una deiyoknye, Isa Mutuku Dongonye arye tapu koubuka deiamsukba, malye winin ninguk ulamluma noutamak, Allah arye lyebuka akunum loplopsuke. Winipsuka ati, wini talak ara, el amu tam bukuka, diksukum ninguk talibuka, telebuk ululume. Ati, Allah moronunye talak nirya ara, narye anggunti tenepnirye, ‘Telebe,’ nyanune.

¹⁹ Ura, winipmanto yupu ap, lakak kekepmanto yupu ap deice arye nyapmasina ara, anggun kanye talima nirya min kum wisibukba, talye nang arye tenelamak touk, tuba tenelulume. ‘Deiyok dan do?’ tenen, teneipdemunce, ‘Deiyok ning moubuka kum kel kipmunyak’ tenen, lakak aryuk nyapsine. Minop talak ara, anggun nong ap, kanye talima nirya ap ara, malye una deiyoknye biti arilamlumba, tapu kouamsuka anya arye, el amutamuk bukuka ulamlumce, malye winin ning aning-aning nirya weika arye talibuka winiprabalamlume. Minop talak ara, malye winin ninguk talibuka winiprabalamlume. Bukni, wini talak ara teleb kibuka winin ninguk talibuka wininamlulume. Ara, anggun nong ap, kanye talima nirya ap ara, Allah atibuk arepmunce, el amutamuk bukuka dobolbamunyeba, elce talinamsila deice arye, diksukum ubuka un ninguk talibuka unamlume. Winipmunyopura, anggun malye winin ning nirya kum kipdeipsilyeba, teleb nanguk ubrabanamlume. Tonda, ‘Elce diksukum ninye kipsilirye, teleb kibuka deipnamsil ca’ tenen, teleb winin ninguk talibuka ubrabanamlume.

²⁰ Minop talak ara, Isa Mutuku Dongonye arye tapu kouamsukba, el amutamuk ulamlumce, malye piluk dolamlume. Winilamlumce, Allah el amu tam buknarye, diksukum winin ning ton talibuka kum winipmanto ulamlume. Allah arye anggun kanye talima kum talyamsuke.

²¹ Atalak winilamlum ning nirya ara, ila tuba tonap teneipdelulume. Amalye winin ning aning-aning nirya winilamluma deice arye, anggun kanye talima ap, anggun winin ning nirya ap, teleb kililamsuk do, kum do? Wini talak ara, anggun minop winilamlum ning tenepmunyopura, alye dakalalulume. Aning nirya talibuka winipra balamibya ani, sirya talak dibibyopura, Allah ap neika kum uptibye. Malye ninguk pia talibuka winipmunyopura, dipkoprop dipnamlume. Malye ninguk talibuka wininyak ninye ara, sirya talak, Allah ap neika kum unamake. Sik yuk-yuk unamake.

²² Bukni, Isa Mutuku Dongonye arye tapu kouamsukba, el amutamuk ulamlumce, malye winin ninguk talibuka winilamluma noutamak, Allah arye akunum lyebuka loplopsukba, wini talak ara el amu tam bukuka umunyeba, elcuk anggun kanye talima talisulule. Allah el talisilya deice arye, teleb ulisulul ning ara nyapnusine. Ara diksukum teleb ubuka winin ning winipra balamibya ani, aminyan sirya talak ara, Allah ap neika kam pia unamabe.

²³ Aning ara talye kum nyapsine. Deiyok ara nyapnusine. Ara, nunce dengna ning dolona ati, pil dobibiba, sik pil deiyok nang arye menenga ning, yo bok arisinyak touk, malye winin ninguk tenebuka, pia malyeuk winipra balamibyopura, sirya talak ara dipnamabe. Dibibyopura, Allah ap neika pia kum unamabe. Bukni, Allah bico tenesilirye, el kanye aryuk talye arisilye ning ara, nyapnusine. Ara, nun Deiyoknye Yesus Kristus ap, talima dukdongopsuk deice arye, sirya talak ara kam bukeipsilyeba, Allah ap pia kam unamabe.