Roma 5 - Eipomek

“Yesus Kristus pil dopsuka deice arye, nun ap, Allah ap, ansinibdeipsukba, kanye deibuka kanye talima dukdongobuka neika unyabe,” nyabuk yupu

¹ Aning ati ara, diba tenebupa deice, Allah arye nun malye ning kilipsukce, lyepsuke. Lyepsukce diksukum kipdeipsuke. Nun Deiyoknye Yesus Kristus pil dopsuka deice arye, nun ap, Allah ap ansinibdeipsukba, ilil una kum diparyuk, kanye deibuka el ap kanye talima dukdongobuka neika unyabe.

² Tonda, Kristus el pil dopsuka deice arye, Allah bico tenesilirye, el kanye aniryuk melibuka tuba-tuba lyesiliba, nun lyen ning dopropbibirye, nun kanye talima bokoltona kumce, pia batakna kumce, aninguk talibuka unyabe. Yesus arye lyepsuka ara, kume kum dasutue. Aning babye, Yesus diba tenenyaba deice arye unyabe. Tonda, ‘Allah arye el pia teleb ulul ning nirya, arepsiliba, nun babye pia telebuk wininamap’ tenen, kintinibibirye, kanye deibuka dinauk unamabe.

³ Aninguk kum bukni, nun ikin ning usilya babye, kanye deibuka unyabe. Deiyok ara ani. Ara, ikin ning upsilyopura, aning arye asilesiliba, aminyan talak ara batakna kumce, pia pi dobuka, mikip asa arye pil dopmanto ninye kilisulule. Ara ikin usilye ning deice arye, mikip kilisulul ati ikin ning upsilya babye, kanye deibuka unamabe nyapsine.

⁴ Aikin ning usilye talak nirya babye, batakna kumce, pia pi dobuka pil donyapa deice arye, nun kanye talima wisisululba, teleb kibuka un ning winin nang kilisulule. Kanye talima wisipsilyopura, ‘Allah arye melipsilirye, aminyan talak dipkoprop lyepropnamsile’ tenen, kintinibuka dinauk unyabe. Aning ara kanye bokoltona kum diparyuk, dib tenenyabe.

⁵ Ura, Allah arye el Dib Kanye weika arye arepsukba, melisilya deice, Allah arye nunti bico tenesilye ning nirya, weika arye kel kipra babyeba, nun talima pum tam weik kibuka langdipnamsile. Allah arye kanye talima arisilya ati ara, ‘Allah arye dipkoprop melipsilirye, lyepropnamsile’ tenen, kintinibuka dinauk unyaba ara, talye ati kum unyabe. Allah arye dipkoprop lyepnamsila anya arye, amenyan talak ara, ‘Se,’ tenen, malye kanye bobuka kum unamabe.

⁶ Anggun ton kel kiplulume. Nun nirya ara, mikip pia kum ninye ulamubu talak, Allah el ulul ning nirya ati, yanibuka malyeuk ulamuburye, Allah el dam pia kum ulamubu. Bukni, wini talak noutamak ara Allah arye, ‘Yesus el dipnamle talak, pia teleb talak atia,’ tenyamuk touk, nun malye ulamubu ning pununa ati, Yesus arye nunti dibuk. Nun malye winilamubu ning wenena ati talye oplopsutu bukni, Kristus arye nunti dipsuke.

⁷ Ninye tukwak ninye arye, yuk nang pununa ati, ton kum dibinyake. Tonok talak ton, pia telebnye biti, ‘Opnuyap’ tenen, kintiniptingba, atelebnye el pununa ati, yuknye ton ilil pia kum kanye bopturye, “Kume, anye bira batakmunce nauk opnululume,” nyaptue. Bukni, aning atonun ning ara, weika arye ton winikiba, pia kum kekenyabe. Ninye arye yuk nang pununa ati, kum delinyaka ati nyapsine.

⁸ Bukni, nun nirya ara pia tuba-tuba malyeuk winipra yangalamupa noutamak, Kristus arye nun malye winin ning kilina ati dibuk. Allah arye Kristus arepsukba, Kristus depsuk deice arye, akunum lakak kibuka deipsukba kel kinyabe. Adeice arye, ‘Allah weik arye bico tenesulule’ tenen, kel kinyabe.

⁹ Wini talak ara, nun kele. Kristus obikba el ining biyuka deice arye, nun malye un ning nirya kilipsukba, Allah arye, “Yesus apil dobuk deice arye aninye ara, diksukum ninye ubuka deipsine,” nyabuka teleb kipdeipsuke. Aning ati ara, nun kele. Yesus ap kanye talima dukdongobuka unyaba deice, Allah arye malye winin nang nirya ati, yu upliba sikti, lepsisikuka bokeiplirye, amalye winin ninye obuka sirya daknamle talak ara, Kristus arye nun diba tenenyap ninye ati lobuka lyepnamsile.

