Roma 12 - Eipomek

“Anggun kanye talima ap, anggun nong nirya ap ara, adiparyuk Allah ati arepnamlulume,” nyabuk yupu

¹ Na kayapo, malye unyaba ati, Allah arye adiparyuk talye wenebuka oplopsutu bukni, weik arye bico tenesulule. Bico tenesilirye, pia teleb kibuka melisulule. Aning ati ara, minop talak Allah el si erena ati, kam ning obuka arilamik touk, ‘Anggun kanye talima ap, nong ap nirya ara, Allah ati arepmunce, diksukumuk unamlum’ tenen, mikip arye nyapsine. Wininamlum ning ara, talye yupu deiceuk nyabuka, nong bol deice atonun una kum bukni, anggun kanye talima pum tam ara, dipkopropa pia diksukumuk umunce, ‘Allah el pil dobuka, el siuk erenamnap’ tenen, unamlume. Winibuka upmunyopura, Allah arye kanye delinamsile.

² Tonda, sik diba kum tenenyak ninye arye winilamaka atonun, tuba kum wininamlum bukni, Allah arye anggun malye kanye tenen ning nirya dangupsilirye, kanye talima winiryuk ning punubuka arisilya deice arye, anggun winin ning nirya ara, telebuk wininamlulume. Anggun kanye talima winiryuk ning akunum upmasilyopura, Allah arye, ‘Wininamake,’ tenesilye ninguk, moubuka kel kinamlulume. Ara, ‘E, dipkoprop teleb winin ning ara ani. Winibibiba, Allah arye kanye deilisilye ning ani. Malye ning tonok babye kum winiplirye, diksukum winin ning ani, kel kinamlum’ tenen, nyapsine.

³ Ura, na kayapo anggun nirya ati, ayupu ton nyapsine. Allah arye bico tenepnukce, el kanye aniryuk melyamnuk deice arye nyapsine. Yata ninye do nirya, anggunce anggun bidamang kanye aryuk erelilana ara malye ati, winina meme. ‘Nara, weiknye,’ tenena kum bukni, anggunce Allah ati diba tenepmunyopura, elce diba tenen deiyok ning tabakuka areamsuka atonun, anggun kanye ara amu tam bukmunce, moubuka yuk-yuk tenelanamlulume.

⁴ Ura, winipmanto yupu ton nyapnusine. Nun nirya ara, nong tonokuk aupsuk bukni, yan ap, taruk ap, kisok ap aning-aning nirya yuk-yuk aupsuka deice arye, pil yala yuk-yuk talibuka donyabe.

⁵ Aning atonun, Kristus ap kanye talima dukdongobuka neika unyap ninye ara, yuk-yuk yala ninye weik unyap bukni, Kristus el nong tonok atonun dukdongopsukba, unyabe. Kanye talima wilibuka yuk-yuk kum unyap bukni, nong tonok dukdongobuka neika unyabe.

⁶ Allah bico tenepsukce, el kanye aryuk, ‘Anye bira apil donamnile, anye bira yuk yala pil donamnile,’ tenyamsuk touk, el Dib Kanye arye pil dona deiyok ning yala yuk-yuk arepsukba, pil yuk-yuk talibuka donyabe. Anya arye, Allah arye tonye biti, “Aminyan wininamle ning ap, na nyalinye yupu ap, laka nyana ap ati, ayupu nyapkiniba, laka nyanamne,” nyabuka, apil dona deiyok ning areplyopura, anye birye el diba tenelye touk, ‘Allah el yupu laka nyana ap, aminyan winipnamle ning laka nyana ap ati, apiluk talibuka donamle’ tenen, wibuka delilule.

⁷ Allah arye yuknye biti, ninye melina ati, melina deiyok ning areplyopura, anye birye yuk ninye sik patan ning ati, melibuka pil dolirye, unamle. Allah arye el yupu peterena deiyok ning ton areplinye birye, Allah yupu peterena piluk talibuka donamle.

