Roma 16 - Eipomek

Paulus arye el kayapo nang ati, “Telebe, nyapnamnulume,” nyabuk yupu

¹ Ura amapo, yuk yupu ton nyapnusine. Tonok kil el si ara Febe akunum diba tenebuka anya arye, Yesus ap talima dukdongobuka unyaba ati, akil ara nun weit kil kopropa atonun ulirye, mutuku si Kengkeria mutuku asik dobuka unyak mutuku noutamak diba tenebuka unyak ninye ati, Allah yupu aik talibuka melina deiyok kil atonun ulirye, melilule.

² Nun ka kil el si Febe nyapmasina deiyok ara ani. Ara, ‘Anggun Roma mutuku ninye arye akil ati, pia teleb kibuka taruk arepmunce, “Telebe,” nyabuka melinamnulum’ tenen, nyapsine. Winipnamluma deiyok ara, ani. Akil ara diba tenebukba, nun Deiyoknye Yesus ap, kanye talima dukdongobuka ulula anya arye, Allah el mapu nirya ati, sik patan ning ati, teleb kibuka melilamubuto uk, akil babye atonun melinamlulume. Tonda, akil Febe bira, yuk diba tenenyak ninye ap, na ap nun nirya ati, weika arye melyamsuka ati, elce anggun mutuku yalyopura, ‘El pataplye ning nirya ati, melibuka arepnamlum’ tenen, akil el si nyapsine.

³ Na kayapo nang, sik bitinye, Pereskila ap, el akanye Akwila ap ati, “Paulus arye teleb nyapdeisuke,” nyabuka nyanamlulume. Na ap, sik bitinye ap Yesus Kristus el yupu peterena ati, neika pil dolamubu nang bitinye ati nyapne.

⁴ Aninguk kum bukni, na opmanto ulamnik talak ara, ‘Paulus melibuka lopdeipnunam’ tenen, melipnirika deice arye, sik babye yu nang arye opmanto ubik. Ati, narye sik bitinye ati, “Telebe,” nyapne bukni, naryuk kume. Sik Yahudi yala kum ninye arye, Allah ati diba tenenyak nang nirya arye sikce na melipnirik ning ati, “Telebe,” nyanyake.

⁵ Tonda, anggun Roma mutuku diba tenelulum ninye arye, Periskila ap, Akwila ap, sik aik pum, ‘Allah yupu kekenamap’ tenen, buluyak ninye, sik diba tenenyak ninye ati, “Paulus arye telebe nyapsuke,” nyabuka laka nyapnamnulume. Tonye el si ara, Epenetus, elda Asia tam noutamak unyak ninye kan-kan arye, minyuma deiyok koubuka diba tenyamuknye anya arye, elda na kanye delinanye ulule. El ti, “Paulus arye telebe nyapdeipmakile,” nyabuka nyapnamnulume.

⁶ Ton kil el si ara Maria, anggun Roma mutuku ululum ninye melina ati, pia pi dobuka weika arye pil dolamsuke. El ti, “Paulus arye telebe nyapdeipmakile,” nyabuka nyanamlulume.

⁷ Tonda, nara Yahudi yalanye unye touk, na kayapu bitinye sik si ara, Andronikus ap, Yunias ap, yu nang arye, na ap anang bitinye ap, tapu koubuka wenena aik dongopsikba, nun neika ulamubu. Abitinye nang ati, “Paulus arye telebe nyapmasile,” nyabuka laka nyapnamnululume. Yesus arye wipdeiyamuk Rasul nang, sik 12 nang arye abitinye nang ati, si erelamik. Tonda, sik abitinye nang ara na min kum diba tenyamse talak ara, sikce minyuma Kristus ati akunum diba tenyamrik.

⁸ Tonye el si ara Amfilatus, elce nun Deiyoknye Yesus ati diba tenebuka anya arye, na kwit kopropa ulule. El ti, “Paulus arye telebe nyapkuke,” nyabuka nyapnamnulume.

⁹ Tonye el si ara Urbenus, el babye nun ap, el ap, Kristus el piluk neika donyabe. Tonda na kwit kopropa ton, el si ara Stakis ap, sik bitinye ati, “Paulus arye telebe nyapdeisuke,” nyabuka nyapnamnulume.

¹⁰ Tonye el si ara Apeles, el babye el nong deice ikin ning awamuk bukni, ‘Ikin unilya ara na like’ tenen, pil batakna kum diparyuk, Kristus ati tuba diba tenelirye, el piluk palebuka dolula anya arye, Allah arye anye biti kanye delilule. Tonda Aristobulus ap, el mapu ap, el aik neika unyak ninye nirya ap, Apeles ap sik nirya ati, “Paulus arye telebe nyapdeisuke,” nyabuka nyapnamnulume.