¹⁰ Aning ara talye kum nyapsine. Kume, nun ninye nirya arye, ‘Allah ati nun like’ tenen, pia malye-malyeuk ulamubu talak noutamak arye, Allah el Mi Kopropa Yesus arepsukba, nun pununa ati dibuka deice arye, Allah ap, nun ap, teleb kibuka ansinibdeipsukce, wini talak ara Allah ap, nun ap neika uptibye. Winipsuka ati, nun kanye kum boktopsutue. Pia dipkoprop tenebuka kel kinyabe. Kristus arye Allah ap, nun ap, ansinibdeipsukce, akunum teleb kipdeipsuka ati, Kristus pia kam unamla deice arye, el ap nun ap kanye talima dukdongobuka unyaba deice arye lyepnamsile. Aminyan talak Allah arye kum bataknamsile. El ap neika pia ati unamabe.

¹¹ Tonda, aninguk kum bukni, minop talak ara, nun ap, Allah ap neikak kum upmanto ninye ulamubu bukni, Yesus Kristus dibuka deice arye nun ap, Allah ap ansinibdeipsukba, Allah ap neika pia unamabe. Wini talak ara, nun Deiyoknye Yesus ap neik kanye talima dukdongobuka upra banamap talak noutamak nirya ara, nun Ni Kopropa Allah ati kanye delinyabe.

“Ninye dipna deiyok ning ara, Adam birye benepdeibukba dakrongopsuk bukni, kam una deiyok ning ara, Kristus arye arisulule,” nyabuk yupu

¹² Ura, yuk yupu ton dukdongobuka nyapnusine. Malye una ati deiyok ning ara, tonoknye birye deiyok kibukce, ninye tukwak ninye nirya benepdeibukba, dakdongopsuke. Dakdongopsukce, wini talak ninye im sirya, mutuku sirya nirya ara, talima malye usulula ati ara, malyeuk wininyabe. Tonda, anye malye uamuka deice arye, ninye dipna deiyok ning ton yayuke. Ninye im sirya, mutuku sirya nirya malyeuk unyaba anya arye, ninye nirya dipnauk unyabe.

¹³ Allah arye, ‘Aning wininamlulume, aning ara kum wininamlulume,’ nyapdeibukba, Musa birye sekamuk yupu min kum nyapdeiyamuk talak ara, ninye tukwak nang arye malye weik winilamik. Bukni, Musa birye amem yupu min kum sekamuk talak ara, ton nang arye yuk nang ati, “Anggun malye winimunya deice arye, amem yupu yanipmalume. Deiyok ara, ani-ani,” nyabuka kum nuklamik. Ara, ‘Malye winin ning ara, ani. Teleb winin ning ara, ani,’ tenena ati, laka nyan yupu min kum uamuk talak ara, tukwak ninye arye, ‘Yanipmalum yupu ara, ani,’ nyabuka, lak kum nyalamik.

¹⁴ Allah arye nyalamukba, Musa birye sekeiyamsuk yupu min kum uamuk talak ara, ninye arye, “Malye winibice ning ara, deiyok ani. Malye winibica deice arye, ayupu yaninyak,” nyabuka lipsisikuka, teleb ubuka kum delilamik. Bukni, minyumanye Adam birye, dibuka, daupra yangalamika ani, Musa ulamuk talak noutamak nirya ara, ninye im sirya, mutuku sirya nirya, dipra yanganauk ulamik. Tonda, Allah arye Adam biti, ‘Aning kum wininamlyame,’ nyapdeibuk yupu, lakak nyabuk bukni, Adam arye ayupu yanibuk. Winibukba, atalak dipdongobuka, anoutamak ulamik ninye nirya arye, mem yupu sekuka deiamik ning ton, min kum uamuk anya arye, atalak noutam nirya ara, sikce, “Se, anggun malye winiplumce, mem yupu yanipmalum ning ara, ani,” nyabuka, kum laka nyapmanto ulamik. Bukni, sik babye malye winilamika deice arye, dipra yangalamik. Adam bira, aminyan talak doyanamuknye Yesus ati, winipmantonye ulamuk.

¹⁵ Bukni, na kwit capu. Allah bico tenesilirye, el kanye aryuk talye arisilye ning ara, yuk ulule. Tonda, Adam malye winibukce beneipsukba, tukwak ninye deice nirya dakdongopsuk ning ara yuk ulule. Adam arye winibuk ning ara, yuk, Allah arye talye aresulul ning yuk ulule. Aning ara laka nyapnusine. Tonoknye, Adam birye malye ubukba, ninye weika arye dipriyangalamika ani, nun babye dibinyabe. Bukni, pia teleb ning ara Allah bico tenyamsukce, el kanye aryuk tonoknye, Yesus Kristus talye arepsuka deice arye, ninye im sirya, mutuku sirya nirya weika arye, teleb kibuka kipripnin yangalamsukba, kam pia unamabe.