⁸ Allah arye yuknye biti, yuk ninye sik kanye talima melinana deiyok ning areplyopura, anye birye yuk nang ati, sik ikin unamak talak ara, elce sik kanye talima kwa dibuka melinamle. Allah arye yuknye biti, ‘Yuk ninye sik patan ning ati melibuka arenamle’ tenen, aning-aning weika arye anye arepliba, elce adeiyok ning doplyopura, anye birye yuk nang ati, kanye deibuka sik patan ning weika arye melibuka arenamle. Ura, Allah arye yuknye biti, ninye deiyoknye unamla ati, ‘Ninye deiyok talibuka unamle’ tenen, ninye deiyok nang kibuka, talibuka una deiyok ning arepliba, anye birye, pia batakna kumce, ninye deiyok piluk talibuka, teleb ubuka donamle. Atonun, Allah arye yuknye biti, ‘Anye bira, yuk nang malye winipmakca babye, adiparyuk kum wenepnamle bukni, namin kiplirye, namin asa arye melinamle,’ teneplirye, talima namin una deiyok ning arepliba, kanye deibukap, apiluk talibuka dolirye, yuk ninye ati bico tenebuka kanye talima kwa dibuka melinamle.

“Yuk ninye ati, bico tenebuka melinamlulume,” nyabuk yupu

⁹ Ura, anggunce, ‘Yuk ninye nirya ati, bico tenebuka melinamabe,’ nyabuka tenepce arye talye yupu nyabuka, kum wininamlum bukni, dipkoprop yuk ninye ati pia bico tenebuka melipnamlulume. Tonda, malye winin ning aning-aning nirya ati, ‘Aning ara pia nun like’ tenen, bataknamlume. Malye ning tonok babye talibuka kum unamlume. Teleb winin ning yala-yala nirya ati, aninguk talipmunce kanye deibuka diksukumuk unamlume.

¹⁰ Anggunce, yuk ninye nirya ati, ‘Na weit yapu atonun unyake’ tenen, kanye talima deipdamunce, unamlulume. Pia kum batakalanamlulume. Yuk nang ati, ‘E, sikda mambul weik bukni, nara mitik mambulnye unune,’ tenemunce, yuk ninye sik amu tam umunce, aninye ati erepdeipmunce, si erenamlulume. Anggun nirya arye, anggun kayapu nirya ati, kanye deibuka si erelanamlulume.

¹¹ Atalak-atalak nirya ara, ‘Lik unilya ati, daupmalye’ tenen, talye kanye bobuka kum unamlulume. Aning pia kum bukni, anggun unamlum talak noutam nirya ara, ‘Adonamne pil ara, na Deiyoknye Yesus atibuk donamne. Nara, el pil melinanye unune,’ tenebuka el piluk donamlulume. Winipmunce, Yesus el amutamuk dobolbamunce, el piluk kanye deibuka pia donamlulume.

¹² ‘Allah arye melinamnil’ tenen, kintinibuka dinauk unamlum talak nirya ara, kanye deibuka pin-pin asauk unamlulume. Ikin upsiliba, imun kanye bopmunye talak nirya ara, ‘Se, aning ara, adiparyuk minopce kum upnutue,’ tenena kum diparyuk, ‘Aupmanilya babye, telebuk wininamne,’ tenebuka, kanye lamapdongobuka unamlulume. Allah morona ayala-ayala nirya ati ara, batakna kum arye, pia Allah moronauk unamlulume.

¹³ Tonda, Allah ati diba tenekirye, el mapu unyak ninye nirya ati, sik patalul ning kum upliba, mambul kanye bobuka ucopura, anggun talilulum ning noutam arye bokuka, aninye ati melibuka arenamlulume. Tonda, ninye asik nang nirya ap, anggun kayapo nang nirya ap ati, anggun aik buplan kukeipmunce, “Telebe,” nyabuka inilonamlulume. Aning atonun, anggun unamlum mutuku noutam yanuka unamak ninye asik nang nirya babye, teleb kibuka melinamlulume.