¹¹ Tonye el si ara Herodion, el babye, na Yahudi yalanye unye touk ulule. El ti, “Paulus arye telebe nyapkuke,” nyabuka laka nyapnamlulume. Tonda, Narkisus ap, el aik neika unyak ninye kan-kan arye, diba tenenyak ninye nirya ap ati, “Paulus arye telebe nyapsuke,” nyabuka nyapnamlulume.

¹² Tonda, kilapu bitinye Trifena ap, Trifosa ap ati, “Paulus arye telebe nyapdeisuke,” nyabuka nyapnamlulume. Sik abitinye kilapu arye, nun Deiyoknye Yesus ati, mikip asa arye pil dorurake. Atonun, na ka kil kopropa, Persis ati ton, “Paulus arye telebe nyapkuke,” nyabuka nyapnamnulume. El babye Yesus ati mikip asa arye pil dolul kil ati nyapne.

¹³ Tonda, nun Deiyoknye Yesus arye wibuka deiamukba, Yesus el pil ati pia teleb kibuka pil dolulnye Rufus ap, el lin ap, sik bitinye ati, “Paulus arye telebe nyapdeisuke,” nyabuka nyapnamlulume. Rufus el lin bira, na nin kopropa atonun ulamnukce, nati teleb kibuka melilamnuke.

¹⁴ Tonda, nun kwit capu nang sik si ara, Asinkritus ap, Felegon ap, Hermes ap, Patrobas ap, Hermas ap, nun kayapu, anang ap unyakce, diba tenenyak ninye nirya ap ati, “Paulus arye telebe nyapdeisuke,” nyabuka nyapnamlulume.

¹⁵ Tonda, Pilologus ap, Yulia ap, Nereus ap, el weit kil ap, Olimpas ap, Allah diba tenekirye, anang ap neika unyak ninye nirya ati, “Paulus arye telebe nyapdeisuke,” nyabuka nyapnamlulume.

¹⁶ Aning atonun, batakna kumce, anggun Roma mutuku diba tenelulum ninye nirya arye, elanamlum talak nirya babye, bico tenebuka, “Telebe,” nyalanamlulume. Anggun Roma ninye ati ara, yuk mutuku unyakce, Kristus ati diba tenebuka, el ap kanye talima dukdongobuka unyak ninye nirya arye anggunti, “Telebe,” nyasinyake.

‘Bita moubuka tenebikirye unamak’ tenen, nyabuk yupu

¹⁷ Amapo, winira yuk yupu ton nyapnusine. Ura, nunce Yesus el dipkoprop yupu peterepsupuba, kel kiluluma atonun ning kum bukni, yuk nang sik malye winilamaka deice arye, adipkoprop yupu yanibikirye, anggun Roma mutuku diba tenelulum ninye noutamak ara, talima wililanauk usinyake. Sikce malye updeipsikiba, Yesus el diksukum bisik teleb ubuka kum bitume. Winibuka unyak nang ati, moubuka kel kipmunce, memelonamlulume. Sik ap neika una meme.

¹⁸ “Amalye nang ati memelonamlulume,” nyapmasina deiyok ara nyapnune. Ara, sik bidamang winin ninguk tenebuka wininyak nang ara, nun Deiyoknye Yesus Kristus ati, diba tenebuka el amu tam unyakce, dipkoprop el pil kum donyake. Aning kum bukni, sik bidamang kanye aryuk tenekirye, sik bidamang patan ninguk tenebuka, malye ulisica ati nyapmasine. Anang arye yuk nang ati, “Se, anda pia telebe,” nyabuka tenepce arye talima lilona ati, namin yupu nyanyake ap, tilila yupu talye nyaltakanyak ning ap deice arye, sik kanye moubuka tenena kum, mitik walwal unyak nang arye, ‘E, aning ara dib nyapmasiak do’ tenen, atilila yupu uk diba tenenyake. Winibuka tilila yupu uk nyasinyaka ati, anang sik dam arye kwarabuka, yukak memelonamlulume.

¹⁹ Bukni, amapo, anggun Roma mutuku tam umunye ninye ara, Allah el yupu nyasilye touk, diba tenebuka, diksukumuk umunyopura, yuk mutuku nang nirya arye eibuka kel bikisinyakce, laka nyanyakba, nun ton kekenyabe. Ati narye anggunti kanye delisunune. Narye anggunti, ‘Se, winibuka unamak’ tenen, patapnile. Aning ara nyapnusine. Tonok ning ara, ‘Weik arye kel kibikcopura, teleb winin ninguk wininamak,’ tenesunune. Bitinye ning ara, ‘Malye winin ning aning-aning nirya ati ara, kum wininamake,’ tenenune. Tonda, amalye winin ninguk kel kibikirye, malye kum wininamak’ tenen, se tenenune. Ara, ‘Malye winin ning tonok ning babye kum wininamak’ tenen, se tenenune.