¹⁶ Aning atonun tonap nyapsine. Tonoknye Adam birye malye ubukba, ninye nirya sik deice dipna deiyok ning beneipsuk ning ara, Allah arye talye arepsuk ning ara atonun kum ulule. Adam birye tonok malye ning winibuka, Allah arye el wenena ati yupu lipsisikuka bokeibukce, nyabuk. “Adam malye winibuka deice arye ninye nirya dipnamake,” nyapdeibukba, nun nirya dibinyabe. Bukni, Allah bico tenyamsukce talye arepsuk ning ara, yuk ulule. Aning ara, tonoknye birye malye winina kume. Ninye im sirya, mutuku sirya nirya kum nukmanto, malye weik ulamik bukni, Allah bico tenyamsukce talye arepsuka deice arye, nun malye winin ning nirya kum kipdeipsukce, “Aninye teleb ninye unyake,” nyabuka, teleb kipdeipsuke. Adeice arye kam pia unamabe.

¹⁷ Ura, nun akunum kel bikupe. Tonoknye Adam birye malye winibuka, adeice arye ninye im sirya, mutuku sirya nirya dipri yangalamika ani, tuba dibinyabe. Bukni, pia teleb ning babye, akunum kel kinyabe. Ara, Allah weik arye bico tenyamsukce, el kanye aryuk talye arisilye ning akunum kintinyamsuke. Ara, Allah arye nun malye winin ning kilipsilirye, lyesulule. Elcuk, “Anggunda diksukum un ninye,” nyabuka, teleb kibuka kilisulul ning ara, akunum kintinyamsuke. Ati, adiksukum una deiyok ning kintinipsuk ning ara, dipkoprop diba tenebuka doprobice ninye ara, kam pia unamake. Ara Yesus Kristus ap, kanye talima dukdongobuka neika unamake deice arye, el mikip arisilya deice arye, malye winin ning nirya malye kiyamikirye, telebuk unamake.

¹⁸ Aning ati ara, ayupu ton nyapnusine. Tonoknye Adam birye malye ubukba, Allah arye ninye im sirya, mutuku sirya nirya ati, “Sikda dipnauk unamake,” nyapdeiyamsuk. Aning atonun, tonoknye Yesus Kristus arye, pia diksukum pil dopsuka deice arye, ninye malye winin ning kum kilina ap, ninye lyena ap, diksukum kilina deiyok ning ap kintinyamsuke. Anyapmasin yupu ati, diba tenebuka doprobica deice arye, ninye im sirya, mutuku sirya nirya noutamak arye, diba tenenyak ninye weika arye kam pia unamake.

¹⁹ Ara, tonoknye Adam birye malye winibuka deice, nun nirya benepsukce, malye winina ninye kipdeipsuka atonun, tonoknye Kristus arye, el li yupu kekebuka diksukum ulamuka deice arye, ninye weika arye diksukum un ninye kilisulule. Winisilya deice arye, Allah arye ninye weik ati, “Sikda teleb ninye unyake,” nyabuka teleb kibuka delinamsile.

²⁰ Allah arye, ‘Aning wininamlulume, aning ara kum wininamlulume,’ nyapdeibukba, Musa birye sekamuk mem yupu arepsuka deiyok ara ani. Ara, ‘Amem yupu kekebuka kel kibikirye, se nunda dipkoprop pia malye nanguk unyabe,’ tenebikirye, ‘Moubuka kel kipnamak’ tenen, arepsuke. Amem yupu aribukba, ninye nirya kel kiyamik bukni, malye ning weika arye tonap tapakrap tuba winipribalamik. Tuba tabakuka malye winipribalamik bukni, Allah weika arye tonap bico tenelamsukce, el kanye aryuk, ‘Dipkoprop ninye lyena ning talye arepnamsine,’ tenyamsuke. Malye winin ning ara, mitik weik upra balamuk bukni, Allah arye bico tenesilirye, lyesulul ning ara, pia weik upra balirye, malye una deiyok ning nirya ara, malye kibuka bisilule.

²¹ Allah arye tukwak ninye ati, weika arye bico tenelamsuka deiyok ara, nyapnusine. Ninye im sirya, mutuku sirya nirya, malye winilamika deice arye dibinauk upra yangalamika ani, malye winina ap, dipna ap amu tam ulamik. Bukni, Allah bico tenenyamsukce, Allah el kanye aryuk, “Sikda diksukum un ninye,” nyabuka, teleb kibuka delisulule. Minop talak ara, malye winina ap, dibina ap mikip weik ulamuka anya arye, ninye nirya aning amu tam ulamik. Wini talak ara, Yesus pia diksukum ulamuka deice arye, kam una deiyok ning arisulul ati ara, Allah elcuk bico tenesilirye, talye melisulul ning amu tam unyabe. Nun Deiyoknye Yesus Kristus diksukum ulamukce, mambul pil dopsuka deice, Allah arye, “Sikda diksukum un ninye,” nyabuka, teleb kilisululba, pia kamuk unamabe.