¹⁴ Yuk nang arye anggun diba teneplum ninye ati, ‘Nun like’ tenen, anggun nong deice ikin ning deipsikirye, malye yupu nyapsikce babye, anggunce ila tamubuka malye yupu nyana meme. Anggunce anang ati, ‘Allah arye teleb ulinamsile’ tenen, “Allah moronamsiape,” nyabuka, teleb yupu uk tamubuka nyanamlulume. Anggunce anang ati, ‘Allah arye sikti, malye updeiptue’ tenen, sik nong deice malye yupu nyabuka, kum delinamlulume.

¹⁵ Sik kanye deibuka pin-pin asa arye unyak ninye ati ara, anggun ap neika kanye deibukap unamlulume. Sik imun kanye dobuka engenyak ninye ati ara, anggun ap neika engebuka unamlume.

¹⁶ Anggun ap, kanye talima dukdongobuka tonok kanye bobuka, anggun neikauk kanye deibuka namin asa arye unamlume. ‘Nara, weiknye unune’ tenen, anggun bidamang kanye erepdamunce, kwalinauk kum unamlume. Aning kum bukni, talye bona utotoa kum ninye ap, mambul kum nang ap, kanye talima namin asa arye teleb ubuka neika unamlume. ‘Nara, pia mambulnye’ tenen, anggunce, anggun bidamang ati kanye kum erelanamlulume.

¹⁷ Yuk nang arye anggunti, ikin ning anggun nong deice deipsikirye, malye updeipsica babye, anggunce anang ati tamubuka kwang kum daknamlulume. Anang ati tamubuka malye kum kilinamlulume. Yuk ninye nirya arye, ‘E, pia teleb winina ara ani,’ tenelamak touk anggunce, ‘E, adiksukum winin ning ara, nun babye talibuka wininamap’ tenen, kanye moubuka unamlulume. Kanye bona kumce, talye luparabuka umunce, malye winina meme.

¹⁸ Yuk nang arye, anggunti, ‘Nun ap, anggun ap neika teleb ubuka kum unamap’ tenen, malye kipdeipsicopura, anggun deiyok uka. Aning ara anang anggun deice aupnamle bukni, anggun diba tenelulum ninye, anggun bidamang deice aupnamle ning nirya ara, ‘Kume, derelana ap, olana ap kum diparyuk, nun ap, yuk ninye nirya ap, kanye talima dukdongobuka namin asa arye, teleb ubuka neikauk unamap’ tenen, pia pi dobuka pirilenamlulume.

¹⁹ Na kayapo narye anggunti, pia bico tenesunune. Yuk ninye arye anggunti malye updeipsica babye, anggunce aninye ati, tamubuka kwang dakna meme. Aning kum bukni, ‘Allah arye aninye ati weneplirye, yupu lepsisikuka bokeipnamle’ tenen, lo bataknamlulume. Anggunce tamubuka kwang dakanauk kum wininamlulume. Deiyok ara, ani. Ara Allah el yupu noutamak ara, ayupu sekamik. ‘Allah arye nyabuk. “Angguncuk tamubuka kwang dakna meme. Na aryuk amalye nang ati wenebuka yupu lepsisikuka bokeipnamna anya arye, nara Kwang Dakna Deiyoknye unune,” nyabuk.’ (Ulangan 32:35)

²⁰ Ati anggunce kwang kum dakanamlulum bukni, Allah el yupu noutamak sekik touk wininamlulume. Ayupu ara ani. ‘Yuk ninye arye anggunti, ‘Nun like’ tenen, olamsice ninye ati, sik din ning pataplyopura, anggunce melibuka arepnamlulume. Atonun, sik aninye mek pataplyopura, anggunce mek kwebuka arepnamlulume. Winipmunyopura, aning winipmunya deice arye, anang ara, ‘Se, nunce malye updeipmap ning ara batakmatibye. Dipkoprop nuncuk malye updeipmabe,’ tenebikirye, alye dakaname.’ (Amsal 25:21-22)

²¹ Ati, yuk nang arye nunti malye kibuka malye kipdeipsicopura, nunce tamubuka, ‘Kwang daktibye, aninye ati malye winiptibye,’ tenena meme. Kwang dakna kum diparyuk, kanye moubuka telebuk unamlulume. Anggun teleb wininamlum ning deice arye, malye winin ning nirya ati malye kipnamle.