²⁰ Na nyapmasin touk winilamupa ani, aminyan talak ara, Allah arye Isa Mutuku Dongonye dobuka, sik amu tam deiplirye, wenepnamle. Allah arye olana ap, walana ap, ikin kanye bona ap deiyok ning nirya kum kibuka delisilirye, talye kanye bobuka teleb winina ati deiyok ning arisululnye ulule. Allah arye Isa Mutuku Dongonye dobuka, sik amu tam deiplirye, wenepnamle. Aning ara minopce upnamle. Na Paulus arye anggun Roma mutuku umunye ninye nirya ati, ‘Nun Deiyoknye Yesus bico tenesilirye, el kanye aryuk melisilye ning ara, pia arenamsile’ tenen, narye anggunti Allah morosunune.

²¹ Tonda, na ap neika pil donyamnye Timotius arye, anggun Roma mutuku ninye ati, “Telebe,” nyapsile. Aning atonun, na yala nang kopropa, sik si ara, Lukius ap, Yason ap, Sosipater ap, sik nirya arye anggun Roma mutuku ninye nirya ati, “Telebe,” nyapsiake.

²² Ura Paulus arye nyapdeipmanilba, na si Teretius taruk arye asurat sekeipmasine. Nara, nun Deiyoknye Yesus el si deice arye “Telebe,” nyapmasine.

²³ Tonda, Gaius birye na Teretius ap, Paulus ap, amutuku diba tenenyak ninye nirya ap ati, el aik buplan kukeibuka, melisilirye, nun patan ning nirya ati melibuka arisilyinye birye, anggunti, “Telebe,” nyapsile. Tonye, el si ara Erastus, amutuku unyak ninye arye yo bok bulubuka delikiba, ayo bok talibuka kalikna ap, elce bokuka arena ap ati, talibuka pil dolul deiyoknye birye, anggunti, “Telebe,” nyapmasile. Tonda, diba tenebukce, nun weit atonun ululnye, el si Kwartus birye, anggunti “Telebe,” nyapmasile.

²⁴ Ura, narye anggun nirya ati, Allah morosununa deiyok ara nyapnusine. Ara, ‘Nun Deiyoknye Yesus Kristus, el kanye aryuk bico tenesilirye, melibuka arisilye ning nirya ara, weika arye arenamsile’ tenen, narye anggunti Allah morosunune. ‘Wininamsil’ tenen, Amin nyapne.

Asurat sirya dakna ati, nyabuk yupu

²⁵ Allah el siuk weik arye erenamabe. Na Paulus arye, Yesus Kristus ninye lyena ati el laka teleb yupu dobuka peteresunune. Apeteresinye yupu deice arye, diba tenepmunyopura, Allah arye anggun kanye talima mikip kilisululba, pia batakna kumce pia talibuka unamlume. Allah elcuk mikip ulisulule. Mikip kilisululba, minop talak arye dipdongobuka, danoutam talak nirya ara, Allah arye ninye lyena ati, Yesus el laka teleb yupu ara duknyamukba ninye arye kum kekepmanto ulamik. Bukni, wini talak ara ayupu lakak kibukba, peteresinyabe.

²⁶ Ninye lyena yupu ara, minop talak Allah arye duknyamuk bukni, wini talak ara akunum laka kibuka deipsuk. Ara, minop talak arye dipdongobuka doryanamle talak nirya unamlanye Allah arye el yupu laka nyana deiyok nang nabi-nabi nang ati “Winipnamlulume,” nyalilamukba, sikce sekuka delilamik yupu nunce dobuka, peterenyaba deice arye, laka ulule. Allah arye laka kipdeipsuka deiyok ara ani. ‘Ninye im sirya, mutuku sirya nirya arye, Yesus Kristus el laka teleb yupu, ninye lyena yupu kekebikirye, diba tenebikcopura, el yupu uk talibuka dobolbanamak’ tenen, laka nyalilamsuke.

²⁷ Aning ati ara, nun Deiyoknye Yesus Kristus melisilya deice arye el ap, nun nirya ap, kanye talima dukdongobuka unamap talak noutamak nirya ara, nun Ni Kopropa Allah, pia weik Kel Kina Deiyoknye ati, el si weik arye erebuka si kinamabe. ‘Dipkoprop wininab’ tenen, Amin, nyapsine. Na Paulus arye anggun Roma mutuku ululum ninye nirya ati, “Telebe,” nyapsinarye, asukumuk deipne.